Luka 23
23
U Yesu pamaso pa Pilati
(Mat. 27.1-2, 11-14; Mlko. 15.1; Yoh. 18.28-38)
1Ichilundilo chosi chikanyamuka nukubuka nu Yesu kwa Pilati, 2kuko bakanda pakumutamantila ukuti, “Tukamwagha umuntu yunuyu akubasovya abantu bitu, akubakanizya pakusonka umusonko kwa Kesale, nukwinena mwene ukuti we Kilisitu, sona we Mwene.”
3U Pilati akamulalusya akati, “Nkimba awe we Mwene uwa ba Yuda?”
U Yesu akamula akati, “Wanena wemwene.”
4Po u Pilati akababuzya abaputi abasongo ni chilundilo icha bantu chila akati, “Intakumwaghapo ninongwa nayimoyimo umuntu uyu.”
5Loli bakiyula nkani pakunena bakati, “Ni vimanyilo vyache akwandizya ivyongo mu bantu muchigaba chosi icha Yudeya. Akanda muchigaba icha Galileya, ilelo ali kuno.”
U Yesu pamaso pa Helodi
6Bo u Pilati ivwa zinizi, akalalusya akati, “Nkimba umuntu uyu wamu Galileya?” 7Bo azimanya ukuti u Yesu akafuma muchigaba chicho chikalaghiliwanga nu Helodi, akamutuma kwa Helodi, yuyo akaba mu Yelusalemu akabalilo kalakala. 8U Helodi akahoboka nkani bo amwennya u Yesu pakuti akivwanga bulo nizya yuyo, sona akamulondagha akabalilo akatali pakumwennya. Akalondagha nkani ukuti amwennye u Yesu akubomba ichika chimo. 9Po u Helodi akamulalusya u Yesu amalaluzyo aminji, loli u Yesu atakamwamula. 10Abaputi abasongo na bamanyisi aba Ndaghilo bakiza pantazi nukumutamantila nkani u Yesu. 11U Helodi na basilikali bache abankondo bakamobezya u Yesu nukumutuka. Po bakamuvwika inkazo inyiza nukumutuma sona kwa Pilati. 12Bo zitabombiwe zinizi, pakasi pa Helodi nu Pilati pakaba ubulwani. Loli ukwandila pisiku lilalila bakaba pa bumanyani.
Kwadumuliwa ukuti u Yesu aghoghiwe
(Mat. 27.15-26; Mlko. 15.6-15; Yoh. 18.39—19.16)
13U Pilati akabitizya poka abaputi abasongo, na balongozi, sona na bantu bosi 14nukubabuzya ukuti, “Mwizite nu muntu uyu kukwane ukuti akubasovya abantu. Po ilelo namulalusya pamaso papinyu, loli ntakuyaghamo nayimoyimo inongwa mu muntu uyu pavintu vivyo mukumutamantila.” 15Wepe u Helodi atakamwaghapo ninongwa, cho chifukwa akamunyosezya kukwitu. Chitalipo nachimochimo chicho umuntu uyu abombite ichakuti angaghoghiwa nacho. 16Po inkwiza pakumusyempa bulo nukumulekezya ukuti abukaye.#23.16 Amasimbo ghamo aghakale ghonjelezya ivesi ilya 17: Palusekelo losi ulwa Pasa, u Pilati akizubila pakumusatula umukayidi weka, yuyo abantu bamusala ukuti abasatulile (ennya mwa Mlko. 15.6).
18Abantu bosi bala bakakolomoka nkani ukuti, “Mughoghe! Tusatulile u Balabasi!” 19(U Balabasi akaba mujele pachifukwa icha kwandizya ivyongo mukaya akakulu nkani, sona nu kughogha abantu.)
20U Pilati akalondagha pakumusatula u Yesu, po akabuka sona pakunenezannya na bantu bala. 21Loli abantu bakakolomoka nkani bakati, “Mukomele pachipinjika! Mukomele pachipinjika!”
22U Pilati akababuzya akabutatu akati, “Nkimba ananga ichoni? Intakuyaghamo nayimoyimo inongwa iyakuti angaghoghiwa nayo. Inkwiza pakumusyempa bulo nukumulekezya ukuti abukaye.”
23Loli bakendelela pakukolomoka na mazyu agha pamwanya ukuti u Yesu akomeliwe pachipinjika. Pabumalilo ukukolomoka kwabo kukapota. 24Po u Pilati akadumula ukuti chicho abantu bakalondagha cho chicho chibombiwe. 25Akamusatula umuntu yuyo bakamulondagha, yuyo akaba mujele pachifukwa icha kwandizya ivyongo nu kughogha abantu, po akamubika u Yesu munyobe zyabo ukuti babombe nawe ukuyana na mumo bakalondelagha.
Bakumukomela u Yesu pachipinjika
(Mat. 27.32-44; Mlko. 15.21-32; Yoh. 19.17-27)
26Abasikali abankondo bakamusenda u Yesu nukubuka nawe. Muzila bakakomana nu muntu yumo uwa mu Kileni, yuyo akaba we Simoni, yuyo akafumagha mutwaya. Bakamunyamulisya ichipinjika ukuti amukonkaye u Yesu mwisinda.
