Luku 6

Abụbu-Ndiwhe bụ Onye-nwe mbọku-ọtuta-ume

(Mát. 12:1-8; Mak. 2:23-28)

1Ọ bya ebe ujiku lanụ, mbọku ono bụru mbọku ọtuta-ume ndu Ju, Jisọsu l'aghata l'ẹgu ẹka a kụru iwhe dụ g'ọo akpe. Ndu l'etso ụzo iya gbukoo ishi iwhe ono, gude ẹka anyịswashi iya ẹswa ata mebyi iya. 2Ndu Fárisii harụ sụ: “?Ọo gụnu meru unu l'eme iwhe dụru anyi lẹ nsọ ememe mbọku ọtuta-ume?”

3Jisọsu sụ whẹ: “?Unu tẹke agụbudua ẹkwo-okfu Chileke gụ-vu iwhe Dévidi meru nteke ẹgu l'agụ iya, agụ ndu yẹle iya lị? 4L'ọ bahụru l'ụlo Chileke je ewota buredi, dụ nsọ l'iwhu Chileke taa. Buredi ono bẹ onye ọdo l'ẹte atajẹkwa. Ọlekwawho ndu l'agbajẹ ẹja nụ Chileke bẹ l'atajẹ iya nụ. Dévidi je ataa ya, nụkwawho ndu yẹle iya lị whẹ takwaawhọ.”

5Jisọsu sụ whẹ: “Ọo Abụbu-Ndiwhe bẹ bụ Onye-nwe mbọku-ọtuta-ume.”

Jisọsu l'eme t'onye iwhe lọnwuru ẹka lanụ mehu

(Mát. 12:9-14; Mak. 3:1-6)

6Ọ bya erwukwaa mbọku ọtuta-ume ọdo, Jisọsu bahụkwa l'ụlo-ndzuko whẹ je ezhilahaa whẹ iwhe. O nweruwho nwoke lanụ ọbu, iwhe lọnwuru ẹka-ụtara alọnwu, nọ l'ẹka ono. 7Ndu o-zhi-iwu mẹe ndu Fárisii gelahaa Jisọsu ngge tẹ whẹ maadarụ ?I'oo-me tẹ madzụ mehu l'iwhe l'eme iya nụ mbọku ono, bụ mbọku ọtuta-ume ndu Ju nke ọwhu whẹ l'a-sụje l'o noo iwhe o meru. 8Ọle Jisọsu marụ iwhe dụ whẹ l'obu, ọ sụ nwoke ono iwhe lọnwuru ẹka lanụ ono: “Gbeshi bya akfụru l'ẹka-a.” Nwoke ono gbalihu je akfụru l'edzudzu-ọha ono. 9Jisọsu sụ whẹ: “Tẹ mu jịada unu nwa-ajị: Iwu mbọku ọtuta-ume ndu Ju ono ?ọ sụru t'e mejee iwhe-ọma, t'ọ sụru t'e mejee ejo iwhe? Ọ sụru ?t'a dzọjee ndzụ, tọo t'e mebyijee ndzụ?” 10Ọ bya aghaa ẹnya, ledzuru whẹ ẹnya gẹ whẹ ha, sụ nwoke ono: “Ngwa machịa ẹka ghu amachị.” Ọ machịa ẹka. Ẹka ono bya eteta iya.

11Whẹ swolihu wata ọchi idzu iwhe whẹ l'e-me Jisọsu.

Jisọsu l'ahọta ụmadzu iri l'ẹbo

(Mát. 10:1-4; Mak. 3:13-19)

12O rwua ujiku lanụ, Jisọsu jeshia ẹka ọbu ugvu ha l'igweligwe jeshia okfuru nụ Chileke. O kfuru nụ Chileke ẹnyashi owhu mgburumgburu. 13Chi sahụlewho ọ bya ekukotagezhia iwhe bụ ndu l'etso ụzo iya họta whẹ ụmadzu iri l'ẹbo. Ọ gụa ndu ono ndụ-ishi-ozhi iya. 14Ẹwha ndu ono bụ: Sáyịmonu onye ọ gụberu Pyita mẹe nwune iya Ánduru mẹe Jémusu, Jọnu, Fílipu, Batólomiyu, 15Mátiyu, Tọ́mosu, Jémusu Álufiyọsu mẹkwawho Sáyịmonu, ọwhu tso l'ọgbo l'adzọ t'alị ndu Ju dụru ndu Ju, 16mẹe Júdasu Jémusu mẹe Júdasu Isukáriyọtu, bụ iya megeeru nọdu lẹ mgbazhi t'e gude Jisọsu.

