San Lucas 8

Kain ni nchrii bakjengijna Jesús

1Kuthimejan Jesús kjui bitsjeꞌe tsjé rajna ko rajnanchjan ixin bakjaago ngain chujni ixin thi thetuꞌan Ndo Dio, ko bakao thi theyoo chujni kuinchieꞌe, 2ko kai bakao kanxion nchrii bantsjeꞌe espíritu jianꞌa ko binchexrueꞌen ixin ikainxion chin. Ko kai nthi̱ꞌa̱ beꞌe María Magdalena thi bachrjexin yaato espíritu jianꞌa. 3Ko nthi̱ꞌa̱ beꞌe Juana, nchri chriꞌi naa tathiita biꞌin Chuza, thi baketuꞌan ngain nchianduꞌa Herodes, ko kai nthi̱ꞌa̱ beꞌe Susana ko ikainxion nchrii bakjengijna Jesús ko thi chujni bakao, ko tumii nchra bakjengijnanxin nchra ni teꞌi.

Thi kuꞌen thi bikenga trigo ngataon jngi

(Mt. 13:1-9; Mr. 4:1-9)

4Tsjé chujni ngain tsjé rajna kjui na̱ ixin bitsjeꞌe na̱ Jesús, ko are uxrathe na̱, jeꞌe kuekiin na̱ naa thi kuꞌen ko ndachro:

5—Naa xii kjui bikenga trigo ngataon jngi. Ko are kuexiꞌin kjua trigo, kanxion nuanchjan binthji ngaa nthiꞌá, ko are batho chujni ngachje na̱ trigo, ko kai kunthua bine ba trigo. 6Ko ithuꞌa trigo binthji ngataꞌa thi jii thjao, ko are chriꞌin trigo, anto daka ndaxema ixin xruꞌin tjao bechunda. 7Ko ithuꞌa trigo binthji ngakjan kanchaꞌa ko kanchaꞌa chriꞌin ka ko icha daka bangi ka, ko ikuanchrjandaꞌa bangi trigo. 8Aro icha trigo binthji ngain thi jian jinche. Ko are bangi trigo, anto jian guan, ixin naa nuanchjeꞌen trigo binchechjian naꞌo thi kan nuanchjan.

Are Jesús jindachro kain jiꞌi, jeꞌe nichja suji ngain na̱, ko ndachro:

—Jaꞌa ra xro thiꞌin ra, thinxin ra jian.

Jesús bakjaago kunixin thi bancheꞌe chujni

(Mt. 13:10-17; Mr. 4:10-12)

9Kuthimejan chujni bakao Jesús banchiangiꞌi na̱ ixin keꞌe ruchro thi ndachro jeꞌe. 10Jeꞌe ndachro ngain na̱:

—Jaꞌa ra, Ndo Dio binthakininxin ra tsjaguꞌa ra thi jima ixin kexreen Ndo Dio tsetuꞌan ngain anseen chujni, aro jaꞌan nichjaa chujni kunixin thi tuꞌen ixin maski dikon na̱, jeꞌe na̱ dikonꞌa na̱, ko are tsiꞌin na̱, tsinxinꞌa na̱.

Jesús tjaago thi kuꞌen ka trigo biginga

(Mt. 13:18-23; Mr. 4:13-20)

11’Jiꞌi ruchro thi bikenga na̱ trigo: trigo ruchro juajnee Ndo Dio. 12Ko thi trigo binthji ngaa nthiꞌá, mee thi chujni thiꞌin juajnee Ndo Dio, aro thii nchiijin ko ndanchetjajin ngain anseen na̱ ko idithikaonꞌa na̱ ko ikjanꞌa na̱ inaa chujni narua. 13Ko trigo binthji ngataꞌa thjao, mee thi chujni thiꞌin juajnee Ndo Dio ko anto chee na̱ are dayee na̱ juajna, aro xra thinxinꞌa na̱ jian ko are thii thi tangi tatjañeꞌe na̱ thi jian juajnee ndo. 14Ko trigo binthji ngagaꞌa kanchaꞌa, mee chujni thiꞌin juajnee Ndo Dio, aro dithikaonꞌa na̱ juajna. Ko jeꞌo ta na̱ juachjaon ixin ruchunda na̱ icha tumi ko jiꞌi thi tanchrjandaꞌa na̱ dithikaon na̱ juajnee ndo. 15Aro thi trigo binthji ngain jinche jian, mee thi chujni jian ngain anseen, ko anto rinao na̱ thiꞌin na̱ ko ncheꞌe na̱ thi thetuꞌan Ndo Dio. Ko jamee dithikaon na̱ kainxin nchaꞌon, ko kain thi ncheꞌe na̱ nchexruxiꞌin Ndo Dio.

