San Lucas 1

San Lucas okitlajkuiluij Teófilo para kimachistis on tlen melauak itechkopa on kuajli tlajtojli

1Notlajsojka Teófilo, miyekej tlakamej okijkuilojkej kenijki onochiu on tlajtlamach* yejuan onochiu totsajlan. 2Nochi okijkuilojkej ijki ken otechmachistijkej on yejuan okitakej nochi on tlajtlamach* tlen onochiu desde ipeuyan, niman yejuamej okiteijlijkej itlajtol Dios. 3Nejua no kuajli onitetlajtlajtoltij nochi on tlajtlamach* yejuan onochiu desde ipeuyan. Yejua ika, tejua ueyixtikaj Teófilo, nikuitia kuajli para nimitstlajkuiluis niman nimitstekpanilis nochi ken onochiu on tlajtlamach*. 4Ijkon tej, kuajli tikmatis nochi on tlen melauak itechika on tlajtlamach* yejuan omitsmachtijkej.

Sen ángel okijlij Zacarías ika isiuau kitlakatilis ikoneu

5Nochi on tlajtlamach* opeu ijkuak on rey Herodes tlamandarouaya ipan iueyitlalpan Judea. Ipan on tonaltin nemiya sen tiopixki itoka katka Zacarías, yejuan teuan nopouaya intech on tiopixkej yejuan igrupo Abías. Isiuau Zacarías itoka katka Elisabet. Yejua teuejkakoneu katka itech on tiopixki Aarón. 6On omemej yolchipajkej katkaj ixpan Dios niman kitlakamatiyaj nochi on itlanauatiluan toTEKO, niman ijkon tej, xakaj ueliya itlaj ika kintlajtlakolmakaya. 7Pero xkipiyayaj inkoneuan, pampa Elisabet tetsakatl* katka, niman sanoyej* ye ueuentsitsinmej katkaj.

8Ijkuak oyejkok on tonaltin para tekitis on grupo kampa Zacarías nopouaya, yejua otekit ixpan Dios. 9On tiopixkej kipiyayaj costumbre para kitlapejpeniayaj ikan suerte sen tiopixki, para kitlatiaya on xochikopajli ipan iueyitiopan toTEKO, niman Zacarías yejua okitocaroj kitlatis. 10Chika kitlatiaya on xochikopajli, nochi tlakatl kichijtikatkaj oración ne ikiauak on ueyitiopan. 11Kemaj sen ángel yejuan toTEKO okuajtitlan, ouajnonextij nisiu itech Zacarías. On ángel ijkatikatka iyekmakopa on tlaixpan* kampa notlatia on xochikopajli. 12Ijkuak Zacarías okitak on ángel, xok kimatiya tlen kichiuas niman sanoyej onomojtij. 13Pero on ángel okijlij:

—Maka xmomojti, Zacarías. Dios yokak mooración, niman mosiuau Elisabet kitlakatilis itlakakoneu. Niman Tiktokayotis Juan. 14Sanoyej tipakis niman no miyekej pakiskej ipampa itlakatilis mokoneu. 15Ijkin nochiuas, pampa yejua ueyixtias ixpan Dios. Yejua xkonis vino nion itlaj okse yejuan tetlauantij, niman on Espíritu Santo nochipa kiyoltemitis desde ijkuak tlakatis. 16Yejua kichiuas para miyekej tlakamej yejuan tekoneuan itech Israel ma nokuepakan niman ma kitlakamatikan toTEKO yejuan iminDios. 17Juan yas iyakapan toTEKO ikan iyolchikaualis niman poder ken on yejuan okipix on tiotlajtojketl Elías. Yas iyakapan toTEKO, niman kichiuas para on tatajtin ma kintlajsojtlakan inkoneuan, niman no kichiuas para on yejuan xkitlakamatij Dios ma kitlakamatikan, ijkon ken on yejuan kuajkualtin tlakamej. Ijkon kinmelajkatlalis on tlakamej para ueliskej kiseliskej toTEKO.

18Pero Zacarías okitlajtoltij on ángel:

—¿Kenijki nikmatis ika on tlen otikijtoj melauak?, pampa nejua sanoyej ye niueuentsin niman nosiuau no ye lamajtsin.

19Niman on ángel okinankilij:

—Nejua niGabriel, niman niitekitkau Dios. Dios tej, onechajtitlan ma nimitsnotsaki para nimitsijlis in kuajli tlajtojli. 20Pero xotikneltokak tlinon onimitsijlij. Yejua ika tinontias. Xuelis titlajtos hasta ijkuak tlakatis mokoneu.

