San Lucas 6

Chujni bakao Jesús kunchrijin na̱ trigo ngain nchaꞌon nchejugaꞌa ni

(Mt. 12:1-8; Mr. 2:23-28)

1Naa nchaꞌon nchejugaꞌa ni, Jesús ko chujni bakao bathukee na̱ thuꞌa jngi diginga trigo, ko chujni bakao Jesús kunchrijin na̱ nchín ninchjeꞌen trigo, ko ngaa raa na̱ bincheruaxin na̱ trigo ko bine na̱ nuanchjan. 2Ko thuꞌa xi fariseo banchiangi xa ngain na̱ ko ndachro xa:

—¿Unda jaꞌa ra ncheꞌe ra naa xra jikininxinꞌa sincheꞌe ni ngain thi nchaꞌon nchejugaꞌa ni?

3Ko Jesús batheꞌe ngain xa:

—¿Axra tsjeꞌa ra Xruen Ndo Dio ixin keꞌe bincheꞌe David kunixin kain xi bagakao are binthegeꞌen na̱ jintha? 4David bixiꞌin ninguꞌe Ndo Dio, ko jeꞌe ko kain ni bagakao bine na̱ niuthja banchendusen na̱ ngain Ndo Dio, thi niuthja bikininxinꞌa rujine na̱ ko jeꞌo xi daana bekininxin bane xa niuthja mee.

5Kai ndachro Jesús ngain xa:

—Jaꞌan, thi Xii juixin ngajni, kai chunda juachaxin ngain thi nchaꞌon nchejugaꞌa ni.

Thi xii ndadixemadoꞌo naa raa

(Mt. 12:9-14; Mr. 3:1-6)

6Inaa nchaꞌon nchejugaꞌa ni, Jesús bixiꞌin inaa niꞌngo ko kuexiꞌin binchekueꞌen chujni ixin Ndo Dio. Ko nthi̱ꞌa̱ tajii naa xii ndadixemadoꞌo raa xa, rajian. 7Ko xi tjaago ley ko xi fariseo tatetsayeꞌe xa Jesús ixin sikon xa asinchexrueꞌen xii mee ngain nchaꞌon nchejugaꞌa ni, ixin jamee ruchunda xa thi rukjangixin xa Jesús. 8Aro Jesús ubenuꞌe keꞌe texraxaon xi tjaago ley ko xi fariseo, ko jeꞌe ndache thi xii ndadixemadoꞌo raa:

—Dingathjen ko dariꞌi ngusine.

Ko thi xii bingathjen ko beꞌe ngusine. 9Kuthimejan Jesús ndachro:

—Jaꞌan sanchiangiꞌa ra: ¿Keꞌe jikininxin sincheꞌe ni ngain nchaꞌon nchejugaꞌa ni? ¿Asincheꞌe ni thi jian o sincheꞌe ni thi jianꞌa? ¿Atsjengijna ni na̱ ixin senꞌa na̱ o nasuenxin ni na̱?

10Ko Jesús tsjeꞌe ni tendajin jeꞌe, ko ndachro ngain thi xii:

—Thinxe raa.

Ko thi xii kuinxe raa ko takuxrueꞌen ra. 11Aro xi fariseo ko xi tjaago ley anto bintheguñao xa ko kuexiꞌin xa banchiangiꞌi choo xa ixin keꞌe sincheꞌe xa ngain Jesús.

Jesús kuinchieꞌe thi theyoo chujni bakao

(Mt. 10:1-4; Mr. 3:13-19)

12Ko are mee Jesús sakjui ngagaꞌa naa jna ixin runichjee Ndo Dio, ko nguii thie mee kjuao ndo. 13Are bingasaan, jeꞌe baye̱e kain chujni baruee ko kuinchieꞌe theyoo na̱, thi ni jeꞌe binchegiꞌin apóstol. 14Ko jaꞌin diꞌin na̱: Simón, thi jeꞌe banchegiꞌin Pedro, Andrés xan choo Simón, Jacobo, Juan, Felipe, Bartolomé, 15Mateo, Tomás, Jacobo xeꞌen Alfeo, Simón, naa thi baruee ni baketukaꞌo ni romano, 16Judas, xan choo Jacobo ko Judas Iscariote, thi tsjaago ixin rutse na̱ Jesús.

Jesús kjuague tsjé chujni ixin Ndo Dio

(Mt. 4:23-25)

17Jesús xinkanjinxin ngagaꞌa jna kunixin ni theyoo ko tabinthe na̱ ngataon naa jngi. Ko xrathe tsjé chujni juixin nguii nunthe Judea ko rajna Jerusalén ko ni juixin nguii ngandeꞌe ndachaon ngain rajna Tiro ko Sidón. Kain chujni mee kunchieꞌen na̱ ixin rukiꞌin na̱ thi nichja Jesús ixin Ndo Dio ko ixin rukuxrueꞌen na̱ ixin kexeꞌo chin techunda na̱. 18Thi ni binthechunda espíritu jianꞌa kai kuxrueꞌen na̱. 19Kain chujni binao na̱ kathe na̱ Jesús, ixin jeꞌe banchexrueꞌen kain chujni kunixin juachaxiin Ndo Dio.

