Malaki 1
1
1Ha siitit yi na Dagwi a hemo. Rehâ Dagwi Darwey a remo, vɔk na BeIsrayɛl yi na Malaki.
Tɛ̂ yey Dagwi Darwey vɔk na Israyɛl
2Dagwi Darwey a yang ɛn, “Ma tɛ̀ yey na yin.”
Ko yɛn a toyo a yɛ, ba ye, “E rɛ̌ de hwà ga dura a wot tɛ̂ yey mō mo arɛt?”
Dagwi Darwey a hanat a ye, “Esau a sé gwa Yakɔp wɛt a? Mwa ano, ma ga tɛ̀ yey na Yakɔp, 3ko ma kyɛ́ mɛ Esau. Ma ga tɛ̀ be wey na vwel mɛ hê berahwol, ko ba ga kyini hɛ, he tɛ́ ɛ hê nevu-hey.”
4Ka sede BeƐdɔm ba ye, “Ba ga wey na bapomo mot, ko mwa ano, wot ê toyo na wot lɔk barin o.” Ko Dagwi Darwey, Dâ Jey Mwa a rɔda ye, “Yɛn ê to lɔk vɛ, ko mê gangas vɛ. Bemat ba rɔda yila hɛ à vwêl neves na yerê bemat jey de Dagwi Darwey a kyini hɛn nesheneshey!”
5BeIsrayɛl ba rɔda di pyɛ́ yemo na bayis mɛn, ko bê ye, “Dagwi Darwey a vɔk reto vɔk e vwel de ha ka sé hê BeIsrayɛl wɛt!”
Pyɛ̂ nɔrɔ vyes vɔk na Dagwi
6Dagwi Darwey, Dâ Jey Mwa a ye, “Hwey he nɔ̂ng dâ hɛ nerey, ko mwât fwom e nɔ̂ng dalɔ mɛ nerey arɔng. Ka sede ma sé da, ko nerey a nɛ de yin e nɔng mɛ ɛ? Ka sede ma sé dalɔ min, nerey a nɛ de yin e nɔng me ɛ? A sé e yin bepiris de yin e byɛs reza hom, ko yin e rangsal, yin e tɛ̀, ‘E gwɛ̌ gwong de wot e byɛs reza mo ɛ?’ 7Yin e byɛs me yi na nása pyɛ́ vyes e ra gàgbang rangâs yas vey na me. Ko yin e rangsal yin e tɛ̀, ‘E gwɛ̌ gwong de wot a tɛ̀ o ligis arɛt?’ A sé yi e byɛnɛ̂ng gàgbang rangâs yas hom. 8Jeng de yin e vey na yas de ya sé bwok, kɛ ye ro yɛ, kɛ ye yɔmɔng na yin a vey nára a me nɔrɔ̂ yɛ, yin e bare a sé vwes na yin a ra ano wɛt a? Mara nɔng in gwɔmna yere yas yane! Ê vɔk yey pyɛng na yin, kɛ ê ra a yin pyɛ́ de yin e simo a?”
9À yin bepiris, mara rangal hin hɛ na a dura a wot nerat. Dagwi Darwey, Dâ Jey Mwa a ye, “Ê sey nɔrɔ hemo yi e vɔ min arɛt? 10Ma simo ka hwak e ji min a yang wɔ̀ bang ri Gbɔng Duk Re Fongol, na a dul in sana tɛ̀ kyâ zɔng-reng e ra gàgbang rangâs yas hom. Ma vɔk yey pyɛng na yin wɛt; ma rɔda sey nɔrɔ̂ yas yi e vɔ min wɛt. 11Yi e jeng de gwi gwa nusu vɔk e jeng de gwa gaba, be nása a me nɔrɔ̂ pyɛ̂ nesang hyɔɔlɔl mwa na yê pɛngɛ a me yey, yaga reza hom ra sé rey o e ji yére bemât jey. Me Dagwi Darwey, Dâ Jey Mwa ma ye ano. 12Ko yin e nɔng me nerey wɛt, jeng de yin e tɛ̀, gàgbang rangâs yas hom wa sé yapyi, na jeng de yin e nása pyɛ̂ re de yin a byɛnɛng yɛ e ra wɛ. 13Yin e tē, ‘Wot a ga ruru na râ pyɛ́ yemo!’ Ko yin e tos nenu yin e byɛs me. Yin e vɛ̀sɛ na yas de ba sey ɛ yɛ na yol, kɛ yemo de ye yɔmɔng, kɛ yemo de ye ro yɛ, yaga na yin a nára a me nɔrɔ mo. Yin e bare, mê sey yas yere yemo yi na yin a? Me Dagwi Darwey, Dâ Jey Mwa ma ye ano. 14Gawey e ra mwât mɔ̂t bemat de e nára a me nɔrɔ̂ yas yere yemo, mwa ano de a vɔk yas ryat e kwara mɛ de a ga kana sira ê nɔng me yɛ! Yaga me ma sé gbɔng gwɔ̀m rwey o, ko yére bemat jey mwa ye wok bengyip hom. Me Dagwi Dâ Jey Mwa ma ye ano.”
Currently Selected:
Malaki 1: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
