Lukahtar 4
4
O zumavipe e Isusohko. Vov lel te sikavel e manušen thaj te del vorba ando Nazareto thaj Kapernaumo, kaj sastarel e Petrehće sasuja thaj bute nasvalen.
1O Isuso, pherdo e Sumnale Odjeha, irisljo katar e len Jordano, a o Sumnalo Odji igjardah le pe nesavo korkor̄imahko than.
2Inćate ačhilah saranda djive, a o beng zumavela le. Gole djivesengo niči h̄alah khanči, a kana gola djivesa nakhle, vov bokhaljah.
3Thaj phendah lehće o beng: Te san tu čačimaha e Devlehko Čhavo, vaćar gale bar̄ehće te avel marno, čamblo.
4A o Isuso mothodah lehće, dindo vorba: Ando lil ačhel gova: O manuš niči parvarela pe samo e marneha, nego svakone Devlehće alaveha.
5Thaj athoska igjardah le o beng upre pe jekh uči plajin thaj sikadah lehće jekhvaratar sa e phujva pe gav sveto.
6Thaj phendah lehće o beng: Ake, tuće kam dav sa o zor, sa o kadar̄ipe thaj o barikanipe lengo, kaj gova si mangje dino, pa me kahte kamam, šaj dav.
7Te tu, ake, angla mande bangjoha, sa kam avel ćiro.
8A o Isuso, dindo vorba, vaćardah lehće: Igjardo, h̄asajvo kathar, bengona bengjaleja! Ando lil ačhel: Bangjiv korkor̄e e jekhe jekhor̄ehće Devlehće ćirehće, lehće te bangjardivo, thaj samo leh jekhe paća, kande.
9Thaj igjardah le o beng ando Jerusalimo, bešaldah le upre pe khangjiri thaj phendah lehće: Te san tu o čačo Čhavo e Devlehko, h̄uti gav thanehtar tele.
10Kaj ando lil ačhel kaj kam vaćarel pe e angjelongje te resen tut thaj te arakhen tut te na ićhajvo.
11Thaj kam len tu pe va, te na čalaveh tu varekaj pe varesavo bar̄ će prnenca.
12Thaj vaćarindo phendah lehće o Isuso: Mothodino si te na zumaveh e Bare, e Devle ćire.
13Palal, kana o beng ćerdah sa gav zumavipe, gjelo tar lehtar.
14A o Isuso irisaljo ande pire odjehko zor ande Galileja, thaj ašundilah lehtar e vorba pe sa ogoja rig.
15Thaj sikavela ande lengje khangjira thaj e manuša savor̄e ašarde le.
16Thaj vov avilah ando Nazareto, kaj vov bajrilaha odomut thaj dijah subotone ande khangjiri thaj uštilah te del vorba andar e lila.
17Thaj dije le o lil e prorokohko Isaijehko, a vov putarindo gov lil arakhlah o than kaj ačhel, kaj sah pišime.
18E Devlehko Odji si upral mande, pala gova bičhaldah ma maškar e čor̄e te dav lengje vorba e Devlehće alavendar, bičhaldah ma te sastarav golen savengje odja lačhardile, thaj te mothovav e phanglengje kaj kam mukljon, a e kor̄engje kaj kam dikhen thaj te mukljarav, te putarav e phanglen.
19Thaj te dav vorba katar o šukar, guglivarno e Devlehko brš.
20Athoska phanglah o lil, dijah le ko kandino, e slugahće, thaj bešlo tar, a savor̄e ande khangjiri dikhle ande lehte.
21Thaj lijah te del vorba lengje: Adjive ćerdilah pe ande tumare kan sa gova, so ačhel ande gav lil.
22A savor̄e čudisalje lehće šukare alavengje save ikliste andar lehko muj thaj vaćarde: Naj li gava o čhavo e Josifohko.