Thi renthe ngathexin kon Ndo Dio

(Mt. 5:1-12)

20Kuthimejan Jesús tsjeꞌe chujni bakao ko ndachro ngain na̱:

—Ndo Dio sinthanchaon ra jaꞌa ra xro nua ra, ixin jikininxin ra ngajni, thi thetuꞌan Ndo Dio.

21’Ndo Dio sinthanchaon ra jaꞌa ra xro jai deꞌen ra jintha, ixin kuthimejan jaꞌa ra tsujaꞌa ra.

’Ndo Dio sinthanchaon ra jaꞌa ra xro jai tsjanga ra, ixin kuthimejan jaꞌa ra tsjano ra.

22’Ndo Dio sinthanchaon ra jaꞌa ra are chujni tsuñao na̱ ngajin ra ko sengi ra na̱, ko are chrjuinꞌa runichja na̱ ixin jaꞌa ra ko runichja na̱ jianꞌa ixin jaꞌa ra ixin dithikaon ni ra jaꞌan, thi Xii juixin ngajni. 23Are jamee tsuꞌan ra jaꞌa ra chaꞌa ra ko anto chrjuin tunuꞌa ra, ixin ngajni ruchunda ra naa thi jian. Ixin xrajeꞌo bincheꞌe ni ndo dachriꞌi na̱ xrachrjen ngain kain ni bagayee juajnee Ndo Dio are saꞌo.

24’Aro anto tangi tsuꞌan ra jaꞌa ra xro chunda ra tsjé tumi, ixin jaꞌa ra uchaꞌa ra nthiꞌi ngataꞌa nunthe.

25’Anto tangi tsuꞌan jaꞌa ra xro nthe ra jian, ixin kuthimejan jaꞌa ra seꞌen ra jintha.

’Anto tangi tsuꞌan jaꞌa ra xro tjano ra jai, ixin kuthimejan jaꞌa ra rutsjanga ra ko sinthechiꞌin ra.

26’Anto tangi tsuꞌan jaꞌa ra xro nthaxruxiꞌan ra ixin chujni runichja na̱ jian ixin jaꞌa ra, ixin xrajeꞌo bincheꞌe ni ndo dachriꞌa ra xrachrjen are banchesayeꞌe na̱ thi chujni nduaꞌa banichja juajnee Ndo Dio are saꞌo.

Jesús ndachro ixin ruthjueꞌe ni chujni ningakuꞌen ni

(Mt. 5:38-48; 7:12)

27’Aro jaꞌa ra xro tethiꞌin ra, thiꞌin ra thi rundathjo ra: Thjueꞌe ra chujni ningakuꞌan ra, ko ncheꞌe ra jian ngain thi chujni tuñao ngajin ra. 28Ko nchetseꞌen ra ñao Ndo Dio sinchenchaon thi chujni nichja jianꞌa ixin jaꞌa ra, ko nchetseꞌen ra ñao ndo ixin thi chujni thengaꞌa ra reka. 29Ja̱ chrujan chujni ruxrangiꞌa ra naa raa ngakon ra, dithuaxin ra ruxrangiꞌa ra inaa raa. Ja̱ chrujan thi santsjaꞌa ra thi tetsii ra, dajon ra kai thi tengaꞌa ra. 30Ko kexeꞌo chujni sanchiaꞌa ra thi techunda ra, chjeꞌe ra na̱, ko are santsjaꞌa ra na̱ thi techunda ra, idanchieꞌa ra na̱. 31Ncheꞌe ra ngain chujni inchin rinao ra sincheꞌe na̱ ngajin ra.

32’Ja̱ thjueꞌe ra jeꞌo chujni thjuaꞌa ra, ¿keꞌe jian tencheꞌe ra? Ixin thi chujni ncheꞌe jianꞌa, kai jañaa ncheꞌe na̱. 33Ko ja̱ jeꞌo ncheꞌe ra jian ngain thi chujni ncheꞌe jian ngajin ra, Ndo Dio nchexruxinꞌa yaa, ixin kai thi chujni ncheꞌe jianꞌa ncheꞌe na̱ jañaa. 34O ja̱ nchekjen ra tumi jeꞌo thi chujni nchao tsjengaꞌa ra ꞌna, Ndo Dio nchexruxinꞌa yaa, ixin thi chujni ncheꞌe jianꞌa kai nchekjen na̱ tumi ngain icha chujni ncheꞌe jianꞌa, ixin chunthia na̱ ruxengeꞌe na̱ ꞌna. 35Jaꞌa ra rugunda ruthjueꞌe ra chujni ningakuꞌan ra ko sincheꞌe ra jian ngain na̱, ko nchekjen ra na̱ thi chunda ra ko xraxaonꞌa ra ixin sacha ra. Ko jamee ngajni ruxengaxin ra ꞌna icha jian, ko jaꞌa ra rukjan ra xeꞌen Ndo Dio, ndo thjen ngajni. Ixin Ndo Dio kai dajon ndo tsjé jian ngain chujni jianꞌa ko ngain ni xruꞌin nchaꞌon banchesayeꞌe na̱ ndo. 36Thiakunueꞌe ra icha chujni, jañaa inchin Ndudaa ná, ndo thjen ngajni, thiakunueꞌe ndo kain chujni.

