Zɛkarya 13
13
Dagwi ê paa cī na bezarap bɔs yi e vwel o
1E jeng yane, nshi na rɔda hwo nunus yi e jɔt yaga yére Davit na bwang bemat de ba sé sangal e Yɛrusalɛm, na be kus ɛn mɛ yi e banɛn tanga yi e pyɛ́ de ya tɛ̀ ɛn ligis.
2Dagwi Darwey, Dâ Jey Mwa, a ye, “E tuk o, ma rɔda paa kayiyɛ yerê cī yi e sevwel o, ko bê to bare na yɛ mwa na bazâ yɛ ko tyɔng wɛt. Ma rɔda ro kawɛ mwat de e tē, a sé zarap hom, ko ma rɔda to paa begabik beves de ba vɔk reto e ra yɛn. 3Ka sede zarap hwak a nusu gbak, ko da na neng mɛ ba rɔda yang ɛ, ‘Hwô dal wɛt, yaga hwó zarap bɔs e ji rezâ Dagwi Darwey.’ Ko yɛn a rɔda luga hɛ.
4“E jeng yane, bezarap ba rɔda tē naka na ha wɔgɔ, Dagwi a ga dura a yɛn pyɛ cak sede e ji negwi wɛt. Yɛn a rɔda to tɛ̀ berugû bezarap de ba yong na setôt vyēl yaga na be bin kwɛlɛng mɛ bemat wɛt. 5E tô ano, kawɛ mo a rɔda ye, ‘Ma sé zarap Dagwi wɛt. Ma sé mwât cap, me sɛsɛm pyɛ̂ re hom yi e fwôm cap yimo me wen.’ 6Ka sede mwat hwak a rangal hɛ, a ye, ‘Barâm sɛ́ a vane e rebek mo ɛ?’ A rɔda toyo a yɛ, a ye, ‘Ba tɛ̀ a me baram o e lɔ̂ besa hom.’ ”
Ba rɔda mɔrɔ lwêk vyēl o
7Dagwi Darwey, Dâ Jey Mwa, a ye,
“À wal, sene! Hwo e ra lwêk vyēl hom
e ra sa gafiri hom!
Tara, na hwo wey na lwek o,
na vyēl o ye shara hɛ!
Ko ma rɔda doyo e ra nèy o, nɛ a bemat hom.
8E ji vwel o mwa
ba rɔda tow beba e ji kavɛ betat, na be wey,
ko ba rɔda tik gwining e ji kavɛ betat na neken.
9Yɛn vane mo bê kwey e ji kyâ tabak,
mê mara hɛn, na me paa neves yi e ji mɛn,
sede be paa nevês dyām shinang na dyām pyɛng
jeng de be rugut yɛ.
Yɛn a rɔda ra won e ji reza hom, ko mê wok ɛn.
Ma rɔda yang ɛn, ‘Yin a sé bemat hom’,
ko yɛn arɔng ba rɔda ye,
‘Hwo, Dagwi Darwey, hwà sé Dagwi mot.’ ”
Currently Selected:
Zɛkarya 13: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
