Génesis 49

Jacob binchenchaon kain xeꞌen

1Ko Jacob bayee kain xeꞌen ko ndachro ngain xan: «Dinthendajin ni ra ko rundathjo ra keꞌe sikuꞌan ra kain ra.

2»Jaꞌan ndudaa ra Jacob tunchieꞌen ra ngajin,

ixin tsiꞌin ra thi rundathjo ra jaꞌan, Israel na.

3»Jaꞌa Rubén, jaꞌa thi xanꞌna xan saꞌo,

jaꞌa tsangaxin na, jaꞌa xan saꞌo guan are tsanga bariꞌi,

jaꞌa thi saꞌo jitusayaꞌa ko richunda juachaxin.

4Aro jaꞌa itsjiꞌa inchin xan saꞌo,

Ixin jaꞌa xraa ndachaon juxon kjamangiathe

ixin bincheꞌe jianꞌa ngataꞌa thi darichritaꞌa

ixin barichrikoꞌo naa chriꞌna.

5»Simeón ko Leví xrajeꞌo ncheꞌe

ko chrintho xraa kuxiigo ko tjayakua.

6¡Jaꞌan rinaoꞌa sariꞌi

thi jeꞌe xan ruxrathe xan!

Ixin are bintheguñao xan guen xan tsjé chujni,

ko jeꞌo ixin juinao xan

bincherrengo xan tsjé kuxinthaa.

7¡Jianꞌa tsjiꞌi thi duñao xan,

jianꞌa tsjiꞌi thi anto chrintho xan!

Jaꞌan tsunchjekaa xan ngayee chujni sachrjeninxin Jacob;

ngain nguixin nunthe Israel.

8»Jaꞌa, Judá, xan choo sinthasayaꞌa xan.

Ko kain ni ningakuꞌan, jaꞌa tsjeꞌe na̱ cha,

ko kain xan choo ruchunda xan juasaaya ngajin.

9¡Xanꞌna Judá! Jaꞌa xraa naa kuleunchjan

ixin are uthjexin jine ba kuxiigo duen ba,

disee ba ko detsingataꞌa ba nunthe,

xraa ncheꞌe naa kuleón jié.

¿Ko xruꞌin kensen rinao tunchieꞌen ixin sinchekjayeꞌe ba?

10Xruꞌin kensen nchao santsjaꞌa juachaxin, jaꞌa Judá,

ko xruꞌin thi santsjaꞌa nthasen, thi ntha ruchro ixin chunda juachaxin,

tsija thi thetuꞌan nthasen,

thi tsetuꞌan nguixin nunthe.

11Jaꞌa thenchruagaꞌa kuluchuꞌa ngain jngi tho uva,

ko kuluchuchjeꞌen ba ngain inaa ntha icha jian

Ko thjeen lunthua kunixin ndee tho uva.

12Ko jmakon icha thie tetsjeꞌe ke ndee tho uva;

ko neno icha rua jitsjeꞌe ke tsjin.

13»Zabulón jaꞌa sariꞌi ngandeꞌe ndachaon,

thi nchao senganthjen ntha barco.

Ko nuntheꞌa sekaxin ngain nuntheꞌe Sidón.

14»Isacar, jaꞌa naa kuxiigo tama

ko tajijua ngayee yoo thi teaxiꞌin kuxiigo.

15Ko are sikon ixin nunthe jian nunthe

ko chrjuin jii nunthe ixin sinchejugaꞌa,

ruchaꞌa sinchechieꞌen lumua ixin tsama,

ko sithuaxin sincheꞌe xra, xraa chujni dikeꞌna na̱.

16»Dan, jaꞌa sincheꞌe jie̱ ngain rajnaa,

ixin jaꞌa sachrjeninxin Israel.

17Dan jaꞌa xraa naa kunchee

jii ngandeꞌe nthiꞌá,

ko neꞌe ruthee kunxin

ko detsinga xi jitaꞌa kunxin.

18»¡Ndo Diuna, chuan Suixin tsjengijna na!

19»Jaꞌa Gad, sixinthe tsjé chujni cheꞌe,

aro jaꞌa sinchekinga na̱ are jeꞌe na̱ texraxaonꞌa na̱ ixin tsetokoꞌo na̱.

20»Jaꞌa Aser, ruchunda tsjé thi sinthe;

ko sajon thi jikininxin sine ni rey.

21»Jaꞌa, Neftalí, xraa naa kuxijna xruꞌin kensen thenchrua

ko chrjuin te xeꞌen ba.

22»Jaꞌa, José, xraa naa nthaa jii chrika jinda,

ko dajon tsjé thuchjuin

ko chaan ntha tanito thjarioꞌo.

23Ni tjayaxin ntha chijno ningakuꞌan na̱ ko tjaꞌa na̱ chijno

ko nguxon tenthañao na̱;

24Aro anto suji ntha raa

ko suji tse ntha chijnuꞌa;

¡ko jaꞌa sujixin ixin Ndo Diue Jacob, thi chunda kain juachaxin!,

¡ko suji ixin thi jinda ko dayakuꞌen Israel!

25Ko Ndo Diue ndudaa tsjengijna;

Ko Ndo Dio chunda kain juachaxin, sinthanchaon jaꞌa.

Ko ngajni sinthanchaunxin Ndo,

¡Ko sinthachaon Ndo kunixin thi jii chringi ndachaon!

¡Ko sinthanchaon kunixin janaꞌa sinchekunkjiꞌi chjan ko sinchekai xan!

26Jaꞌan, ndudaa, ko icha rinthanchaon

ke inchin binchenchaon na ndudana,

ko icha jian ke thi tsunchaunxin kunixin nthajie̱ ko jna xruꞌin nchaꞌon tsjexin.

Ko thi kunchaunxin jiꞌi

seꞌe ngajin jaꞌa José,

ixin jaꞌa xan icha renthe ngayee xan choo.

27»Jaꞌa, Benjamín, jaꞌa naa kundanixra chrintho,

ko are nduuyo jine ba kuxiigo duen ba

ko tsukjin tunchjeeya ba thi jueꞌa ba.»

28Jiꞌi thi the yoo xeꞌen Israel, ko jiꞌi thi ndache nanaa xeꞌen are binchenchaon xan.

Ndaseꞌen Jacob

29Naa nchaꞌon Jacob ndachro ngain xeꞌen: «Utuin ndaseꞌen na. Ko tjabaa ni ra chrika ni xranchrjeꞌna ngain thjao jichrjadoꞌo jii ngain jngiꞌi Efrón thi heteo, 30nthiꞌa ngain nunthe Canaán. Ko thjao jichrjadoꞌo mee jii ngain nunthe Macpela nu thi chrinxin nchaꞌon chrikee nuntheꞌe Mamre thi kueꞌna Abraham ngain Efrón ixin ruxrabaa ni chujnii. 31Nthiꞌa kjuabaa na̱ Abraham ko Sara, Isaac ko Rebeca, ko kai nthiꞌa jaꞌan kjuabaa Lea. 32Ko jngi ko thjao jichrjadoꞌo, ndudachriꞌna Abraham kueꞌna ngain ni Het.»

33Are Jacob juexin kuetuꞌan jiꞌi ngain xeꞌen, kjan betsingataꞌa sauen ko ndabeꞌen.

Currently Selected:

Génesis 49: plsNT

Highlight

Copy