Génesis 50

1Ko José kjuua ndudee ko kuetuxin ndo ko tsjangaxin ndo. 2Kuthimejan kuetuꞌen xi nchexruan bancheꞌe xra ngain, ixin jian ruchjee na̱ xruan nthauꞌe ndudee ixin rukuxraꞌa nthao; ko jañaa bincheꞌe xi nchexruan ngain Israel. 3Ko yoo kan nchaꞌon kunchrjeꞌen na̱ chjee na̱ xruan ixin jañaa bakunchrjeꞌen na̱ bancheꞌe na̱ yaa.

Ko ni egipcio kuaxin na̱ juachjaon Jacob nii kan ko the nchaꞌon. 4Ko are uxethja thi nchaꞌon taxin na̱ juachjaon, José nichjee ni bakjengijna faraón ko ndache na̱:

—Ja̱ chundana ni ra juasaaya, jaꞌan nthatsaꞌan ñao ra nichjaxin ni ra ngain faraón ko ndache ra, 5ixin are ndudana uchiaon ndarrugeꞌen ndo, jeꞌe ndo bincheꞌe ndo ixin jaꞌan bajin ngain ndo ixin are rugeꞌen ndo rukjabaa ndo ngain thi chinthi jeꞌe ndo binchechjian ndo ngain nunthe Canaán. Mexinxin ndache ra ixin tsanchrjanda na tsji sikjabaa ndudana, ko tuin rukjan na.

6Ko faraón ruaꞌan juajna ko ndachro:

—Thji dikjabaa ndudaa, jañaa inchin banchia ndo.

7Kuthimejan José kjui bikjabaa ndudee, ko José bikao kain ni nchexree faraón, ni baketuꞌan ngain nchianduꞌa ko ngain nunthe Egipto, 8ko kain chujnii Jacob, ko kain xan choo José ko ni nchianduꞌa jeꞌe. Ko ngain nunthe Gosén bithuꞌe jeꞌo ni nchinchjan ko kain kuxigue na̱. 9Ko kai kjui chujni dikao ntha thingajin kunxin ko ni tetaꞌa kunxin, ko anto tsjé chujni bikao José. 10Ko are biji na̱ ngain jngi diꞌin Atad, thi jii chrikee nda Jordán, ko nthiꞌa binchechjian na̱ xraa naa kiai ko yaato nchaꞌon kuaxin na̱ juachjaon Jacob.

11Ko are ni cananeo binthe nu yaa bikon na̱ kain thi jituꞌen, ko ndachro na̱: «Nchingo ni egipcio ndabeꞌen naa chujnii na̱, naa ni anto jié juachaxin chunda.» Mexinxin binchegiꞌin na̱ Abel-mizraim, ixin ndachro na̱: «Ngain nunthe jiꞌi anto jié juachjaon chunda ni egipcio.»

12Kain xeꞌen Jacob bincheꞌe xan thi kuetuꞌen ndudee xan, 13ixin bikao xan ndo Canaán, ko kjuabaa xan ndo ngain thi thjao dichrjadoꞌo jii ngain jngi diꞌin Macpela, chiaon nunthe Mamre. Jiꞌi thi chinthi kueꞌna Abraham ngain Efrón thi heteo. 14Kuthimejan are ujuexin xrabaa ndudee José, jeꞌe sakjan Egipto kunixin kain xan choo ko kain ni bikao.

José kuenta juachjauen xan choo

15Ko ixin ndabeꞌen Jacob, kain xan choo José xraxaon xan: «¿Mee ja̱ xra ningakuan ná José, ko sinao chrujan sinthaa ná ixin kain thi binthukoo ná?» 16Mexinxin jeꞌe xan ruaꞌan xan naa juajna ngain José ko ndachro xan: «Are xra bechon ndudaa ná, kuetuna ná ndo 17Jaꞌin ndache ra José: “Nthatsaꞌan ñao, nchetjañeꞌe xan choo kain thi jianꞌa binthaꞌa xan.” Mexinxin nthatsaꞌan ra ñao nchetjañana ni ra thi jianꞌa binthaꞌa ná, jaꞌan ná xro ni nchexree Ndo Diue ndudaa ná.»

Ko are ni bikao juajna tenichja ná ngain José, jeꞌe kuixinꞌa ko beꞌe tsjanga. 18Kuthimejan are ubintheji xan choo, kain xan bethuxin xan ko bisetaꞌa xan nunthe, ko ndachro xan:

—Nthiꞌi te ná ngajin, jaꞌan ná xi nchexraa.

19Aro José batheꞌe:

—Xraonꞌa ra. Jaꞌan jeꞌa Dio na ixin sinthaꞌa jie̱. 20Jaꞌa ra xraxaon ra binchena ni ra thi jianꞌa, aro Ndo Dio binchekjan thi jianꞌa mee, naa thi jian ko jañaa kjuengijnaxin ná Ndo kain ná, ko tsjé chujni benꞌa. 21Mexinxin xraonꞌa ra. Jaꞌan ruchjaꞌa ra sinthe ra, jaꞌa ra ko kain xaꞌan ra.

Ko José kuenta juachjauen xan ixin nichjee xan kunixin juathjua.

Seꞌen José

22José ko kain chujnii ndudee, xra binthe na̱ ngain nunthe Egipto. Ko José bechon naa renkia ko the nano, 23ko xra bikon xanthi xranchrjeꞌen Efraín, xeꞌen jeꞌe. Kai xra binchengithjen ngain nthajuchjiꞌi xeꞌen Maquir, ko Maquir kjui xeꞌen Manasés.

24Naa nchaꞌon José ndache xan choo: «Jaꞌan utuin seꞌen ná, aro Ndo Dio tsii Ndo tsjengijna ra Ndo, ko santsjexin ra Ndo ngain nunthe jiꞌi ko tsjiꞌo ra Ndo ngain thi nunthe ndachro Ndo rugajon Ndo ngain Abraham, Isaac ko Jacob.» 25Ko José bincheꞌe ixin kain xeꞌen Israel bajin xan ko ndache xan: «Ndua Ndo Dio tsii Ndo tsjengijna ra Ndo. Ko are sikuꞌen yaa, jaꞌa ra sathjiuxin ra nthiꞌi kain ntha luruna.»

26José beꞌen are bechunda naa renkia ko the nano; ko jian chjee na̱ xruan nthauꞌe ixin rukuxraꞌa nthauꞌe ko kuengaꞌa na̱ ngaa naa nthacaaja chuxin dengaa ni faraón are deꞌen na̱.

Currently Selected:

Génesis 50: plsNT

Highlight

Copy