Luku 4
4
Sétanu l'adale Jisọsu
(Mát. 4:1-11; Mak. 1:12-13)
1Ume-Dụ-Nsọ bya eji Jisọsu ẹhu. O shi lẹ Jọ́danu lashia. Ume Chileke duta iya, o je anọo l'echi-ẹgu, 2ụkporo abalị ugbo labọ. Oshifutuswe datakọta iya nteke ono. Ọ nọkota ụkporo abalị ugbo labọ ono, t'ọ dụ nri o riru. O nodzugele iya who, ẹgu gụlahaa ya. 3Oshifutuswe ono sụ iya: “Ọ -bụru l'ị bụ Nwa Chileke, sụadaa ẹwhuru-a t'ọ ghọo nri.” 4Jisọsu sụ iya: “E deru iya ede l'ẹkwo Okfu Chileke sụ: ‘Ọ tọ bụdu nri kpụ bẹ bụ iwhe madzụ l'egudeje nọdu ndzụ.’ ”
5Oshifutuswe ono bya eduta iya je anọdu l'ewhekerewhe. Lẹ njị-ẹnya lanụ b'o goshikotawaru Jisọsu alị-eze ndiwhe swịikpamu, 6sụ Jisọsu: “Ọo ghu bẹ mu l'e-me t'ị bụru onye l'a-nọ achịkota iwhe lile-e mẹe iwhe dụ ree, dụkota iya nụ, o noo l'ọo mu b'e yeru iya l'ẹka, tẹmenu ọ bụru onye dụ mu mma l'obu bẹ mu l'a-nụ iya. 7Ọo ya bụ, ị -bazhiwaru mu ẹja, mu ahakọtaru ghu iwhe lile ono.”
8Jisọsu sụ iya: “E deru iya l'ẹkwo Okfu Chileke sụ: ‘Ọo Onye-Nwe-Ọha, bụ Chileke ghu bẹ bụ onye l'ịi-barụ ẹja, ọ bụkwaru iya whọ kpụ bụ onye l'ịi-nọdu l'ẹka.’ ”
9Oshifutuswe ono bya edulikwaa ya jeshia Jerúsalẹmu, duru iya dobe l'ẹka kakọta l'eli l'eze-ụlo Chileke sụ iya: “Ọ -bụru l'ị bụ Nwa Chileke, shinu l'eli ẹka-a kfụdaada l'alị, 10nkele e deru iya l'ẹkwo Okfu Chileke sụ: ‘Chileke l'e-kfuru-a ndu ojozhi-imigwe iya tẹ whẹ leta ghu ẹnya cheje ghu nche. 11Whẹ l'e-gbobe ẹka wọta ghu nggẹ t'ị kpọpyashi ọkpa l'ẹwhuru.’ ”
12Jisọsu sụ iya: “E deru iya l'ẹkwo Okfu Chileke sụ: ‘Be ejekwa ọdata Onye-Nwe-Ọha, bụ Chileke ghu.’ ”
13Oshifutuswe ono datagele iya who, ọ parụ iya haa nke nwa nteke ono.
Jisọsu l'awata oje ozhi lẹ Gálili
(Mát. 4:12-17; Mak. 1:14-15)
14Jisọsu nọdu l'ike nke Ume-Dụ-Nsọ lwatashia Gálili. Ọ ngakọta iwhe bụkota alị buwhetaru Gálili mgburumgburu. 15L'ọonoje ezhi whẹ iwhe l'ime ụlo-ndzuko ndu Ju g'ọ ha. Madzụ lile tụko jakọta iya ama.
Aajịka Jisọsu lẹ Názaretu
(Mát. 13:53-58; Mak. 6:1-6)
16Ọo ya bụ l'ọ bya abahụ lẹ Názaretu, bụ ẹka a nọdu hefuta iya. O rwua mbọku ọtuta-ume ndu Ju, ọ bya abahụ l'ụlo-ndzuko ndu Ju, bụ iwhe l'oomejehawa. Ọ gbashi tẹ ya gụa iwhe. 17A bya anụ iya ẹkwo, o deru mbụ Ayizáya onye nkfuchiru Chileke. Ọ bya awhụhaa ẹkwo ono chọta ibe iya ọwhu e deru sụ:
18“Ume Onye-Nwe-Ọha dụ mu l'ẹhu,
o noo l'ọ họtawaru mu
tẹ mu je ezhia ndu ụkpa ozhi-ọma.