Jesús thekin ixin naa thi nchegakaon xruꞌi

(Mr. 4:21-25)

16’Xruꞌin chujni sinchegakaon naa xruꞌi kuthimejan tsjamataon o ruxrangiꞌi xrui ngangi sauen, aro icha jian chujni mee nui sakeꞌe xrui ixin singaseꞌen chujni sixiꞌin nchia. 17Xruꞌin thi jima ko tsununxinꞌa, ko xruꞌin thi jima texraxaon ko chujni tsunueꞌa na̱; kain chunda ke tsununxin.

18’Mexinxin jaꞌa ra thiꞌin ra jian, thi chujni thinxin, Ndo Dio tsjengijna ixin tsinxin icha, aro chujni xruꞌin thinxin, Ndo Dio santsjeꞌe ndo thi nchion thinxin.

Janee ko xan choo Jesús

(Mt. 12:46-50; Mr. 3:31-35)

19Kuthimejan janee ko xan choo Jesús biji na thi jii jeꞌe, aro chroꞌa kunchieꞌen na̱ ngaka jeꞌe ixin anto tsjé chujni te nthi̱ꞌa̱. 20Ko naa chujni biketuꞌen Jesús ko ndachro:

—Janaa ko xan choo nduja te na̱, ko rinao na̱ sikon na̱.

21Ko Jesús ndachro:

—Kain thi chujni thiꞌin ko ncheꞌe thi ndachro juajnee Ndo Dio, chujni mee, thi janana ko xan chian.

Jesús kuenta chrintho ko jinda

(Mt. 8:23-27; Mr. 4:35-41)

22Naa nchaꞌon Jesús ko chujni bakao kuani na̱ naa ntha barko, ko nthi̱ꞌa̱ jeꞌe ndachro ngain na̱:

—Sachjin ná tuenxin jinda jiꞌi.

Ko jañaa bincheꞌe na̱. 23Ko are ntha barko tajitauꞌen ntha jinda, Jesús tabejua ngain ntha barko. Kuthimejan kjua chrintho anto suji ko kuexiꞌin bikia jinda ngaa ntha ko utaruxinkanjingi ntha jinda. 24Ko ni bakao Jesús binchexingameꞌe na̱ ko ndachro na̱:

—¡Suixin thi tjaago! ¡Suixin thi tjaago! ¡Ndatexinkanjingi ná jinda!

Kuthimejan Jesús bingathjen ko kuetuꞌen chrintho ko jinda ixin taseꞌe, ko jinda ko chrintho tabeta. Ko kain xratao tabeꞌe. 25Ko Jesús ndachro ngain chujni bakao:

—¿Unda jaꞌa ra chunthiaꞌa ni ra?

Aro jeꞌe na̱ anto binthexraon na̱ ko kuiseꞌen na̱ ko banchangiꞌi choo na̱:

—¿Kensen xii jiꞌi, ixin chrintho ko jinda dithikaon ngain xa?

