Luka 6:27-49

“Loli amwe mwe mukunteghelezya, inkubabuzya ukuti mubaghane abalwani binyu, mubabombelaye inyiza abantu babo bababengite. Mubasaye abantu babo bakubaghuna nukubiputila abantu babo bakubavwima. Nanti umuntu yumo akukoma kulusaya loka, umupe sona ulwamwabo ukuti akome sona. Nanti umuntu yumo akusenda inkazo yako, umuleke asende poka nu mwenda bulo. Nanti umuntu akukulaba ichintu chimo, umupe, sona nanti yumo akusenda ichintu chako, utakamubuzye ukuti anyosye. Mubabombelaye abantu abanji vivyo amwe mukulonda ukuti bababombelaye. “Nanti mukubaghana abantu bene babo babaghanite, nkimba mungakabapo ichoni? Pakuti na bantu abambibi bope bakubaghana babo babaghanite! Nanti mukubabombela inyiza babo bakubabombela inyiza, nkimba mungakabapo ichoni? Na bambibi bope bulo bakubomba bunubu! Sona nanti mukubakopezya bene babo mukubasubila ukuti bakwiza pakunyosya, nkimba bo mwakabapo choni? Na bambibi bope bakukopezyana benebene ukuti bapokele mumo zyabeleye. Awe, mubaghane abalwani binyu nu kubabombela inyiza. Mubakopezyanje sona mutakalindililaye ukuti mupokelepo kamo. Po umuvwalo winyu ghukwiza pakuba mukulu nkani, sona mukwiza pakuba mwe bana aba Chala Wapamwanya Nkani. Pachifukwa chakuti akubapelela ichisa abantu babo batakumupala, sona na bantu ababibi. Mubanje bantu abachisa ukuyana na mumo Ughuso abeleye ni chisa. “Mutakabalongaye abantu abanji, po namwe bulo mutakwiza pakulongiwa. Mutakabasusyanje abantu abanji, po namwe bulo mutakwiza pakususyiwa. Mubahobokelaye abantu abanji, po namwe bulo mukwiza pakuhobokeliwa. Mubapanje abantu abanji, po namwe u Chala akwiza pakubapa. Naloli mukwiza pakupokela ichipimilo ichiza, ichakusindiliwa, ichakuyingana, ni chakufuluka, momumo abantu bakwiza pakubapelagha munyobe zyinyu. Pakuti ichipimilo chicho mukubombezya pa bantu abanji, cho chicho u Chala akwiza pakubombezya papinyu.” U Yesu akabataghila sona ichili akati, “Nkimba umufwamaso angamulongozya umufwamaso uwamwabo? Nkimba bosi babili batangawila muchibanka? Umumanyili ate wapamwanya ukumuchila umumanyisi wache, awe, loli umumanyili wesi yuyo amanyila umwakufikapo we yuyo akwiza pakuyana bulo nu mumanyisi wache. “Nkimba choni chicho ukwennya akapato mu lyiso ilya mukamu wako, ukusita ukwinong'ona ichizinka chicho chili mu lyiso lyako? Nkimba ungamubuzya buli-buli umukamu wako ukuti, ‘Wee mukamu zagha nefye akapato mulyiso lyako,’ bo utakuchennya ichizinka chicho chili mulyiso lyako? Wee muzimbuli wee! Efya tasi ichizinka chicho chili mu lyiso lyako, po ukwiza pakwennya akiza nukwefya akapato, kako kali mu lyiso ilya umukamu wako.” “Ikwi ilyiza litangela ivikomwa ivibibi, pamo ikwi ibibi litangela ivikomwa ivyiza. Ikwi lyosi likumanyikwa ni ivikomwa vyache vivyo likwela; mutakuyaba ivikomwa vya vikuyu pamo ukuyaba amampesya mu ntolovu. Umuntu umwiza akufumya ubwiza bubo asungite mumoyo wache, wepe umuntu umubibi akufumya ububi bubo asungite mumoyo wache. Pakuti umulomo ghukunena vivyo vili mumoyo. “Nkimba choni chicho mukunyitizya ukuti, ‘Mwene, Mwene,’ loli mutakubomba zizyo inkubabuzya? Umuntu wesi yuyo akwiza kukwane akunteghelezya amazyu ghane nukughabombezya, inkwiza pakubalanjizya yuyo ayanite nawe. Ayanite bulo nu muntu yuyo akazenga inyumba yache. Akakumba mupaka pilyalabwe nukwalapo ulwalo ulwa nyumba. Ulusoko lukizula nukukoma inyumba yila, loli yitakayingana pakuti yikazengiwa akiza. Umuntu wesi yuyo akwivwa amazyu ghane, loli atakughabombezya imbombo ayanite bulo nu muntu yuyo akazenga inyumba yache ukusita ukuzengapo tasi ulwalo. Amizi aghakwizula ghakayikoma inyumba yila, po umwalubilolubilo inyumba yila yikawa. Ukumongoka kwache kukaba kukulu nkani!”