27Ichilundilo ichikulu icha bantu chikamukonkagha u Yesu. Mumwabo mukaba abakolo bamo babo bakaba ni chitima nu Yesu nukumulilila. 28U Yesu akaghalabukila kukwabo nukubabuzya ukuti, “Mwe bakolo aba mu Yelusalemu, mutakandililaye. Loli mwililile mwebene na bana binyu. 29Pakuti amasiku ghakwiza ghagho abantu bakwiza pakunena ukuti, ‘Basayiwa abakolo babo baghumba, babo batapapitepo nalumo, babo batonkezizyepo nalumo.’ 30#Ubv. 6.16Kalakala kakwiza pakuba kabalilo kako abantu bakwiza pakughabuzya amaghamba ukuti, ‘Tuwile,’ nukutubuzya utughamba ukuti, ‘Tufise.’ 31Pakuti nanti bakubomba zinizi kwikwi ibisi, po zingaba buli-buli kwikwi ilyumizu?”
32Bakasenda sona na bantu bamo babili, babo bakaba mavyondongo ukuti baghoghiwe poka nu Yesu. 33Bo bafika pabuzilo bubo bukwitiziwa ukuti, “Ifupa ilya kumutu.” Bakamukomela u Yesu pachipinjika palapala poka na mavyondongo mabili ghala, lyoka kunyobe indilo, sona ilinji iya kumongo. 34#Mas. 22.18U Yesu akati, “Wee Tata ubahobokele pakuti batakuzimanya zizyo bakubomba.”#23.34 Amasimbo ghamo aghakale ghate na mazyu aghakuti Yesu akati, “Tata, ubahobokele imbibi zyabo pakuti batakuzimanya zizyo bakubomba.”
Bakagabana amenda ghache pakupanga amayele. 35#Mas. 22.18Abantu bakimilila palapala pakwennya bo abalongozi aba Chiyuda bakumobezya u Yesu ukuti, “Akabapokagha abantu abanji, muleke wepe ipoke mwene nanti we Kilisitu yuyo u Chala akamusala.” 36#Mas. 22.7Abasikali abankondo bope bakamobezya. Bakapalamila papipi nawe nukumupa uvinyo uwakusapa ukuti ang'wele 37nukuti, “Nanti we Mwene uwa ba Yuda, ipoka wemwene.”
38Pamwanya pachipinjika chache pakasimbiwapo amazyu aghakuti, “Uyu we Mwene uwa ba Yuda.”
39Weka uwa mavyondongo yuyo bakamukomela poka nawe akamutuka u Yesu akati, “Nkimba awe ute we Kilisitu? Ipoka wemwene, sona utupoke naswe bulo!”
40Loli ilinji likamuchemela likati, “Nkimba utakumunyila u Chala? Uli pakufundiwa nu lufundo ngati lulo ali pakufundiwa nalo. 41Aswe zitubaghiye ukuti tufundiwe ukuyana na zizyo twabombite; loli umwene atabombite nachimochimo ichibibi.” 42Po akati, “Yesu, unkumbuke nanti wafika mu Bumwene bwako!”
43U Yesu akamubuzya akati, “Naloli inkukubuzya ukuti ilelo ukwiza pakuba nane ku Buyo ubwa buhobosu kumwanya.”
Ubufwe ubwa Yesu
(Mat. 27.45-56; Mlko. 15.33-41; Yoh. 19.28-30)
44Bo izuba lyafika pamutu, likaleka pakulama, sona ichisi chikawa muchisu chosi mupaka fili koloko pachamabwila. 45#Ukf. 26.31-33Umwenda ghugho ghukazighila mu Nyumba iya Chala ghukazepuka pakasi na pakasi. 46#Mas. 31.5U Yesu akalila nizyu ilya pamwanya akati, “Wee Tata inkughubika umuzimu wane munyobe zyako!” Bo anena zinizi, akazililika.
47Usongo uwa basilikali akennya zizyo zikabombiwa nukumuchindika u Chala ukuti, “Naloli uyu akaba muntu mugholosu.”
48Abantu bosi babo bakabungana palapala ukwennya chicho chikabombiwa, bo bennya chicho chikabombiwanga, bakabwela kunyumba zyabo bakwikoma pavifuba vyabo ni chitima. 49#Luk. 8.2-3Abantu bosi babo bakamanyana nu Yesu, poka na bakolo babo bakamukonkagha ukufuma mu Galileya bakimilila pa butalipo ukwennya zinizi.
U Yesu abikiwa mwipumpa
(Mat. 27.57-61; Mlko. 15.42-47; Yoh. 19.38-42)
50Kukabako umuntu yumo yuyo akaba we Yosefu, weka uwakabukatila aka balongozi. Akaba muntu mwiza sona mugholosu. 51Atakitinkana ni nyinong'ono, sona ni mbombo zyabo. Akafuma ku Yudeya mukaya aka Alimateya, po akalindiligha Ubumwene ubwa Chala. 52Akabuka kwa Pilati nukulaba umuvimba uwa Yesu. 53Po akisya umuvimba ghula nukughunnyembetelela ni sanda nukughubika mwipumpa, lilyo likakumbiwa kwibwe, sona batakabombezyapo nalumo. 54Pakaba po pa Chisano, sona Isiku Ilyakutuzya likaba papipi pakwanda.
55Abakolo babo bakamukonkagha u Yesu ukufuma mu Galileya bakabuka nu Yosefu pakwennya ipumpa, sona na mumo bakaghubikila umuvimba uwa Yesu. 56#Ukf. 20.10; Ukk. 5.14Bakabwela kunyumba nukuyannya amafuta ni vyakununkila. Loli bakatuzya Pisiku Ilyakutuzya ukuyana ni Ndaghilo izya Mozesi.
Currently Selected:
Luka 23: LMBNT2016
Highlight
Share
Copy
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya
