Luku 5

Jisọsu l'eku ndu mbụ, l'etso ụzo iya

(Mát. 4:18-22; Mak. 1:16-20)

1Ọ bya ebe ujiku lanụ gẹ Jisọsu kfụru l'agụga eze-ẹnyimu Gẹnésaretu, igweligwe madzụ l'akpa hụbahuba abya ọnu okfu Chileke. 2Ọ whụa ụgbo labọ dụ l'agụga mini ono. Ndu l'egbu ẹma, shi nọdu iya lụfuwaa, je anọdu asa ụgbu-ẹma whẹ asa. 3Jisọsu bya abahụ l'ime ụgbo ono nnanụ, ọwhu bụ nke Sáyịmonu. Ọ sụ Sáyịmonu ono t'o nwubaadaa ụgbo ono lẹ mini nwanshị. Ọ nọdu anọdu l'ime ụgbo ono, zhilahaa ndu ono kụru l'ẹka ono iwhe.

4O kfugelewho iwhe l'ookfu, ọ sụ Sáyịmonu: “Ngabaadaa ụgbo ono l'ẹka iswina dụ, je t'unu ghaa ụgbu unu ono lẹ mini gbukoo ẹma.”

5Sáyịmonu sụ iya: “Nnajị-Ọha, anyi tụkokwaru ẹnyashi owhu sekota anya iya, ọ bụleru-a anyi nsegbu anya mmaanụ. Ọle eshi-ọwhu i kfuwaru ẹgube-ẹ bẹ anyi l'aghakwa ụgbu-a lẹ mini ọbu.” 6Whẹ melewho g'o kfuru, whẹ gbukoo igbudu ẹma. O ji ụgbu ono nke ọwhu o gbee mede t'iya lakaa ụgbu ono. 7Whẹ wheeru ndu l'egbu ẹma ibe whẹ, nọ l'ime ụgbo ọwhu ẹka tẹ whẹ gbatarụ whẹ. Whẹ bya eyejia ụgbo labọ ono l'ẹma nke ọwhu ọ watarụ adami lẹ mini.

8Sáyịmonu Pyita whụlewho iwhe ono, ọ bya adaa l'iwhu Jisọsu sụ iya: “Byiko, Onye-Nwe-Ọha, parụ mu haa jeshia iwhe l'iije, o noo lẹ mu bụ onye l'eme iwhe-dụ-ẹji.” 9O noo lẹ biribiri ẹma ono, whẹ gbukoru bẹ chiru Sáyịmonu ẹhu mẹe ndu yẹle iya lị. 10O nokwawho g'ọ dụ ọwhube ụnwu Zébedi, whẹ lẹ Sáyịmonu tụkoru egbu ẹma ono, mbụ Jémusu nwa Zébedi yẹle Jọnu nwa Zébedi. Ọo ya bụ Jisọsu sụ Sáyịmonu: “Ba atsụshi egvu. Shilewho ntanụ-a tụgburu bẹ l'ịi-nọje erwutaru mu madzụ g'ọo ẹma.”

11Whẹ bya akpụfuta-gee ụgbo whẹ l'eli-mgboko, whẹ hakọta iwhe lile tsolahaa Jisọsu.

Jisọsu l'eme t'onye njọkirehu mehu

(Mát. 8:1-4; Mak. 1:40-45)

12O be ujiku lanụ, gẹ Jisọsu nọ lẹ mkpụkpu lanụ ọbu, tọ dụ iya bụ lẹ nwoke lanụ ọbu, njọkirehu tụkoru ẹhu narụ abyakfuta iya. Ọ whụlewho Jisọsu, ọ daa buaru iya iwhu l'alị ryọo ya sụ iya: “Onye-Nwe-Ọha, ọ -bụru l'ọ dụ ghu mma l'uche bẹ l'ịi-dụkwa ike mee tẹ mu mehu.”

13Jisọsu bya amachịa ẹka; mee nwoke ono l'ẹhu sụ iya: “Ọ dụ mu mma l'uche, mehuwaro.” Nteke onowho njọkirehu ono mishihu nwoke ono l'ẹhu. 14Tọ dụ iya bụ lẹ Jisọsu akarụ iya t'ọ bọ dụbukwaa onye l'oo-kfuru iya sụ iya: “Tụgbulekwaruwho je egoshi onwoghu onye l'agbajẹ ẹja nụ Chileke t'o lerwee ghu ẹnya. Gụ egwoo ngwo-ẹja, onye e metaru l'iwhe l'eme iya nụ l'aanụje lẹge Mósisu tụru iya l'iwu, t'a gbaarụ ghu. Ọo ya bụ nke ọwhu ọha l'a-marụ l'ẹhu dụwaa ghu mma.”

