Malaki 2
2
Dagwi a re nuyel na gyông bepiris mɛ
1Ko di, à yin bepiris, redu remo ra sé yaga yin. 2Dagwi Darwey, Dâ Jey Mwa a ye, “Ka sede yin ɛ wet betong na ha hom wɛt, ka sede yin ɛ tɛ̀ yey na yin nɔ̂ng reza hom nerey wɛt, ko ma rɔda tɛ̀ gawey he hwo e ra yin, ko ma rɔda tɛ̀ gawey e ra pyɛ́ de yin e seres yaga na yin a dalas mɛ. Mwin, ma ga kana tɛ̀ gawey e ra yɛ, yaga yin a tē shɔngɔlɔng na redu hom. 3Ko di, ma rɔda gyong yére min, ko mɛ mɔmɔ bayis min na beving yas de yin e nása a me nɔrɔ̂ yɛ, ko ba rɔda lusha hin e gwɔ̂t fongol. 4Ano yin ê tɔk, ma ga nɔng in redu remo yaga na wuna-na-sira hom na BeLevi he re nuyel.
5“Wuna-na-sira hê neken na yêy dyɛngɛ hom ha sé na yɛn, ko ma nɔng ɛn yêy dyɛngɛ na sangâl netyang o. Pyɛ mo ya tɛ̀ yɛn a sap me, ko yɛn e sap me ding-ding, yɛn a tumal kpɔrɔk e nuyel hom. 6Yɛn e basa pyɛ́ de ya sé tyɛng, ko yemo de ya sé buru wɛt. Yɛn e sangal tyang na me. Yɛn e ragas pyɛ́ de ya sé ryat zɔng wɛt, ko yɛn e sɛlsɛ behak pyak na be tik ragas neves. 7A sé fwôm bepiris na be basa a bemat tsak tɔk, ko bemat be masa pyɛ de be ra yi na yɛn, yaga yɛn vɛ à betom Dagwi Darwey, Dâ Jey Mwa.
8“Ko di, yin bepiris, yin a ga ye rɛng yi e gwong rwat. Yin a ga tɛ̀ bemat pyak be ye bugurɛk yi na basa min. Yin a ga kwɔrɔ wuna-na-sira min na Levi. Me Dagwi Darwey, Dâ Jey Mwa ma ye ano. 9Yaga ano, me arɔng ma rɔda tɛ̀ BeIsrayɛl be byɛnɛng hin, yaga yin a gyeng ha hom wɛt, ko yin a dura simô to e ra pyɛ́ de yin e basa a yɛn.”
BeYuda ba gyeng hâ Dagwi wɛt
10Wot mwa hot, wot a vɔk da gwining wɛt a? E Dagwi gwining de a yong ot mwa wɛt a? Ko yaga sɛ́ de wot e kwɔrɔs sira de wot a ga ra a bemot ɛ? Ko yaga sɛ́ de wot e byɛs wuna-na-sira de Dagwi à kana ra na bedabeda mot ɛ? 11BeYuda ba ga kwɔrɔ sira mɛn na Dagwi, ko yɛn a ga ra pyɛ́ vyes sizɔng e Yɛrusalɛm na e mwa vwel o. Yɛn a ga tɛ̀ Gbɔng Duk Re Fongol de Dagwi Darwey a tɛ̀ yey na wɛ ligis, yi na râ wenêng beha de be re a pyɛ̂ sekwit fongol. 12Tik na Dagwi Darwey a pat kawɛ mwat de a ra pyɛ yere yemo yi e bǔk BeIsrayɛl, mwa ano de e vɛ̀sɛ a Dagwi Darwey, Dâ Jey Mwa na nɔrɔ̂ yas.
13Pyɛ́ mo cak a yemo de yin e to ra. Yin e silsa gàgbang rangâs yas Dagwi Darwey na nemwishil. Yin e tosho, yin e dak bèkun yaga e to seres na yey pyɛng wɛt nenɔrɔ̂ yas de yin e vɛ̀sɛ nɔngɔs hɛ. 14Yin e rangsal, “Yaga sɛ́ de e to seres nenɔrɔ̂ yas o wɛt arɛt?” Yaga Dagwi Darwey a sé mwât nuha e tɛ̀ mo na hwâ weneng mo e nebot min, womo de hwà sé sangal na yɛ na tsak o wɛt, mwa ano de a sé sâ sangal mo ko a to sé hwā de yin a wuna hin na sira na yɛ. 15A sé e Dagwi gwining de a yong rebek na gabik rining o wɛt a? A ra ano yaga sɛ́ ɛ? A sé yaga na yin a vɔk nèy de nê sè bemât Dagwi mwin. Yaga ano, tē in naka, hwak e ji min a kwɔrɔ sira de a ga ra na hwā mɛ wɛt. 16Dagwi Darwey, Dagwi wo Israyɛl a ye, “Me kyɛ́ me gâs weneng. Me kyɛ́ me hɛ zakzak jeng de hwak e ji min a ra a hwā mɛ pyɛ vyes yere yemo. Tē naka, hwo kwɔrɔ sira mo wɛt, ko tik na hwo vɔk hwā mo na tsak o.”
Tuk shɔt Dagwi ha ga vey bagat
17Yin a ga tɛ̀ Dagwi Darwey gbɛrɛk na neha min. Ko mwa ano yin e tɛ̀, “E rɛ̌ de wot a ga tɛ̀ ɛ gbɛrɛk arɛt?” Yi na té “Mwa vemo de be ra pyɛ́ vyes ba sé berat e bayîs Dagwi Darwey ko e feng na yɛn.” Kɛ yin e rangsal yin e tē, “Dagwi wo gâs badu e tē a wɛ arɛt?”
Currently Selected:
Malaki 2: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
