San Lucas 7
7
Jesús okipajtij itekitkau sen soldadojtlayekanki romano
(Mt. 8.5-13)
1Ijkuak Jesús otlan okijtoj nochi in tlajtlamach* imixpan on tlakamej, oyaj Capernaúm. 2Ompa nemiya sen soldadojtlayekanki romano yejuan kipiyaya sen itekitkau niman sanoyej* kitlajsojtlaya*. On itekitau sanoyej kualouaya niman ye miktikatka. 3Niman ijkuak on soldadojtlayekanki romano okak kiteneuaj Jesús, okinnauatij on tlajtlajmatkej tlayekankej yejuan kisayaj intsajlan on hebreos* para ma kiknotlajtlanilitij Jesús para ma kipajtiti on itekitkau. 4Yejuamej okinisiuijkej Jesús niman ijkin opeu kiknotlajtlaniliaj:
—Yejua in soldadojtlayekanki romano kimelaua*, niman kuajli para tikpaleuis, 5pampa yejua kitlajsojtla* topaís niman yejua okichijchiu tosinagoga* ikan itomin.
6Kemaj Jesús inuan oyaj. Pero ijkuak ye nisiu nemiyaj ne ichan on soldadojtlayekanki romano, yejua okinnauatij sekimej itetlajsojkaikniuan* ijkin ma kijlitij Jesús:
—NoTEKO, maka xmotemati para tiuajlas pampa nejua xnechtocaroua para tikalakis nochan. 7Yejua ika, nion xoniknek nejua onimitsitsato. San xuajtlanauati niman notekitkau pajtis. 8Ijkon nochiuas pampa nejua no nikmati ken nikintlakamati on yejuan nechmandarouaj ijkuak itlaj nechnauatiaj, niman nejua no nikimpiya nosoldados yejuan nechtlakamatij ijkuak itlaj nikinnauatia. Ijkuak se niknauatia kanaj ma uiya, yau. Ijkuak okse nikijlis ma uajla, uajlau. Niman ijkuak on notekitkau niknauatia itlaj ma kichiua, kichiua.
9Ijkuak Jesús ijkon okak, sanoyej okitlatlachaltij. Kemaj ouajnokuep niman okimixtlaloj on tlakamej yejuan kikuitlapanuijtiayaj niman okijtoj:
—Ika tlen melauak nemechijlia ika nion sen hebreo* xkaman nikita sanoyej tlaneltoka ken yejua in tlakatl.
10On yejuan okintitlankaj onokuepkej ichan on soldadojtlayekanki romano niman okinextitoj on tekitketl yopajtik.
Jesús okiyoliuitij* ikoneu sen siuakaualtsintli
11Achijtsin más sakin*, Jesús yaya ipan sen kalpan itoka Naín, niman iuan yayaj on inomachtijkauan* niman miyekej oksekimej tlakamej. 12Ijkuak ye kinisiuijtiayaj ikalakiyan on kalpan, okitak ika kuikayaj kontokaskej sen mikatsintli. Yejua san ika nochi katka tekoneu itech sen siuakaualtsintli*. Miyek tlakatl yejuan chanejkej ipan on kalpan uajlayaj iuan. 13Ijkuak toTEKO okitak on siuakaualtsintli, okiknelij*, niman okijlij:
—Maka xchoka.
14Kemaj Jesús okinnisiuij niman okimatokak on caja, niman on yejuan kechpanojtiayaj onoteltijkej. Niman Jesús okijlij on mikatsintli:
—Telpochtli, nejua nimitsijlia: ¡Xmokuiteua!
15Kemaj on yejuan yomikka onotlalij niman opeu tlajtlajtoua, niman Jesús okimaktilij inanaj. 16Ijkuak nochimej ijkon okitakej, onomojtijkej niman opeu kueyiliaj Dios. Ijkin kijtouayaj:
—Sen ueyi tiotlajtojketl ononextij totsajlan.
No kijtouayaj:
—Dios youajlaj, okimpaleuiko ikoneuan.
17Niman ipan nochi Judea niman nochiuiyan ipan on oksekimej países yejuan onokej iyeualkan, omachiyak on tlen Jesús okichiu.