23Thaj vov mothodah lengje: Tumen kamen te phenen mae gaja paramiči: Doktoreja, sastar tut korkor̄e m’anglal. Ašundam so ćerdan ando Kapernaumo, ćer gova vi ande ćiro foro.
24Thaj pale lengje phendah: Čače me tume mothovav kaj niko ande piro them našti avel gadija godjaver thaj bižaj te šaj avel pindžardo maškar pe amala thaj h̄anamika.
25Čače mothovav tumee: Ando Izrailjo ačhile but phivlja, kana sah inća o Ilija thaj kana phanglinaljah o del trin brš thaj šov čhon, thaj kana avilah bari bokh ande sa e phuv.
26A o Ilija ni jekhate maškar lende naj sah bičhaldo, osim ande Sarepta, ande Sidonohko them, jekhe phivljate.
27Thaj but manuša seha phuknjale, gjerale ando Izrailjo, a ni jekh dženo lendar niči sastilah, samo o Neeman e Sirijako.
28Thaj savor̄e h̄oljalje ande khangjiri kana ašunde gava.
29Thaj uštile tar, thaj ispidindo tradije le avri andar o foro, igjarde le upre pe uči plajin kaj sah lengo foro te čhuden le upral h̄arate.
30A vov nakhlah maškaral, maškar lende thaj gjelo tar.
31Thaj avilah ando Kapernaumo, ande Galilejako foro thaj sikavela len e subotenca.
32A von čudisalje lehće sikavimahće, kaj lehko alav sah zuralo.
33Thaj ande khangjiri sah jekh manuš ande savo garudilah e bengjehko odji thaj vov dijah vorba andar sa o krlo.
34Vačarindo: Muk amen, so kameh amendar, Isuse Nazaretohćereja! Da li avilan te mudareh amen? Pindžarav tut ko san, tu san jekh sveco, Devlikano.
35A o Isuso daradah le vazdindo o naj thaj vaćardah lehće: Na de vorba thaj ikli andar lehte. A o beng eradah maškare e manuše, dijah našipe andar le thaj niči dukhadah le khanči.
36A savor̄e daralje thaj phende jekh e avrehće: Savi si goja vorba, pa šaj moćoha vaćarel e bengjengje te iklen.
37Thaj ašundilah pe pala lehte pe sa e riga ando pašipe.
38Uštindo andar e khangjiri avilah vov ande Simonohko ćher. A e Simonohće sasuja astardah e bari jag thaj voj ćinosaljah peha thaj e ćherutne molisarde le te sastarel la.
39A vov ačhindo upral late vaćardah e jagaće te mukel la thaj e jag muklah la. A voj po than uštili tar thaj lijah te ćerel bući paša lende.
40A kana o kham nakhlah thaj pašlilah, sa gola džene savende seha nasvale katar bute nasvalimahtar, igjarde len dži lehte, a vov čhutah po va pe svako manuš pa sastardah len.
41Thaj vi e benga iklena andar varesave manuša akušindo thaj vaćarindo: Tu san Hristo, o Čhavo e Devlehko. A vov daravindo len vaćardah lengje te na den vorba averengje kaj džanen pala lehte kaj hi vov Hristo.
42A kana djivesaljah, putaljah o djive, iklistah vov thaj gjelo tar ando korkor̄ipe, a e manuša rodije le, thaj avile dži lehte thaj ačhade le, ićarde le, mangindo te na džal tar lendar khatinde.
43A vov lengje phendah: Akana trubuj te dĹľav ande aver thema, koring karing, te dav vorba katar o Sumnalo Lil pala e Devlehko thagaripe, kaj me sem pala golehte biÄŤhaldo.
44Thaj phirindo gadija dela vorba ande khangjira e Galilejengje.
Currently Selected:
Lukahtar 4: GURB1938
Highlight
Share
Copy
Want to have your highlights saved across all your devices? Sign up or sign in
Englezongo thaj avere Themengo Biblijako Amalipe 1938.
