Lizsij dih Gaihcij 8
8
Raemx roengz
1Cangqdiq mbouj lumz Nozyaq caeuq gaen de haeuj ndaw ruz bae hih doenghduz, couh hawj miz rumz ci, ci hawj gij raemx roengz. 2Mboq raemx laj doem caeuq gij raemx gwnz mbwn cungj gven bae, fwn caemh dingz lo. 3-4Yiengq raemx couh menhmenh roengz. [4]Daengz caetnyied cibcaet hauh le, aen ruz couh gak youq Yaqlahlaz canhgih dih aen bya he. [3b]Couh dwg naeuz dajlwh Nozyaq haeuj ruz daengz aen ruz gak youq gwnz bya miz bakhaj ngoenz. 5Raemx vanzlij menhmenh roengz, daengz cibnyied it hauh, couh gaihcij loh raen dingjbya lo.
6Caiq goq seiqcib ngoenz le, Nozyaq couh hoi conghcang ruz, 7coengq duz roegga he. Yiengq duz roegga neix mbin bae mbin dauq, mbin daengz raemx roengz liux. 8Yiengq Nozyaq caiq coengq duz roegguqgap he okbae, siengj yawjyawj raemx roengz liux mijyaengz. 9Hoeng, raemx vanzlij dumh; duz roegguqgap gaenhbaenj mij mwnq dieg ndaej ndwn he, yiengq duz de couh doiqyungz mbin ma boiz. Nozyaq raen le, couh iet fawz ciep duz de haeuj maj ndaw ruz boiz. 10Gajlaeng Nozyaq caiq daengj caet ngoenz. Caet ngoenz le, de caiq doiqyungz coengq duz roegguqgap he okbae. 11Ok bae daengz yiengqhaemh le, duz roegguqgap mwnq ndaw bak de gamz miz mbaw makmbi ngamq mbaet he, mbin ma daengz Nozyaq mwnq. Yiengq Nozyaq couh rox naeuz raemx roengz lo. 12Caiq goq caet ngoenz le, Nozyaq youhcaiq coengq duz roegguqgap okbae, hoeng mbat neix mij raen duz roegguqgap caiq mbin ma laem lo.
13Bi Nozyaq ndaej roekbak lingz it bi dih yienznyied it hauh, raemxdumh dungjdungj roengz liux lo. Yiengq Nozyaq couh hoi gij goemq aen ruz hwj ndomq ok rog daeuj yawj, ndomq raen rog neix gij doem gaihcij hawq lo. 14Caiq daengz ngeihnyied ngeihcib caet hauh, lajdoem cungj hawq liux lo.
15Gajlaeng Cangqdiq doiq Nozyaq naeuz: 16“Mwngz caeuq yah caeuq lwg caeuq bawx ok ruz ma bax! 17Mwngz caemh ij daiq doengh duz gaen mwngz haeuj bae he ok ma, hawj gyoengqde ok ma fat doengh daih gajlaeng, fat hawj lajmbwn dauqcawq cungj miz bae.” 18Gajlaeng Nozyaq caeuq yah caeuq lwg caeuq bawx ok ma lo. 19De caemh hawj sojmiz doengh duz youq ndaw ruz he hih, cungj caemh baez cungj baez cungj hwj hawj gyoengqde ok ma lo.
20Hawj gyoengqde ok ma le, gajlaeng de couh caeb aen daiz dajbwiz he, dawz gak cungj doengh duz ndaej aeu ma guh dajbwiz hih aeu ma coemh hwj bwiz Yehhozvaz. 21Gajlaeng Yehhozvaz mupraen gij heiq rang coemh hwj dajbwiz mwnq le, ndaw sim de gag naemj: “Gou gan rox, gij vunz daj lij iq, ndaw sim cix miz cungj doegdoeg siebsieb he lo, hoeng gou mbouj caiq vih gij vunz hwj mang gij dieg haem lo, mbouj caiq luj mbat neix cawz lajmbwn sojmiz miz mingh hih lo. 22Cijaeu baezneix mbwn mbouj doemq dieg mbouj loemq, couh gaengjdingq miz ndaem miz sou, miz nit miz hwngq, miz seizdoeng miz seizhah, miz ngwnz miz ngoenz.”
Currently Selected:
Lizsij dih Gaihcij 8: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited