Markus 12

Gwɔrɔ-há e ra bemât bɛrɛng bwî anap

(Mat 21:33-46; Luk 20:9-19)

1E bama mo, Yɛsu a hwo ha a bemat na gwɔrɔ-há, a yang ɛn, “Mwat hwak a sé de a how bwi, ko a tus ɛ̀ cɔ́gɔt anap. A ta gwɛ naka, a cing kwɔ̂n farâng nèy anap, ko a to lɔk dem hak de mwat ê wɔ̀ sangal ɛ̀ na a bɛrɛng bwi mo. Ano kwong, a tik gwɛ e vɔ bemat behak na be bɛrɛng a yɛ, ko a kyè vɔk e sevwel sehak. 2Sede jeng vêl nèy cɔ́gɔt o ya vey, a tomo hwak e ji besam mɛ vɔk na bemât bɛrɛng bwi mo, na a wɔ̀ sey a yɛ numo mɛ e ji pyɛ́ de ya ga vel. 3Ko bemat o ba vo ɛ, ba dak ɛ, ko ba tomo hɛ vɔ sǎn. 4Dâ bwi mo a to tomo sam o hwak na yɛn. Wane kwong yɛn a dak ɛ e rato, ba mǎ hɛ, ko ba ha a yɛ há ves. 5E bama mo, a to tomo hwak gbak; e remo, yɛn a mɔrɔ hɛ. Ko yɛn a ra a behak pyak ano: Ba dakas behak, ko ba mɔbɔs behak. 6Mwat de a tɛt ɛ̀ sana tomo a sé hwêy yey mɛ. E tala mo kwong, a tomo hɛ vɔk na yɛn, a ye, ‘Yɛn a rɔda nɔ̂ng hwey hom nerey.’ 7Ko bemât bɛrɛng bwi mo ba yâng bemɛn, ‘Hwey de he ba re nedanelɔ mɛ ma hemo! Vey in, na wot a mɔrɔ hɛ, na pyɛ̂ nedanelɔ mɛ ye bin tɛ́ ɛ myot!’ 8Yɛn a vo hɛ, ba mɔrɔ hɛ, ko yɛn a bomo revin o e bamâ bwi.

9“E sɛ́ kwong de dâ bwi mo a rɔda ra arɛt? A rɔda kyè na a wɔ̀ mɔbɔs bemat o, ko a rɔda jut bwî anap o, a nɔ̂ng bemât bɛrɛng behak. 10Yin a ga basa há hemo e Bwok-basa Dagwi wɛt arɛt? Hā ye:

“ ‘Gwofwa de bemât lɔ̂k duk ba kyɛ́ ɛn gwɛ wɔgɔ, gwa vɔk fwom wɛt,

e gwɛ de gwa tɛ́ ɛ gbɔng gwofwa râ fwom.

11A sé e Darwey de a ra ano,

ko na wot, a sé pyɛ langat sizɔng!’ ”

12Ko bemât nuyêl BeYuda ba jāma begwong na be tɛ̀ be vo ɛ, yaga yɛn a tɔk, a ha gwɔrɔ-há mo e ra yɛn. Ko yaga yɛn a wok bengyip regyɛng bemat, yɛn a tik ɛ, ko ba kyè nedem mɛn.

Rángal e ra talâ dyâm vwel

(Mat 22:15-22; Luk 20:20-26)

13Ba tomo behak e ji BeFarisi tanga bemât raà Herodes wɔ na Yɛsu, na be sɛ̀ ɛ na há hak de ha sé tyɛng wɛt. 14Sede yɛn a pom, yɛn a yang ɛ, “À Mwat Basa, wot a tɔk, hwà sé mwat de hwó ha tsak o. Vit a pyɛ de ye bɔrɔk hwo na báre mwat hwak, yaga bemât mwa ba sé tyɛng e nuyel mō, ko hwó basa a yɛn pyɛ de ya sé tsak o e ra gwong de Dagwi e simo be raa gwɛ. Hā a wot, Badu mot ba simo a wot na wot a talâ Da vwel BeRoma dyâm vwel arɛt? Ko sɛ̌ wot tala yɛ̄ a? Kɛ wey arɛt?”

