Luku 3
3
Ozhi Jọnu baputizimu l'ezhi
(Mát. 3:1-2; Mak. 1:1-8; Jọn. 1:19-28)
1O rwua l'awha kwe Siza Tayibíriyọsu, bụ ishi ọ-chị-ọha ndu Romu awha iri l'ise, o shi chịta, nteke ono bẹ bụ Pọ́nchosu Páyileti bụ ọ-chị-ọha Judíya. Hẹ́rodu bụru ọ-chị-ọha l'alị Gálili. Nwanna Hẹ́rodu nke nwoke, ẹwha iya bụ Fílipu bụru ọ-chị-ọha l'achị Ituríya mẹe Tirakonáyitisu. Layiséniyasu bụkwaruwho ishi ọ-chị-ọha l'achị Ábilini. 2Nteke ono bẹ bụkwawho Ánasu yẹle Káyafasu bẹ bụ ndu ishi ndu l'agbajẹ ẹja nụ Chileke. O noo nteke Jọnu Zakaráya shi buru l'echi-ẹgu. Ọ bụru nteke ono bẹ Chileke kuru iya zhi iya ozhi. 3Tọ dụ iya bụ, o tsoru alị lile, duwheru ẹnyimu Jọ́danu mgburumgburu ejewhe, arya iya aryarya asụje: “Unu daa onwunu ụta sefu ẹka l'ome iwhe-dụ-ẹji, unu l'emegbabe lwakfuta Chileke t'e mee unu baputizimu, ọo ya bụ Chileke agụaru unu nvụ l'iwhe-dụ-ẹji ono, unu metagbaberu.” 4Bụ iya bụ lẹge e deru iya l'ẹkwo Ayizáya, bụ onye nkfuchiru Chileke sụ:
“O nweru onye l'echi mkpu l'echi-ẹgu asụje:
‘Unu mechaaru Onye-Nwe-Ọha ụzo.
Unu mee ogborogbo ụzo iya t'ọ kfụ-geeru nhamụnha.
5Ẹka dụ nsụda nsụda bẹ l'ee-nwuchikota enwuchi.
Iwhe lile bụ ugvu mẹe mgbogidi bẹ l'aa-tụko
rwazeshikota arwazeshi.
Ẹka dụ kpọkoro kpọkoro bẹ l'aa-rwaze,
ya akwọhu tụruru.
6Iwhe bụkota madzụ kpamụ kpamụ l'a-whụkota gẹ Chileke l'e-gude dzọo ndu nkiya.’ ”
7Ọo ya bụ, Jọnu sụ igweligwe ndu byarụ t'o mee whẹ baputizimu: “Unubẹ ndu-a, oguji-nwaka nwụshiru-a! ?Ọo onye bya agbaarụ unu ama t'unu gbalaarụ oke-ẹhu-eghughu ono, Chileke l'a-tụfuru unu, l'abyawaa nụ ono. 8Unu mịa mebyi g'ọo oshi-ọmi. Mebyi, unu l'a-mịta bụ umere, l'e-goshi l'unu dawarụ onwunu ụta, hawaa ome iwhe-dụ-ẹji, unu l'emegbabe lwakfutawaa Chileke. Unu be ekfulahakwaa sụ: ‘Mbẹ Ébirihamu bụroo nna onye-ichee unu.’ L'o be nke t'ọ dụ nno bẹ Chileke l'a-dụkwa ike mekota ẹwhuru-a, dụ-gee ẹgube-ẹ t'ọ bụkotaru ụnwu Ébirihamu. 9Mbụ lẹ ntaa b'a dabẹekwaru ogbunkụ l'ọgbaragbu iwhe bụkota oshi. Ọo ya bụ l'iwhe bụ oshi ọwhu l'ẹte amịa mebyi, dụ ree, e gbutsua ya chee l'ọku.”
10Igwe madzụ ono jị iya sụ: “?O zhia gụnu bẹ anyi l'e-me ntaa?”
11Ọ sụ whẹ: “T'onye nweru uwe ugwẹhu labọ, tẹ yẹle onye l'enweenu kekahu iya. T'onye nweru nri mekwaawho g'onye ọwhu meru.”
12Ndu akịriko byakwawhọ t'e mee whẹ baputizimu, whẹ sụ iya: “?Ọo gụnu bẹ anyịbedua l'e-me?”
13Ọ sụ whẹ: “Unu ba anatajẹkwa ntukobe tukobe l'iwhe a sụru t'unu nata.”
14Ndu ojọgu byakwawhọ bya ajị iya sụ: “Anyịbedua-e, t'anyi mekwanu agha?”
Ọ sụ whẹ: “Unu be egudejeshi ẹka ike ana madzụ iwhe iya, unu te eboje madzụ ibo gude nno naa ya iwhe iya, t'ụgwo l'aakfụje unu tsụjee unu l'ẹnya.”
15Ndu ono daa onwowhe tụbata, whẹ tụko ghalahaa kẹbekebe l'ime obu whẹ sụ: “M'ọo kwa-a yẹbe Jọnu bẹ bụ Kuráyisutu ọbu.” 16Jọnu sụ whẹ: “Mbẹdua kwa mini bẹ mu l'egudeje eme unu baputizimu. Ọle onye ka mu l'ishi ka mu l'ọkpa l'abyaa, mbụ onye mu l'ẹte adụ-zhia iwhe mu bụ l'ẹka ọ nọ, nke tẹ mu tọfu iya eri akpọkpa iya. O noo onye ọwhu l'e-gude Ume-Dụ-Nsọ mẹe ọku mee unu baputizimu. 17O gudewaa ẹka-epete iya l'ẹka, l'oo-gude whụshia ẹswa lẹ witi iya, vuta ọwhu bụ witi vuba l'ime mkpu witi. Ya ekpota ọwhu bụ ẹswa iya nwuru ye l'ọku, bụ agbanyi agbanyi, ya ekepyashia ya.”
