Joannostir 20
20
Džeļ, 20.
1Pšeršo dīves ano kurko Marija Magdaļina javdža ko grobos zorasa, kedi oščo isis čemno, te dikhela, so bar otriškirdo grobostir.
2Tejake uhtela, te javela ko Simonos Petris te ko vār sikļaibnangīro, sajes miļidža Iisusos, te rakirla lenge: vijandle Ras grobostir te nadžinas, kai čhudle Les.
3Te zaras vigija Petris te vāvir sikļaibnangīro, te gīne ko grobos.
4Jone uhle sāre dui khetane; ne vāvir sikļaibnangīro uhča sīgnidīr Petristir, te javdža ko grobos pšeršo.
5Te, doklonindoipes, dikhša čhudle cerhi; ne nazagija ano grobos.
6Pal leske javela Simanis Petris, te džala ano grobos, te dikhela jek cherhi čhudle;
7Te dikhloro, savo isis pe Leskīro šēro, na cerhensa isis čhudlo, ne peske zapačkirdo po vār štetos.
8Togi zagija andre nin vār sikļaibnangīro, kon vāgo javdža ko grobos, te dikša, te pačandija.
9Hai jone oščo nadžindle čhinibnandir, so Leske jālapes opreuštel mulēndir.
10Te jake sikļaibnangīre rišīne pāle ke pe.
11Ne Marija tardija ko grobos te rovdža. Te kedi rovdža, doklonindžapes ano grobos,
12Te dikhela dui Jaņolen, ano parno uraiben bešle, jekhes ko šēro te vāvres ko pīre, kai isis pašle Iisuskīre masa. v
13Te jone rakirna lake: džūli! so tu rovesa? rakirla lenge: lidžīne krig Ras mīres, te nadžinav, kai čhudle Les.
14Phendža dava, te obrišija pāle, te dikša Iisusos tardes; ne napinčkirdža, so dava Iisusos.
15Iisusos rakirla lake: džūli! so tu rovesa? kones radesa? Joi, dufindoi, so dava bārjakīro, rakirla Leske: rajale! keļi tu vijandžan Les, phen mange, kai tu čhudžan Les, te me lava Les.
16Iisusos rakirla lake: Marija! Joi, obrišija, te rakirla Leske: Ravvuni! — dova značini: Sikļakirbnaskīro!
17Iisusos rakirla lake: nauhtiltut ke Me, hai Me oščo nagijom ke Mīro Dād; ne dža ke Mīre pšala te phen lenge: opredžava ko Mīro Dād te ko Dād tumāro, ko Dēvēl Mīro te ko Dēvēl tumāro.
18Marija Magdaļina džāla te phenela, sikļaibnangīrenge, so dikša Ras te so Jov lake dava phendža.
19An do kokoro kurkesko pšeršo dīves belveļe, kedi udār khēreskīro, kai žakede — naspen sikļaibnangīre Leskīre, isis zaklīdume rakhindoipes. Judendir, javdža Iisusos, te tardīja maškirāl, te rakirla lenge: pokoinuma tumenge!
20Kedi dava phendža, Jov sikadža lenge vasta te pīre te bokos Peskīro. Sikļaibnangīre radžakirdnepen, dikhindoi Ras.
21Iisusos phendža lenge vār molos: pokoinuma tumenge! sir bičadža Man Dād, te jake Me bičava tumen.
22Kedi phendža dava, phurdija, te rakirla lenge: dolen Svencono Duhos.
23Koneske otmukhena grehi, doleske jāna otmukhle; pe koneske jačakirna, pe doleske jačena.
24Foma, jek dešodujendir, dīno goli dvoikos, naisis doi lensa, kedi javdža Iisusos.
25Vār sikļaibnangīre phendle leske: me dikhjam Ras. Ne jov phendza lenge: keļi nadikhava pe Leskīre vasta do džirki čvekendir, te načhuva mīro palcos ano džirki čvekendir, te načhuva vast mīro an Leskīro bokos, napačava.
26Pošļi ohto dīvesa noko isis ano khēr sikļaibnangīre Leskīre te Foma lensa. Javdža Iisusos, kēdi udār isis zaklīdume, tardija maškir lenge, te phendža: pokoinuma tumenge!
27Pošļi rakirla Fomake: pode tīro palcos darīk, te podik vasta Mīre; pode vast tīro, te čhuv ano bokos Mīro; te nasan napačaibnaskīro, ne pačaibnaskīro.
28Foma phendža Leske ano otpheniben: mo Raij te mo Dēl!
29Iisusos rakirla leske: tu pačandijan vašo dova so dikšan Man; švenčume dola kon nadikhena te pačana.
30Būt kērdža Iisusos angil Peskīre sikļaibnagīrenge vār dživi nin, sajendir nāni začhindle an da lil.
31Dava isi začhindlo, sobi tume mepačan, so Iisusos isi Hristos, Davlesko Čhāvo, pačandoi, mejāl tumenge džīben an Leskīro lav.
Currently Selected:
Joannostir 20: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