21On tlakamej yejuan kichixtikatkaj Zacarías ne kiauak, xkimatiyaj tlinon kinemiliskej, pampa yejua youejkajka ika xuajkisaya de ijtik on ueyitiopan. 22Niman ijkuak Zacarías ouajkis, xueliya kinnojnotsaya. Yejua ika, on tlakamej okajsikamatkej ika yejua okitak itlaj tetlatlachalistli yejuan ken itemikpan ijtik on ueyitiopan. Niman yejua sa kinmanotsaya, pampa xok ueliya tlajtouaya.

23Ijkuak otlan on tonaltin ika Zacarías tekiti ne ipan on ueyitiopan, okis niman oyaj ichan. 24Más sakin*, Elisabet on isiuau, ones ika ye kipiya ikoneu, niman makuijli metstli oniyan ne ichan. Ijkin kinemiliaya: 25“Aman toTEKO ijkin onechchiuilij ikan iteiknelilis* para xok nipinauas imixpan oksekimej.”

Sen ángel okijlij María ika kitlakatilis sen konetsintli

26Ijkuak Elisabet ye kipiyaya ikoneu chikuasen metstli, Dios okuajtitlan on ángel Gabriel ipan sen kalpan de Galilea itoka Nazaret. 27Dios okititlan para kinotsas sen ichpochtli, yejuan xe yakaj tlakatl iuan notekaya, itoka María. María yokitlalijka compromiso para nonamiktis iuan sen tlakatl itoka José yejuan sa teuejkajkoneu katka itech David. 28On ángel okinisiuij María niman okijlij:

—Nimitstlajpaloua tlatiochijkasiuatl itechDios. ToTEKO mouan nemi. Dios más omitstiochiu de nochimej on siuamej.

29Pero ijkuak María okak on ángel, okimojkakak itlajtol, niman sano yejua kinotlajtoltiaya tline* ijkin okitlajpaloj. 30Pero on ángel okijlij:

—Maka xmomojti María, pampa Dios sanoyej yomitstiochiu. 31Aman tikanas mokonetsin niman tiktlakatilis sen tlakakonetl. Niman tiktokayotis Jesús. 32Yejua ueyixtias niman itoka yes teKoneu itech on más ueyixtikaj Dios. Niman Dios toTEKO kitlalis para Rey yes, niman kipiyas on tekiuajyotl yejuan iuejkatataj David okipix. 33Yejua tlamandaros para nochipa ipan on país de Israel, niman itekiuajyo xkaman tlamis.

34Kemaj María okitlajtoltij on ángel:

—Nejua xe yakaj tlakatl iuan ninemi. Yejua ika tej, ¿kenijki uelis nochiuas in?

35Niman on ángel okinankijlij:

—On Espíritu Santo mopan uajlas, niman ipoder on yejuan más ueyixtikaj Dios kichiuas sen milagro tejua mopan. Yejua ika, on konetsintli yejuan tlakatis yolchipauak yes niman itoka yes iKonetsin Dios. 36Xkelnamiki moprima Elisabet yejuan kimatij ika xueli nokoneana. Aman ye kipiya chikuasen metstli ika koneuaj maski yejua lamajtsin. 37Ijkon nochiuas pampa xitlaj* onkaj yejuan Dios xueli kichiua.

38Niman kemaj María okijtoj:

—Nejua niitekipanojkau noTEKO. Ma ijki nochiua ken yotinechijlij.

Kemaj on ángel oyaj.

María okinotsato Elisabet

39Ipan on tonaltin María okajsik iojui. Niman amanaman oyaj ipan on tepemej hasta oajsik ipan sen kalpan ne Judea. 40Ijkuak oajsik ipan on kalpan, okalak ichan Zacarías niman okitlajpaloj Elisabet. 41Niman ijkuak Elisabet okak itetlajpalol María, on ikonetsin onolinij ijtik, niman on Espíritu Santo okiyolten Elisabet. 42Kemaj Elisabet okijtoj chikauak:

—Dios más omitstiochiu xken nochimej on siuamej, niman no yokitiochiu on konetsintli yejuan tiktlakatilis. 43¿Akin nejua tej, ika tejua yejuan inanaj noTEKO otiuajlaj para otinechnotsako? 44Nimantsin ijkuak otinechtlajpaloj, nokonetsin onolinij ikan paktli nikan nojtik. 45Dios mitstiochiua tejua yejuan otikneltokak ika nochiuas on tlen okijtoj.

46Kemaj María okijtoj:

Noalma kiueyilia noTEKO,

47niman noyojlo nopaktia itech Dios yejuan noTemakixtijkau,

48pampa yejua onechelnamik nejua maski xniiueyitekipanojkau.

Niman desde aman nochimej nechtokayotiskej nitlatiochijkasiuatl.

49Ijkon nochiuas pampa Dios yejuan nochi ueli kichiua, okichiu uejueyi tlajtlamach* para nejua.

Yejua yektitikaj.

50Nochipa kimpiyalis teiknelilistli* nochimej yejuan kitlakaitaj.