O zhiru mu tẹ mu je ezhia ndu a kpụtaru
lẹ ndzụ l'aa-ha whẹ, mu emee ndu l'atsọ ishi tẹ whẹ whụlahaa ụzo.
O zhikwa mu who tẹ mu je eme ndu l'aakpa ẹhu
tẹ whẹ nweru onwowhe.
19Mẹ tẹ mu bya aryakaa l'awha Onye-Nwe-Ọha l'a-dzọ ndu nke iya rwuakwaru.”
20Ọ whuchia ẹkwo ono g'a whụhawaru iya pẹwhu iya nwozhi ụlo-ndzuko ono azụ, bya anọdu anọdu. Iwhe bụ ndu nọ l'ụlo-ndzuko ono chị-zhiaruwho ẹnya wụbe iya. 21O kfuderu whẹ sụ: “Ntanụ-a bẹ iwhe lile-e, e deru l'ẹkwo-ọ unu nụru ọwa vụru lẹge e deru iya.”
22Whẹ tụko zụa mgbede, okfu ọma l'afụshi iya l'ọnu, dụ whẹ biribiri. Whẹ sụ: “?M'ọ tọ nụ-a nwa Jósẹfu-a dụ ẹgube-ẹ?”
23Ọ sụ whẹ: “O doru mu ẹnya l'unu l'a-nmarụ mu ẹtu-a sụ: ‘Tẹ gụbe ọwhu l'eme ọgvu metanu onwoghu l'iwhe l'eme ghu nụ. Anyi nụwaru iwhe i mekotaru lẹ Kapániyọmu, menua ya l'alị nke ghu.’ ” 24Ọ sụ whẹ: “Iwhe mu l'ekfuru unu bụ, e te egbobejekwa ẹka labọ nata onye nkfuchiru Chileke lẹ mkpụkpu iya. ?Unu nụwaru iya. 25Unu nyatakwa l'ụnwu-mbunu bẹ jikwaru Ízurẹlu ejiji nteke Eláyija nọ, bụ iya bụ nteke ono igweli buchiru mini awha ẹto l'ọnwa ishii, ejo mkpẹgu bya l'alị ono mgburumgburu. 26Ọle ọ tọ dụkwa ụnwu-mbunu ono m'ọo nnanụ onye ọwhu Chileke zhiru Eláyija to je eyeru ẹka, ọ kwarọo nwa-mbunu ọbu bu lẹ Zárẹfatu l'alị Sáyịdonu b'e zhiru iya t'o je ụlo iya. 27O nokwawho gẹ ndu njọkirehu jiru alị Ízurẹlu ejiji nteke Eláyisha onye nkfuchiru Chileke nọ. Ọle ọ tọ dụkwa m'ọo onye lanụ, e meru o mehu lẹ njọkirehu nke iya, ọ kwarọo Némanu onye Siriya.”
28Whẹ nụkobelewho iwhe ono, ẹhu wata oghu iwhe bụ ndu lile nọ l'ụlo-ndzuko ono eghu mebyi shii. Whẹ tangịrihu. 29Whẹ swolihu chịfu iya lẹ Názaretu. Whẹ duta iya je enyikota ọnunu-swọngu-swọngu ugvu, bụ ẹka mkpụkpu whẹ tukoru, melahaa tẹ whẹ nọdu l'ẹka ono nwukota iya, t'ọ bya asụa ishi isuwhu l'alị. 30Ọ bya aghajalẹ whẹ-ẹ l'echilabọ tụgbua lụfushia.
