Ozhi ndu ishi-ozhi 7

Ọnu Sutívinu l'eye

1Onye ishi ndu l'agbajẹ ẹja nụ Chileke jị Sutívinu sụ iya: “?Ọo gẹ ndu-a kfuru iya bụ g'ọ nwụru?” 2Ọo ya bụ, Sutívinu sụ whẹ: “Ndibe anyi lẹ ndu nna anyi, unu gebekwa-o. Sụa: ọo Chileke, bụ onye o rwuberu t'a kwabẹje ugvu bẹ meru tẹ nna anyi ochee, bụ Ébirihamu whụa ya. Nteke ono bẹ bụ lẹ Mesopotémiya bẹ Ébirihamu bu. Ọ tọko lakwaanụ m'ọo Háranu. 3Ọo ya bụ, Chileke sụ iya tọ haa ndu ibe whẹ, haa alị iya, jeshia alị, ya l'e-goshi iya. 4Ọ haa alị Kaludiya, tụgbua je eburu l'alị Háranu. Nna iya nwụhulewho, Chileke mee ya, o shi l'alị ono lwa bya eburu l'alị-a, unu bu ntanụ-a. 5Ọ tọ dụkwa alị ono ọwhu Chileke nụwaru Ébirihamu t'ọ bụru nkiya nteke ono, mbụkwa m'ọo ọha-ọkpa lanụ. Ọle Chileke kweru iya ụkwa lẹ ya l'a-nụ iyẹ ya t'ọ bụru alị iya, bụkwaruwho nke ẹpa iya. Nteke Chileke kfuru Ébirihamu iwhe ono bẹ Ébirihamu l'ẹteke anwụtakwaa nwa. 6Chileke sụru Ébirihamu; l'ẹpa iya l'e-bekwa laa alị ọdo je abụru ohu, tẹmenu e je l'eme whẹ awhụ ụnu awha. 7Chileke sụ: ‘Ọle ndu ono, whẹ l'a-bụ ohu whẹ ono bẹ mu l'a-nmakwanụ ikpe. E megekwaaro, whẹ afụta l'alị ono bya abalahaaru mu ẹja l'ẹka-a.’ 8Chileke bya ekweta Ébirihamu ụkwa iwhe; doberu iya omelalị nke obu ugvu, t'ọ bụru iwhe l'oo-gudeje nyata ọgbandzu Chileke. Ọo ya bụ, Ébirihamu bya anwụta Áyiziku. Áyiziku nọlewho abalị ẹsaa, nke ẹsato iya; e bua ya ugvu. O nokwawho gẹ Áyiziku buru iya Jékọpu, ọ bụru nno bụ gẹ Jékọpu buru iya ochee-oroke anyi whẹ ono whẹ iri l'ẹbo.

9“Ochee-oroke anyi whẹ ono koderu nwanna whẹ, bụ Jósẹfu okoowhoo, whẹ kpụta iya ree ndu Íjiputu g'ọo ohu. Ọle Chileke bẹ kfụru swiru Jósẹfu ono ree-ree-ree. 10Chileke dzọkota iya l'iwhe-ọtsulanu lile, byakfutaru iya nụ, nụ iya umere ọma mẹe mmamagụ l'ibe onye eze ndu Íjiputu bụ iya bụ Fero. Fero mee Jósẹfu, ọ bụru iya bụ onye l'achị alị Íjiputu l'owhu, bụkwaruwho onye ishi l'ibe yẹbe eze g'ọ hakọta.

11“A nọnyaa, ejo mkpẹgu bya l'alị Íjiputu l'owhu mẹe Kenanu. Ọ bụru iwhe-ọtsulanu, parụ ẹka. Ochee-oroke anyi whẹ ono ta awhụje nri ria. 12A nọnyaa; Jékọpu bya anụa lẹ nri dụ l'alị Íjiputu. Ọ bya ezhi ochee-oroke anyi whẹ tẹ whẹ jee. Ọ bụru ono bụ ejeje mbụ, whẹ jeru. 13O be l'ejeje nke ẹbo, Jósẹfu mee tẹ whẹ marụ lẹ ya bụ nwanna whẹ. Fero shiwaro nno madzuru ndibe Jósẹfu whẹ. 14Ọo ya bụ, Jósẹfu bya ezhia ozhi t'e je asụ nna iya Jékọpu t'ọ lwatashia Íjiputu mẹe ndibe iya gẹ whẹ ha. Iwhe whẹ kpakọru dụ bụ ụkporo madzụ ụgbo ẹto l'ụmadzu iri l'ise. 15Ọo ya bụ, Jékọpu laa Íjiputu, bụ iya bụ ẹka yẹle ochee-oroke anyi whẹ bu jeye whẹ nwụshihu. 16E vutakota odzu whẹ laa Shékemu je elia l'ilu, Ébirihamu gudehawaa okpoga zụta ụnwegirima ibe Hamọ l'alị Shékemu.