15Ko Yɛsu a pere di yerê netsitsɛng neves mɛn nane, a yang ɛn, “Yaga sɛ́ de yin e simo yin a tɛ̀ a me segun arɛt? Vey a me hin na dyam, na me di yɛ̀.”

16Yɛn a vey a yɛ mɛ̀, ko a rangal hɛn, a ye, “E ratô wà na rezâ wà de ba tɛ̀ e ra dyam o arɛt?”

Yɛn a yang ɛ, “A sé rê Da vwel BeRoma.”

17Ko Yɛsu a yang ɛn, “Yàa! Tala hin Da vwel BeRoma pyɛ de ya sé myɛ; ko tala hin Dagwi pyɛ de ya sé ye Dagwi.”

Ko yɛn a langat hɛn hɛ sizɔng.

Rángal e ra sensa bemat yi e reku

(Mat 22:23-33; Luk 20:27-40)

18BeSaduki behak ba vey na Yɛsu. Yɛn a vemo de be tē, vit a mwat de a rɔda ba sene yi e reku. 19Yɛn a yang ɛ, “À Mwat Basa, Mose à kana jɛk a wot há hemo, a ye, ‘Ka sede mwat a ku, na a tik hwā mɛ vit à nèy, a sé gbing-gbing na gwa mwat o a vɔk kuma mo, na rɔ̌ be tɔs nèy, na be sɛ̀ mɛ̀ yerê lɔ mo.’ 20Hwà di a? Bemat behak bá sè betaama e neng mɛn. Kunat o a vo hwā, ko a ku sana sɛ̀ nèy. 21E bama mo, womo de a raa hɛ a vɔk hwā mo, ko a ku sana sɛ̀ nèy arɔng. Pyɛ jining o ya té na gwa mɛ wo netat. 22Ano ya té na bwang o: Mwa hɛn betaama ba vɔk ɛ, ba kushu, ko vit a sɛ̀ nèy na hwā mo. E yɛnɛ mo, hwā mo arɔng a ku. 23Ko di, tuk sensa bemat, hwā mo a rɔda ba tɛ́ ɛ wo wà arɛt? Yaga mwa hɛn betaama ba ga vɔk ɛ.”

24Yɛsu a yang ɛn, “Yin vɛ, yin a tɔk há tyɔng wɛt! Ko yin a tɔk pyɛ de ya tɛ̀ in, na yin a ha ano arɛt? A sé yaga yin e dunus Bwok-basa Dagwi tanga reto mɛ arɔng. 25Jeng de bemat de ba ga kushu ba rɔda ba sensa yi e reku, yɛn e to ba vos beha wɛt, ko beha be to ba kyese neweneng arɔng wɛt. Yɛn a rɔda ba sè sede betom-lagwi. 26Ko e rà sensa bemat yi e reku — yin a basa e Bwok-basa Mose e kwɔn de bà ha mɛ̀ rehâ kya de hà lolo e reburuk wɛt arɛt? E hwomo, bà jɛk wɔgɔ, Dagwi à yâng Mose, ‘Me ma sé Dagwî Abraham, na wo Yishak, na wo Yakɔp.’ 27Hane ha dura, yɛ a sé Dagwî bavin wɛt, ko a sé Dagwî bemat de ba sé na neken, mwa ano de yɛn a ga kushu. Yin a ga buru ding-ding!”

Redu de ra dal bwang o mwa

(Mat 22:34-40; Luk 10:25-28)

28Hwak e ji bemât basâ Badu á sè wokos pyɛ de yɛn á sè tó mɛ̀ cuna e ra tɛt o. A di, Yɛsu a ha a BeSaduki yɛt. Yaga ano, a gwɛ̌ sek na a rangal hɛ, a ye, “E rɛ̌ redu de ra dal bwang o mwa na nerey arɛt?”