Jisọsu l'ezhi iwhe, emekwawho tẹ ndu ẹhu l'eme mehu

(Mát. 4:23-25)

17Jisọsu yẹle ndu ono, ọ họtaru ono tụko shi l'eli ugvu ono kpozeta, whẹ tụko bya anọdu l'ọma alị, whẹ l'igweligwe ndu ono l'etso iya nụ mẹe oke igweligwe ndu ọwhu shigee lẹ Judíya l'owhu mẹe Jerúsalẹmu mẹe ndu shi l'ọnu eze-ẹnyimu Taya yẹle Sáyịdonu, bụkota ndu byarụ ọnuta iwhe l'oozhi mẹe ndu byarụ t'o mee whẹ tẹ whẹ mehuchaa l'iwhe l'eme whẹ nụ. 18Ndu lile ọgvu l'akpa ẹhu b'o meru, whẹ mehukota. 19Ikpoto ndu ono tụko emekaa t'ẹka whẹ rwua ya l'ẹhu nkele ike shi iya l'ẹhu l'emeje t'ẹhu dụkota whẹ mma gẹ whẹ ha.

Ẹhu-ụtso yẹle awhụ atsọtso

(Mát. 5:1-12)

20Jisọsu bya apalia ẹnya dazhịbe ndu l'etso ụzo iya sụ:

“Ẹhu-ụtso bụ nke unubẹ ndu ụkpa,

nkele unu l'e-ri urwu l'ọo Chileke bụ eze unu!

21Ẹhu-ụtso bụ nke unubẹ ndu ẹgu l'a-gụ ntaa;

nkele ẹwho l'e-ji unu.

Ẹhu-ụtso bụ nke unubẹ ndu l'arya ẹkwa ntaa;

nkele unu l'a-chị ọchi.

22Ẹhu-ụtso bụ nke unu nteke madzụ l'a-kpọ unu ashị, ekefu unu l'oke, akọ unu ọnu,

eku unu ndu ejo-iwhe nkele unu kweru nke Abụbu-Ndiwhe.

23“T'ẹhu tsọo unu ụtso mbọku ono, unu kfulihu akfulihu tee ẹswa nkele obunggo unu parụ ẹka l'imigwe, o noo l'o nokwawho gẹ nna whẹ ndụ-ichee mekotaru iya ndu nkfuchiru Chileke gẹ whẹ ha.

24“Ọle nshọkwanu unubẹ ndu nweru iwhe,

o noo nkele unu natakọtawaru iwhe rwuberu unu.

25Nshọo unubẹ ndu ẹwho jiru ntaa,

nkele ẹgu l'a-gụ unu.

Nshọo unubẹ ndu ono, l'achị ọchi ntaa,

o noo l'unu l'a-rya ẹkwa gụa áwhụ.

26Nshọo unu nteke madzụ lile l'a-tụko ekfukaa l'unu l'eme ree,

nkele o nokwawho gẹ nna whẹ ndụ-ichee

shi ekfujeru iya ndu gude ụgho ekfuchiru Chileke.”

Ye ọhogu obu

(Mát. 5:38-48; 7:12a)

27“Ọle iwhe mu l'akarụ unubẹdua l'anụ iwhe mu l'ekfu bụ: Unu ye ọhogu unu obu. Unu emejeeru ndu kpọru unu ashị iwhe-ọma. 28Unu gọjeru ọnu-ọma nụ ndu tụru unu ọnu. Unu kfujeru nụ Chileke l'iswi onye l'akọ unu ọnu. 29Onye chiru ghu ẹka l'agbagba nchị, dobefuaru iya agbagba nchị ọwhu. Onye yetaru ghu uwe ugwẹhu ghu, hakwaawhọ t'onye ono yetafua ọwhu i yeru l'ime ẹhu. 30Nụje onye byarụ ghu ọryota iwhe i nweru, iwhe ọbu ọ byarụ aryọta. Onye wotajeru iwhe ghu, ba akpahẹkwa onye ọbu ishi iya ọdo. 31T'ọ bụru iwhe bụ onye ọdo mee ya unu, ya adụ unu mma l'obu bẹ unu l'emeje onye ọdo.

32“Nteke ọ bụlewho l'ọo ndu yeru unu obu bẹ unu yeru obu kpụ. ?Ọ hụnu ẹgube urwu gụnu bẹ ono bẹru unu? Nkele ndu l'eme iwhe-dụ-ẹji bẹ bụkwawho onye yeru whẹ obu bẹ whẹ l'eyeje. 33Nteke ọ bụlewho l'ọo ndu l'emejeru unu ree bẹ unu l'emejeru ree ?ọo ẹgube urwu gụnu bẹ ono bẹru unu? Nkele o nokwawho gẹ ndu l'eme iwhe-dụ-ẹji l'emejekwawho. 34Nteke bụ l'o zhiawho ndu unu l'ele ẹnya l'unu l'a-nata iwhe l'ẹka whẹ bẹ unu l'ejeje ụgwo ?ọo ẹgube urwu gụnu bẹ ono bẹru unu? Lẹ ndu l'eme iwhe-dụ-ẹji bẹ l'ejejekwawho ndu l'eme iwhe-dụ-ẹji ibe whẹ ụgwo nggẹ whẹ nata ọnwurunwa iwhe ha g'ọo ụgwo ọbu whẹ jeru. 35Unu ye ọhogu unu obu. Unu mejeeru whẹ ree. Unu ejeje madzụ ụgwo, unu be elebehekwa ẹnya t'onye ọbu kfụa ya unu nke ọwhu obunggo unu l'a-hakwarọo shii. Unu abụkwaruwho ụnwu nke Ọkalibe-Kangokotaru-Nu, bụ Chileke, o noo nkele ndu bụ o-ria-ọmata mẹe ndu bụ ejo madzụ bẹ Chileke dụ-gekwaaruro odoo. 36T'unu bụru ndu obu-imiko lẹge Nna unu bụkwawho onye obu-imiko.”

