San Lucas 5

Nauimej michajsikej onochijkej inomachtijkauan* Jesús

(Mt. 4.18-22; Mr. 1.16-20)

1Ipan se tonajli Jesús nemiya itenko on atl itoka Genesaret. Niman miyek tlakatl oyaj itech hasta kipitsmiktiayaj* para kakiskej itemachtil Dios. 2Jesús okitak ome barco itenko on atl. On michajsikej yeuatikatkaj niman kipajpaktikatkaj iminmatlau. 3Kemaj Jesús otlejkok ipan on barco yejuan iyaxka* Simón, niman okitlajtlanilij Simón para achijtsin más ma kalakti neka atlajkotian. Kemaj Jesús onotlalij ne ipan on barco niman okiminmachtij on tlakamej yejuan nemiyaj ne atlatenko. 4Niman ijkuak Jesús otlan kiminmachtia on tlakamej, okijlij Simón:

—Xkuika in barco ne kampa más uejkatlan niman ompa xkonchapanikan nemomatlauan para nenkimajsiskej michimej.

5Simón okijlij:

—Temachtijketl, tejuamej nochi tlayoua otikejekojkej tikimajsiskej on michimej niman xouel itlaj otikajsikej. Pero pampa tejua titechnauatia, tejuamej tikonchapaniskej in matlatl.

6Ijkuak okonchapanijkej on matlatl, okajsikej miyek michin niman hasta ye kojkotoniya* on matlatl. 7Kemaj okinmanotskej on intekipanojkaxiuan yejuan nemiyaj ipan on okse barco para ma kimpaleuikij. Niman yejuamej oualajkej, niman okitemiltijkej on ome barco ikan michimej niman hasta ye polakisnekiyaj. 8Niman ijkuak Simón Pedro okitak on tlen onochiu, onotlakuantelketstiaj ixpan Jesús niman okijlij:

—Xnechtlalkaui noTEKO, pampa nejua nitlajtlakolej.

9Simón niman nochimej on yejuan ompa iuan nemiyaj otlamojkaitakej, pampa okajsikej sanoyej miyek michin. 10No ijki onomojtijkej Santiago niman Juan, ikoneuan Zebedeo, yejuan no michajsikej katkaj ken Simón. Pero Jesús okijlij Simón:

—Maka xmomojti, pampa desde aman xok tikintejtemos michimej para tikinmajsis, yej tikintejtemos tlakamej para tikiminmachtis itlajtol Dios.

11Niman ijkuak okinkixtijkej on barcos itenko on atl, nochi ompa okajtejkej niman oyajkej iuan Jesús.

Jesús okipajtij sen kokoxki yejuan okipix on kualolistli itoka lepra

(Mt. 8.1-4; Mr. 1.40-45)

12Ijkuak Jesús nemiya ipan sen kalpan, ompa oyejkok sen tlakatl yejuan kipiyaya sen kualolistli itoka lepra. On kualolistli kipalanaltijtiaya miyekan ipan itlalnakayo. Ijkuak on tlakatl okitak Jesús, ixpan onotlakuantelkets niman onopachoj hasta ipan tlajli. Niman ijkin sanoyej* okitlajtlanilij:

—Señor, tla tikneki, uelis tinechpajtis.

13Kemaj Jesús okimatokak, niman okijlij:

—Nikneki. Aman xpajti.

Niman ijkuak Jesús ijkon okijtoj, on kualolistli nimantsin opopoliu ipan on tlakatl. 14Kemaj Jesús okinauatij on tlakatl para maka yakaj kitlajtlajtouilis akinon okipajtij. Okijlij:

—San xuiya niman xmoteititi itech on tiopixki para mitsitas ika xok tikualo. Niman pampa yotipajtik, xkuentlali on tlen Moisés otlanauatij. Ijkon tej, on tlakamej kitaskej ika yotipajtik.

15Pero on tlen Jesús kichiuaya más nouiyan machiyaya, niman miyek tlakatl nosentlaliaya itech para kakiskej niman para yejua kimpajtilis inkokolis. 16Pero Jesús miyekpa kintlalkauiyaya on tlakamej niman yaya ne kampa xakaj nemi para ompa kichiuaya oración.

Jesús okipajtij sen tlakatl yejuan sepojtoya

(Mt. 9.1-8; Mr. 2.1-12)

17Se tonajli ne kampa Jesús temachtiaya, yejyeuatikatkaj sekimej fariseos* niman on temachtijkej ikan tlanauatiltin yejuan ualeuayaj tlajtlaluis ipan on kalpanmej de Galilea, de Judea niman no de on ueyikalpan Jerusalén. Niman Jesús okipix ipoder Dios para kimpajtiaya on kokoxkej. 18Sekimej tlakamej oyejkokej yejuan kuajuikayaj ipan kojtlapechtli sen tlakatl yejuan sepojtoya. Niman kinekiyaj kalaktiskej ne kalijtik niman kitlaliskej ixpan Jesús. 19Pero xouelkej okalakkej, pampa miyek tlakatl ompa nemiya. Yejua ika otlejkokej ikuapan on kajli. Niman ijkuak yokejkuanijkej on tejas, okitemoltijkej on kokoxki ipan ikojtlapech intlajkotian on tlakamej, niman melajki ixpan Jesús. 20Ijkuak Jesús okitak ika on tlakamej tlaneltokayaj, okijlij on yejuan kualo:

—Tlakatl, motlajtlakoluan yonimitsintlapojpoluilij.

