San Lucas 2

Otlakat JesuCristo

(Mt. 1.18-25)

1Ipan on tonaltin, Augusto César yejuan más ueyi tlayekanketl katka ipan on países kampa tlamandarouaya Roma, otlanauatij para nochimej on chanejkej ipan on países ma kitemakatij intoka ipan on poualistli. 2In achtoj poualistli okichijkej ijkuak Cirenio tekiuaj katka ipan iueyitlalpan Siria. 3Ipan on tonaltin nochi tlakatl yaya cada se ipan ikalpan kampa otlakat para ompa onijkuiloto ipan on poualistli. 4José uejka teuejkakoneu katka itech David. Yejua ika okis ipan on kalpan Nazaret, yejuan onkaj ipan on iueyitlalpan Galilea, niman oyaj ipan on kalpan Belén, yejuan onkaj ipan on iueyitlalpan Judea kampa otlakat David. 5Yejua oyaj Belén para onijkuiloto ipan on poualistli iuan María yejuan kipiyaya compromiso para iuan nonamiktis. María koneuaj katka. 6Niman chika nemiyaj ompa Belén, oyejkok on tonajli para María kitlakatilis ikonetsin. 7Ompa okitlakatilij on iachtoj tlakakonetsin. Okitlatlapachoj ikan tela* niman okitekak ipan sen canoa, pampa xonkatka kampa noseuiskej ijtik on mesón.

Sen ángel okinmijlij sekimej tlajpixkej ika inTemakixtijkau yotlakat

8Nisiu ne Belén nemiyaj sekimej tlajpixkej yejuan nochi tlayoua nokauayaj ipan on tepetl kampa kintlajpiyayaj imborreguitos. 9Sen ángel yejuan toTEKO Dios okuajtitlan okinuajnotitij. Niman iueyilis toTEKO Dios ken sen tlauijli opetlan inyeualkan on tlajpixkej. Kemaj, yejuamej sanoyej* onomojtijkej. 10Pero on ángel okinmijlij:

—Maka xmomojtikan, pampa oniuajlaj para nemechmachistiko sen kuajli tlajtojli, yejuan uelis kipaktis nochi tlakatl. 11Aman ne ipan ikalpan David otlakat nemoTemakixtijkau. Yejua Cristo on nemoTEKO. 12Niman para nenkixmatiskej on konetsintli, nenkinextiskej tetejkuixtikaj ikan sen tela*, niman onotok ipan sen canoa.

13Kemaj nimantsin ne itech on ángel ouajnonextijkej sanoyej miyekej oksekimej ángeles yejuan oualejkej ne iluikak. Yejuamej kueyiliayaj Dios niman kijtouayaj:

14¡Ma kueyilikan Dios ne iluikak,

niman nikan tlaltikpak ma onya yolseuilistli intsajlan on tlakamej

yejuan kipiyaj itetlajsojtlalis* Dios!

15Kemaj ijkuak on ángeles onokuepkej ne iluikak, on tlajpixkej opeu kinojliaj:

—Tiauij Belén, niman ma tikitatij on tlen onochiu yejuan otechmachistij toTEKO.

16Nimantsin oyajkej niman okinextitoj María niman José, niman on konetsintli onotoya ipan sen canoa kampa tlakuaj yolkej. 17Ijkuak yokitakej, okitetlajtlajtouilijkej on tlen on ángel okinmijlij itechkopa on konetsintli. 18Niman nochimej yejuan okinkakkej otlapakamatkej ika on tlen on tlajpixkej kijtouayaj. 19Pero María okejeu ipan iyojlo nochi in tlajtojli niman sanoyej ika tlanemiliaya. 20On tlajpixkej onokuepkej ne kampa okinkajkej imborreguitos. Niman chika nokuepayaj, okueyilijkej niman okiyektenejkej Dios ipampa nochi on tlen okakkej niman okitakej. Nochi onochiu ken on ángel okinmijlij.

On konetsintli Jesús okuikakej ipan on ueyitiopan para okaxkatitoj toTEKO Dios

21Ipan chikueyi tonajli okitlalilijkej on neskayotl itoka circuncisión ipan inakayo on konetsintli niman okitokayotijkej Jesús. Okitokayotijkej sano ijki ken on ángel okijlij María ijkuak xe kanaya ikonetsin.

22Ijkuak yopanok on tonaltin ika José niman María yonochipajkej ijkon ken tlanauatia itlanauatil Moisés, yejuamej okuikakej Jesús ne Jerusalén niman okiyaxkatijkej* toTEKO Dios. 23In okichijkej pampa ipan itlanauatil toTEKO ijkin tlajkuilolnestikaj: “Nochi yejuan yenkuiyotlakakonetl ma kiyaxkatikan toTEKO.” 24Niman no oyajkej otlauentlalitoj, ijkon ken tlanauatia itlanauatil toTEKO: ome kokotetsitsimej noso ome pichontsitsimej.

25Ipan on tonaltin chantiya ne Jerusalén sen tlakatl itoka Simeón. Yejua kuajli tlakatl katka, niman kuajli kitlakaitaya Dios. Yejua kichaya kamanon tlakatis on yejuan kinyoltlalis ichanejkauan* on país Israel, niman on Espíritu Santo nemiya ipan. 26Niman on Espíritu Santo okimachistijka ika yejua xmikis hasta kitas on Cristo yejuan toTEKO kuajtitlanis. 27Niman on Espíritu Santo okuikak Simeón para oyaj ipan on ueyitiopan. Niman ijkuak José niman María okuikakej on konetsintli Jesús ne ipan on ueyitiopan para okichiuilijkej on tlen tlanauatia on tlanauatijli, 28Simeón okinapaloj on konetsintli niman ijkin okiyekteneu Dios:

29NoTEKO, aman ye uelis tinechkauilis para ma nimiki ikan yolseuilistli,

pampa aman yotikchiu tlinon otinechprometerouilij nejua nimotekipanojkau.