15Ọle a gbẹenu kabaa anọ ekfukashi nke Jisọsu, kfukashita iya nke ọwhu igweligwe madzụ wụkoru abya tẹ whẹ bya anụa lẹ nchị whẹ mẹe t'o mee whẹ tẹ whẹ mehukota l'ẹhu l'emekaa whẹ nụ. 16Jisọsu l'atsụlaje je anọdu l'echi-ẹgu kfuru nụ Chileke.

Jisọsu l'eme onye iwhe lọnwuru ibẹhu lanụ t'o mehu

(Mát. 9:1-8; Mak. 2:1-12)

17O rwua ujiku lanụ gẹ Jisọsu l'ezhi iwhe, ndu Fárisii mẹe ndu o-zhi-iwu nọdukwawho l'ẹka ono. Whẹ shigee lẹ mkpụkpu gẹ mkpụkpu ha dụ lẹ Gálili mẹe Judíya, shigekwaawho Jerúsalẹmu bya. Ike Onye-Nwe-Ọha, bụ Chileke mee ya; ọ dụ ike mee t'ẹhu dụkota ndu iwhe l'eme mma. 18O nweru nwoke lanụ iwhe lọnwuru ibẹhu lanụ, unwoke pa l'eli ugbooshi bya. Whẹ chọo ụzo whẹ l'e-shi pabata iya l'ime ẹka ono, je edobe iya l'iwhu Jisọsu, whẹ ta awhụ iya. 19Whẹ mee nta mee imo tẹ whẹ kpabata ụzo, tọ dụ nkele a hanụka l'igweligwe kụru l'ẹka ono. Ọo ya bụ whẹ kwee nyihu eli ụlo ono, je alafua ya ụzo l'okpotsu iya pyoo ugbooshi ono, nwoke ono zẹe, shi l'ụzo ono mee ya o rwua alị l'iwhu Jisọsu. 20Jisọsu whụlewho lẹge ndu ono gude kwetabe lẹ ya l'a-dụ ike mee tẹ nwoke ono jee ije, ọ sụ nwoke ono: “Ọnya mu, a gụwaru ghu nvụ l'iwhe-dụ-ẹji, i metagbaberu g'ọ ha.”

21Tọ dụ iya bụ lẹ ndu o-zhi-iwu mẹe ndu Fárisii arịlahaa l'ime obu whẹ sụ: “?Ọo ẹgube madzụ gụnu dụ ẹgube-ẹ l'ekfubyishi Chileke ekfubyishi-a? ?Ndẹe onye ọdo l'a-dụ ike gụaru madzụ nvụ l'iwhe-dụ-ẹji onye ọbu metagbaberu l'abụa Chileke nwẹkiya?”

22Jisọsu malẹkwaruwho iwhe whẹ l'arị l'obu whẹ, ọ sụ whẹ: “?Ọo gụnu meru iwhe unu l'arị ẹgube ọriri ono l'obu unu? 23?Ndẹe ọwhu ka ntse ekfukfu? ?Ọo t'a sụ iya: ‘A gụwaru ghu nvụ l'iwhe bụ-zhia iwhe-dụ-ẹji, i metagbaberu’ tọo t'a sụ iya: ‘Gbalihu jelahaa ije’? 24Ọo l'ọo nggẹ unu makwanụru l'e zhiru Abụbu-Ndiwhe t'ọ gụjeeru madzụ nvụ l'iwhe-dụ-ẹji onye ọbu metagbaberu lẹ mgboko-o.” Ọ sụ nwoke ono, iwhe lọnwuru ibẹhu lanụ: “Ọo ghu bẹ mu l'ekfuru t'i gbalihu pata ugbooshi ghu lashia ibe ghu.”

