Markus 8
8
Yɛsu a nɔ̂ng bemat gu banaas pyɛ̂ re
(Mat 15:32-39)
1E jeng yane, bemat pyak ba to tula hɛn na Yɛsu, ko vit a hɛn na pyɛ́ de bê re arɔng. A yila bemât masâ fwom mɛ vey na yɛ, ko a yang ɛn, 2“A sé a me mwishish na bemat vemo, yaga pɔlɔ mɛn hê netat a hemo na me, ko yɛn a vɔk pyɛ́ na be re wɛt. 3Sede ma tɛ̀ ɛn e gwong vɔk e nelɔ mɛn na vyong, ê tang ɛn cwɛ̀ɛ e gwong o, yaga behak mɛn ba yís yikyik.”
4Bemât masâ fwom mɛ mo ba rangal hɛ, ba ye, “E tê hey sede hemo ngan, mwat ê sɛ̀ pyɛ́ e gwa de yê vey na be nɔ̂ng bemat vemo arɛt?”
5Yɛsu a rangal hɛn, a ye, “Bāgat kpam-tuk ba sé ala na yin arɛt?”
Yɛn a ye, “Ba sé bataama.”
6Ko Yɛsu a yâng bemât mwa be sangal e vwel. Ano a jut bagat kpam-tuk vane bataama, a feng a Dagwi, a kwɔrɔs vɛ, ko a nɔ̂ng bemât masâ fwom mɛ na be gas a bemat, ko yɛn a ra ano. 7Yɛn a vɔk betɔk besɛl o tyɔng arɔng. Sede Yɛsu a to feng yaga vɛ, a yâng bemât masâ fwom mɛ be gas a bemat vɛ kwong. 8Yɛn a re, ba siris. E bama mo, bemât masâ fwom mɛ mo ba jut sháp tyaama de ya sila na cɛ́k o de ya pɔl. 9Bemat de ba re ba sé sede gu banaas (4,000).
E bama de Yɛsu a tɛ̀ ɛn e gwong, 10a pere wɔ̀ yel e ji dwa-nshi tanga bemât masâ fwom mɛ, ko yɛn a kyè vɔk e yɛnɛ̂ sevwêl Dalmanuta.
BeFarisi ba simo Yɛsu a dura a yɛn pyɛ bes cak
(Mat 16:1-4)
11BeFarisi behak ba vey na Yɛsu, ko yɛn a hwo tó cuna na yɛ. Yɛn a simo be mara hɛ. Yaga ano, yɛn a yang ɛ, a dura a yɛn pyɛ bes cak de yê dura, reto mɛ ra yi na Dagwi. 12Ko Yɛsu a vo yey sizɔng, a ye, “Yaga sɛ́ de bemât jeng yemo be simo be dura a yɛn pyɛ bes arɛt? Mwin me ha a yin: Ba rɔda dura a bemat vemo pyɛ bes cak wɛt!”
13A tik ɛn, a to wɔ̀ yel e ji dwa-nshi, ko a hwo kyè wɔ̀ ye dɔ e gura gworo.
Gêy-sing BeFarisi na wo Herodes
(Mat 16:5-12)
14A yâng bemât masâ fwôm Yɛsu bam nà jut kpam-tuk, ko yɛn a vɔk regat o rining zɔng e dwa-nshi. 15Yɛsu a yang ɛn, “Tē in naka, na yin a tē hywɛ na géy-sing BeFarisi na wo Herodes.”
16Yɛn a tɔrɔng há mo na bemɛn, ba ye, “A ha ano, yaga wot a vɔk kpam-tuk wɛt.”
17Ko Yɛsu a tɔk pyɛ de yɛn a sé ha, ko a rangal hɛn, a ye, “Yaga sɛ́ de yin a sé tɔrɔng, ko yin e tɛ̀sɛ kaà vɔ̂k kpam-tuk wɛt arɛt? Yin a rɔngɔl nà tɔk a? Kɛ yin a di wɛt arɛt? Bato min be ra fwom wɛt a? 18Yin a vɔk bayis, ko yin e tɔk bɛrɛng wɛt a? Yin a vɔk betong, ko yin e tɔk wokos wɛt arɛt? Yin e tɔk bare wɛt a? 19Jeng de má kwɔrɔs bāgat vane batungun na me nɔ̂ng bemat gu batungun (5,000), sháp ala de yin á sila na cɛ́k o de ya pɔl arɛt?”
Yɛn a yang ɛ, “Rekuru na yɛ bya.”
20A to rangal hɛn, a ye, “Ko jeng de mà kwɔrɔs bagat vane bataama, na me nɔ̂ng bemat gu banaas (4,000), sháp ala de yin á sila na bwang cɛ́k o arɛt?”
