Makụ 8

Jisọsu l'anụ ụnu madzụ iri nri

(Mát. 15:32-39)

1O rwua ujiku lanụ, igweligwe madzụ dzukobekwawho ọdo, tọ dụ nri whẹ gude whẹ l'e-ri. Jisọsu bya e kua ndu l'etso ụzo iya sụ whẹ: 2“Imiko igweligwe ndu-a dụakwa mu, unu awhụa l'onye lẹ whẹ nọwaru ujiku ẹto ntaa l'ẹka-a, tọ hẹ l'ọ dụkwadu nri whẹ gude, whẹ l'e-ri. 3Mu ta adụkwanu ike asụ whẹ tẹ whẹ swịru ẹgu lashia. Mu -kfua ya nno bẹ ọdamba l'a-tụkwa whẹ l'ụzo mẹ whẹ ladẹ, o noo l'o nweru ndu ọwhu harụ shi ụzo otẹnya.”

4Ndu l'etso ụzo iya sụ iya: “?Ọo awee bẹ l'aa-whụkwanu buredi l'e-dzukota ndu-a l'echi-ẹgu l'ẹka-a?”

5Ọ sụ whẹ: “?Ọo ishi buredi ole bẹ unu gude?” Whẹ sụ iya “Ọo ẹsaa.”

6Ọo ya bụ, ọ sụ t'igweligwe ndu ono nọdukota anọdu l'alị l'ẹka ono. Ọ bya achịta ishi buredi ẹsaa ono bya ekele Chileke ekele. O kelegelewho Chileke, ọ nyawashịa ya nụ ndu l'etso ụzo iya tẹ whẹ keshiaru ndu ono. Ndu l'etso ụzo iya keeru whẹ iya. 7O nwekwaruwho ụnwu-ẹma, whẹ chị. O kelekwawho Chileke lẹ nke ẹma ono, bya anụ iya ndu l'etso ụzo iya tẹ whẹ kefuaru iya ndu ono. 8Whẹ ritagee rijishia ẹwho. Whẹ bya atụtukoo ibiribe iya ọwhu whẹ riwhodoru. O ji nkata-ivu ẹsaa. 9Ndu riru nri ono rwukwaru ụnu madzụ ugbo iri. Ọ sụ whẹ tẹ whẹ lashiwaro. 10Yẹle ndu l'etso ụzo iya bahụ l'ụgbo tụgbua jeshia alị Dalumanúta.

Eekfu tẹ Jisọsu goshi l'ọo Chileke zhiru iya

(Mát. 16:1-4)

11Ndu Fárisii byakfutashia Jisọsu, whẹ l'iya tụlahaa ẹgo. Whẹ sụ iya t'o meeru whẹ iwhe-awhụrulenya, bụkwanu iwhe l'e-goshi whẹ l'ọo whọ Chileke bẹ zhiru iya ọkpobe iya. Iwhe ono bụkwanuru ọnya okfu bẹ whẹ bya agbaarụ iya nno tẹ whẹ gude nmata iya. 12Ọ tsụa oke ude l'ime obu iya zhia ume sụ whẹ: “?Ọo gụnu kpatarụ ọgbo elenu-a bụ-zhiaruwho iwhe-awhụrulenya, l'e-goshi l'ọo Chileke zhiru mu tẹ mu bya bẹ whẹ l'anọje elewhe ẹnya iya. Iwhe mu l'ekfuru unu bụ; ọ tọ dụkwa iwhe-awhụrulenya, a bya l'egoshi ọgbo elenu-a.”

13Jisọsu whẹ gharụ whẹ l'ẹka ono bahụ l'ụgbo ngagbụru iya jeshia azụ mini azụ iya ọwhu.

Jisọsu l'amarụ ndu l'etso ụzo iya ọkwa ejo nzhi ndu Fárisii

(Mát. 16:5-12)

14Ndu l'etso ụzo iya zọhaa ogude nri, ọ bụleruwho ishi buredi lanụ bẹ bụ mkpakọ nri, whẹ gude nọdu l'ụgbo ono. 15Jisọsu nmaarụ whẹ ọkwa sụ: “Unu kwakwaa ẹnya, zelajeeru iwhe-l'ekoje-buredi nke ndu Fárisii mẹe nke Hẹ́rodu t'o bo mebyi unu.”

16Whẹ kfulahaaru ibe whẹ sụ: “Ọ kwa l'ọo l'anyi te egudedu buredi meru l'ookfu nno.”

17Jisọsu marụ iwhe whẹ l'ekfu ọ sụ whẹ: “Ọo-wa! ?Ọo gụnu meru unu l'ekfukaa l'onwunu l'unu te egudedu buredi? ?Unu ta akabẹdu rịa ọriri rị-vu iwhe mu mehawaru ?toko doduaro unu ẹnya; ndẹe g'ọ nwụru iwhe te edoje unu ẹnya ẹgwegwa? 18?Unu nweru ẹnya, unu ta awhụ iya ụzo? ?Unu kfụ nchị, unu ta anụ iya iwhe? O to nwedu iwhe unu l'anyatajẹ-zhia. 19Nteke ono mu gude ishi buredi ise keeru ụnu madzụ ugbo iri l'ẹbo l'ụkporo ụmadzu iri. ?Ọ nụa nkata-ivu ole bẹ unu tụtu-jiru ibiribe iya ọwhu whọduru nụ?”

Whẹ sụ iya l'ọo iri l'ẹbo.

20“Ọ dụ ree! Nteke mu gude ishi buredi ẹsaa keeru ụnu madzụ ugbo iri ?ọ nụa nkata-ivu ole bẹ unu tụtu-jiru ibiribe iya ọwhu whọduru nụ?”

