San Lucas 6

Jesús kipiya tekiuajyotl para kijtos tlinon kuajli para se kichiuas ipan on tonajli sábado

(Mt. 12.1-8; Mr. 2.23-28)

1Ipan sen tonajli sábado, Jesús nejnentiaya kampa onkaj on tlatoktli de trigo. On inomachtijkauan* kimaxikopinayaj on trigo, niman kimateiniayaj niman kikuayaj on iteyo. 2Niman sekimej fariseos* okintlajtoltijkej:

—¿Tline* nenkichiuaj on tekitl yejuan itlanauatil Moisés xkitekauilia nochiuas ipan on tonajli sábado?

3Jesús okinmijlij:

—¿Xkaman nenkimomachtiaj on tlen okichiu David ijkuak yejua niman icompañeros oapismikej? 4Okalak ipan itabernáculo Dios niman okitilan on pan yejuan tlatiochijtli. Kemaj okuaj niman no okinmakak on yejuan ompa inuan nemiyaj, maski itlanauatil Moisés san kinkauiliaya on tiopixkej kikuayaj on pan.

5No ijki okinmijlij:

—Tej, nejua yejuan oninochiu Tlakatl nikpiya tekiuajyotl para nikijtos tlinon kuajli para sen tlakatl kichiuas ipan on tonajli sábado.

Jesús okipajtij se tlakatl yejuan kipiyaya se ima uaki

(Mt. 12.9-14; Mr. 3.1-6)

6Ipan okse sábado, Jesús okalak ipan sen sinagoga* niman ompa temachtiaya. Ompa nemiya sen tlakatl yejuan kipiyaya on iyekma uaki. 7Niman on temachtijkej ikan on tlanauatijli niman on fariseos* kipijpiyayaj Jesús para kitaskej tla kipajtis on tlakatl ipan on tonajli sábado. Ijkon okichijkej para kinextiliskej tlinon ika uelis kiteixpanuiskej. 8Pero Jesús kimatstikatka tlinon yejuamej kinemiliayaj, niman okijlij on tlakatl yejuan kipiyaya ima uaki:

—Xmotelketsa niman xuiya ne tlajkotian.

On tlakatl onotelkets niman ompa oyaj. 9Kemaj Jesús okinmijlij:

—Nejua nemechtlajtoltia: ¿Tlinon techkauilia itlanauatil Moisés tikchiuaskej ipan on tonajli sábado, on tlen kuajli noso on tlen xkuajli? ¿Techkauilia tikmakixtiliskej inemilis sen tlakatl noso tikixtiliskej inemilis?

10Kemaj Jesús okimixtlaloj on yejuan nemiyaj iyeualkan, niman okijlij on tlakatl:

—Xmelaua moma.

On tlakatl okimelau ima, niman opajtik. 11Pero yejuamej sanoyej* okualankej, niman opeu notlajtoltiaj tlinon uelis kichiuiliskej Jesús.

Jesús okitlapejpenij majtlaktli uan ome apóstoles*

(Mt. 10.1-4; Mr. 3.13-19)

12Ipan on tonajli Jesús otepetlejkok para okichiuato oración. Niman ne ipan on tepetl nochi tlayoua okichiu oración itech Dios. 13Ijkuak otlanes, okiminnots inomachtijkauan*, niman de yejuamej okintlapejpenij majtlaktli uan ome nomachtijkej* yejuan okintokayotij apóstoles*. 14Ijkin intoka katka on apóstoles*: Simón, yejuan Jesús okitokayotij Pedro, Andrés ikniu Simón, Santiago, Juan, Felipe, Bartolomé, 15Mateo, Tomás, Santiago ikoneu Alfeo, Simón, yejuan nopouaya intech on cananistas, 16Judas ikniu Santiago niman Judas Iscariote, yejuan más sakin* okitemaktilij Jesús.

Jesús otemachtij niman okimpajtij miyekej kokoxkej

(Mt. 4.23-25)

17Jesús iuan inomachtijkauan* ouajtemok de ipan on tepetl, niman onoteltij ipan sen ixtlauatl. Niman ompa nemiyaj miyekej inomachtijkauan niman tlakamej yejuan chanejkej nochiuiyan ne Judea, niman on ueyikalpan Jerusalén niman ipan on ueyikalpanmej de Tiro niman de Sidón yejuan onkaj itenko on mar. Yejuamej ompa oyajkej para okakitoj Jesús niman para itech okimpajtitoj inkualolis. 18On yejuan tlajyouiyaj pampa kipiyayaj on xkuajkualtin espíritus no opajtikej. 19Nochi tlakatl kinekiya kimatokas Jesús, pampa ipoder kisaya itech niman kimpajtiaya nochimej.