17“O bedelewho nteke Chileke l'e-meru Ébirihamu iwhe ono, o kweru iya ụkwa iya ono, ndibe anyi whẹ, bu lẹ Íjiputu zụshiwaa; ha l'igweligwe. 18A nọnyaa, eze ọdo, l'ẹte amaa nke Jósẹfu bya achịde Íjiputu. 19Ọ gbabẹru ndibe anyi whẹ ono ẹregede, wata anọ eme ochee-oroke anyi whẹ ono mmegide, nke ọwhu ọ tụru iwu sụ t'onye nwụtajeru nwa nke ọwhuu je etuwhajee ya etuwha nke ọwhu nwa ono l'ẹte anọdu ndzụ.

20“Ọo nteke ono b'a nwụru Mósisu. Ọ bụru ẹguru nwa, dụ ugvu l'iwhu Chileke. E hee ya ọnwa ẹto l'ime ụlo. 21O be nteke a patarụ iya je ewehaa, nwa Fero nke nwanyị tụruta iya zụa, ọ bụru nwa iya. 22E zhikota iya iwhe bụ ẹkwo, l'aanwụ anwụ lẹ Íjiputu nteke ono. O shi l'ẹka ono bụru onye-ukfu-l'ọha l'okfu, l'eekfu l'ọnu mẹe iwhe l'eeme l'ẹka.

23“Mósisu nọlewho ụkporo awha ugbo labọ, ọ chịpyaa ya l'ime obu iya lẹ ya l'e-je agbawhee ndu alị iya, bụ ndu Ízurẹlu. 24Ọ whụa onye lanụ l'ẹka onye Íjiputu l'eme iya mmegide. O gbakfu iya je agbaarụ iya ọdzori. O kwobe iwhe ono megbulekwawho onye nke Íjiputu who emegbu l'ẹka ono, shi nno melata iya ụgwo iwhe ono, o meru onye Ízurẹlu ono. 25O dobenu sụ lẹ ndu nkiya l'a-maa lẹ Chileke l'ee-megee shi l'ẹka iya mee tẹ whẹ nweru onwowhe, ọle o to dodu whẹ ẹnya. 26O be echile iya, ọ whụa ẹka ndu Ízurẹlu labọ l'alwụ ọgu; o jeshia whẹ egbokahu, tẹ ya doshiaru whẹ iwhe l'adarụ whẹ nụ. Ọ sụ whẹ: ‘Unu gebe! ?Unu ta amadụ l'unu bụ ụnwunna? ?Ọo gụnu meru iwhe unu l'achọ onwunu okfu?’

27“Onye ọwhu bụ iya l'achọ okfu nwufu Mósisu sụ iya: ‘?Ọo onye meru ghu onye ishi mẹe onye ikpe anyi? 28?Tẹ l'iimewaa t'i gbua mu g'i gburu onye Íjiputu ụnyawhu-a?’ 29Mósisu nụlewho iwhe ono; ọ gbafụ l'alị Íjiputu gbalaa je eburu l'alị Midiyanu. Ọ nọdu l'ẹka ono meta ụnwegirima unwoke labọ.

30“A nọlewho ụkporo awha labọ; Mósisu whụa ojozhi-imigwe l'echi-ẹgu, dụ l'agụga ugvu Sáyinayi. Ojozhi-imigwe ono nọdu l'ọku, l'enwu lẹ nwooshi nshịi. 31Mósisu nọdu ele iya; ọ tụfu iya ẹhu. O jekubedele iya who ntse tẹ ya marụ iwhe ọ bụ, ọ nụa olu Onye-Nwe-Ọha l'ọku ono. Olu ono sụ iya: 32‘Ọo mbẹdua bụ Chileke nna ghu ochee whẹ, bụ iya bụ Chileke nke Ébirihamu, bụru Chileke nke Áyiziku, bụkwaruwho Chileke nke Jékọpu.’ Mósisu tsụlahaa egvu, tọ tụhewaro ama nke ole ẹnya l'ẹka ono ọdo.

