Yohani 11

Ubufwe ubwa Lazalo

1 # Luk. 10.38-39 Pakabapo umuntu yumo yuyo akaba we Lazalo, uwa mukaya aka Betaniya, yuyo akaba mubine. Betaniya kakaba kaya kako u Maliya nu muzuna wache u Malita bakikalaghamo. 2#Yoh. 12.3U Maliya yunuyu akaba we yuyo akakupulila amafuta aghakununkila munyayo izya Mwene nukuzipuputa ni sisi zyache. Umuyemba wache u Lazalo we yuyo akaba mubine. 3Abayemba bakamutumila u Yesu amazyu aghakuti, “Mwene, umumanyani wako umughaniwa abinite.” 4Bo u Yesu ivwa zinizi akati, “Ububine ubu bute bwakuti angafwa nabo, loli bwakuti u Chala achindikiliwemo, sona ukuti u Mwana uwa Chala apokele ubuchindamu pachifukwa icha bubine bunubu.”

5U Yesu akamughana u Maliya nu muzuna wache u Malita, sona nu Lazalo. 6Loli bo u Yesu ivwa ukuti u Lazalo abinite, akikala kuko akabanga amasiku aghanji mabili. 7Po akababuzya abamanyili bache akati, “Zagha tunyokele mu Yudeya.”

8Abamanyili bache bakamwamula bakati, “Wee Mumanyisi, patachilitepo na kabalilo akapimpa bulo, aba Yuda bakulakula bakalondagha pakukusumba na mabwe, po nkimba ukulonda pakunyokelako sona?” 9U Yesu akamula akati, “Umusanya ghuli na ma awala 12, mute momumo? Po nanti umuntu akwenda nu musanya atakwipunula pakuti akulwennya ulukozyo ulwa chisu ichapasi. 10Loli nanti akwenda nu busiku, akwipunula pakuti ate nu lukozyo.”

11U Yesu akanena amazyu ghanagha nukonjelezyapo ukuti, “Umumanyani witu u Lazalo aghonite bulo utulo, loli nkubuka pakumulamusya.” 12Abamanyili bache bakamwamula bakati, “Mwene, nanti achili bulo mutulo, akwiza pakuba akiza.” 13Abene bakinong'onagha ukuti akunena utulo utwenecho, loli u Yesu akang'anamulagha ukuti u Lazalo afuye. 14Po u Yesu akababuzya pabuzelu akati, “U Lazalo afuye, 15loli pachifukwa icha mwemwe ihobokite nkani ukuti ntakabako, umwakuti musubile. Twende kukwache.” 16Po u Tomasi, (yuyo akitiziwanga ukuti we Didimo), akababuzya abamanyili abamwabo akati, “Twende twebosi poka nu mumanyisi, umwakuti tufwile poka nawe.”

U Yesu we yuyo akubazyusya abantu

17Bo u Yesu afika akagha ukuti u Lazalo aghonamo kale mwipumpa amasiku folo. 18Akaya aka Betaniya kakaba papipi nu Yelusalemu, amamita 3,000, 19po aba Yuda abinji bakiza pakumulema inyobe u Malita nu Maliya pachifukwa icha bufwe ubwa muyemba wabo.

20Bo u Malita ivwa ukuti u Yesu akwiza, akafuma kuzi pakumupokela, loli u Maliya akasyala munyumba. 21U Malita akamubuzya u Yesu akati, “Mwene, nanti ukabangapo panapa, ngali umuyemba wane atafuye! 22Loli izimenye ukuti ilelo u Chala akwiza pakukupa chosi chicho ukumulaba.”

23U Yesu akamubuzya u Malita akati, “Umuyemba wako akwiza pakuzyuka kubufwe.”

24U Malita akamwamula akati, “Inzimenye ukuti akwiza pakuzyuka kubufwe pisiku ilyabumalilo.”

25U Yesu akamubuzya akati, “Ane ne yuyo akuzyusya abantu nukubapa ubumi. Umuntu wesi yuyo akusubila mumwane akwiza pakuba nubumi napapo angafwa. 26Sona umuntu wesi yuyo mumi nukusubila mumwane atakwiza pakufwa nalumo. Nkimba ukuzisubila zinizi?”

27U Malita akamwamula akati, “Ee, Mwene, inkusubila ukuti awe we Kilisitu, u Mwana uwa Chala, yuyo bakatinji akwiza muchisu ichapasi.”

U Yesu akulila

28Bo u Malita amala pakunena zinizi, akanyokela pakumwitizya umuzuna wache u Maliya palubazu nukumubuzya ukuti, “Umumanyisi ali kuno akukwitizya.” 29Bo u Maliya ivwa zinizi, akanyamuka umwalubilolubilo pakukomana nu Yesu. 30U Yesu akaba achili pakufika mukaya kala, loli akaba achili pabuzilo bubo u Malita akakomana nawe. 31Abantu babo bakaba munyumba poka nu Maliya pakumulema inyobe, bakamukonka bo bennya anyamuka umwalubilolubilo nukufuma kuzi. Bakinong'onagha ukuti akubuka mumapumpa pakulila. 32U Maliya akafika pabuzilo bubo u Yesu akaba, po bo amwennya bulo, akamuwila muvinama. Akamubuzya akati, “Mwene nanti ukabangapo panapa, ngali umuyemba wane atafuye.”

