Lizsij dih Gaihcij 7

Raemx dumh mbwn

1Yehhozvaz caiq doiq Nozyaq naeuz: “Mwngz caeuq ndaw ranz mwngz hih vunz cungj ij haeuj ndaw ruz bae, aenvih gou rox, mwngz youq ndaw lwgra gou, lajmbwn caenhgag miz mwngz dwg boux simndei simsoh he hih vunz. 2Mwngz caemh ij daiq caet doiq gak cungj doenghduz, couh dwg doengh duz ndaej aeu ma guh dajbwiz he, haeuj ndaw ruz bae; moix it doiq dwg duzboux duzmeh. Gak cungj doengh duz mbouj ndaej aeu ma guh dajbwiz he caemh ij daiq doiq he haeuj bae, caemh dwg daiq duzboux duzmeh; 3doengh duz mbin gwnz mbwn hih caemh ij daiq caet doiq, moix doiq caemh dwg duzboux duzmeh. Yienghmwnq, gak cungj cukseng caeuq gak cungj roeg mbin cungj ndaej louz guh cungj, mbouj lau rairaeg lo, 4aenvih goq caet ngoenz laem, gou couh ij hawj fwn doek hung, lienzdaemh doek baenx seiqcib ngwnzngoenz, dawz gou soj cauh hih miz mingh hih cungj cawzraeg bae.” 5Yiengq, Nozyaq caemh ciuq Yehhozvaz raengq hih yienghmwnq bae guh lo.

6Mwh raemx dumh mbwn mwhde, Nozyaq ngamqluj ndaej roekbak bi. 7De caeuq yah caeuq lwg caeuq bawx cungj haeuj ndaw ruz bae ndoj raemxdumh. 8Doengh duz ndaej aeu ma guh dajbwiz he caeuq doengh duz mbouj ndaej aeu ma guh dajbwiz he, doengh duz roeg mbin gwnz mbwn he caeuq doengh duz vuenz lajdoem he, 9cungj caemh ciuq Cangqdiq raengq hih yienghmwnq duzboux duzmeh baenx doiq baenx doiq hwj daeuj daengz Nozyaq mwnq, gaen Nozyaq haeuj ndaw ruz bae lo. 10Cingqgawq goq caet ngoenz le, raemx cungj dumh sojmiz hih dieg liux.

11Couh dwg Nozyaq ndaej roekbak bi hih bi mwnq dih ngeihnyied cibcaet hauh, sawqmwh laj doem sojmiz hih mboq cungj danh mboenxmboenx hwnjdaeuj mbouj dingz; gwnzmbwn fwn doek roengz regreg, lujnaeuz gwnzmbwn miz baj gyaegfairaemx hoi liux lo nwih, 12doek baenx seiqcib ngwnzngoenz. 13Couh youq ngoenz fwn doek hunghung mwnq, Nozyaq caeuq mehyah de, caeuq sam daeglwg de, Cenj, Hamz, Yajfuz, caeuq doengh mehbawx de haeuj ndaw ruz bae lo. 14Gak cungj doengh duz nyaen hah, gak cungj doengh duz cukseng hah, gak cungj doengh duz vuenz he hih hah, gak cungj doengh duz roeg mbin gwnz mbwn he hih hah, 15fanjcingq doengh duz diemjcaw he cungj caemh baenx doiq baenx doiq hwj daeuj daengz Nozyaq mwnq gaen Nozyaq haeuj ndaw ruz bae lo. 16Sojmiz hih doenghduz cungj caemh ciuq Cangqdiq raengq hih yienghmwnq, duzboux duzmeh baenx doiq baenx doiq hwj haeuj ruz bae lo. Gajlaeng Yehhozvaz couh bang Nozyaq haep aen dou ruz lo.

17Fwn doek hung gig yungyiemj, lienzdaemh doek baenx seiqcib ngoenz; lajmbwn dauqcawq cungj miz raemx. Raemx yied hwnj yied sang; aen ruz daj lajdoem fouz hwnjdaeuj. 18Raemx yied hwnj yied sang, ruz yied fouz yied sang. 19Raemx yied dumh yied sang, lajmbwn sojmiz hih bya cungj dumh liux. 20Hoeng raemxdumh vanzlij yied hwnj yied sang, mauh goq dingjbya caet mij sang.#7:20 Dineix ndaw yienzvaenz dwg naeuz ‘cibhaj caeuz sang.’ 21Lajmbwn sojmiz hih doenghduz, couh dwg doengh duz mbin he hah, doengh duz cukseng hah, doengh duz nyaen hah, doengh duz vuenz he hah, caeuq sojmiz hih vunz hah cungj rai liux. 22Fanjcingq gwnz hawq sojmiz aeu ndaeng ma diemjcaw hih cungj rai liux lo. 23Couh yienghneix, Cangqdiq cawz gwnz hawq sojmiz miz mingh he: vunz hah, doengh duz cukseng hah, duz vuenz he hah, duz mbin he hah, cungj cawz liux. Caenhgag lij lw Nozyaq caeuq gaen de haeuj ndaw ruz bae hih vunz caeuq doenghduz laem lo. 24Raemx dumh mbwn, dumh baenx bakhaj ngoenz baenx lai.

Currently Selected:

Lizsij dih Gaihcij 7: YBNT

Highlight

Copy