Yohani 9

Nizya muntu yuyo akapapiwa mufwamaso

1Bo u Yesu akwenda, akamwennya umuntu yuyo akapapiwa mufwamaso. 2Abamanyili bache bakamulalusya bakati, “Wee Mumanyisi, nkimba we wenu akananga ukuti umuntu yunuyu apapiwe mufwamaso? Nkimba we yuyo akananga, pamo abapapi bache?”

3U Yesu akabamula akati, “Atakaba we yuyo yunuyu, pamo abapapi bache babo bakananga. Loli akapapiwa mufwamaso ukuti amaka agha Chala ghabonekelemo mumwache. 4Bo kuchili musanya, tubaghiye pakubomba imbombo iya yuyo akantuma. Ubusiku bukwiza bubo nayumo umuntu atangabomba imbombo. 5#Mat. 5.14; Yoh. 8.12Bo inchili indi muchisu ichapasi, ane ne lukozyo ulwa chisu ichapasi.”

6Bo amala pakunena zinizi, u Yesu akafwina amati pasi, akakanta itope na mati ghala, po akaghapaka ni tope amaso agha umuntu yula, 7nukumubuzya ukuti, “Bukagha usukusule kumaso pachiziba icha Silowamu.” (Silowamu chikung'anamula ukuti Umutumiwa). Po umuntu yula akabuka nukusukusula kumaso, po akanyokela bo akwennya.

8Abapalamani bache na bantu babo bakamwennyanga bwila bo akulaba-laba bakalalusya bakati, “Nkimba uyu ate we yuyo akikalagha pasi nukulabalaba?”

9Bamo bakati, “We yunuyu.” Abanji bakati, “Awe, ayanite bulo nawe.”

Po umwene akababuzya akati, “Nene.”

10Abene bakamulalusya bakati, “Nkimba amaso ghako ghighukite buli-buli?”

11Umwene akabamula akati, “Umuntu yuyo bakuti Yesu, akakanta itope nukumpaka kumaso; akambuzya akati, ‘Bukagha usukusule kumaso pachiziba icha Silowamu. Inkabuka nukusukusula kumaso, po inkagha nanda pakwennya.’ ”

12Abene bakamulalusya bakati, “Nkimba ali ko kwiyi umwene?”

Akabamula akati, “Intamenyeko.”

Aba Falisayi bakulondelezya nizya kupoziwa kwache

13Po bakabuka nawe mu ba Falisayi umuntu yuyo kale akaba mufwamaso. 14Likaba Lisiku Ilyakutuzya lilyo u Yesu akakanta itope nukumupozya umuntu yula. 15Aba Falisayi bope bakamulalusya umuntu yula namumo amaso ghache ghakighukila. Po umwene akababuzya akati, “Akampaka itope mumaso ghane, inkasukusula kumaso, po ilelo nkwennya.” 16Aba Falisayi bamo bakati, “Umuntu uyu atafumite kwa Chala pakuti akunangannya ululaghilo ulwa Lisiku Ilyakutuzya.”

Abanji bakati, “Nkimba umuntu uwa mbibi angabomba buli-buli ivimanyilo vinivi?” Po bakagabinkana benebene.

17Po aba Falisayi bakamulalusya sona umuntu yula bakati, “Ukuti akakwighula amaso, mute momumo, po nkimba ukuti choni nizya muntu yunuyu?”

Umuntu yula akabamula akati, “We mulaghuzi.”

18Loli abalaghili aba Chiyuda batakalondagha pakusubila ukuti akaba mufwamaso, sona ilelo akwennya, mupaka bakabitizya abapapi bache 19nukubalalusya ukuti, “Nkimba uyu mwana winyu, yuyo mukuti akapapiwa mufwamaso? Po ilelo akwennya buli-buli?”