33Bo u Yesu amwennya u Maliya akulila, sona na bantu babo bakaba nawe, umoyo wache ghukizula ni chitima, sona akayimba nkani mumoyo wache. 34Akabalalusya akati, “Nkimba mumusyilite kwiyi?”

Abene bakamwamula bakati, “Mwene, twende wennyeko.”

35U Yesu akalila. 36Po aba Yuda bakati, “Ennya namumo akamughanila.”

37Loli bamo bakati, “Umuntu uyu akamwighula amaso umufwamaso, mute momumo? Nkimba atangabombapo chimo ukuti u Lazalo atakafwe?”

U Yesu akumuzyusya u Lazalo

38U Yesu akayimba nkani sona mumoyo wache, po akabuka kwipumpa lilyo likaba mpako. Bakighalilapo nibwe pamulyango. 39U Yesu akalamula akati, “Efyapo ibwe.”

U Malita umuyemba uwa muyazi yula akamubuzya u Yesu akati, “Mwene, pano pakwiza pakununka akabibi pakuti aghonamo kale amasiku folo.”

40U Yesu akamubuzya akati, “Nkimba ntakakubuzya ukuti nanti ukusubila ukwiza pakwennya ubuchindamu ubwa Chala?” 41Bakefyapo ibwe lila. Po u Yesu akennya kumwanya nukuti, “Tata, inkukupalizya pakuti wivwa inyiputo zyane. 42Inzimenye ukuti ukunyivwa akabalilo kosi, loli nkunena ichi mubuzilo ubwa bantu babo bali pano, umwakuti basubile ukuti wewe ukantuma.” 43Bo amala pakunena zinizi, akitizya nizyu ilya pamwanya nkani akati, “Lazalo epamo!” 44Umuyazi yula akepamo, inyobe ni vinama vikaba vichili vinnyembeteleliwe na menda ghagho bakamusyilila nagho, sona nu mwenda ghugho bakamunnyembetelela nagho kumaso. U Yesu akababuzya akati, “Mumusatule, muleke abukaye.”

Aba Yuda bakubatika pakumughogha u Yesu

(Mat. 26.1-5; Mlko. 14.1-2; Luk. 22.1-2)

45Aba Yuda abinji babo bakiza pakumulema inyobe u Maliya bakennya zizyo u Yesu akabomba, po bakamusubila. 46Loli bamo bakabuka kuba Falisayi nukubabuzya zizyo u Yesu akabomba. 47Po aba Falisayi na baputi abasongo bakaba nu lukomano nukulaluzannya ukuti, “Nkimba tubombe choni panapa? Ennya, umuntu yunuyu akubomba ivimanyilo ivyinji! 48Nanti tukumuleka bulo ukuti endelelaye bunubu, abantu bosi bakwiza pakumusubila, sona aba Loma bakwiza pakunangannya Inyumba iya Chala nu luko lwitu bulo!”

49Weka mukasi mumwabo yuyo akaba we Kayafa, Umuputi Usongo umwaka ghulaghula akati, “Amwe mwe bapunganu! 50Nkimba mutakuzyaghannya ukuti chizapo umuntu weka abafwile abantu bosi nukuchila ukuti uluko losi luzimile?” 51Nkani-nkani, atakanenapo amazyu agha na mahala aghache na ghache. Loli pakuti akaba Muputi Usongo mumwaka ghulaghula, akalaghula ukuti u Yesu akwiza pakulufwila uluko ulwa ba Yuda, 52kute kokuti akwiza pakulufwila uluko lwabo lwene, loli pakubabungannya sona abana aba Chala babo banyampanite.

53Ukwandila pisiku lilalila, abalaghili aba Chiyuda bakivwana nizya kumughogha u Yesu. 54Po u Yesu akaleka ukwenda-kwenda pabuzelu mukaya aka Yudeya, loli akepukako nukubuka kubuzilo bubo buli papipi ni nkolongo, akaya akakulu aka Efulayimu, kuko akikalagha na bamanyili bache.

55Ulusekelo ulwa Pasa uwa Chiyuda lukaba papipi, po aba Yuda abinji bakafuma mutwaya nukubuka mu Yelusalemu pakubomba ulwiho ulwakwiswefya, bo nu lusekelo luchili pakubombiwa. 56Bakamulondagha u Yesu, po bo bakomana mu Nyumba iya Chala bakanda pakulaluzannya bakati, “Amwe mukwinong'ona ichoni? Nkimba akwiza ku lusekelo ulu pamo awe?” 57Abaputi abasongo naba Falisayi bakalamula bakati nanti alipo yumo yuyo amenye kuko u Yesu akaba, abuke ababuzye, umwakuti babuke bamuleme.

Currently Selected:

Yohani 11: LMBNT2016

Highlight

Copy