Luka 24

Ukuzyuka kubufwe kwa Yesu

(Mat. 28.1-10; Mlko. 16.1-8; Yoh. 20.1-10)

1Pandabindabi nkani pisiku ilyakwanda mwa sabata, abakolo bakabuka kwipumpa, bo banyamuye ivyakununkila vivyo bakayannya. 2Bakagha ukuti babunguluzizyepo kale ibwe pamulyango wipumpa. 3Bakinjila mukasi, loli batakawaghamo umuvimba uwa Mwene u Yesu. 4Bo bakuswigha na zinizi, umwakuchenusya bulo bakennya abantu babili bavwalite amenda aghakunyezimila bimiliye papipi nabo. 5Abakolo bala bakanyila nkani nukwinamila ivyeni vyabo pasi. Po abantu bala bakalalusya bakati, “Nkimba choni chicho mukulonda umuntu umupuma mu bantu abafwe? 6#Mat. 16.21, 17.22-23, 20.18-19; Mlko. 8.31, 9.31, 10.33-34; Luk. 9.22, 18.31-33Atalimo muno, azyukite kubufwe! Kumbuka zizyo akababuzya bo ali mu Galileya ukuti, 7‘Umwana uwa Muntu abaghiye pakubikiwa munyobe izya bantu abambibi nukukomeliwa pachipinjika. Po isiku ilyabutatu akwiza pakuzyuka kubufwe.’ ” 8Panapo na panapo abakolo bala bakakumbuka amazyu ghache. 9Bo babwelako kwipumpa bakababuzya vyosi vinivi abamanyili 11 bala na banji bosi. 10Mu bakolo balabala mukaba u Malya Magadalena, nu Yohana, sona nu Maliya unyina uwa Yakobo, abene na bakolo abanji babo bakaba nabo bakababuzya zinizi abatumiwa. 11Loli abatumiwa bakinong'onagha vivyo abakolo bala bakanena ukuti vikaba vyabupunganu, sona batakabasubila. 12Loli u Pitala akavundumuka nukuchimbilila kwipumpa, akinamila pasi nukwennya bulo amenda amazelu ghagho bakaghunnyembetelela umuvimba uwa Yesu. Po akabwela kunyumba bo akuswigha na zizyo zikabombiwa.#24.12 Amasimbo ghamo aghakale ghate ni vesi ilya 12.

Zizyo zikabombiwa pa bulendo ubwa ku Emabusi

(Mlko. 16.12-13)

13Pisiku linilyo abamanyili aba Yesu bakabukagha kukaya aka Emabusi, ubutali bwache bukaba amamita 11,000 ukufuma mu Yelusalemu, 14sona bakanenezannyanga nizya vintu vyosi vivyo vikabombiwa. 15Bo bakunenezannya nukulaluzannya benebene, u Yesu akapalamila nukwenda poka nabo. 16Loli batakamwaghannya pakuti amaso ghabo ghakaba ngati ghighaliliwe. 17U Yesu akabalalusya akati, “Nkimba mukunenezannya choni, bo mukwenda.”

Abene bakimilila nivyeni vyabo vya chitima. 18Umuntu weka uwa babo, yuyo akaba we Kiliyopa akalalusya akati, “Nkimba awe we muyeni mu Yelusalemu umu, yuyo atavimenye vivyo vyabombiwa mulamula amasiku amanandi bulo ghagho ghachila?”

19U Yesu akalalusya akati, “Vintu vyoni?”

Abene bakamula bakati, “Ivintu vivyo vikabombiwa kwa Yesu uwa mu Nazaleti. Umuntu uyu akaba mulaghuzi, yuyo imbombo zyache, sona na mazyu ghache vikamuhobosya u Chala, sona na bantu bosi. 20Abaputi abasongo na balaghili bitu bakamubika munyobe izya balongi, umwakuti abalongi badumule ukuti aghoghiwe, po akakomeliwa pachipinjika. 21Loli tukasubilagha ukuti we yuyo akwiza pakubasatula aba Izilayeli. Ukonjelezya pavyosi vinivi, ili lisiku lyabutatu ukwandila pisiku lilyo vikabombiwa. 22Abakolo bamo aba mukabukatila kitu bakatuswighizya nkani. Abene bakabuka kwipumpa pandabindabi, 23loli batakawaghamo umuvimba. Bo babwelako bakatubuzya ukuti bakennya ichisetuka icha bantumi aba Chala, babo bakababuzya ukuti u Yesu mumi. 24Bamo aba mukabukatila kitu bakabuka kwipumpa nukuvyagha vyosi ukuyana na mumo abakolo bala bakanenela, loli batakamwennya.”