51Yejua okiteititij ipoder ikan on tlen okichiu.

On yejuan noueyimatij niman san tlamach xkuajli kinejnemiliaj,

Dios xkinkauilia ma kichiuakan tlen kinekij.

52On uejueyitlayekankej reyes okinkixtij kampa tlamandarouayaj,

niman yej okinmakak ueyilistli on yejuan yolyemankej.

53Yejuan apismikiyaj, okinmakak nochi tlen kuajli,

niman xitlaj* okinmakak on yejuan ricos.

54Okipaleuij on país de Israel yejuan itekipanojkau.

Niman yejua xokelkau kiknelis Israel,

55ijkon ken okimakak ipromesa on touejkatataj Abraham,

niman nochi kech tekoneuan para nochipa.

56María onokau iuan Elisabet kanaj yeyi metstli,

niman kemaj onokuep para ichan.

Otlakat Juan on tlakuatekijketl

57Oajsik on tonajli para Elisabet kitlakatilis ikonetsin, niman okitlakatilij sen tlakakonetl. 58Kemaj inisiuchanejkauan* niman on yejuan ken kintaj, ijkuak okakkej ken toTEKO sanoyej kuajli okitiochiu, pakiyaj iuan. 59Kemaj ipan chikueyi tonajli oyajkej para okitlalilitoj on neskayotl itoka circuncisión* ipan inakayo. Niman kinekiyaj kitokayotiskej Zacarías ken itataj, 60pero inanaj okijtoj:

—Ka. Itoka yes Juan.

61Niman okijlijkej:

—¿Tline ijkon itoka yes? Ipan mofamilia xakaj nemi yejuan ijkon itoka.

62Kemaj okimanotskej itataj on konetsintli para kimatiskej kenijki yejua kineki kitokayotis. 63Niman itataj okitlajtlan se amatl para ompa okijkuiloj ken itoka yes on ikoneu. Niman ijkin okijkuiloj: “Itoka Juan.” Niman nochimej okintlatlachaltij ika ijkon okitokayotij. 64Kemaj nimantsin Zacarías ouel otlajtoj oksejpa, niman opeu kiyekteneua Dios. 65Yejua ika, nochimej on ichanekauan otlapakaitakej. Niman nochiuiyan ipan on tepemej yejuan onkaj ipan on iueyitlalpan Judea kiteijliayaj on tlen onochiu. 66Nochimej on yejuan kakiyaj on tlen onochiu ijkin tlanemiliayaj niman kinotlajtoltiayaj: “¿Manin, tlinon itekiu yes in tlakakonetl?” Melauak ipoder toTEKO ipan onkaj.

Zacarías okiteijlij on tlen Dios okijlij

67On Espíritu Santo okiyolten Zacarías itataj on tlakakonetl, niman ika on yektlajtojli yejuan Dios okimakak, okijtoj:

68Ma tikueyilikan toTEKO Dios, on iminDios on hebreos*,

pampa yotechitako niman yotechmakixtiko.

69Yotechmakak sen ueyi Temakixtijketl

yejuan teuejkakoneu itech David on itekipanojkau.

70Ye uejkaui ijkin okijtoj intechkopa on iyektiotlajtojkauan,

71ika yejua techmakixtis intech on totlauelikniuan,

niman itech impoder nochimej on yejuan techtlauelitaj.

72Ijkon okichiu para techmakas on teiknelilistli* yejuan okimprometerouilij touejkatajuan,

niman xkelkaua on ichipajkapacto*.

73In yejua on promesa yejuan Dios okiprometerouilij

ikan tlajtolmakalistli itech on toachtojtataj Abraham

74ika techmanauis intech on totlauelikniuan, para xikan nemojtijli tiktekipanoskej

75ikan chipajkanemilistli niman ikan melajkanemilistli nochi tonaltin ipan tonemilis.

76Niman tejua, nokonetsin Juan,

mitstokayotiskej itiotlajtojkau on más ueyixtikaj Dios,

pampa tejua tias iyakapan on toTEKO para tikuektlalijtias iojui.

77Titemachistis ika kiseliskej temakixtilistli

ijkuak Dios kintlapojpoluilis intlajtlakoluan.

78ToDios sanoyej teiknelia.

Ikan iteiknelilis* kinuajtitlanilis on Temakixtijketl yejuan ualeua iluikak.

79Niman on Temakixtijketl kinmakixtis yejuan tlajtlakouaj

niman yejuan nemij ipan mikilistli.

Yejuamej no kinmakas yolseuilistli.

80Niman on tlakakonetl noskaltiaya niman chikajtiaya itech Dios. Niman yejua ochantik neka xalpatlajkan hasta ipan on tonajli ijkuak yejua onoteititij intech on tlakamej yejuan chantij ipan on país de Israel.

Currently Selected:

San Lucas 1: nguNT

Highlight

Copy