33“Ọo ya bụ, Onye-Nwe-Ọha sụ iya: ‘Yefu akpọkpa ghu nkele ẹka ono, ị kfụru bẹ bụ alị, dụru mu nsọ. 34Mu lewaru ẹnya, whụ ẹgube áwhụ, l'eme ndibe mu l'alị Íjiputu. Mu whụwaru iwhe-ọtsulanu, whẹ l'eje, mu byawaa tẹ mu bya adzọo whẹ. Ngwa, bya nta-a tẹ mu zhi ghu Íjiputu.’

35“Ọ bụkwaru-a Mósisu-a, ndu Ízurẹlu jịkaru, sụ iya: ‘?Ọo onye meru ghu onye ishi mẹe onye ikpe anyi?’ bẹ Chileke shi l'ẹka ojozhi-imigwe iya, Mósisu whụru lẹ nwooshi nshịi, l'enwu ọku, họta zhi iya t'o je abụru onye ishi mẹe onye l'a-gbata whẹ nụ. 36Mósisu nọdu meshia iwhe-awhụrulenya, dụ-gee biribiri l'alị Íjiputu; shi lẹ Íjiputu ono dufuta whẹ. Ọ byakwa emeshikwaawho iwhe-awhụrulenya, dụ-gee biribiri lẹ Eze-ẹnyimu-uswe; mekwaawho ọwhu o meru l'echi-ẹgu, whẹ nọru ụkporo awha ugbo labọ.

37“Ọo ya bụ, Mósisu ono, sụru ndu Ízurẹlu lẹ: ‘Chileke l'ee-bekochakwaa shi l'echilabọ unu họta onye l'ekfuchiru iya, zhi g'o zhiru mbẹdua.’ 38Ọ bụru Mósisu ono bẹ nochiru ẹnya ndu Ízurẹlu nteke whẹ dzukoro l'ugvu Sáyinayi l'echi-ẹgu ono. Ọo ya l'akajẹru ochee-oroke anyi whẹ iwhe Ojozhi-imigwe ono kfuru, mbụ ojozhi-imigwe ono, byakfutaru iya l'ugvu ono. Ọo ya shi l'ẹka Chileke nata okfu ono, l'anụ ndzụ, wolataru anyi.

39“Ọle ndụ-ichee anyi nụ-geeru iwhe ono, o kfuru whẹ, nyịa nchị mmanụ. Whẹ jịka iya. Whẹ rịlahaa ọ dụ g'e shi whẹ dawhu azụ lẹ Íjiputu. 40Ọo ya bụ, whẹ sụ Érọnu: ‘Doberu anyi agwa, l'e-vutajeru anyi ụzo, l'anyi ta amahẹdu iwhe meru Mósisu-a, dufutaru anyi lẹ Íjiputu.’ 41O noo nteke whẹ meshiru agwa ono, dụ g'ọo nweswi; wata agwagwa. Whẹ gwoo ngwo-ẹja bya agwaa ya, eme ẹswa nke iwhe ono, ọ bụ whẹ gude ẹka whẹ mee. 42Tọ dụ iya bụ lẹ Chileke eswefu whẹ ẹnya, haa whẹ tẹ whẹ gwajẹ kpokponde, dụ l'igwe, bụ iya bụ iwhe ọbu, e deru l'ẹkwo ndu nkfuchiru Chileke lẹ Chileke sụru:

“ ‘Ndu Ízurẹlu! M'ọ dụkwa ụkporo awha ugbo labọ

g'unu gbushiru anụ l'echi-ẹgu gwaa iwhe,

Ọle m'ọ tọ dụkwa ọwhu bụ mụbe

Chileke bẹ unu gburu iya nụ.

43?Tọ dụ nwụlo agwa ono, bụ

Molẹku bẹ unu vutaru,

vutakwawho kpokponde, unu kpụru akpụ,

ọ dụ g'ọo agwa unu ono, bụ Réfanu.

Iwhe ono bẹ bụ iwhe unu gude

ẹka unu meshia t'unu bajẹru ẹja.

O noo g'o gude mu je l'a-chịta

unu chịghaa Bábyilọnu.’