20Abapapi bache bakamula bakati, “Tuzimenye ukuti uyu mwana witu, sona tuzimenye ukuti akapapiwa mufwamaso. 21Loli namumo ghighukiye amaso ghache zyo tutazimenye, sona na wepe yuyo akamwighula amaso tutamumenye. Mumulaluzye yuyo pakuti we umuntu usongo, angiyamulila mwene.” 22Abapapi bache bakanena izi pachifukwa chakuti bakabanyilagha abalaghili aba Chiyuda, babo bakivwana kale ukuti umuntu wesi yuyo akasubila ukuti u Yesu we Kilisitu, akwiza pakwepusiwa munyumba iyakwiputilamo. 23Ichi cho chifukwa abapapi bache bakanena bakati, “We umuntu usongo, mumulaluzye mwene.”

24Po bakamwitizya sona ulwabubili umuntu yuyo akapapiwa mufwamaso nukumubuzya ukuti, “Lapa pamaso pa Chala ukuti ukwiza pakunena ubwanaloli. Aswe tuzimenye ukuti umuntu yuyo akakwighula amaso ghako wambibi.”

25Umuntu yula akamula akati, “Ane izyakuti wambibi pamo ate wambibi ntazimenye. Ichintu choka chicho inchimenye ichakuti inkaba mufwamaso, loli ilelo nkwennya.”

26Bakamulalusya bakati, “Nkimba abombite izya choni kukwako? Akwighuye buli-buli amaso ghako?”

27Akabamula akati, “Imbabuzizye kale, loli mutalondagha ukwivwa. Nkimba choni chicho mukulonda ukwivwa sona? Pamo namwe bulo mukulonda pakuba bamanyili bache?”

28Abene bakamutuka bakati, “Awe we mumanyili uwa muntu uyu, loli aswe twe bamanyili aba Mozesi. 29Aswe tuzimenye ukuti u Chala akanena nu Mozesi, loli izya muntu uyu tutazimenye, sona na kuko afuma tutamenyeko.”

30Umuntu yula akamula akati, “Izi zyakuswighizya nkani ukuti amwe mutamenyeko kuko umuntu uyu afuma, loli akanyighula amaso. 31Aswe tuzimenye ukuti u Chala atakwamula inyiputo izya bambibi, loli akwamula inyiputo izya bantu babo bakumuchindika nukubomba zizyo akulonda. 32Ukwandila ko kubwandilo ubwa chisu ichapasi, tutivuyepo nalumolumo ukuti kukabako umuntu weka yuyo akighula amaso agha umuntu yuyo akapapiwa mufwamaso. 33Nanti umuntu uyu atakafumagha kwa Chala, atangabomba nachimochimo.”

34Abene bakamula bakati, “Awe ukapapiwa nukukulila mumbibi, nkimba ilelo ukulonda pakutumanyizya aswe?” Po bakamwepuzyamo munyumba iyakwiputilamo.

Ubufwamaso mubuzimu

35U Yesu akivwa ukuti umuntu yula bamwepuzyamo munyumba iyakwiputilamo, sona bo amwagha akamulalusya akati, “Nkimba ukumusubila u Mwana uwa Muntu?”

36Umuntu yula akamula akati, “Mwene, mbuzya we wenu umuntu yunuyu, umwakuti nane imusubile.” 37U Yesu akamubuzya akati, “Umwenizye kale, po yuyo akunena nawe we yuyo.” 38Po akati, “Mwene, inkusubila.” Akamufughamila u Yesu nukumuchindika.

39U Yesu akati, “Nkiza muchisu ichapasi pano pakulonga, umwakuti abafwamaso bennye, sona babo bakwennya babanje bafwamaso.”

40Aba Falisayi bamo babo bakaba nawe palapala bakivwa amazyu ghache nukumulalusya ukuti, “Nkimba ukung'anamula ukuti naswe bulo twe bafwamaso?”

41U Yesu akabamula akati, “Nanti mukabanga bafwamaso, ngali mute mwe bambibi. Loli pakuti mukwinena mwebene mukuti, ‘Tukwennya,’ chikung'anamula ukuti muchili mwe bambibi.”

Currently Selected:

Yohani 9: LMBNT2016

Highlight

Copy