Mak 12

Palan Nolou ile Ta Su Lau Mada’ Su Iso Langah odo Kei Wain

(Matyu 21.33-46 pe Luk 20.9-19)

1Yesus mapwi imin ndre lon sariy odo omwen surok mandra‑an odo Yerusalem pe Iy ipehre sohou ile ke palan nolou ile ta su lau ihpah, “Orngon homou idohon lok hombrul ile wain. Iy ide sariyen, pe isu‑ei ngat sih odo lisi sengin wain, pe itmon omwen ndram ise lo langah tadan tih. Iy iduwe sa lau se mada’ su ise langah tadan, pe we hompo marai kile eriy, pe iy we kinesihnen su. Inum pe iy iyeu ilndrou ile lok hokor yi.

2“Iy ma insa mapwi ti pe sengin wain tadan ti ihmandran pe sa ka hokun. Iy waso‑on se mbrwen wain kuti, ile pe iy ihtakalan lewen marai tadan homou ile odo kiltakun. 3Odoke sa lau mada’ sa isso eriy ti hondrotowe lewen marai tadan kuti, hapwi iy, pe ha‑as iy iyeu yi. 4Ile pe orngon ndre tadan wain kuti ihtakalan lewen marai tadan homou yi ile. Su hetpili palan ile kei, pe hahnan iy imah‑ah ile ke mo‑on. 5Taman wain kuti ihtakalan ndramat homou yi ile, pe iy ndramat kuti su hapwi iy imet. Iy ihtakalan sa lau sulo‑on se yi hala, odoke su lau ndre mada’ su iso wain kuti hapwi su se pe heruhe se hamat.

6“Ndramat ke homou kopwi mapwi imin ti orngon kuti waso‑on lakopwi. Iy erti lilin nedun kamal. Orngon kuti ipe ihpah, ‘Huyen, yu ka we kuhtakalan nedu kamal kile. Su lau ti tuno’ su iy. Uh nedu ti kihir hu su ti we su hondrupo mo‑on kile tadan pwi, odosa su tuno’ su ihpa ndre iy ti lilin nedu tih.’

7“Odoke su lau ndre hompo marai ile wain kuti hapa ihpah, ‘Iy ndramat kuti we kikuni ndruhun taman. Tidu titruhe iy kimet, kile pe langah kuti we ta tidu.’ 8Ile pe su hondrotowe iy pe hapwi iy imet, inum pe hepiyen iy ile ndruwen sariy odo langah.

9“Oduu atawene ihpa kehe? Taman langah odo wain kuti we kipu sa? Iy we kise pe kiruhe su lau kurti hamat pe kiduwe langah kuti kile ta sa lau se yi. 10Oduu ti tuno’ oduu nolou iyin Buk ta Lapan ti ndre pwi? Nolou ndre ipe ihpah,

“‘Pat kuti sa lau odo tumwe um ti hapa mo‑on

pe heduwei ile mahun,

eri kah inna ndruwen ndrokornu‑um.

11Lapan Iy ndre Iy ihnan pe tidu titpwo-es kile eriy.’#12.11 Endre-et Buk Song 118.22-23

“Nolou kuti oduu tuno’ oduu ndre pwi?”

12Sa lau mandra‑asa ta su Yuda heltuwe ihpa ndre Yesus ti impa palan nolou ile ta su. Ile pe su hehreh sal ile puko‑on lakopwi hapa hondrotowe Yesus, odoke su honoh ta sa lau. Ile pe su hendripo hangka‑an inna Tadan pwi, pe su ha‑au.

Sa Lau We Hepiyi Takis Kile ta Sisar ndre Konan?

(Matyu 22.15-22 pe Luk 20.20-26)

13Su lau mandra‑ane odo Yuda hapa hahnan Yesus kipe handrai nolou kihrut, kile pe su helilyan Iy. Ile pe su hahtakalan su Paraseo ndroda su lewen Herot se hala. 14Su hala pe hapa ile ta Yesus ihpa, “Tisa, Ou ti esentaheweh pwi. Nolou ndre sulo‑on Ou ampa ile ta sa lau ti hemel kopwi. Ou ti esenoh ta homou lau pwi yi. Homosa ndre Ou apa apa kile ta si lau, eri Ou esenoh pwi. Ou antatuhnon sa lau ile punou ta Lapan. Ile pe piyi takis ile tan king Sisar odo Rom ti huyen ndre mo‑on? Kehe apa eh? 15Tidu titpo takis ndre konan?”