21Kemaj on temachtijkej ika tlanauatijli niman on fariseos* opeu ijkin kinemiliaj: “¿Akinon in tlakatl? ¿Tline* kuijuikaltia Dios ikan itlajtol? Xakaj ueli kitetlapojpoluilia tlajtlakojli, yej san Dios.”

22Pero Jesús kimatstikatka tlinon kinemilijtikatkaj, niman okinmijlij:

—¿Tline ijkon nenkinemiliaj? 23¿Katlejua más xtepopoloj nikijtos: “Motlajtlakoluan yonitlapojpoluilokej”, noso yej nikijtos: “Xmokuiteua niman xnejnemi”? 24Aman kuajli nejua nemechititis ika nejua, yejuan oninochiu Tlakatl, nikpiya itlanauatil Dios ipan in tlaltikpaktli para nitetlapojpoluilis tlajtlakoltin.

Kemaj okijlij on tlakatl yejuan sepojtoya:

—Tejua nimitsijlia, xmokuiteua, xkajkokui motlapech niman xuiya mochan.

25Nimantsin on tlakatl yejuan sepojtoya ouajnokuiteu imixpan on tlakamej, okajkoku itlapech yejuan ipan onoya niman oyaj ichan. Niman kueyilijtiaya Dios. 26Nochimej on tlakamej okintlatlachaltij on tlen onochiu, niman okueyilijkej Dios, niman ikan miyek nemojtijli okijtojkej:

—Aman yotikitakej on tlajtlamach* yejuan xkaman tikitayaj.

Jesús okinots Mateo para iuan yas

(Mt. 9.9-13; Mr. 2.13-17)

27Más sakin* ijkuak ijkon yonochiu, Jesús okis, niman okitak sen tlakatl itoka Leví yeuatikatka kampa tlacobraroua ikan impuestos. Niman Jesús okijlij:

—Xuajla nouan.

28Niman kemaj Leví ouajnotelkets, okajteu nochi, niman oyaj iuan Jesús.

29Más sakin*, Leví okichiu sen ueyi iluitl ichan para Jesús, niman ompa miyekej nemiyaj yejuan tlacobrarouaj ikan impuestos niman oksekimej más yejuan ompa inuan san sekan yejyeuatikatkaj itech mesa. 30Pero on fariseos* niman on temachtijkej ikan on tlanauatijli yejuan nopouaj inuan on fariseos* opejkej kinmichtakaajuaj on inomachtijkauan* Jesús, niman okinmijlijkej:

—¿Tline nemejuamej nentlakuaj niman nentlaonij inuan on yejuan tlacobrarojkej ika impuestos, niman inuan on tlajtlakolejkej?

31Jesús okinmijlij:

—On yejuan xkualoj xkimpoloua on tepajtijketl, pero on yejuan kualoj kemaj. 32Nejua xoniuajlaj para nikinnotsas on yejuan kuajkualtin, yej on yejuan tlajtlakolejkej para ma nokuepakan itechika Dios.

Jesús okijtoj tline inomachtijkauan* xnosauaj

(Mt. 9.14-17; Mr. 2.18-22)

33Kemaj yejuamej okitlajtoltijkej Jesús:

—¿Tline miyekpa nosauaj niman kichiuaj oraciones on yejuan nouikaj iuan Juan niman on yejuan nouikaj iuan on fariseos*, pero monomachtijkauan tlakuaj niman tlaonij?

34Jesús okinmijlij:

—¿Nemejuamej uelis nenkinnesaualtiskej on tlanotsaltin kampa nonamiktiua chika on novio ompa inuan nemi? 35Pero xmatstiakan ika yejkos on tonajli ijkuak on novio kinkixtiliskej, niman ijkuakon kemaj nosauaskej notemachtijkauan.

36No okixtij in okse ejemplo:

—Xakaj kiteki sen tlakentli* yenkuik para ika kitlamanilia sen tlakentli* ijsoltik. Tla yakaj ijkon kichiua, kixpoloua on yenkuik tlakentli*, niman no on yenkuik tlakentli* xok kuajli iuan nokaua on tlakentli* ijsoltik. 37Niman no xakaj kitlalia on yenkuik vino ipan on bolsas de kuetlaxtli ijsoltikej, pampa on vino posonis niman on bolsas toponiskej, niman kemaj on vino iuan on bolsas ixpoliuiskej. 38Yejua ika más kuajli notekas on yenkuik vino ipan bolsas de kuetlaxtin yenkuikej para ijkon on vino niman on bolsas de kuetlaxtin kuajli kixikoskej. 39Niman xakaj yejuan yokonik on vino yejuan youejkau yetikaj kinekis konis on yenkuik vino pampa nochi tlakatl kijtoua: “On vino yejuan youejkau yejyejtikaj, más uelik.”

Currently Selected:

San Lucas 5: nguNT

Highlight

Copy