Nwoke ọgvu bu l'ẹhu
(Mak. 1:21-28)
31Jisọsu gbazeta tụgbua bahụ Kapániyọmu dụ lẹ Gálili. L'oozhi whẹ iwhe lẹ mbọku ọtuta-ume ndu Ju. 32Iwhe ono l'oozhi whẹ mee whẹ, ẹhu jishihu whẹ oyi nkele okfu l'ookfu goshiru who l'ọo Chileke zhiru iya. 33O nweru nwoke ọgvu bu l'ẹhu nọ l'ime ụlo-ndzuko ono. Nwoke ọgvu ono chishia oke mkpu sụ: 34“Parụ anyi haa. Jisọsu, onye Názaretu! ?Ọo gụnu bẹ anyi lẹ ghu jigba. ?Ịibyawaa t'i kpawhua anyi ọbu? Mu makwarụ-a onye ị bụ. Ọ kwa ghu bụ onye ono, dụ nsọ shi l'ẹka Chileke.”
35Jisọsu baarụ iya mba sụ: “Dobe ọnu ndoo, fụta nwoke ono l'ẹhu!” Ọgvu ono nwuta nwoke ono zụbe l'alị l'edzudzu-ọha l'ẹka ono fụta iya l'ẹhu, tọ dụkwanu ẹka o mekaru iya iwhe.
36Ọ dụ ndu lile ono, nọ l'ẹka ono biribiri, whẹ kfulahaa sụ: “Ẹgube okfu ọwa bụkwa ole-e? Onye ọwhu l'egudeje ẹgube nsarasa-ẹnya ọwa mẹe ike sụ ọgvu t'ọ wụfuta, whẹ awụfuta.” 37Ude Jisọsu dekota l'ẹka lile l'iwhe bụkota mkpụkpu dụ-wheru ẹka ono mgburumgburu.
Jisọsu l'eme igweligwe ndu ẹhu l'eme tẹ whẹ mehu
(Mát. 8:14-17; Mak. 1:29-34)
38O gbalihu lụfuta-shia l'ụlo-ndzuko ono, ọ bya abahụ ibe Sáyịmonu. Ẹwhoku l'enwu ne nyee Sáyịmonu, whẹ bya aryọo ya t'ọ marụ gẹ l'oo-me nwanyị ono. 39Ọ bya akfụkube iya, baarụ ẹwhoku ono mba, ẹwhoku ono nwubuhu nwanyị ono. Nwanyị ono zhilihu kwalahaarụ whẹ ẹbyii.
40Ẹnyanwu nyịhudelewho, iwhe bụ onye nweru onye ẹhu l'eme, ẹgube ẹhu ọ bụ-zhiawho, duta whẹ dukfutashia Jisọsu. Ọ byakọta whẹ ẹka, mee whẹ whẹ mehukota. 41Ọgvu l'awụfutajekwawho l'ẹhu igweligwe ndu o bu l'ẹhu, echikaa mkpu asụje: “Ọo gụbedua bụ Nwa Chileke!”
Ọle ọobajeru whẹ mba. Too kweje tẹ whẹ kfua okfu nkele whẹ marụ l'ọo ya bụ Kuráyisutu ọbu.
Jisọsu l'ekfu okfu Chileke lẹ Judíya
(Mak. 1:35-39)
42Chi sahụlewho, o gbashi jeshia l'ẹka l'ọo-nọdu nwẹkiya. Igweligwe madzụ tsoru achọkashi iya, whẹ bya abyakfuta iya. Whẹ melahaa tẹ whẹ sede iya t'ọ bọ hahẹ whẹ ẹka ọdo. 43Ọ sụ whẹ: “Mu zhifutajekwawho ndu mkpụkpu ọdo ozhi-ọma ono, bụ iya bụ nke ẹka Chileke bụ eze, nkele o noo iwhe e kwoberu zhi mu tẹ mu bya ndono.”
44L'ọorya okfu Chileke aryarya l'ụlo-ndzuko ndu Ju dụ lẹ Judíya.
Currently Selected:
Luku 4: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