Yɛn a yang ɛ, “Tyaama.”
21Ko a yang ɛn, “Sɛ̌ vey e jeng yemo yin a ka tɔk wɛt arɛt?”
Yɛsu a tɛ̀ bwók tyang e Bet-Saida
22Jeng de yɛn a pom e Bet-Saida, bemat behak ba vey a Yɛsu na bwók, yɛn a ra won na yɛ, na a tɛ̀ vwɔ mɛ e ra yɛ. 23A kaba bwók o e vwɔ, ko a hwɔlɔ hɛ vɔk e bamâ kerepomo mo. E hwomo, a tulus netey e bayîs bwók o, ko a ra ɛ na vɔ, a yang ɛ, “Hwó tɔk di pyɛ cak arɛt?”
24Mwat o a bɛrɛng, ko a ye, “Ey, me tɔk di bemat, ko me di ɛn ba sé sede batîn cɔ́gɔt de be kyě kyè.”
25Yɛsu a to gwɛ̌ tɛ̀ vɔ mɛ e bayîs mwat o. E remo kwong, mwat o a hwo bɛrɛng naka, ko bayis mɛ ba tɛ̀ tyang, a di kayɛ pyɛ wɛshɛrɛk. 26Yɛsu a tɛ̀ ɛ e gwong vɔk e lɔ mɛ, ko a yang ɛ, “Hwo yel e ji kerepomo mo wɛt.”
Bitrus a nɔng nuha e ra Yɛsu
(Mat 16:13-20; Luk 9:18-21)
27Yɛsu na bemât masâ fwom mɛ ba tik kerepomo mo, ko ba vɔk e nebapomô Kaisariya Filipi. A rangal hɛn e gwong, a ye, “Bemat be tē ma sé wà arɛt?”
28Yɛn a yang ɛ, “Behak be tē, hwà sé Yohana wo batisma; behak, Eliya; ko behak kwong be tē, hwà sé gwining e ji bezarap Dagwi.”
29Ko Yɛsu a to rangal hɛn, a ye, “Ko sɛ̌ yin ɛ, yin e tē ma sé wà arɛt?”
Bitrus a toyo a yɛ, a yang ɛ, “Hwà sé Mwat de Dagwi a kasa na a sey bemat.”
30Ko Yɛsu a nɔng ɛn nu, a yang ɛn, “Yin kwon ha a mwat hwak há e ra me wɛt.”
Yɛsu a ha e ra reyɔm na reku mɛ
(Mat 16:21-28; Luk 9:22-27)
31E bama mo, Yɛsu a hwo basa a bemât masâ fwom mɛ, a ye, “A sé gbing-gbing na Me de ma tɛ́ me mwat me di reyɔm pyak, ko bemakuk, na begbɔng bepiris, tanga bemât basâ Badu ba rɔda kyɛ́ ɛn me. Ba rɔda mɔrɔ me, ko e bamâ nepɔlɔ netat ma rɔda sene yi e reku.” 32A ha a yɛn há hemo wɛshɛrɛk. Yaga ano, Bitrus a hwɔtɔ hɛ e vwara, a hwo gyong ɛ. 33Ko Yɛsu a doyo, a di bemât masâ fwom mɛ, ko a gyong Bitrus, a yang ɛ, “Sek e ngamo, à Shetan! Báre mō ha sé yerê hê Dagwi wɛt, ha sé yerê hê mwasi!”
34Ko Yɛsu a yishi regyɛng bemat tanga bemât masâ fwom mɛ vey na yɛ, a yang ɛn, “Ka sede mwat hwak e simo a raa me, gbing-gbing na a ye bam a tó mɛ, na a jut cɔ́gɔt-kak mɛ, na a raa me. 35Yaga mwa mwat de e simo a sey neken mɛ a rɔda bidɛ nɛ; ko mwa mwat de a ye waa a neken mɛ, yaga e raa me, tanga yaga sharâ Yɛgɛt Yat, a rɔda sey nɛ. 36Fwom o gwɛ a sɛ́, ka sede mwat a bensa pyɛ̂ mwa e jey, ko e yɛnɛ mo, a bidɛ neken mɛ arɛt? 37Vit a pyɛ cak de mwat ê tɔk nɔng na a viri mɛ̀ tó mɛ. 38Ka sede mwat a vo rekyen hom tanga rê reha hom e nuyêl bemât jeng yemo de be kyɛ́ ɛn nà raa Dagwi, vemo de be to ragas banɛn, ko Me de ma tɛ́ me mwat ma rɔda ba vo rekyen mɛ arɔng jeng de mê ba vey na gbɔng nerât Da hom tanga betom-lagwi vê jɛrɛ.”
Currently Selected:
Markus 8: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