Thi xii bechunda espíritu jianꞌa ngain nunthe Gadara

(Mt. 8:28-34; Mr. 5:1-20)

26Ko bathujin na̱ jinda ko biji na̱ ngain nunthe Gadara, chrika nunthe Galilea. 27Are Jesús banianxin ntha barko, naa thi xii bechunda tsjé espíritu jianꞌa juixin nunthe Gadara ko kunchieꞌen ngain Jesús. Ko usee xii jiꞌi xruꞌin luntho bagengaa xa, ko beꞌa xa ngain nchia, ko beꞌe xa ngayee thi baxrabaa chujni. 28Ko are thi xii mee bikon Jesús, kuyao suji ko bethuxin ko bisetaꞌa nunthe chrika ruthee Jesús ko nichja suji:

—¿Unda dixinthe ngajin na, jaꞌa Jesús, Xeꞌen Ndo Dio, ndo thjen ngajni? Nthatsaꞌan ñao nchegetanꞌa na tangi.

29Ko jeꞌe ndachro jañaa ixin Jesús ukuetuꞌen espíritu jianꞌa sachrjexin ngain xii mee. Ko utsjé nthiꞌa espíritu jianꞌa utse xa, ko maski chujni bakiaxin na̱ xa kunixin chia ngain raa xa ko ruthee xa, ko are espíritu jianꞌa batse xa bakunchrintaon xa chia ko banchekinga xa ngagaꞌa jna thi xruꞌin chujni jii. 30Jesús banchiangiꞌi xii mee:

—¿Kexreen diꞌin jaꞌa?

Ko jeꞌe xa ndachro xa:

—Jaꞌan diꞌin na Legión.

Jeꞌe xa ndachro xa jañaa ixin anto tsjé espíritu jianꞌa beꞌe ngaxiꞌin xa. 31Ko kain espíritu mee ndache Jesús ixin rinaoꞌa tsji ngain xruꞌi dangaꞌa ko binchetseꞌen ñao Jesús ixin ruruanꞌa ngain thi tsaaga anto niꞌnga. 32Ko nthi̱ꞌa̱ tenea tsjé kukuchi ngain naa jnanchjan, ko kain espíritu jianꞌa binchetseꞌen ñao Jesús ixin tsanchrjanda sixiꞌin ngain kain kukuchi mee. Ko Jesús bajon juachaxin. 33Kuthimejan kain espíritu jianꞌa bachrjexin ngain xii jiꞌi, sabinthegixiꞌin ngain kukuchi, ko kain kukuchi kjuixin jaa ba ko binthetsiangi ba jinda, ko ndakjuꞌen ba jinda.

34Ko are chujni tethingaria kukuchi bikon na̱ keꞌe kuꞌen ba, jeꞌe na̱ kuinga na̱ bindache na̱ chujni ngain rajna ko kai ni te ngataon jngi. 35Ko kain chujni kjui na̱ bitsjeꞌe na̱ thi kuꞌen. Ko are biji na̱ thi jii Jesús, bikon na̱ thi xii udigachrjedoꞌo kain espíritu jianꞌa, ko utajii xa chrika ruthee Jesús, ko ujingaa xa luntho, ko undakua ncheꞌe xa ko kain chujni anto binthexraon na̱. 36Ko kain chujni bikon kexreen kuxrueꞌen thi xii bechunda espíritu jianꞌa kuexiꞌin na̱ binchenuꞌe na̱ chujni kain thi kuꞌen. 37Kuthimejan kainxin chujnii nunthe Gadara binchetseꞌen na̱ ñao Jesús ixin sarukjixin nthi̱ꞌa̱, ixin anto binthexraon na̱. Mexinxin Jesús kuani ntha barko ko sakjui. 38Aro thi xii bachrjedoꞌo kain espíritu jianꞌa binchetseꞌen ñao Jesús ixin rukajanda rugakji ngain jeꞌe, aro Jesús kuetuꞌen xii mee ixin sithuꞌe xa, ko ndachro:

39—Kjan nchiandui ko thekiꞌin chujni kain thi bincheꞌe Ndo Dio ngajin.

Ko thi xii mee sakjui ko kuekiin kain chujnii thi bincheꞌe Jesús ngain jeꞌe.