Yesus tunon tawene ta su, ile pe Iy ipe ile ta su ihpah, “Oduu atpa ataheweh Yu ti ile sa? Otpo hendrek moni kise pe Yu kundre‑et.”

16Su heduwe moni hendrek ile Tadan. Pe Iy ihndremte su ihpah, “Palan si pe rangan si iyin eriy tih?”

Su hahpah, “Palai ti palan Sisar pe rangai ti rangan Sisar.”

17Eri pe Yesus ipe ile ta su ihpah, “Sane ta Sisar ti atawei kile ndre ta Sisar, pe sane ta Lapan ti atawei kile ndre ta Lapan.” Su hehrungi nolou Iy ipe ti pe hehretek pe hemesi‑iy.

Ndramat Handrimat ti Henesou ndre Pwi?

(Matyu 22.23-33 pe Luk 20.27-40)

18Inum pe su Sadyusi hala hu Yesus. Su Sadyusi ti su lau ndre hapa uh, taha tihmat, eri we titndretalang pwi yi. Su hala hu Yesus pe hehndremte ihpah, 19“Tisa, Moses idetorwe Lo handrai ta tidu ti ipe uh homou kamal kindripo nedun pwi pe kimet, eri tinton ti we kesuwon nau tadan tih. Kile pe pedih kuti kipu nedun, pe kom ti we nedun tinton ndre indrimat tih. 20Ile pe idu petsih, eri su madan tinton ndre ndrotulmuu hodo. Iy munen ti iyesou, odoke homou nedun pwi pe imet. 21Tinton homou yi ti ikuni pedih nau kutih, odoke iy yi ti homou nedun pwi pe imet. Tinton homou yi ti ikuni pedih nau kurtih, odoke ihpa ke horu rumuu ndre herndremat tih. 22Su madan tintoi ndre ndrotulmuu ti hasuwon ndre pedih kuti ea, odoke su homou indripo homou nedun pwi pe hamat. Inum pe pedih kuti imet yi. 23Ile pe uh kidu mundrun ndre sa lau ndre sulo‑on ndre handrimat ti we hatlang yi, eri iy si lakopwi ta su ndre ndrotulmuu ti we mbrulun pedih ertih?”

24Yesus ipe ile ta su ihpah, “Oduu ti tuno’ oduu nolou he‑en lon Buk ta Lapan ti pwi. Oduu ti tuno’ oduu puko‑on ta Lapan ti pwi yi, ile pe nolwo‑o’ oduu ti indremimel pwi. 25Kidu rang omur kihir pe sa ndramat mat ndre sulo‑on hatlang yi, eri we osou pwi. Sa ndramat ti we hahpa ndre su engel odo heven. 26Oduu yi ti atpa sa ndramat handrimat ti we handretalang pwi yi. Oduu ti edendroni nolou iyin buk ta Moses ti ndre pwi? Idu kalmene‑en kei innul pe Lapan isohou ile ta Moses ti oduu tuno’ oduu ndre pwi? Idu mundrun erti eri Lapan ipe ile ta Moses ihpa, ‘Yu ti Lapan tan Abraham, Lapan tan Aisak, pe Lapan ta Yakop.’ 27Etndre‑et oh, Iy ti Lapan ta sa ndramat handrimat ti pwi. Iy ti Lapan ta sa ndramat more’ sa. Abraham, Aisak pe Yakop ti handrimat ndre pihe odoke mulwe’ su ti mapwi hodo, ile pe Lapan ipe ihpah, ‘Yu ti Lapan tan Abraham, Lapan tan Aisak pe Lapan ta Yakop.’ Ile pe nolou ta oduu Sadyusi ti indrohtot sal pwi. Tawene ta oduu ti indremimel pwi!”

Lo Mandra‑an Lakopwi ta Lapan

(Matyu 22.34-40 pe Luk 10.25-28)

28Orngon homou idu pe intahrung nolou ndre Yesus impa ile ta su Sadyusi tih. Orngon kuti tadan sape mandra‑an odo Lo. Iy ihrungi nolou ta Yesus ti ndre ndrokene, ile pe iy ihndremte Yesus ihpah, “Lo kehe ndre iyin pule‑en Lo ndre sulo‑on tih?”