18Jọnu gude ozhi-ọma ono, l'oozhi whẹ, adụ whẹ ọdu l'ụdu dụ iche iche. 19Ọle ọ-chị-ọha bụ Hẹ́rodu bẹ Jọnu jekfuru iwhu l'iwhu je akarụ iya l'o meru iwhe-dụ-ẹji l'okfu ẹhu Heródiyasu, bụ nyee nwanna iya mẹwaro iwhe ọdo dụ-gee ọdo, Hẹ́rodu ono megbaberu. 20Hẹ́rodu bya emefuaro ọka njọ tukobe iya nkele ọ kpụtaru Jọnu je atụa ya mkpọro.
Jọnu l'eme Jisọsu baputizimu
(Mát. 3:13-17; Mak. 1:9-11)
21Tọ dụ iya bụ, ndu ono bya, Jọnu megele whẹ whọ baputizimu; Jisọsu byakwawhọ, o mee yẹbedua. Jisọsu l'ekfu anụ Chileke, kfụkwaduru-a ekfu anụ Chileke ono, igweli bukahulewho ẹbo gheru ọnu. 22Ume Chileke dụlewho g'ọo ndo whezeta bya anọdu iya l'ẹhu. A nụa olu-okfu, shi l'imigwe ono sụ: “Ọo gụbedua bụ Nwa mu, mu yeru obu, onye l'emeje ẹhu atsọ mu ụtso.”
Eri Jisọsu
(Mát. 1:1-17)
23Jisọsu bẹ nọru iwhe rwuru ụkporo awha l'awha iri tẹmenu ọ wata anọ eje ozhi iya. A sụleruwho l'ọo nwa Jósẹfu. Jósẹfu bụru nwa Heli. 24Heli bụru nwa Mátatu, Mátatu bụru nwa Lívayi, Lívayi bụru nwa Méliki, Méliki bụru nwa Jánayi, Jánayi bụru nwa Jósẹfu. 25Jósẹfu bụ nwa Matatáyasu, Matatáyasu bụru nwa Émọsu, Émọsu bụ nwa Néhumu, Néhumu bụru nwa Hésuli, Hésuli bụru nwa Nágayi. 26Nágayi bụru nwa Máatu, Máatu bụru nwa Matatáyasu, Matatáyasu bụ nwa Sẹ́meyinu, Sẹ́meyinu bụru nwa Jósẹku, Jósẹku bụ nwa Joda. 27Joda bụ nwa Jowánanu, Jowánanu bụru nwa Risa, Risa bụru nwa Zerúbabelu, Zerúbabelu bụru nwa Shiyálutiyẹlu, Shiyálutiyẹlu bụru nwa Nẹri. 28Nẹri bụ nwa Méliki, Méliki bụru nwa Adi, Adi bụru nwa Kósamu, Kósamu bụru nwa Elumádamu, Elumádamu bụru nwa Ẹru. 29Ẹru bụ nwa Jóshuwa, Jóshuwa bụru nwa Eliyéza, Eliyéza bụru nwa Jọ́rimu, Jọ́rimu bụru nwa Mátatu, Mátatu bụru nwa Lívayi. 30Lívayi bụ nwa Símiyọnu, Símiyọnu bụru nwa Juda; Juda bụru nwa Jósẹfu, Jósẹfu bụru nwa Jónamu, Jónamu bụru nwa Elíyakimu. 31Elíyakimu bụ nwa Melíya, Melíya bụru nwa Mena, Mena bụru nwa Matáta, Matáta bụru nwa Nétanu, Nétanu bụru nwa Dévidi. 32Dévidi bụ nwa Jesi, Jesi bụru nwa Óbẹdu, Óbẹdu bụru nwa Bóazu, Bóazu bụru nwa Sálụmonu, Sálụmonu bụru nwa Nahụshonu. 33Nahụshonu bụ nwa Amínadabu, Amínadabu bụru nwa Áduminu, Áduminu bụru nwa Anị, Anị bụru nwa Hézerọnu, Hézerọnu bụru nwa Pẹ́rezu, Pẹ́rezu bụru nwa Juda. 34Juda bụ nwa Jékọpu, Jékọpu bụru nwa Áyiziku, Áyiziku bụru nwa Ébirihamu, Ébirihamu bụru nwa Tẹra, Tẹra bụru nwa Nahọ. 35Nahọ bụ nwa Sérugu, Sérugu bụru nwa Reyu, Reyu bụru nwa Pẹ́legu, Pẹ́legu bụru nwa Iba, Iba bụru nwa Shela, 36Shela bụ nwa Káyinanu, Káyinanu bụru nwa Afákusadu, Afákusadu bụru nwa Shemu, Shemu bụru nwa Nowa, Nowa bụru nwa Lamẹku. 37Lamẹku bụ nwa Metúsela, Metúsela bụru nwa Ínọku, Ínọku bụru nwa Járẹdu, Járẹdu bụru nwa Mahálalelu, Mahálalelu bụru nwa Káyinanu. 38Kenanu bụ nwa Ẹ́noshi, Ẹ́noshi bụru nwa Seti, Seti bụru nwa Ádamu, Ádamu bụru nwa Chileke.
Currently Selected:
Luku 3: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
