Zɛkarya 14
14
Dagwi a rɔda vey re negwɔm
1Tuk de Dagwi Darwey a rɔda dura shom mɛ ha ga vey bagat. Bemât repugu ba rɔda hashe pyɛ̂ Yɛrusalɛm, ko yin bemat o, yin a rɔda bɛrɛng hɛn e de gâs pyɛ́ mo. 2Ey, Dagwi Darwey a rɔda tula yére bemât jey mwa vey e gbɔng repomo mo, na be tó como na rɛ. Ba rɔda re rɛ, bê hashe pyɛ́ yi e nelɔ rɛ, ko bê dyɛng na behâ rɛ na retek. Ba rɔda kyè na rebit bemât repomo mo vɔk e de sesam, ko bwang o bê nàra e ji rɛ.
3E bama mo, Dagwi Darwey a rɔda nusu, na a tó como na yére bemât jey vane mo, sede remo de á ragas e tûk tô como. 4E tuk o, a rɔda tumal na bol mɛ e ra Raku Pat de wa sé e rwa ta na Yɛrusalɛm. Raku Pat o wa rɔda gas ɛ zang ba yi e rwa rak vɔk e rwa ta, ko wo tɛ̀ gbɔng nɛk e tē mo. Rebit raku mo rê gwɛ̌ sek vɔk e rwa bato, ko rebit o vɔk e rwa batin. 5Yin a rɔda tele e nɛk raku mo wɔ nusu hin, yaga wa rɔda gwɛ̌ hɛ pere vɔk e Azal. Yin a rɔda tele, sede remo de beda min bá kana tele yi e digîs vwel e jeng Uziya, gbɔng gwɔ̀m Yuda. E bama mo, Dagwi Darwey, Dagwi hom a rɔda vey, yɛ na mwa betom-lagwi mɛ!
6Tuk o ha rɔda se wɛshɛrɛk, ha rɔda vɔk bale wɛt. 7Nagwi na rɔda nàra, ko e nawiri mwa jey ya rɔda rɔngɔl gbey, ya rɔda se mwangalang wɛt. E Dagwi Darwey zɔng de a tɔk jeng de pyɛ yane yê té.
8E tuk o, nshi nerat nê nunus yi e Yɛrusalɛm, rebit nɛ rê tele vɔk e Gworep Tē e bak rak, ko rebit o vɔk e Gbɔng Rep Nevwashe e bak ta. Nê tele nǎhwos na nazɛng mwa rining o.
9Dagwi Darwey a rɔda sè gbɔng gwɔ̀m e ra jey mwa, ko e tuk o, Dagwi Darwey ê sè gwining, ko e reza mɛ de rê sè nju rɛ zɔng.
10Vwel o mwa yi e Geba e rwa bato vɔk e Rimɔn e rwa batin ha rɔda sè tyɛl, ko Yɛrusalɛm wa rɔda sè e ra raku e rak o, e kwɔ̂n wɛ, yi e rwi yel gwô Bɛnyamin wɔ̀ sɛ̀ mɛ kwɔ̂n rwi rosomo wɔ e to-kwɔng; wa rɔda to yi e Tyɔ̌n Hananɛl vɔk e nekwɔn pirî nshî anap ne begbɔng begwɔ̀m. Ba rɔda sangal e bak wane mo mwa, 11ko yɛn ê sangal tyang e ji wɛ, ba rɔda sang to wey na wɛ wɛt.
12Dagwi Darwey a rɔda tɛ̀ tumbang vwes wo hwo e ra yére bemât jey de bá tó como na Yɛrusalɛm. Banamâ babek mɛn bê hwo bɔsɔ, jeng de yɛn pyɛ mɛn ba rɔngɔl beken. Yéneng bayis mɛn ya rɔda bɔsɔ e ji bavɔng bayis o, ko balem mɛn ba rɔda bɔsɔ e ji nenu mɛn arɔng. 13E tuk o, Dagwi Darwey a rɔda tɛ̀, be kyě lingsit kpɛɛ. Kawɛ mwat a rɔda kaba mumwɛ, ko yɛn a rɔda hwo e ra bemɛn. 14BeYuda arɔng ba rɔda tó como na bemât yére dyuk e Yɛrusalɛm. Ba rɔda tula pyɛ̂ nedanerey mɛn o mwa, ba rɔda sɛ̀ gwakû dyam shinang na dyam pyɛng tanga nezap berugu. 15Ko yerê tumbang gwining o wa rɔda hwo e ra bedwa, na bedwa-madung, na bemaryat, na bemadung, tanga mwa yas de ya sé e nekwɔn ye ngyɔk mɛn.
16E bama mo, bemat de ba dalas yi e yére bemat jey de ba tó como na Yɛrusalɛm ba rɔda kyese kahɛ shey, na be wɔ̀ re a Dagwi Darwey, Dâ Jey Mwa, gbɔng gwɔ̀m mɛn, fongol, na be ra Nzem Buk. 17Ka sede behak e ji yerê bemat o ba wɔ́ e Yɛrusalɛm na be wɔ̀ re a Dagwi Darwey, Dâ Jey Mwa, gbɔng gwɔ̀m mɛn, fongol wɛt, vwel mɛn ha rɔda sɛ̀ rwak wɛt. 18Ko ka sede e BeMisra de ba kyɛ́ ɛn nà wɔ ra nzem o, ko yerê tumbang o wô hwo e ra yɛn. 19Hemo hɛ de ha rɔda sè tabak e ra Misra tanga yére bemat jey mwa de ba kyɛ́ ɛn nà wɔ̀ ra Nzem Buk.
20E tuk o, ba rɔda jɛk e ra begyɛngɛrɛ̂ng bedwa ngan: “Jaram yaga Dagwi Darwey.” Nerwey kyerês pyɛ́ ne Gbɔng Duk Re Fongol nà rɔda sè ne Dagwi, tyɛng sede neshǐ de na sé e nuyêl gàgbang rangâs yas o. 21Kahɛ rwey e Yɛrusalɛm na Yuda ha rɔda sè jaram yaga Dagwi Darwey, Dâ Jey Mwa, ko mwa bemat de bê vey nára nɔrɔ̂ yas ba rɔda ra fwom na nerwey o, na be kyé ɛ banama mo e ji nɛ. E tuk hane, ba rɔda to simo bejik be rɛsɛl nerwey nehak detu e ji Gbɔng Duk Re Fongôl Dagwi Darwey, Dâ Jey Mwa ko tyɔng wɛt.
Currently Selected:
Zɛkarya 14: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