30Aman ikan nixtololojuan yonikitak on Temakixtijketl yejuan yotikuajtitlan,

31niman yejuan yotiktlalij ixpan nochi tlakatl.

32Yejua ken tlauijli yejuan kintlauiluis on yejuan xhebreos*

niman kinmakas ueyilistli mokoneuan hebreos*.

33José iuan María, inanaj Jesús, sanoyej okintlatlachaltij on tlen Simeón kijtouaya itechkopa on konetsintli. 34Kemaj Simeón okintiochiu, niman okijlij María:

—Xkita, Dios okitlalij in konetsintli ipan itekiu. Miyek tlakatl yejuan chanej* ipan in país de Israel ixpoliuiskej pampa xkineltokaskej mokoneu, niman miyek tlakatl no kiseliskej on nemilistli yejuan para nochipa pampa kineltokaskej. Niman yejua kiteititis on ojtli para kalakiskej ne itech Dios, pero miyekej yej kixnamikiskej. 35Niman ijkon miyekej kiteititiskej ken kinemiliaj ipan inyojlo. Niman para tejua, nochi in ken itlaj espada yes yejuan kitsopinis moalma.

36No, ompa nemiya sen siuatl tiotlajtojketl, itoka Ana. Itataj katka Fanuel, yejuan kisaya itech itribu* Aser. On siuatiotlajtojketl sanoyej lamajtsin katka niman ononamiktijka pero san chikome xipan onen iuan iueuentsin, 37niman kemaj yejua kauajli katka hasta ye kipiyaya 84 xipan. Xkaman kisaya ipan on ueyitiopan, yej kitekipanouaya toTEKO ikan tonajli niman yeuajli, ikan nesauajli niman ikan oraciones. 38Niman chika Simeón tlajtlajtouaya iuan María niman José, yejua okinnisiuij niman opeu kimaka tlaxtlauijli Dios. Niman kemaj opeu kinnojnotsa de on konetsintli Jesús nochimej on yejuan no kimachayaj on temakixtijketl para kimanauis Jerusalén.

Jesús iuan itajuan onokuepkej para Nazaret

39Kemaj ijkuak José niman María yokichijkej nochi on tlen tlanauatia itlanauatil toTEKO, onokuepkej para oyajkej ipan on inkalpan Nazaret yejuan onkaj ne ipan iueyitlalpan Galilea. 40Niman on telpokakonetl Jesús noskaltiaya niman kajsitiaya más chikaualistli niman miyek tlamatkilistli*, niman kiseliaya itlatiochiualis Dios.

On telpokakonetl Jesús nemiya ipan on ueyitiopan

41Cada xipan itajuan Jesús yayaj Jerusalén para kompanouayaj on iluitl itoka Pascua*. 42Niman ijkuak Jesús okajxitij majtlaktli uan ome xipan, oyajkej Jerusalén ijkon ken nouikayaj. 43Ijkuak otlan on iluitl niman nochi tlakatl nokuepaya para ichan, on telpokakonetl Jesús onokau ne Jerusalén. Pero inanaj niman itataj xokimatkej ika yejua onokau. 44Yejuamej kinemiliayaj ika Jesús yaya intsajlan on tlakamej. Yejua ika ijkuak se tonajli yonejnenkaj, kemaj opeu kitejtemouaj intech on ifamilias niman intech inteixmatkauan. 45Pero ijkuak xokinextijkej, onokuepkej Jerusalén para ompa okitejtemotoj.

46Niman ipan yeyi tonajli sakin* okinextitoj ipan on ueyitiopan. Yeuatikatka intsajlan on uejueyixtokej temachtijkej yejuan kitemachtiaj itlanauatiluan Dios. Ompa kinkaktikatka niman no miyek tlamach kintlajtoltiaya. 47Niman nochimej yejuan kakiyaj kipakaitayaj ika on kuajli itlamatkilis* yejuan ika tenankiliaya. 48Ijkuak itajuan okitakej, opakatlachixkej, niman inanaj okijlij:

—Nokonetsin, ¿tline* ijkin otitechchiuilij? Motataj niman nejua sanoyej yotimojkamikej chika timitstejtemouaj.

49Niman Jesús okinmijlij:

—¿Tline nennechtejtemouaj? ¿Tline xnenkimatij ika nejua ika onkaj ninotekimakas ipan on tlajtlamach* yejuan iyaxka* noTajtsin?

50Pero yejuamej xokajsikamatkej tlinonon yejua okinmijlij.

51Kemaj, inuan onokuepkej para Nazaret, niman yejua kintlakamatiya. Niman inanaj kejeuaya ipan iyojlo nochi on tlajtlamach* yejuan nochiuaya. 52Niman Jesús más noskaltijtiaya niman más kajsitiaya itlamatkilis*. Niman Dios pakiya ipampa Jesús niman on tlakamej no pakiyaj ipampa.

Currently Selected:

San Lucas 2: nguNT

Highlight

Copy