Maliko 15

U Yesu pamaso pa Pilati

(Mat. 27.1-2, 11-14; Luk. 23.1-5; Yoh. 18.28-38)

1Pandabindabi nkani abaputi abasongo bosi, na balongozi aba Chiyuda, sona na bamanyisi aba Ndaghilo na balongi bosi bakakomana poka nukunenezannya benebene nizya Yesu. Bakamupinya u Yesu nukubuka nawe kwa Pilati. 2U Pilati akamulalusya akati, “Nkimba awe we Mwene uwa ba Yuda?”

U Yesu akamula akati, “Wanena wemwene.” 3Abaputi abasongo bakamutamantila u Yesu ivintu ivyinji, 4po u Pilati akamulalusya sona akati, “Nkimba utakwamula? Ivwa ivintu vyosi vivyo bakukunenela.” 5U Yesu akasona umulomo wache, chicho chikamuswighisya nkani u Pilati.

Kwadumuliwa ukuti u Yesu aghoghiwe

(Mat. 27.15-26; Luk. 23.13-25; Yoh. 18.39—19.16)

6Pakabalilo kosi aka Lusekelo ulwa Pasa umulaghili uwa Chiloma akizubila pakumusatula umukayidi weka, yuyo abantu bamusala ukuti asatuliwe. 7Pakabalilo kalakala umuntu yuyo bakatinji u Balabasi akaba mujele poka na babo bakalisambukila iboma nukughogha abantu pavyongo. 8Bo ichilundilo icha bantu chabungana, chikanda pakumulaba u Pilati ukuti ababombele vivyo akizubilila. 9Akabalalusya akati, “Nkimba mukulonda imbabulile u Mwene uwa ba Yuda?” 10U Pilati akazimanya akiza nkani ukuti abaputi abasongo bamubikite u Yesu munyobe zyache pachifukwa icha kabini bulo.

11Loli abaputi abasongo bakasonjelezya abantu pakumulaba u Pilati ukuti amusatule u Balabasi, mubuzilo ubwa Yesu. 12U Pilati akachilalusya sona ichilundilo chila akati, “Nkimba po imbombe nawe ichoni yuyo mukuti we Mwene uwa ba Yuda?”

13Abantu bakakolomoka nkani bakati, “Mukomele pachipinjika!”

14U Pilati akalalusya akati, “Nkimba ananga ichoni?”

Loli abantu bosi bakakolomoka nkani bakati, “Mukomele pachipinjika!”

15U Pilati akalondagha pakuhobosya ichilundilo, po akabasatulila u Balabasi nukulamula ukuti u Yesu asyempiwe. Pisinda pache akamubika ukuti bamukomele pachipinjika.

Abasilikali bakumobezya u Yesu

(Mat. 27.27-31; Yoh. 19.2-3)

16Abasilikali bakamusenda u Yesu nukwinjila nawe mulubinjilo ulwa nyumba iya mulaghili uwa Chiloma nukubungannya poka akabukatila kosi aka basilikali ababwite. 17Bakamuvwika u Yesu inkazo inchesamu, bakaluka impumpu iya mivwa nukumuvwika kumutu. 18Po bakanda pakumulamuka ukuti, “Mwaghona Mwene uwa ba Yuda!” 19Bakamukoma pamutu ni ndisa nukumufwinila amati, bakamufughamilila nukumuchindika. 20Bo baleka pakumobezya, bakamuvula inkazo inchesamu yila nukumuvwika sona amenda ghache. Po bakabuka nawe pakumukomela pachipinjika.

Bakumukomela u Yesu pachipinjika

(Mat. 27.32-44; Luk. 23.26-43; Yoh. 19.17-27)

21 # Lom. 16.13 Muzila bakakomana nu Simoni uwamu Kileni uwise uwa Alikizandala nu Lufu, yuyo akadumusannyanga bulo ukufuma mutwaya. Abasilikali ababwite bakamufyenga ukuti anyamule ichipinjika icha Yesu. 22Bakamusenda u Yesu nukubuka nawe kubuzilo bubo bukwitiziwa ukuti Gologota, chicho chikung'anamula ukuti, “Ubuzilo bubo buyanite bulo ni fupa ilya kumutu.” 23Kulakula bakayezya pakumupa uvinyo uwakongannya nu mulembo uwa mila, loli u Yesu akakana pakung'wela. 24#Mas. 22.18Po bakamukomela pachipinjika nukugabana amenda ghache pakupanga amayele ukuti bennye chicho umuntu wesi asende. 25Akabalilo kakaba nayini koloko pandabindabi bo bakamukomela u Yesu pachipinjika. 26Inongwa yiyo bakamughoghela u Yesu yisimbiwe ukuti, “Uyu we Mwene uwa ba Yuda.” 27Bakamukomela u Yesu pachipinjika palapala poka na mavyondongo mabili, lyoka kunyobe indilo, sona ilinji iya kumongo.#15.27: Amasimbo ghamo aghakale ghonjelezya: 28 Izi zikabombiwa ukuyana na Masimbo ukuti, “Bakamubelenga ngati we mumanyani uwa bantu ababibi.” (Ennya mwa Luk. 22.37.)

