Markus 7

Pyɛ́ de bedabeda bá basa

(Mat 15:1-9)

1Behak e ji BeFarisi na bemât basâ Badu, de bá kana vey yi e Yɛrusalɛm, ba tula hɛn na Yɛsu. 2Ko yɛn a di behak e ji bemât masâ fwom mɛ ba sé re pyɛ́ na vɔ de ba sé ligis, yɛn a kus vɛ wɛt e gwong de BeFarisi ba ha a bemat na be ra.

3Yaga BeFarisi na bwang BeYuda yɛn e raa basa de yɛn á kana sey yi na bedabeda mɛn: Yɛn e hwo re pyɛ́ wɛt, sɛ̌ yɛn a kus vɔ mɛn e ra gwong de ba ga basa a yɛn. 4Ko jeng de yɛn a toyo yi e bajang, yɛn e hwo re pyɛ cak wɛt, sɛ̌ yɛn a tānga kus ɛn e ngyen. Ko yɛn e raa badu bahak pyak vemo de yɛn á kana sey, sede gwông kûs begance, na neshǐ, na nerwèy dyam.

5Ko BeFarisi na bemât basâ Badu ba rangâl Yɛsu, ba ye, “Yaga sɛ́ de bemât masâ fwom mō be raa basâ bedabeda mot wɛt, ko yɛn e re pyɛ́ na vɔ de ba sé ligis arɛt?”

6Yɛsu a yang ɛn, “A sé tyɛng na pyɛ de Yɛshaya, zarap Dagwi à kana ha e ra yin, à yin bemât nenu-neba, sede remo de à jɛk wɔgɔ,

“ ‘Dagwi a ye, bemat vemo be nɔng me nerey na nenu mɛn zɔng,

ko neyey mɛn na sé yikyik na me.

7Jeng de yɛn a sé re a me fongol, yɛn a sé ra fwôm mɔrɔ̂ rebek zɔng,

yaga yɛn e raa badu de ba yi na bemasi sede ba yi na Dagwi!’

8Yin a ga wuba redu Dagwi, ko yin a sé gyeng basâ bemat.”

9Ko Yɛsu a to yang ɛn, “Kée kàa! Yin vɛ, yin a vɔk netsitsɛ̂ng kyɛ́ in badu Dagwi, yaga na yin a gyeng basa min. 10Yaga Mose à kana ye, ‘Nɔ̂ng da mō na neng mō nerey’, ko à to ye, ‘Kawɛ mwat de a dùsa da mɛ kɛ neng mɛ, a sé gbing-gbing be mɔrɔ hɛ.’ 11Ko yin, yin e basa wɔgɔ, mwat ê tɔk yâng da mɛ kɛ neng mɛ, ‘Pyɛ de ma ga ye, mê nɔng in, ya sé Korban’ wɔgɔ, ba ga nɔ̂ng Dagwi yɛ e nɔrɔ. 12Ko ka sede mwat o a ye ano, ko yin e to simo na yɛ a sɛlɛ da mɛ kɛ neng mɛ ko tyɔng wɛt. 13Yi ano, yin a sé tɛ̀ hâ Dagwi he sè pyɛ cak wɛt yi na basa min de yin e tikis a behak. Ko pyɛ́ cak ya sé pyak sede yemo de yin e ragas.”

Pyɛ́ de ye tɛ̀ mwat ligis

(Mat 15:10-20)

14Yɛsu a to yila regyɛng bemat vey na yɛ, a yang ɛn, “Wet in betong mwa hin, na yin a tɔk há hom! 15Vit a pyɛ cak de ye yel e ji jîm mwat yi e nu mɛ de ye tɔk tɛ̀ ɛ a sè ligis. Ko a sé e pyɛ́ de ye nunus yi e ji mwat de ye tɛ̀ ɛ ligis. [ 16Ka sede mwat a vɔk betong, tik na yɛ a wok!]”

17Jeng de Yɛsu a tik bemat o, a yel e ji lɔ. Ko bemât masâ fwom mɛ ba hwo rangal hɛ cap-há mo. 18A yang ɛn, “Yin arɔng yin a tɔk di wɛt arɛt? Yin a tɔk wɛt a? Vit a pyɛ cak de ye yel e ji jîm mwat yi e nu mɛ de ye tɔk tɛ̀ mwat o a sè ligis, 19yaga pyɛ mo ye yel e ji yey mɛ wɛt, ko ye kyè vɔk e rebu, ye wɔ̀ nu mɛ e beving.” Yɛsu a ha ano, na a dura wɔgɔ, pyɛ̂ mwa ya sé naka na be re.