25U Yesu akababuzya akati, “Mwe bapunganu mwee! Choni chicho mwe bapalapala nkani pakusubila ivintu vyosi vivyo abalaghuzi bakaghula! 26Nkimba zitamubaghiye pakuti u Kilisitu ayimbe ni vintu vyosi vinivi bo atinjiye mubuchindamu bwache?” 27Sona u Yesu akalingannya kukwabo zizyo zikaneniwa nizya yuyo mu Masimbo ghosi, ukwandila mu mabuku agha Mozesi mupaka na mumasimbo ghosi agha balaghuzi.

28Bo bapalamila kukaya kako bakabukaghako, u Yesu akaba ngati po akubachila. 29Loli bakamulambilizya bakati, “Ikala naswe pakuti kwanda kale pakwila, sona ichisi chandako.” Po akinjila nukwikala nabo. 30Akikala pasi nukulya nabo, sona akasenda ichibama nukupalizya kwa Chala. Po akachimenyannya nukubapa. 31Po amaso ghabo ghakighuka nukumumanya, loli akazyebeluka bulo. 32Bakanenezannyanga benebene bakati, “Nkimba chitakayana bulo nu moto uwakwaka mumoyo ghitu, bo akunena naswe muzila mulamula nukutulingannya Amasimbo?”

33Panapo na panapo bakanyamuka nukunyokela ku Yelusalemu, kuko bakabagha abamanyili 11 babunganite poka na banji, 34nukuti, “Naloli u Mwene azyukite kubufwe! Amubonekela u Simoni!”

35Po abanavuli babili bala bakalingannya vivyo vikababonekela muzila mulamula, sona na mumo bakamumanyila u Mwene, bo amenyannya ichibama.

U Yesu akubabonekela abamanyili bache

(Mat. 28.16-20; Mlko. 16.14-18; Yoh. 10.19-23; Imbo. 1.6-8)

36Bo babili bala bachili bakunena zinizi, u Mwene akimilila pakasi papabo nukuti, “Umutende ghubanje namwe.”#24.36 Amasimbo ghamo aghakale ghate na mazyu aghakuti nukuti, “Umutende ghubanje namwe.”

37Loli abene bakachenuka nukunyila nkani, ukwinong'ona ukuti bakwennya chizyuka. 38Po u Yesu akababuzya akati, “Choni chicho mukunyila nukwilamwa mumoyo ghinyu? 39Ennya inyobe zyane, sona ni vinama vyane, ukuti naloli Nene! Mumpalamasye nukwennya pakuti ichizyuka chite ni nyama na mafupa ukuyana na mumo mukunyenezya ane indi navyo.”

40Bo anena zinizi, akabalanjizya inyobe ni nyayo zyache.#24.40 Amasimbo ghamo aghakale ghate ni vesi ilya 40. 41Pope bulo batakasubila pakuti bakahoboka nkani nukuswigha. Po akabalalusya akati, “Nkimba muli nacho chimo ichakulya?” 42Bakamupa akamenyu akaswi impiye, 43kako akasenda nukulya pamaso papabo.

44Po akababuzya akati, “Ivi vyo vivyo inkababuzya, bo indi poka namwe. Vyosi vivyo vikasimbiwa nizya ane mu Ndaghilo izya Mozesi, ubusimbe ubwa balaghuzi na mu Masalimo bukwanilisiwe.”

45Po akabighula inyinong'ono zyabo ukuti bivwisye Amasimbo, 46nukubabuzya ukuti, “Ivi vyo vivyo visimbiwe: U Kilisitu abaghiye pakuyimba nukuzyuka kubufwe, bo ghachilapo amasiku matatu, 47sona nukuti mwitabwa lyache amazyu ghalumbililiwe pakasi pa bantu aba inko zyosi ukwandila mu Yelusalemu ukuti abantu bapinduke nukuzileka imbibi zyabo, sona nukuti u Chala abahobokele imbibi zyabo. 48Amwe mwe bakaboni aba vintu vyosi vinivi. 49#Imbo. 1.4Nkwiza pakubatumila chicho u Tata wane akalayizya. Loli mulindililaye mukaya akakulu nkani mupaka papo mwapokela amaka aghakufuma kumwanya.”

U Yesu akusendiwa ukubuka kumwanya

(Mlko. 16.19-20; Imbo. 1.9-11)

50 # Imbo. 1.9-11 Po akabalongolela pakufuma nabo mukaya akakulu nkani kala mupaka mukaya aka Betaniya. Kulakula akimika inyobe zyache nukubasaya. 51Bo akubasaya, akatantama panandi nukusendiwa ukubuka kumwanya.#24.51 Amasimbo ghamo aghakale ghate na mazyu aghakuti nukusendiwa ukubuka kumwanya. 52Bakamuchindika nukunyokela mu Yelusalemu, bo bizuye nu buhobosu ubukulu nkani. 53Akabalilo kosi bakikalagha mu Nyumba iya Chala pakumupalizya u Chala.

Currently Selected:

Luka 24: LMBNT2016

Highlight

Copy