44“Sụa, ndụ-ichee anyi whẹ ono shi nweru ụlo-ẹkwa, bụ ẹka ẹkwo-iwu Chileke shi adụje; ọ bụru whẹ shi egudeje ẹka whẹ kpọbe ụlo-ẹkwa ono l'ẹka whẹ jeberu l'echi-ẹgu. Ụlo ono b'e meleruwho lẹge Chileke sụru Mósisu t'e mee ya, bụ iya bụ ẹgube iya ọwhu o goshiru iya. 45Ndụ-ichee anyi whẹ ono wota ụlo ono ye ọgbo ọwhu tso whẹ nụ l'ẹka. E megee, ọgbo onona vuta iya tsoru Jóshuwa je a naa alị ndu ọdo, mbụ alị, ọ bụ Chileke bẹ gude ẹka iya l'onwiya chịshihawaa ndu bu iya nụ. Ụlo ono dụ-zhiawho l'ẹka ono jeye l'ọgbo nke Dévidi. 46Dévidi bụru onye yẹle Chileke dụ lẹ mma. Ọ sụ Chileke t'ọ haa tẹ ya tụaru iya ụlo, mbụ ụlo yẹbe Chileke ono, bụ Chileke Jékọpu. 47E megekwanua, ọ bụru Sólomọnu beru tụaru Chileke ụlo ono.

48“Ọle Chileke, bụ Ọkalibe-kangokotaru nụ te ebujedu l'ụlo, e gude ẹka tụa, bụ iya bụ iwhe ọbu, Ayizáya, bụ onye nkfuchiru Chileke kfuru sụ lẹ Chileke sụru:

49“ ‘Igweli bụ oshi-eze mu,

Eliwhe bụru oshi-ọdzobe-ọkpa mu.

?Ọo ẹgube ụlo gụnu bẹ unu l'a-tụru mu?

?O zhia ẹgube awee-ya bẹ mu l'a-nọduje atụta ume?

50?Tọ dụ mbẹdua tụkoru iwhe ono g'ọ ha mekota?’

51“Unubẹ ndu-a, bụ kpọkponyi, unubẹ ndu-a, kpochiru obu t'unu ba anọ akwabẹ Chileke ugvu, kpochia nchị t'unu ba anụ ozhi, Chileke zhiru. Unu l'ajịkajekwawho Ume-Dụ-Nsọ lẹge ndụ-ichee unu whẹ jịkaru iya. 52?Ọ dụ-zhia ndu nkfuchiru Chileke ono gẹ whẹ ha m'ọo onye lanụ, ndụ-ichee unu whẹ l'akpaa ẹhu? Ndu ọwhu Chileke zhiru ozhi bẹ whẹ gbukotaru egbu, mbụ ndu ono, bụ whẹ ryarụ iya arya nteke ono sụ l'onye lanụ ono bụ iya bụ onye dụ chịriri nwẹkiya bẹ l'ee-bechakwaa bya. Obenu nta-a, ọ bya, unu nọdu lẹ mgbazhi, a kpụta iya gbua. 53Ọo unu bẹ Chileke shi l'ẹka ndu ojozhi-imigwe iya tụaru iwu nkiya, unu te eme iwhe iwu ono sụru t'unu mee.”

Aatugbu Sutívinu l'ẹwhuru

54Ndu ọgbo-ikpe ono l'anụ okfu ono, l'ọotakaa whẹ ẹrwu lẹ nchị. Whẹ l'atakaa ikireze g'ẹhu l'eghuhunu whẹ damụdamu. 55Ọle Ume-Dụ-Nsọ bya eji Sutívinu ẹhu, ọ palia ẹnya lee l'eli, ọ whụa ogbu-zaazaa nke Chileke, whụkwaawho Jisọsu g'ọ kfụru Chileke l'ẹka-ụtara. 56Ọ sụ: “Unu leedawho imigwe g'o gheru too, Abụbu-Ndiwhe kfụru l'ẹka-ụtara Chileke!” 57Whẹ chishia mkpu swọbe-gee ẹka lẹ nchị. Whẹ wulihu l'ugbo lanụ je azugude iya; 58kpụta iya kpụfu l'ime mkpụkpu tẹ whẹ je egude ẹwhuru tugbua ya. Ndu ono, l'eje iya atugbu chịru uwe whẹ wụshiru nwokoro ọbu, ẹwha iya bụ Sọlu.

59Whẹ l'atụ iya ẹwhuru ono, o kua Onye-Nwe-Ọha sụ: “Onye-Nwe-Ọha, bụ Jisọsu, natakwa ndzụ mu.” 60Ọ daa byishi ikpere, chia mkpu sụ: “Onye-Nwe-Ọha, ba agụkokwaru whẹ iwhe-dụ-ẹji-a, whẹ l'eme mu!” O kfugelewho nno, o kubuhu ume.

Currently Selected:

Ozhi ndu ishi-ozhi 7: Ezaa

Highlight

Copy