Okpe ndu ọdo ikpe

(Mát. 7:1-5)

37“Unu be ekpekwa ndu ọdo ikpe nggẹ Chileke te ekpekwaro unu ikpe. Unu ta anmahụnu ndu ọdo ikpe nggẹ Chileke ta anma unu ikpe. Unu gụaru ndu ọdo nvụ nggẹ Chileke gụaru unu. 38Unu nụje madzụ iwhe, nggẹ Chileke anụkwawho unu. Iwhe Chileke l'a-nụ unu bẹ bụ iwhe a tujiru atuji, tsụa ya atsụtsu, yojia ya ayoji o ji godogodo awụshihu awụshihu. O noo l'ọo iwhe unu gude tụru nụ ibe unu bẹ bụ iwhe Chileke l'e-gudekwawhọ tụru nụ unubẹdua.”

39Ọ bya anmakwaaru whẹ whọ ẹtu sụ: “Onye l'atsọ ishi ?ooduje onye l'atsọ ishi g'ọo ya? ?Whẹ ta atụkodu dalaje l'ime iduma? 40Onye l'anwụ iwhe l'ẹka onye l'ezhije iwhe ta akajẹkwa onye ono l'ọnwu iwhe l'ẹka iya oonwe ẹnya. Ọle onye l'anwụ iwhe bụkwa: ọ -nwụta-gee iwhe l'eezhi iya, ya abya aha g'ọo onye ono l'ezhi iya iwhe ono.

41“?Ndẹe iwhe meru l'ịiwhuje mkpaba, dụ nwanna ghu l'ẹnya, ọle ị tị whụkwanu ọwhu bụ osweru, dụ ghu l'ẹnya nke ghu? 42Ọdo bụ: ?Ndẹkwanu gẹ l'ịi-gbẹe sụ nwanna ghu ono: ‘Nwannajị anyi, gebe tẹ mu whụfu ghu mkpaba ẹswa ono, dụ ghu l'ẹnya’ l'ẹka gụbedua l'awhụkwaanu ono ha g'ọo osweru dụ ghu l'ẹnya nke ghu. Gụbe iwe-l'obu-ọchi-l'ọnu-eze! Vuadaru ụzo mefuada osweru ono, dụ ghu l'ẹnya nke ghu, nggẹ ị dụ ike whụ-rweta ụzo, whụfu mkpaba, dụ nwanna ghu l'ẹnya.”

Oshi ọmi yẹle akpụru iya

(Mát. 7:16-20; 12:33-35)

43“Ọ tọ dụkwa ọkpobe oshi mịtajeru mebyi dụ ẹji, o nokwawho gẹ l'ọoto dụkwanua ejo oshi mịtajeru mebyi dụ ree. 44Ọo akpụru, oshi mịtaru bẹ l'eegudeje marụ ẹgube oshi ọ bụ. A ta awọtajekwa ujiru l'oshi uke, tọ dụ onye l'awọtaje akpụru-ẹra-nwata l'ẹgbara. 45Lẹ ọkpobe madzụ l'eshije l'ọkpobe iwhe dụ iya l'obu wofuta ọkpobe iwhe, ejo madzụ l'eshijekwanu l'ejo iwhe dụ iya l'obu wofuta ejo iwhe, o noo l'iwhe l'ookfu l'ọnu bụ iwhe shi iya l'obu ebushihu ebushihu.”

Ụmadzu labọ l'atụ ụlo

(Mát. 7:24-27)

46Jisọsu sụ whẹ: “?Ọo gụnu kpatarụ iwhe unu l'anọje eku iya ‘Onye-Nwe-Ọha; Onye-Nwe-Ọha,’ ọle unu te emejekwanu iwhe mu sụru t'unu mee. 47Iwhe bụ onye byakfutaru mu nụ bya anụa okfu mu, ọ tụko iya g'ọ ha eme eme bẹ mu l'e-goshi unu onye ọ dụ g'ọo ya. 48Onye ono dụ g'ọo nwoke l'atụ ụlo, o gvumia alị egvumi tụa ukfu-ụlo ono l'ẹwhuru. O be nteke utso gbarụ, mini bya agbawhee ụlo ono, to nwunga iya rọo enwunga owhu nkele e gvumiru alị egvumi tụa ukfu iya ree-ree-ree. 49Ọle onye l'anụ okfu iya, t'o me iya eme bẹ dụ g'ọo onye gbubeleruwho ụlo l'elikoro alị mmaanụ, tọ wa alị awa tụa ukfu iya. Utso byapyabẹ iya, ọ whọhuro nteke ono roo daa, dakpọshihu gwee onwiya aryaka eryune.”

Currently Selected:

Luku 6: Ezaa

Highlight

Copy