Lukahtar 5
5
O Petre astarel mačhen. O sastaripe e phuknjalehko thaj e linehko. O h̄ape paša o Levi. O Isuso del vorba katar o šućaripe.
1Jekhvar avile e manuša lehte te ašunen o alav e Devlehko, a vov ačhela uzo paj e Genisaretohko.
2Thaj dikhlah duj ladje, duj pajehće kaštune, kaj ačhen pe jekh rig, a e mačhale, e ribajra, iklisteha andar lende te e mreže thoven.
3Thaj vov dijah ande jekh pajehći kaštuni, e Simonohći, thaj manglah lehtar te dujron tar cîra katar e phuv, maj dur inćate. Vov bešlah ande gaja pajali thaj lijah e manušen te sikavel.
4Kana ačhilah te del vorba, phendah e Simonohće: Ha džan inćate kaj si maj baro paj, maj handuk, čhuden e mreže thaj astaren e mačhen.
5A o Simono lehće phendah dindo vorba: Sikamneja, sor̄o e jrat ćerdan bući thaj niči astardan niso, a te tu kameha, ake, amen šaj mukah ando paj e mreža, e astardi.
6Von gadija ćerde thaj astarde bute mačhen thaj e mreže putalje e pharimahtar, phar̄adinalje.
7Thaj von ande pire amalen perutnen save seha pe aver pajali te aven te astaren lenca. Thaj gola amala avile tha gaći pherde e mačhenca e solduj pajale, kaj e pajale, e ladje, lije te phar̄on katar o pharipe.
8A kana dikhlah gova o Simono Petre, vov pelah pe čanga angla o Isuso, dindo vorba: Dža tar mandar, kaj me sem manuš došamno, bezeh̄alo.
9Kaj dijah ande lehte e dar thaj ande lehće amala save seha leha. Von daralje katar e but mačhe saven istarde von.
10Gadija dijah o darape vi ando Jakovo vi ando Jovano, ande čhave e Zevedejehće, save seha e Simonohće amala. Thaj phendah o Isuso e Simonohće: Ma dara, katar akana kam astareh e manušen.
11Thaj kana crdije e solduj pajale e ladje, pe phuv, mukle von sa thaj gjele tar pala lehte.
12Kana o Isuso avilah ande jekh than, dikhlah jekhe manuše sa ande phuknja, ande brunde. A gov phuknjalo kana dikhlah e Isuso, pelah po muj thaj lijah te mangel dindo vorba: Te tu kameha, tu šaj man sastareh.
13Thaj inzarindo o va astardinaljah pala le thaj phendah: Kamam te aveh sasto gole phuknjendar. Thaj akanor̄a pele lehtar e phubale funočoja.
14Thaj vov vaćardah lehće te na nikahće mothovel gova. Ha dža tu thaj sikadinajvo e lilvarnehće, e rašajehće, thaj sikav so šaj deh ćire odjehtar pala ćo sastaripe, gadija sar o Mojsije phendah.
15Vov ašundinaljah vadžaj maj dureder thaj but manuša avile te thoven le kan te ašunen le, te sastarel len katar lengo nasvalipe.
16A vov crdinaljah palpale ando korkor̄ipe, korkor̄isaljo, thaj molisaljah e Devlehće.
17Gadija jekhe djivesehko bešlah vov thaj e manušen sikavela, a kothe bešena vi e rašaja thaj e zakonikujra, save avile andar sa e gava e Galilejengje thaj e Judejengje thaj andar o Jerusalimo. A e Devlehko moćo sastardah len.
18A, eke, e manuša igjarde jekhe muruše pe phal savo sah lino e nasvalimahtar thaj mangle te anen le andre thaj te thoven le angla lehte.
19Thaj kana našti arakhle than, kaj inća seha but manuša, a von ikliste po ćher thaj krozo e ćherehći berand mukle le tele po maškar angla o Isuso.
20Thaj kana o Isuso dikhlah kaj von paćan ande le, vov phendah e nasvalehće: Manušeja, ćire doša muklinjavon.
21A e sikavde thaj e rašaja, e livarne lije te den vorba: Savo si gava savo akušel e Devle. Ko šaj mukel e došalimata sar o jekh Del.
22A kana haćardah o Isuso so von garuven ande pire godja, phendah lengje: So tumen gîndisaren, so ićaren ande tumare odja.
23So si maj loćhe te phendol: Muklinajvol ćo došalipe, jali kana mothodol: Ušti thaj phir.
24Akana trubuj te džanen kaj man, e manušehće čhave, si moćo pe phuv te mukav e doša e manušengjire. Pala gova phendah e nasvalehće: Ušti, le tuha e phal thaj ćo buhljaripe thaj dža tar ke ćo ćher.
25Thaj akana, andejekh, uštilah, angla lende lijah gova pe sohte pašljola thaj gjelo tar prastamaha ke po ćher, ašarindo e Devle.
26Thaj savor̄e capenisalje thaj ašarde e Devle, thaj pherdinajlje e daraha, dindo vorba: Adjive dikhlam bare buća.
27Pala golehte iklistah vov thaj dikhlah jekhe cariniko, savo akhardola Levi, a savo bešela pe malta, thaj phendah lehće: Avta pala mande.
28Thaj vov muklah sa gova, uštilo tar thaj gjelo tar pala lehte.
29Thaj o Levi ćerdah lehće paša po ćher paćiv, a kothe seha but carinikujra tha e aver džene kaj bešena leha paša o h̄ape.
30A e sikavde thaj e rašaja, e lilvarne, dije vorba lehće amalengje: Sohće h̄an the pijen tumen e carinikonca thaj e došamnenca.
31A o Isuso dindo vorba phendah lengje: E saste manušengje niči trubuj o sastaripe, gova trubuj e nasvalengje.
32Me niči avilem te ćidav e paćamne manušen, me avilem te arakhav golen save si došale.
33A von lehće phende: Pala sohte e Jovanohće amala šućaren, postin, but droma, ni h̄an ni khapen, ni pijen, thaj molin pe e Devlehće, a gadija ćeren vi e amala e lilvarnengje, a ćire amala h̄an thaj pijen.
34A vov lengje phendah: Da li šaj tumen vaćaren e manušengje po abijav te na h̄an, te šućaren, kana lenca si gothe o džamutro.
35Thaj kam aven e djivesa kana lena lendar e džamutre, pa von kam šućaren, postin pala golehte ande gola djivesa.
36A vov lengje phendah gaja paramiči: Niko niči kamel te suvel jekh kotor katar e phure gada po nevo hujravipe. Gadija phar̄adona vi e neve gada, kaj po nevo našti suvdol gova so si purano.
37Thaj niko niči kamel te čhuvel e nevi mol ande phurikane vasujra. Te gova gadija ćerela, phar̄ona e staklune vasujra katar o nevo pipe. E mol čhordola, a e vasujra phagjona.
38O nevo pipe trubuj te čhutol ande neve khore thaj gadija kam saste ačhen solduj.
39Svako manuš savo pilah e phuri mol, niči kam mangel o nevo pipe, kaj mothovel: E phuri mol si maj lačhi e nevjatar.
Currently Selected:
Lukahtar 5: GURB1938
Highlight
Share
Copy
Want to have your highlights saved across all your devices? Sign up or sign in
Englezongo thaj avere Themengo Biblijako Amalipe 1938.