Jesús otemachtij akinomej kipiyaskej itlatiochiualis Dios

(Mt. 5.1-12)

20Jesús okimixtlaloj inomachtijkauan* niman okinmijlij:

—Dios mechtiochiuas nemejuamej mayankej, pampa nenkalakiskej kampa Dios tlamandaroua.

21’Dios mechtiochiuas nemejuamej yejuan nemapismikij, pampa nemejuamej nemixuiskej.

’Dios mechtiochiuas nemejuamej yejuan aman nenchokaj, pampa nemejuamej nempakiskej.

22’Dios mechtiochiuas nemejuamej ijkuak on tlakamej mechtlauelitaskej, ijkuak xmechseliskej, ijkuak mechuijuikaltiskej, niman ijkuak mechtejteneuaskej san pampa nennechneltokaj nejua yejuan oninochiu Tlakatl. 23Ijkuak ijkon nochiuas, sanoyej xpakikan niman xtemikan ikan pakilistli, pampa ne iluikak nenkiseliskej sen ueyi tlaxtlauijli. Xkelnamikikan ika inachtojtajuan no ijki okinchiuilijkej on tiotlajtojkej.

24’Pero lástima para nemejuamej ricos, pampa on pakilistli yejuan nenkipiyaj, nikan tlamis ipan in tlaltikpaktli.

25’Lástima para nemejuamej yejuan nemixuitokej pampa nenkipiyaskej apistli.

’Lástima para nemejuamej yejuan aman nempakij, pampa nenchokaskej niman nemajmanaskej.

26’Lástima para nemejuamej ijkuak nochi tlakatl mechyekteneuas. Xkelnamikikan ika inachtojtajuan no ijki kinyekteneuayaj on yejuan xmelauak tiotlajtojkej.

Jesús otemachtij ika noneki tikintlajsojtlaskej yejuan techtlauelitaj

(Mt. 5.38-48; 7.12)

27’Pero nemejuamej yejuan nennechkakij nemechijlia: Xkintlajsojtlakan* on yejuan mechtlauelitaj; xkinchiuilikan tlen kuajli. 28Xtlajtlanilikan Dios para ma kintiochiua on yejuan mechuijuikaltiaj; xchiuakan oración impampa on yejuan mechchiuiliaj tlen xkuajli. 29Tla yakaj mitsxayakauiteki, no xkauili okse lado ma mitsxayakauiteki. Niman tla yakaj mitskuilia mogabán, no xkauili ma kikti motlaken. 30San akinon yejuan itlaj mitstlajtlanilis, xmaka. Niman on yejuan mitskuilis tlen moyaxka*, maka sa xtlajtlanili para ma mitsmaka. 31Xkinchiuilikan tlen kuajli oksekimej ijkon ken nemejuamej nenkinekiskiaj yejuamej ma mechchiuilikan.

32’Tla nemejuamej nenkintlajsojtlaj san yejuamej on yejuan no ijki mechtlajsojtlaj, ¿tlinon más kuajli nenkichiuaj xken oksekimej?, pampa hasta on tlajtlakolejkej ijki kichiuaj. 33Noso tla on yejuan mechchiuiliaj on tlen kuajli san yejuamej nenkinchiuiliaj tlen kuajli, ¿tlinon más kuajli nenkichiuaj xken oksekimej?, pampa on yejuan tlajtlakolejkej no ijki kichiuaj. 34Niman tla itlaj nenkintlanejtiaj san on yejuan nenkinemiliaj intech nenkiseliskej oksejpa sano ijki, ¿tlinon más kuajli nenkichiuaj xken oksekimej? Xitlaj pampa on tlajtlakolejkej no itlaj kintlanejtiaj on yejuan no tlajtlakolejkej para intech kiseliaj oksejpa sano ijki. 35Pero nemejuamej xkimintlajsojtlakan on yejuan mechtlauelitaj niman xkinchiuilikan on tlen kuajli. Niman itlaj xkimintlanejtikan pero maka nenkichaskej itlaj intech nenkiseliskej. Tla ijkon nenkichiuaskej, nenkipiyaskej sen ueyi tetlayokolijli*, niman nemejuamej nentekoneuan yeskej itech Dios yejuan más ueyixtikaj, pampa yejua yolyemanki* intech on yejuan xitlaj* kitlajsojkamatij niman intech on yejuan xkuajkualtin tlakamej. 36Nemejuamej tej, xteiknelikan* ijkon ken nemoTajtsin teiknelia.