Ncheꞌa ra jie̱ thi nichja ko ncheꞌe inaa chujni

(Mt. 7:1-5)

37’Ncheꞌa ra jie̱ ixin thi nichja ko ncheꞌe inaa chujni, ko jañaa Ndo Dio sincheꞌa jie̱ ngajin ra. Danchiaꞌa ra tangi tsuꞌen inaa chujni ko jañaa Ndo Dio sinthagathoꞌa ra tangi. Nchetjañeꞌe ra kain chujni, ko jañaa Ndo Dio sinthatjañaꞌa ra kai. 38Chjeꞌe ra chujni thi rugundeꞌe ko Ndo Dio ruchjaa ra thi rugundaꞌa ra ko thi tamanxin ra tsuntheedo jian, tuntsjenga ra ko rukaon jian. Ixin jañaa inchin jaꞌa ra dajon ra, jañaa kai sayéꞌe ra.

39Jesús ndachro jiꞌi ngain na̱:

—¿Anchao naa thi dikonꞌa sikao inaa thi dikonꞌa? Ndua kayuixin chujni mee setsingaa na̱ chrujan thue. 40Xruꞌin chujni jitangi nuꞌe icha ke xi jitjague, ko are tsjexin tsangi jeꞌe tsunuꞌe inchin xi tjague.

41’¿Unda tsjeꞌe kaxineno nchiin jingangi jmakon inaa chujni ko tsjeꞌa thi nthaa jié jingangi jmakon jaꞌa? 42Ja̱ dikonꞌa nthaa jié jingangi jmakon, ¿unda ndachro ngain inaa chujni sithuexin santsjengiꞌi kaxineno jingangi jmakon? ¡Jaꞌa thi tjaago ixin anto jian aro nduaꞌa! Saꞌo dantsjengi nthaa jié jingangi jmakon, ixin jamee nchao sikon jian ko santsjengiꞌi kaxineno nchiin jingangi jmakon inaa chujni.

Ntha thuchjuin datsuan ni ntha ixin thuchjuiin ntha

(Mt. 7:17-20; 12:33-35)

43’Xruꞌin ntha thuchjuin jian sinchechjian thuchjuin xruꞌin xree, ko kai ntha thuchjuin xruꞌin xree chroꞌa sinchechjian thuchjuin jian. 44Nanaa ntha thuchjuin datsuanxin ni ntha ixin thuchjuiin ntha. Ntha nchaꞌa nchechjianꞌa ntha higo ko kanchaꞌa nchechjianꞌa ka tho uva. 45Thi chujni jian, nichja jian ixin thi jian jii ngain anseen; ko thi chujni jianꞌa, nichja thi jianꞌa ixin thi jianꞌa jii ngain anseen. Mexinxin kain thi jii ngain anseen chujni, mee thi nichja ruꞌa na̱.

Nchia dikunchjian ngataꞌa thjao ko nchia dikunchjian ngataꞌa nchiise

(Mt. 7:24-27)

46’Jaꞌa ra, ¿unda ndachro ra ixin jaꞌan Nchaa ra ko ncheꞌa ra thi jaꞌan thetuꞌan ra? 47Kain chujni tsii ngajin ko tsiꞌin na̱ thi rundathjan na̱ ko sincheꞌe na̱ thi thetuan na, 48chujni mee inchin naa xii anto niꞌnga bakeꞌe xa nchianduꞌa xa ngataꞌa naa thjao. Ko are kuyee jinda ngaa tsaaga anto suji binkee nda nchia mee, aro chroꞌa kuingi nchia, ixin suji dixenga nchia ngataꞌa thjao. 49Aro thi chujni thiꞌin thi jaꞌan ndachrjan ko dithikaonꞌa na na̱, chujni mee inchin thi binchechjian nchianduꞌa ngatakua nchiise ko ngatauꞌen bithuꞌe thjarioꞌo. Ko are kuyee nda ngaa tsaaga, anto suji binkee nda nchia mee, ko ndakjamangi nchia ko ndaxanthe nguii nchia.

Currently Selected:

San Lucas 6: plsNT

Highlight

Copy