Inomachtijkauan Juan okinotskej Jesús
(Mt. 11.2-19)
18Niman Juan no okimat nochi on tlen onochiu, pampa inomachtijkauan* okitlajtlajtouilijkej. Kemaj okinnots omemej inomachtijkauan*, 19niman okintitlan itech Jesús para okitlajtoltitoj tla yejua melauak Cristo yejuan ye onkatka para uajlas, noso yej kichaskej okse. 20On yejuan okintitlan Juan, okinisiuijkej Jesús niman okijlijkej:
—On tlakuatekijketl Juan, otechajtitlan para timitstlajtoltiskej tla tejua tiCristo yejuan ye onkaj para uajlas noso yej tikchaskej okse.
21Sano ipan on tonaltin chika inomachtijkauan* Juan ompa nemiyaj, Jesús okimpajtij miyekej tlakamej de miyek kualolistin niman okinkixtilij on tlajyouilistin, niman ika on xkuajkualtin espíritus, niman no okinmakak tlachalistli miyekej yejuan ciegos. 22Kemaj Jesús okinnankilij on inomachtijkauan* Juan:
—Xuiyan niman xkijlikan Juan on tlen nemejuamej yonenkitakej niman yonenkakkej. Xtlajtlajtouilikan ika aman tlachaj on yejuan ciegos katkaj, niman on yejuan uilatsitsimej katkaj kistinemij, niman on yejuan palaniya innakayo pajtij, niman on yejuan tsatsamej katkaj tlakakij, niman on mikatsitsimej yoliuij* niman nokuiteuaj ipan intlalkon. Niman no xtlajtlajtouilikan ika on yejuan mayankej kakij on kuajli tlajtojli yejuan kiteijlia ken Dios temakixtia. 23Sanoyej tlatiochijtli yes on yejuan xkaman ometlamatis san nopampa.
24Ijkuak oyajkej on yejuan okintitlanka Juan, Jesús opeu tenojnotsa itechkopa Juan, niman okinmijlij:
—¿Akinon onenkitatoj ne xalpatlajkan? ¿Onenkitatoj sen tlakatl yejuan nolinia itlamachilis ken itlaj ouatl nolinijtikaj ika on ajakatl? 25¿Akinon tej, onenkitatoj? ¿Onenkitatoj sen tlakatl yejuan tlakempepetlaka? Nemejuamej nenkimatstokej ika on yejuan sanoyej tlakempepetlakaj niman kuelitaj nemiskej kampa pakiloyan, nemij inchan on reyes. 26Aman tej, ¿akinon onenkitatoj? ¿Onenkitatoj sen tiotlajtojketl? Kemaj, on melauak, niman yejua más ueyixtikaj xken sen tiotlajtojketl. 27Juan yejua on tenojnotsketl yejuan on Yektlajkuilojli ijkin kijteneua:
Nejua niktitlanis sen tenojnotsketl moyakapan
para yejua mitsyektlalilis moojui.
28Nemechijlia ika intsajlan nochimej on tlakamej, xkaman yakaj otlakat yejuan más ueyixtikaj tiotlajtojketl ken Juan on tlakuatekijketl. Pero in no melauak ika on yejuan kinokauilis ma kimandaro Dios más ueyixtias xken Juan.
29Ijkuak ijkon okakkej itemachtil Jesús itechkopa Juan, nochimej on tlakamej niman hasta on yejuan tlacobrarojkej ika impuestos okitakej ika itlajtol Dios melajki niman onokuatekijkej itech Juan. 30Pero on fariseos* niman on temachtijkej ikan itlanauatil Dios xokiselijkej itemachtil Dios, yejua ika xonokuatekijkej itech Juan. 31Niman toTEKO okijtoj:
—¿Tlinon ika uelis nikimixtlalos on tlakamej yejuan nemij ipan in tonaltin? ¿Ken akinomej nesij? 32Yejuamej ijkomej ken on kokonej yejuan nauiltiaj ipan plaza niman on imincompañeros kintsajtsiliaj: “Otemechtlapichilijkej ikan akatlapitsaltin ken kintlapichiliaj ipan sen nonamiktilistli, pero nemejuamej xonemijtotijkej. Otemechkuikatlalijkej ikan kuikamej teajman yejuan kinokuikatiaj ijkuak yakaj miki niman xonenchokakkej.” 33Ouajlaj Juan on tlakuatekijketl yejuan nosaua niman xkoni vino, niman nemejuamej nenkijtouaj ika kipiya sen xkuajli espíritu. 34Kemaj oniuajlaj nejua yejuan oninochiu Tlakatl. Ijkuak nejua yejuan nitlakuani niman niatlini oniuajlaj, nemejuamej onenkijtojkej ika melauak nitlakuani niman ika sanoyej niatlini. Niman onenkijtojkej ika niintetlajsojkaikniu* on tlajtlakolejkej niman on yejuan tlacobrarojkej ika impuestos. 35Pero on yejuan kiselia on kuajli tlajtojli, kitaj ika itlamatkilis* Dios melauak.