29 # Mas. 22.7, 109.25; Mlko. 14.58; Yoh. 2.19 Abantu babo bakadumusannyanga palapala bakapukuzya imitu yabo nukumusamula u Yesu ukuti, “Eya! Ute wewe ukatinji, ‘Nkwiza pakumongolannya Inyumba iya Chala nukuyizenga sona mumasiku matatu!’ 30Losi ulu ika pachipinjika nukwipoka wemwene!”

31Abaputi abasongo na bamanyisi aba Ndaghilo bope bakamobezya bakati, “Akabapokagha abantu abanji, loli atangipoka mwene! 32Nanti naloli we Kilisitu u Mwene uwa ba Izilayeli, muleke ike pachipinjika losi ulu, po twennye nukumusubila!”

Abantu babili babo bakakomeliwa poka nawe bope bakanda pakumobezya.

Ubufwe ubwa Yesu

(Mat. 27.45-56; Luk. 23.44-49; Yoh. 19.28-30)

33Pakasi pamusanya ichisi chikawa muchisu chosi, mupaka fili koloko pachamabwila. 34#Mas. 22.1Pachamabwila pakabalilo aka fili koloko, u Yesu akalila nizyu ilya pamwanya nukuti, “Eloyi, Eloyi, lama sabakatani?” Ichi chikung'anamula ukuti, “Chala wane, Chala wane, wandeka?”

35Abantu bamo babo bakimilila palapala bakamwivwa nukuti, “Teghelezya akumwitizya u Eliya!” 36#Mas. 69.21Umuntu weka akachimbila nukuyidwibika isipanji muvinyo uwakusapa. Akayisomeka kulutete nukumupa ukuti ang'wele, po akati, “Leka twennye nanti u Eliya angiza pakumwisya pachipinjika!”

37U Yesu akalila nizyu ilya pamwanya nukufuta akabumalilo.

38 # Ukf. 26.31-33 Umwenda uwakuzighila mu Nyumba iya Chala ghukazepuka pakasi ukwandila pamwanya mupaka muntende. 39Bo usongo uwa basilikali ababwite, yuyo akimilila palapala ennya namumo u Yesu akafwila.#15.39 akafwila: Amasimbo ghamo aghakale ghasimbite ukuti akalila nukufwa. Akati, “Naloli uyu akaba Mwana uwa Chala!”

40 # Luk. 8.2-3 Abakolo bamo bakenelezyanga pabutalipo. Pakasi pa bakolo balabala pakabapo u Maliya Magadalena nu Maliya unyina uwa Yakobo umunandi, sona nu nyina uwa Yosefu nu Salome. 41Bakamukonka u Yesu bo ali mu Galileya nukumwavwa. Abakolo abinji babo bakiza mu Yelusalemu nawe bope bakaba palapala.

U Yesu abikiwa mwipumpa

(Mat. 27.57-61; Luk. 23.50-56; Yoh. 19.38-42)

42Kakaba kabalilo akakuti kwanda pakwila pisiku ilya Chisano, lilyo aba Yuda bakiyannyanga nizya Isiku Ilyakutuzya. 43U Yosefu uwa mukaya aka Alimatiya, yuyo akaba muntu umumanyikwe uwa balongi, sona akalindililagha u Bumwene ubwa Chala, akabuka kwa Pilati nu bujivu pakumulaba ukuti amupe umuvimba uwa Yesu. 44U Pilati akaswigha bo ivwa ukuti u Yesu afuye kale. Akamwitizya usongo uwa basilikali uwabwite nukumulalusya nanti u Yesu afuye kale. 45Bo ivwa zizyo usongo uwa basilikali anena, u Pilati akamwitikizya u Yosefu ukuti angaghusenda. 46U Yosefu akaghula isanda, akisya umuvimba nukughunnyembetelela ni sanda yila. Akaghubika mwipumpa lilyo likakumbiwa bulo kwibwe. Pisinda pache akabunguluzya ibwe ikulu nukwighalila pamulyango wipumpa. 47U Maliya Magadalena nu Maliya unyina uwa Yosefu bakennya kuko umuvimba uwa Yesu ghukabikiwa.

Currently Selected:

Maliko 15: LMBNT2016

Highlight

Copy