Whẹ sụ iya l'ọo ẹsaa.

21Ọ sụ whẹ: “?Toko dokwawho unu ẹnya ntaa?”

Jisọsu l'eme t'onye l'atsọ ìshì whụa ụzo

22Whẹ bya erwua Bẹtusáyida, e dutaru iya onye l'atsọ ìshì. Whẹ ryọlahaa Jisọsu t'o byia ya ẹka. 23O sekputa onye ono l'atsọ ìshì ono l'ẹka dufuta iya lẹ mkpụkpu ono. Ọ bya agbụru ọnu-mini ye iya l'ẹnya, bya ebyia ya ẹka sụ iya: “?Ọ dụ iwhe ị whụru?” 24Onye ono, l'atsọ ishi ono palia ẹnya sụ: “Ee; mu whụru madzụ, ọle whẹ dụ-gee g'ọo oshi l'ejekaa ije.” 25Jisọsu byakwa ebyia ya ẹka l'ẹnya ọdo. Nwoke ono bya asaa ẹnya, ọ bụru iya emehu. Ọ whụ-rwetalahaa iwhe lile ree-ree-ree. 26Jisọsu sụ iya t'ọ tụgbua lashia ibe iya, sụ iya t'ọ bọ bahụhekwa l'ime mkpụkpu ono, t'o lashilekwawho.

Pyita l'akọ onye Jisọsu bụ

(Mát. 16:13-20; Luk. 9:18-21)

27Jisọsu yẹle ndu l'etso ụzo iya tụgbua jeshia lẹ mkpụkpu lẹ mkpụkpu dụ-gee lẹ Sizaríya Fílipayi. Whẹ jenyaa l'ụzo, ọ jị whẹ sụ: “?Ọo onye bẹ l'aasụje lẹ mu bụ?”

28Whẹ sụ iya l'o nweru ndu lasụje l'ị bụ Jọnu onye shi emeje baputizimu, o nweru ndu l'asụje l'ị bụ Eláyija, o nwekwaruwho ndu sụru l'ị bụ onye lanụ lẹ ndu nkfuchiru Chileke.

29Ọ sụ whẹ: “Unubẹdua ?unu l'asụjekwanu l'ọo onye bẹ mu bụ?”

Pyita sụ iya: “Ọo ghu bụ Kuráyisutu ọbu, bụ Onye Ndzọta ono Chileke kweru ụkwa iya.” 30Ọ nmaarụ whẹ ọkwa t'ọ bọ dụkwa onye ọdo whẹ l'e-kfuru iya.

Ekfukfu mbụ Jisọsu beberu ekfu lẹ ya l'e-je iwhe-ọtsulanu nwụhu

(Mát. 16:21-28; Luk. 9:22-27)

31Ọo ya bụ, Jisọsu bebe kfuaru ndu l'etso ụzo iya iwhe swiru iya nụ sụ whẹ: “Abụbu-Ndiwhe jefutajekwa iwhe-ọtsulanu ha l'igweligwe. Ndu bụ ọgurenya mẹe ndu ishi ndu l'agbajẹ ẹja nụ Chileke mẹe ndu o-zhi-iwu l'a-jịka iya, e gbua ya. Ya anọo abalị labọ, mbọku l'e-kwe iya ẹto, ya eshi l'ọnwu teta nọdu ndzụ ọdo.” 32Jisọsu kfujaaru whẹ okfu ono ekfuja. Pyita kucha iya ekucha sụ iya: “Tụswekwa; ba atụshiru onwoghu ejo ama.” 33Jisọsu ghaa ẹnya lee ndu l'etso ụzo iya, gbochia Pyita nchị sụ iya: “Gbashi mu l'iwhu gụbe Sétanu-a. Iwhe l'ịiri ta abụdu uche Chileke, ọo uche madzụ bẹ l'ịiri.”

34Jisọsu bya ekukota igweligwe ndu ono mẹe ndu l'etso ụzo iya sụ whẹ: “Onye l'ọogu ẹgu tẹ ya tsoje mu, t'onye ọbu swefu ẹnya l'ẹhu onwiya, onye ọbu evulia oswebe ọnwu nkiya bya etsoje mu. 35O noo l'iwhe bụ onye l'eme tẹ ya dzọo onwiya ndzụ, bẹ kwa etuwha bẹ l'ootuwha ndzụ iya ọbu. Onye ono kwobekwanuru iswi ẹhu mụbe Abụbu-Ndiwhe, ọdua l'ọo nke ozhi-ọma Chileke ono tuwhaa ndzụ iya lẹ mgboko-o bẹ l'a-dzọ onwiya ndzụ. 36Mbụ, ?ọo gụnu bụ urwu, madzụ ritaru, m'o -nwekotagezhiaru iwhe lile, dụ lẹ mgboko-o, tuwhaa ndzụ iya? 37?Ọo ẹgube iwhe dụ ọdu agha bẹ madzụ l'e-gude gbata ndzụ iya? 38L'iwhe bụ onye iwhere ẹhu Abụbu-Ndiwhe dụ, iwhere ozhi ozhi-ọma dụ iya l'ọgbo-ọ ya, l'eri ogori eme iwhe-dụ-ẹji-a bẹ iwhere onye ono l'a-dụkwawho Abụbu-Ndiwhe m'ọ -byalẹwho okpe ndiwhe ikpe. Ọ byadẹlewho ya egude ugvu, l'egbu zaa-zaa lẹ gẹ Nna iya l'egbu. Nteke ono yẹle ndụ-ojozhi imigwe dụ nsọ l'a-lị bya.”

Currently Selected:

Makụ 8: Ezaa

Highlight

Copy