29Yesus ipe ihpah, “Lo mandra‑an lakopwi ti kurtih: ‘Oduu Israel atahrung kehii. Lau Mandra‑an ti Iy homou kopwi, pe Iy Lapan ta tidu. 30Ahwasu‑um Lapan, pe eduwe ou ndre homou kile Tadan. Eduwe ndrinem, eduwe mulwim, eduwe palam, pe eduwe puko‑on tadam ndre sulo‑on kile ke ta Lapan.’#12.30 Endre‑et Lo 6.4-5. 31Lo ndre ise pahndran ti kutih: ‘Ahwasu‑um ndramat homou yi ti kihpa ndre ou wasu‑um ke ndre ou.’#12.31 Endre-et Wok Pris 19.18 Handrai Lo yi indre‑en pule‑en Lo ndre rundrei kuti pwi.”

32Orngon kuti ipe ile ta Yesus ihpa, “Tisa, Ou apa ti imel kopwi. Ndre ndrokene lakopwi ihpa ndre Ou apa tih. Lapan ti Iy ke homou, pe homou Lapan yi indrimin hepe pwi. 33Tidu tidehwaso‑o’ tidu Iy kile ndrine’ tidu, pe kile pala’ tidu, pe kile puko‑on ta tidu. Pe tidu tidehwaso‑o’ tidu su ndramat se yi, ihpa ndre tidu waso‑on ke ndre tidu tih. Lo ndre rundrei kuti here‑en pule‑en ofa handrai pe handrai ndre tidu tidempo tih.”

34Yesus indroni ihpa ndre orngon ti isohou huyen kopwi, ile pe Iy ipe ile tadan ihpah, “Ou ti endrimin alau odo kapman ta Lapan pwi.”

Sa honoh ta Yesus, pe homou indrehndremte Iy ile handrai sohou pwi yi.

Kristus ti Nedu Si?

(Matyu 22.41-46 pe Luk 20.41-44)

35Yesus imin lon sariy odo omwen surok mandra‑an odo Yerusalem, pe Iy intatuhne sa lau ile nolwo‑on Lapan. Pe Iy ipe ihpah, “Ihpa kehe pe sa lau tuno’ sa Lo ti hapa Kristus ti Devit we kiduwe Iy? 36Lapan Mulwen iduwe tawene ile tan Devit pe Devit ipe ihpah,

“‘Lapan ipe ile ta Lau Mandra‑an todo ihpah,

“Asa emin poi emin lumwe mudon

kenon ndre Yu kuduwe sa ndramat hompo mo‑on ile Tadam ti

hasa pahndran lompurndrikem.” #12.36 Endre-et Buk Weriy 110.1’

37Devit ti iyuw Kristus ile Lau Mandra‑an, pe ihpa kehe pe Kristus ti we Devit kiduwe Iy?”

Edempahar Ta Su Tisa odo Lo

(Matyu 23.1-36 pe Luk 11.37-54; 20.45-47)

Sa lau sulo‑on hentahrung Yesus, pe su hepwo-es mandra‑an ile nolou Tadan. 38Pe Yesus ipe ile ta su ihpah, “Oduu edempahar ta su tisa odo Lo. Su hentawe kolos elwe‑en ea pe waso‑o’ su hapa sa lau hompo sikan kile ta su odo ndruhun suhen. 39Su hapa we hemmin ndre munen odo omwen surok. Su hapa we hemmin ndre munen odo lon ndrongon handrai pe handrai. 40Su hantawiwihi sa pedih nau pe hempahno‑o sane ta su. Su hantaheweh hapa su ti lau odo lotu pe hantaleklek odo mada’ sa lau pe heneruwi surok illa elwe‑en. Su lau kiti we hokun pede‑en mandra‑an omur.”

Pedih Homou Tadan Sane Pwi Itou Moni Ofa ile ta Lapan

(Luk 21.1-4)

41Yesus imandro imin ndruhun piyi moni odo omwen surok mandra‑an, pe inendre‑et sa lau halla pe hempiyi moni odo hehnuwii omwen surok ertih. Sa lau ta sa moni sulo‑on ti hala pe hempiyi moni mandra‑ane ile lon ndruhun moni. 42Pe pedih homou mbrulun indrimat, pe tadan sane pwi eri ile, pe ipiyen peni rundrik rama‑an ile.

43Yesus iyuwen su disaipel Tadan hala pe ipe ihpah, “Yu kupwe kile ta oduu. Pedih mo‑on kuti ihluwen sa ndre sulo‑on odo tudou moni. 44Sa se ti hotou mandra‑an yi, odoke ta sa moni sulo‑on mapwi ilto. Pedih mo‑on kuti kopwi ti indretawe hendrek indrimin pwi. Mone‑en ndre sulo‑on odo sihsih anan song ti iy indrepiyen inna ofa.”

Currently Selected:

Mak 12: KTM

Highlight

Copy