Yoznaz Saw 1
1
Yoznaz deuzndoj Yehhozvaz
1Miz ngoenz he, Yehhozvaz doiq Yoznaz, daeglwg Yaqmijdaiq naeuz: 2“Mwngz majcangq bae daengz Niznizveih Singz bae fok gij vunz mwnq, aenvih gyoengqde gig yakrwix; gou yawj mbouj goq ra. Mwngz bae gingjgauq gyoengqde, naeuz gou ijvanh buenqhingz gyoengqde.”
3Hoeng Yoznaz mbouj dingq de, dauqfanj bae daixlingh mbiengj bae, siengj deuzndoj Yehhozvaz. De deuz bae daengz Yozbaq gangj; youq mwnq de nyangz aen ruz hung ij hoi bae Dahswh he. De raen yienghneix le, couh hoi ngaenz, couh hwnj aen ruz mwnq bae, dajsuenq gaen gyoengq fou gwnz ruz bae daengz Dahswh, deuz bae gyae'gyae ndoj Yehhozvaz.
4Cingq youq aen ruz bae hih mwhde, Yehhozvaz hawj gwnz haij fan rumz hung. Rumz hung raemx hung bongx hwj ruz ij vaih. 5Gyoengq fouruz raen yienghneix le, bouxboux cungj lau hwj simvueng liux, vueng hwj gag vunz gag yiengq gij cwnz bonjfaenh hemqgouz gouq. Gajlaeng vihliux mbouj hawj aen ruz baenqlai naek, gyoengqde couh dawz gij doxgaiq ndaw ruz cenzbuq gveng roengz haij bae.
Hoeng mwhneix Yoznaz gaenq youq ndaw ruz ceiq lajdaej he aen canghruz ninz ralaep lo, ninz hwj ndaek fwjfwq. 6Couh youq mwhneix, boux guenj ruz mwnq, de raen Yoznaz youq mwnq ninz le, couh ndatheiq hwj byaij goqbae fok de naeuz: “Veix! Daengz mwhneix mwngz cungj lij ninz baenxlai ndaek hajx? Vaiqdi hwnq! Vaiqdi yiengq gij cwnz mwngz gouz gouq bax! Saekseiz gij cwnz mwngz dauq hojsik raeuz, dauq ndaej gouq gij mingh gyoengqraeuz.”
7 Gajlaeng rumz hung raemx hung cungj vanzlij ci mbouj dingz. Fouruz raen yienghneix le, couh daixgya cimciek naeuz: “Aex, raeuz nipgaeu bax! Nipgaeu yawjyawj dwg byawz daiq ciengz nanh neix daeuj.” Gyoengqde yienghneix cimciek le, couh nipgaeu. Gajlaeng Yoznaz ngamqngamq luj letlet nip dawz diuz ciem naeuz miz nanh mwnq. 8Gyoengqde raen le, couh cam Yoznaz naeuz: “Naeuz raeuz ni, ciengz nanh neix dwg mbouj dwg youz mwngz daiq daeuj hih? Mwngz dwg guh gijmaz hih? Daj mwnqlaw daeuj? Dwg aen gueklaw dih vunz? Aen minzcuzlawz?”
9Gajlaeng, Yoznaz han naeuz: “Gou dwg Hihbwzlaiz vunz. Gou baiq dih cwnz dwg Yehhozvaz; de dwg Cangqdiq, boux ceiq ak ceiq miz gienz dih cwnz. Sojmiz dih gwnzmbwn caeuq lajdeih cungj dwg de cauh okdaeuj dih.” 10De vanzlij caiq naeuz: “Gou vih ij deuzndoj de cij deuz daeuj daengz neij lah.”
Gyoengqde dingq le, cungj lau hwj dungxmbouq ndangsaenz liux, couh naeuz: “Aixyax, cungj saeh neix mwngz caemh guh ndaej okdaeuj?”
11Mwhneix rumzrumz raemxraemx engqgya yied ci yied hung. Gyoengqde couh cam Yoznaz naeuz: “Raeuz ij baenzlawz fad mwngz cij ndaej hawj rumz raemx hung dingz roengzma nej?”
12Yoznaz naeuz: “Gou cungj rox naeuz sou roeb daengz raq rumz hung neix dwg youz gou yinxhwnj hih. Sou couh dawz gou gveng roengz haij bae bax; gveng roengzbae le, rumz hung raemx hung swhmboujyienz couh gag dingz roengzma lo.”
13Yoznaz gan yienghneix naeuz lah, hoeng gyoengq fouruz vanzlij buekmingh vad ruz, ijsiengj vad haeuj hamq bae. Hoeng rumz hung yied bongx yied rem, gaenhbaenj mij banqfaz ndaej doxbae. 14Gajlaeng gyoengqde fug lo, couh hemqgouz Yehhozvaz naeuz: “Yehhozvaz hax! Raeuz mij miz banqfaz lo; cij ndei dawz Yoznaz gveng roengz haij bae lo. Gouz mwngz gaejyungh vih gienh saeh neix hwj fad hawj gyoengqraeuz rai bae, aenvih raeuz gaenhbaenj mbouj rox de miz mbouj miz coih. Hauhnaeuz de mbouj miz coih, raeuz loek vwt diuz mingh de, gouz mwngz gaejyungh vih yienghneix hwj couh hawj raeuz rap diuz coih neix, aenvih raeuz rox, sojmiz dih saeh, mwngz cungj dwg ciuq gij cawjeiq bonjfaenh mwngz bae guh hih.”
15Gyoengqde yienghneix gangjgouz sat le, couh dawz Yoznaz gveng roengz ndaw haij bae. Gyoengqde baex gveng roengzbae he, rumz raemx hung couh majcangq doq dinghcub. 16Gyoengqde raen yienghneix le, cungj gig beiqfug gig gingqcungh Yehhozvaz, vanzlij bwiz de, caiq yiengq de baujcingq baezneix guxmaz guxmaz.
17Yoznaz nej, de ngaiz gveng roengz haij bae le, Yehhozvaz nganhbaiz duz bya hung he goq daeuj, dawz de gyan roengzbae. De youq ndaw dungx duz bya hung sam ngoenz sam ngwnz.
Currently Selected:
Yoznaz Saw 1: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