Jesús temachtia ika xkuajli para se tetlajtlakolmakas

(Mt. 7.1-5)

37’Maka kaman xkintlajtlakolmakakan oksekimej, para Dios no xmechtlajtlakolmakas. Xtetlapojpoluikan, niman Dios no mechtlapojpoluis. 38Xkinmakakan tlajtlamach* oksekimej, niman Dios no mechmakas. Xkinmakakan ken sen kuajli tlanamakaketl kitemaka ikan sen tlatemachiuajli yejuan kuajli tentikaj, yejuan kuajli kipachouaj, yejuan kuajli kikoxoniaj niman yejuan kuajli kiteuitsoltiaj, pampa Dios mechmakas sano ijki ken nemejuamej nenkiminmakaj oksekimej.

39Jesús okixtij in okse ejemplo:

—¿Tlen sen ciego uelis kiyekanas okse ciego? Yejua xueli, pampa onxiniskej san sekan ipan sen pozo. 40Xakaj nomachtijketl más ueyixtikaj xken on yejuan kimachtia. Pero ijkuak tlamis nomachtis, no ijki yes ken on yejuan kimachtia.

41’¿Kenijki tej, ueli tikita on keski tlajtlakojli yejuan kichiua sen mokniu niman xtikita on miyek tlajtlakojli yejuan tejua tikchiua? 42Noso, ¿kenijki ueli tikijlia mokniu: “Ma nimitskajkaualti on keski tlajtlakojli”, ijkuak sano tejua tikpiya miyek tlajtlakojli? ¡Omexayakyej! Achtopa xkajkaua on miyek tlajtlakojli yejuan tikpiya, niman kemaj uelis tikajkaualtis mokniu on keski tlajtlakojli yejuan yejua kipiya.

Sen tlakatl kixmatij ika on tlen kijtoua

(Mt. 7.17-20; 12.33-35)

43’Sen kuajli kojtlakijlotl xuelis kipiyas xkuajli itlakijlo nion on xkuajli kojtlakijlotl xuelis kipiyas kuajli itlakijlo. 44Ijkon tej, nochi kojtlakijlotl kixmatij ika on itlakijlo. Xkaman noteki higos ipan on uitskojtli, nion xnoteki uvas ipan on uitskuamekatl. 45Sen kuajli tlakatl kijtoua nochi tlen kuajli, pampa on tlen kuajli onkaj ipan iyojlo, niman sen xkuajli tlakatl kijtoua on tlen xkuajli, pampa on tlen xkuajli onkaj ipan iyojlo. On tlen sen tlakatl kijtoua ikan ikamak, sano yejua ika tentikaj iyojlo.

Jesús otemachtij de omemej tlakamej yejuan okichijchijkej inkal

(Mt. 7.24-27)

46’¿Tline nennechijliaj, “noTEKO, noTEKO”, niman xnenkichiuaj on tlen nemechijlia? 47Nemechijlis ken akinon nesi on yejuan notech uajlau niman nechkaki niman kichiua on tlen nejua nitlanauatia. 48Nesi ken sen tlakatl yejuan okitlalij sen kajli. Yejua achtopa uejkatlan otlachkuak para uejkatlan okipeualtij on cimiento* ipan on tepetlatl. Niman ijkuak oueyiyak on río, on atl chikauak okichkuato on kajli, pero nion xokolinij, pampa uejkatlan opeu on cimiento* ipan on tepetlatl. 49Pero on yejuan nechkaki niman xkichiua on tlen nitlanauatia, nesi ken sen tlakatl yejuan san ixko tlajli okichijchiu ikal niman xikan cimiento*. Yejua ika ijkuak on río oueyiyak niman chikauak okichkuato ouets, niman nochi kuajli oxoxoton.

Currently Selected:

San Lucas 6: nguNT

Highlight

Copy