25Nwoke ono zhilihu l'edzudzu-ọha ono pata ugbooshi iya tụgbua lashia ibe iya aja Chileke ajaja. 26Ọ kpụbe ndu ono, nọ l'ẹka ono gẹ whẹ ha ọnu okfu. Ibirikoko iya gudeshia whẹ, whẹ jalahaa Chileke ajaja. Whẹ sụ: “Anyi akabẹbukwaa whụa iwhe ka ẹnya anyi ntanụ ọwa.”

Jisọsu l'eku Lívayi

(Mát. 9:9-13; Mak. 2:13-17)

27E megelewho Jisọsu tụgbua lụfuta-shia l'ẹka ono, ọ bya awhụa onye ishi akịriko, ẹwha iya bụ Lívayi g'ọ sụgaberu onwiya l'ụlo okpoga akịriko. Jisọsu sụ iya: “Lívayi tsoru mu.” 28Lívayi gbashilekwawho hakọta iwhe l'oome tsoru iya.

29Lívayi bya emeeru Jisọsu nri, haa shii l'ibe yẹbe Lívayi ono gude kwaarụ iya ẹbyii. Igweligwe ndu akịriko mẹwaro ndu ọdo bya anọdu whẹ tụko eri nri ono. 30Ọo ya bụ lẹ ndu Fárisii mẹe ndu ishi whẹ, bụ ndu o-zhi-iwu delahaaru ndu l'etso ụzo Jisọsu nwirinwiri sụ: “?Ọo gụnu meru unu lẹ ndu akịriko mẹ-gee ndu-a, l'aamakwarụwho ẹjo ẹka tụko eriko, angụkokwawho?”

31Jisọsu sụ whẹ: “Ndu ẹhu dụ mma ta akpajẹkwa ishi onye l'eme ọgvu, ọ kwa ndu ẹhu l'eme bẹ l'akpajẹ iya. 32M;ube Jisọsu ta abyakwa oku ndu dụ chịriri, ọ kwa ndu l'eme iwhe-dụ-ẹji bẹ mu byarụ tẹ whẹ daa onwowhe ụta, haa iwhe-dụ-ẹji, whẹ l'emegbabe byakfuta Chileke.”

Nke ọswi ẹgu ekfu anụ Chileke

(Mát. 9:14-17; Mak. 2:18-22)

33Ndu Fárisii ono sụ iya: “Ndu l'etso ụzo Jọnu l'anọje aswị ẹgu nteke nteke, whẹ ekfukwawho anụ Chileke, o nokwawho gẹ ndu l'etso anyịbedua l'emeje, ọle ndu ọwhu l'etso ụzo gụbedua l'anọje eri, angụ g'ẹhu ha whẹ.”

34Jisọsu sụ whẹ: “Unu l'akpọbeje ndu e kuru tẹ whẹ bya ẹswa-nwanyị ẹgu, l'ẹka onye ọbu kuru whẹ l'ẹswa-nwanyị ono kabẹkwadua nọdu swiru whẹ? 35Ọle mbọku nọkwaa abya nteke l'aa-nafụ whẹ onye ono, l'alụ nwanyị nke ọwhuu, bụ iya kuru whẹ l'ẹswa-nwanyị ono. O noo nteke whẹ l'aswịlahaa ẹgu ndono.”

36Ọ bya anmaarụ whẹ ẹtu sụ: “A ta alakatajẹkwa uwe ọwhuu gude gbachia akahụ uwe. Onye meru iya nno onye ọbu alakaa uwe ọwhuu ono alaka, tẹmenu ibiribe uwe ọwhuu ono yẹle akahụ uwe ono ta arapyabẹdu. 37Ọ tọ dụkwa onye l'awụjeru akụru mmẹe ọwhuu ye l'akahụ ẹda mmẹe l'akaa aka. Onye wụru iya ye iya, mmẹe ono agbafua ẹda mmẹe ono. Mẹe l'ishi onwiya awụshishihu; tẹmenu ẹda mmẹe ono a-bụru iwhe iyi yitaru. 38Akụru mmẹe ọwhuu b'a wụfutaje ye l'ẹda mmẹe ọwhuu, karụ aka. 39Ọ tọ dụdu onye ngụ-gejeedaru akahụ mmẹe nke ọwhuu gụlahaa ya, o noo l'ọosuje l'akahụ iya whọ dụkwaa ree.”

Currently Selected:

Luku 5: Ezaa

Highlight

Copy