Jesús nemiya ichan Simón on fariseo
36Semej yejuamej on fariseos* okinots Jesús para iuan tlakuas. Niman Jesús oyaj ichan on fariseo* niman onotlalij itech on mesa. 37Sano ipan on kalpan nemiya sen siuatl yejuan xkuajli nouikaya. Niman ijkuak yejua okimat ika Jesús oyaj otlakuato ichan on fariseo, oyaj okiktik sen botella de tetl yejuan fino. On botella tentiaya ikan aceite ajuiyak. 38Niman chika chokatikatka, onotlalij ikuitlapan Jesús nisiu ikxitlan, niman opeu kimpajpaka ikxiuan ikan ixayo. Kemaj okinuajuachilij ikan itson. No okintenkuaj* niman kemaj okintekilij on aceite ajuiyak. 39Ijkuak on fariseo* yejuan okinots Jesús, ijkon okitak, okinemilij: “Tla in tlakatl melauak tiotlajtojketl yeskia, kimatiskia akinon kimatokatikaj niman ika xkuajli nouika, pampa yejua sen tlajtlakolej.” 40Kemaj Jesús okijlij on fariseo:
—Simón, nikpiya tlinon nimitsijlis.
On fariseo* okijlij:
—Temachtijketl, xnechijli.
41Jesús okijlij:
—Sen tlakatl okintlanejtij tomin omemej tlakamej. Se okitlanejtij 500 denarios*, niman okse 50. 42Niman ika on omemej tlakamej xueliyaj kuepiliayaj on tomin, on yejuan okintlanejtij on tomin okintlapojpoluilij tlen kiteuikiliayaj. Aman xnechijli, ¿katlejua de on omemej más okipiyalij tetlajsojtlalistli*?
43Simón okinankjlij:
—Nejua nikuitia ika on yejuan más ueyi okitlapojpoluilij on tlen kuikiliaya.
Jesús okijlij:
—Kuajli ken otikijtoj.
44Kemaj Jesús okontak on siuatl, niman okijlij Simón:
—Onikalak mochan niman xotinechmakak atl para nokxiuan. Pero, ¿tikita in siuatl? Yejua okinpajpak nokxiuan ikan ixayo, niman okinuajuats ikan itson. 45Nion xotinechtenkuaj* ijkuak otinechtlajpaloj, pero yejua desde ijkuak nikan onikalakiko xkajtikaj ika kintenkua nokxiuan. 46Xotinechtlalilij aceite ipan notsontekon, pero yejua okitoyau aceite ajuiyak ipan nokxiuan. 47Nimitsijlia ika on miyek itlajtlakol aman yotlapojpoluilok ipampa iueyitetlajsojtlalis*. Pero on yejuan achijtsin kitlapojpoluiliaj itlajtlakol san achijtsin kiteititia itetlajsojtlalis*.
48Kemaj Jesús okijlij on siuatl:
—Motlajtlakol nochi yotlapojpoluilok.
49Niman on tenotskej yejuan ompa iuan yejyeuatikatkaj opeu sano yejuamej kinojliaj:
—¿Akin tlakatl in? ¿Tline* kinemilia ueli kitetlapojpoluilia tetlajtlakol?
50Pero Jesús okijlij on siuatl:
—Aman yotimakis pampa otitlaneltokak. Xuiya ikan yolseuilistli.
Currently Selected:
San Lucas 7: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