Xechon nchrichjeꞌen Jairo ko thi nchrii kathe lunthue Jesús

(Mt. 9:18-26; Mr. 5:21-43)

40Ko are Jesús kjanxin tuenxin jinda mee, kain chujni te nthi̱ꞌa̱ anto chee na̱ ixin biji Jesús ixin kain na̱ techuꞌen na̱. 41Kuthimejan juii naa xii biꞌin Jairo, ko xii jiꞌi baketuꞌan xa ngain niꞌngo. Ko xii jiꞌi bethuxin ko bisetaꞌa nunthe chrika ruthee Jesús ko binchetseꞌen ñao ixin rukji nchianduꞌa 42ixin thi nakua xan nchrichjeꞌen, xan bechunda inchin theyoo nano undajideꞌen xan. Ko are sajithji Jesús nchianduꞌa Jairo, ruee anto tsjé chujni ko anto banchenthedugee na̱ Jesús.

43Ko ngagee chujni mee, beꞌe naa nchrii ubechunda theyoo nano bagengiꞌi nchra jni, ko ujueꞌe binchexiꞌin kain tumii nchra ngain xi nchexruan, aro xruꞌin xi nchexruan binchexrueꞌen nchra. 44Ko nchrii mee kunchieꞌen nchra tuenxin Jesús ko kathe nchra ngandeꞌe lunthue Jesús. Ko thi bagengiꞌi nchra jni bengathjinbeꞌo.

45Kuthimejan Jesús banchiangi ko ndachro:

—¿Kensen kathe na?

Ko kain chujni ndachro na̱ xruꞌin kensen. Mexinxin Pedro ko kain ni bakao ndachro:

—Suixin ke tjaago, ¿unda suixin xra danchiangi kensen kathe? Kain chujni tuntheedo na̱ ngaka suixin, ko tunxinka na̱.

46Aro Jesús ndachro:

—Jii naa thi kathe na, ixin jaꞌan kununa binthaxruaan chujni mee kunixin juachaxinna.

47Nchrii mee are kunueꞌe nchra ixin chroꞌa rugema nchra, jeꞌe nchra kunchieꞌen nchra ko jixranga nchra bethuxin nchra chrika ruthee Jesús. Ko ngathexon kon kain chujni ndachro nchra ngain Jesús unda jeꞌe nchra kathe nchra ko kexreen jaikua ndakuxrueꞌen nchra. 48Kuthimejan Jesús ndachro ngain nchra:

—Jaꞌa kuxruaꞌan ixin chunthia. Nchao sathji ko tunuꞌa chrjuin ngain ansean.

49Ko xra jinichja Jesús, are naa chujni juixin nchianduꞌe Jairo, thi baketuꞌan ngain niꞌngo, ko ndache:

—Xan nchrichjaꞌan undabeꞌen xan, indacheꞌa xi tjaago.

50Are Jesús kuiꞌin yaa, jeꞌe ndachro ngain Jairo:

—Xraonꞌa, jeꞌo dithikaon na, ko xaꞌan ruxingameꞌe xan.

51Are biji na̱ nchianduꞌa Jairo, Jesús kuanchrjandaꞌa bixiꞌin icha chujni, bixiꞌin jeꞌo jeꞌe, Pedro, Jacobo, Juan, ndudee xan nchrichjan ko janee xan. 52Kain chujni te nthi̱ꞌa̱ tetsjangaxin na̱ xan ko tetaxin na̱ xan juachjaon. Aro Jesús ndachro ngain na̱:

—Tsjangaꞌa ra; xan nchrichjan digenꞌa xan; jeꞌo tajijua xan.

53Aro jeꞌe na̱ kjuanuanka na̱ Jesús ixin jañaa ndachro, ixin kain na̱ benuꞌe na̱ ixin xan nchrichjan undabeꞌen xan. 54Kuthimejan Jesús tseꞌe raa xan ko nichja seen ngain xan:

—Jaꞌa xan nchrichjan, dingathjen.

55Ko jeꞌe xan nchrichjan xechon xan, ko tuin jeꞌe xan bingathjen xan. Ko Jesús ndachro:

—Chjeꞌe ra xan sine xan.

56Ko ni nduꞌa xan xratao tabithuꞌe na̱, aro Jesús kuetuꞌen na̱ ixin xruꞌin chujni rundache na̱ thi kuꞌen.

Currently Selected:

San Lucas 8: plsNT

Highlight

Copy