20Ko a to gwɛ̌ yang ɛn, “A sé e pyɛ́ de ye nunus yi e nû mwat de ye tɛ̀ mwat o a sè ligis. 21Yaga a sé yi e ji mo e hwomo wɔgɔ, yi e ji yêy mwat de bare ves he yís, hemo de he tɛ̀ mwat a ra nejwang, a shigi, a mɔrɔ mwat, 22a ra jɛ̀m, a vɔk gananâng pyɛ́, na a ra pyɛ́ detidetu de ya sé vyes; a kwɛlsɛng bemat, a vɔk gwōt, a kyɛ́ ɛ nà simo mwat hwak a sɛ̀ pyɛ cak, a lashe bazâ bemat, a tos rato, ko a kat hâ netɔn. 23Mwa pyɛ́ vyes yemo ye nunus yi e hwomo e ji yêy mwat, ko ye tɛ̀ ɛ ligis.”

Hwā de a sé WoYuda wɛt a tɛ̀ gap mɛ e ra Yɛsu

(Mat 15:21-28)

24Yi e hwomo, Yɛsu a sogo, a kyè vɔk e yɛnɛ̂ sevwel de sa sé bagat na repomô Tur. A yel e ji lɔ hak, ko a simo na mwat hwak a tɔk, yɛ a sé e hwomo wɛt. Ko hane ha tɔk ro bemat sana tɔk kwɔn de a sé ɛ̀ wɛt. 25Hwā hwak de hwong mɛ a vɔk ceng a wok rehâ Yɛsu. Remo-remo, a vey na yɛ, a pom, a gaba e nuyel mɛ, a re a yɛ fongol. 26Hwā mo a sé WoYuda wɛt, ko a sé tɔ̂ yɛnɛ̂ sevwêl Finikya wo Sirya. A ra won na Yɛsu na a pat ceng yi e ji hwong mɛ. 27Ko Yɛsu a yang ɛ, “Tik na wot a tānga nɔ̂ng nèy pyɛ̂ re e ngyen. A sé tyɛng wɛt na mwat a jut pyɛ̂ nèy, na a bomo a bevu yɛ̄.”

28Hwā mo a ye, “Ey, a sé ano, à Da. Ko mwa ano, bevu be re cɛ̂k pyɛ̂ nèy de ye gabsa e vwel!”

29Ko Yɛsu a yang ɛ, “Há mo ha sé naka. Kyè vɔk e lɔ; ceng o ya ga nu ɛ yi e ji hwóng mō!”

30Hwā mo a kyè vɔk e lɔ, a pom, a sɛ̀ hwong mɛ e gwat e dyɛngɛ, ko ceng o mwin ya ga nusu.

Yɛsu a tɛ̀ mwat de a sé kpey, ko a to sé tɔn tyang

31E bama mo, Yɛsu a tik yɛnɛ̂ sevwêl Tur, ko a kyè vɔk e Gworep Galili. A pere kwey e repomô Sidɔn tanga e bapomo kuru de ba tâng vɛ, à Dekapolis. 32Bemat behak ba vey a yɛ na kpey hwak de e to ha jɔ̀gɔy, ko yɛn a ra won na Yɛsu, na a tɛ̀ vwɔ mɛ e ra yɛ. 33Yɛsu a hwo hwɔtɔ hɛ e ji bemat, a vɔk na yɛ e bak gwining. E hwomo, a tɛ̀ bekɛn vɔ mɛ e ji betong mwat o, a tulus netey, ko a ra relem mɛ. 34Ko a tɛ̀ bayis mɛ vɔk e lagwi, a vo yey na gap, ko a yâng mwat o, “Efata!” Wɔgɔ, “Wunta!”

35E ji jeng o, betong mɛ ba wunta hɛn, relem mɛ ra viri hɛ arɔng, ko a hwo ha vit a jɔ̀gɔy yane mo. 36Ano Yɛsu a nɔ̂ng bemat o nu, a yang ɛn, yɛn a ha a mwat wɛt. Ko sede a gwɛ̌ ha a yɛn ano, ko yɛn a gwɛ̌ shara hɛ. 37Mwa bemat de ba wok ba langat hɛn sizɔng, ba tē, “Hm! Kayɛ pyɛ de e ra, e ra yɛ ryat o! E tɔk tɛ̀ bekpey be wok há, betɔn kwong be tɔk ha arɔng!”

Currently Selected:

Markus 7: bomBI

Highlight

Copy