Joannostir 21
21
Džeļ, 21.
1Pošļe dava noko sikadžapes Iisusos Peskīre sikļaibnangīrenge ko Tiberiatskako moros. Sikadžapes jake:
2Isis khetane Simanis Petris, te Foma, dīno goli dvoikos, te Nafanailos Gaļileiskakīre Kānatir, te Sevedejoskīre čhāve, te dui vār Leskīre sikļaibnangīrendir.
3Simanis Petris rakirla lenge: džava uhtilav mačen. Rakirna leske: javen me nin tusa. Gīne, te zaras gīne ane laiva, te niso nauhtilde an do rat.
4Ne kedi javdža tašarla, Iisusos tardija pe berga; ne sikļaibnangīre napinčkirdle, so dava Iisusos.
5Iisusos rakirla lenge: čhāve! isi hobi tumenge savo hāben? Jone otphendle Leske: nāni.
6Jov phendža lenge: thurden mačenge uhtilbnaskīri pe lači rīg laivake, te uhtilen. Jone zathurdīne, te uže naštandīne vitirden mačenge uhtilbanaskīri vašo mačengo būtipen.
7Togi sikļaibnangīro, sajes miļinis Iisusos, rakirla Petriske: dava Raij. Simanis Petris, šunindoi, so dava Raij, obphandžapes idžensa (hai jov isis nango), te thudijapes ano moros.
8Ne vār sikļaibnangīre dodīne plima ane laiva (hai nadur isis phujatir, sai dui šel kuņa), tirdīndoi mačenge uhtilbnaskīri mačensa.
9Kedi vijavdle pe phu, dikhena kerdi jāg te pe lake čhudle mače te māro.
10Iisusos rakirla lenge: janen mačen, sajen kana tume uhtilde.
11Simanis Petris gija te vitirdija pe phu mačenge uhtilbnaskīri, pherdi bāre mačensa, saje isis šel te pandžvardeš te trin; te ke jake būtipen napšeriskandija mačenge tirdipnaskīri.
12Iisusos rakirla lenge: javen, han, sikļaibnangīrendir nikon našmijandija Lestir phučel: kon Tu?, džinindoi, so dava Raij.
13Iisusos jāvela, lela māro, te dela lenge, jake nin mačen.
14Dava uže ano trito molos sikadžapes Iisusos Peskīre sikļaibnangīrenge pošļi Peskīro opreuštiben mulendir.
15Kedi jone pohane, Iisusos rakirla Simaniske Petriske: Simani Ioannosko čhāvo! mīļinesa hobi tu Man butir, nasir jone? Petris rakirla Leske: jake, Raija! Tu džines, so me mīļina Tūt. Iisusos rakirla leske: paščakir Mīre jerhen.
16Oščo rakirla leske ano vār molos: Simani Joannosko čhāvo! mīļinesa hobi tu Man? Petris rakirla Leske: jake, Raija! Tu džines, so me mīļina Tut. Iisusos rakirla leske: paščakir Mīre bakren.
17Rakirla leske ano trito molos: Simani Ioannosko čhāvo! miļinesa hobi tu Man? Petris obsmetņandija, so ano trito molos phučja lestir, mīļinesa hobi Man?, te phendža Leske: Raija! Tu sāro džines; Tu džines, so me miļina Tut. Iisusos rakirla leske: paščakir Mīre bakren.
18Lašņes, lašņes rakirava tuke: kedi tu isanas tarno, togi pšephandžantut kokoro te gijan, kai kamdžan; ne kedi phurjosa, togi vidžinčkiresa tīre vasta, te vār pšephandela tut, te lidžala, kai nakamesa.
19Phendža dijindoi dava, mehaļol sai šmerčasa Petris vislavini Davles. Te, zāras pošļi da pheniben, rakirla leske: Jov pal Mange.
20Petris, rišindoi pāle, dikhela so javela pal lenge sikļaibnangīro, sajes miļinis Iisusos te savo pe beļveļakīro, doklonindoipes ko kolin Iisuskīro Leskīro, phendža: Raija! kon pšedela Tut?
21Les dikhindoi, Petris rakirla Iisuske: Raija! ne jov so?
22Iisusos rakirla leske: keļi Me kama, sobi jov mejačel, poskil javava, so tuke ke dova? tu jov pal Mange.
23Te vilidžijapes da lav maškir pšalenge, so sikļaibnangīro dova namerla. Ne Iisusos naphendža leske, so namerla, ne: keļi Me kama, sobi jov mejačel, poskil javava, so tuke ke dova?
24Sikļaibnangīro dava švatkini dalestir, te čhindža dava; te džinas, so lašņo leskīro švatkuma.
25Būt nin vār kerdža Iisusos; ne, keļi čhinen dolestir sāro so, togi dufinava, so kokore svetoske nazačhuvel an začhindle lila. Amin.
Currently Selected:
Joannostir 21: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