29Yɛsu a yang ɛ, “Redu de ra dal bwang o mwa na nerey à ret ngan: ‘Wet in betong, à yin BeIsrayɛl! Darwey Dagwi mot a sé Darwey gwining zɔng. 30Ko tɛ̀ in yey na Darwey Dagwi min na yey min mwa, na neken min mwa, na tɔ́k min mwa, na gap min mwa arɔng.’ 31Redu re neba rerey o a ret ngan: ‘Tɛ̀ yey na mwât vwara mō, sede hwà tɛ̀ yey na tó mo.’ Vit a redu rehak de ra dal vemo.”

32Mwât basâ Badu mo a yâng Yɛsu, “Mwin, à Mwat Basa, hwà ha yɛt! Dagwi a sé gwining zɔng, vit a hwak sɛ̌ yɛ. 33Ko a sé gbing-gbing na mwat a tɛ̀ yey na Dagwi na yey mɛ mwa, na tɔ́k mɛ mwa, na gap mɛ mwa arɔng, na a to tɛ̀ yey na mwât vwara mɛ sede a tɛ̀ yey na tó mɛ. A dal na nerey na mwat a gyeng badu vemo baba, de a rangas ngyāma burang e ra gàgbang rangâs pyɛ́, na bwang nenɔrɔ̂ yas de be yɛt vɔk na Dagwi.”

34Sede Yɛsu a tɔk sá mo a ha na netsitsɛng, a yang ɛ, “Hwà ga hwo mɛsɛ̂ng tɔk pyɛ de be simo na mwat a ra, womo de Dagwi e re negwɔm e ra yɛ.”

E bamâ há mo, vit a mwat de a vɔk yey ting na a to rangâl Yɛsu rangal hak.

Mwat de Dagwi a kasa na a sey bemat

(Mat 22:41-46; Luk 20:41-44)

35Sede Yɛsu á sè basa e Gbɔng Duk Re Fongol, a ye, “E rɛ̌ de bemât basâ Badu be tē, Mwat de Dagwi a kasa na a sey bemat a sé hwêy Davit arɛt? 36Gabik Jɛrɛ hà tɛ̀ Davit a ha wɔgɔ,

“ ‘Dagwi Darwey a yâng Darwey hom:

Sangal e ngamo e vwɔ yege hom,

sɛ̌ ma tɛ̀ bemât repugu mō e nɛ̂n bol mō.’

37Davit pyɛ mɛ à tâng Mwat de Dagwi a kasa na a sey bemat, à Darwey. E rɛ̌ de mwat o ê sè hwêy Davit o arɛt?”

Tē in naka na bemât basâ Badu

(Mat 23:1-36; Luk 20:45-47)

Regyɛng bemat ra wok hâ Yɛsu, ko ra vɔk yey pyɛng. 38Jeng de a sé basa a yɛn, a ye, “Tē in naka na bemât basâ Badu! Be simo na be kyě kyè e begbɔng berugu belis, na be tē a yɛn kwot, na be tang ɛn show e dúra. 39Yɛn e kasa nekwɔn de be tikis a bemat beting e beduk re fongol, ko be jāma nekwɔn begbɔng bemat e kwɔ̂n rê pyɛ́ na be saras ɛ̀. 40Yɛn e ra won lis na be dura, yɛn a dal bemat na re a Dagwi fongol, ko e ji hâ mwin, yɛn e doyo, ko be kyě re pyɛ̂ bekuma na be mɔt ɛn e ra nelɔ mɛn. Kis! Rezot mɛn re ba dal na neves!”

Nɔrɔ de kuma a tɛ̀

(Luk 21:1-4)

41Sede Yɛsu a sangal bagat na kwɔ̂n tɛ́sɛ dyām e Gbɔng Duk Re Fongol, a sé bɛrɛng bemat de be tɛ̀sɛ dyām mɛn e ji mo. Bedaberey pyak ba tɛ̀sɛ dyām pyak e ji mo. 42Ko kuma hwak de a sé pɛ́ng-pɛng a pom, a tɛ̀ nedyam zwey neba de na sé sede kobo gwining zɔng. 43Ko Yɛsu a yila bemât masâ fwom mɛ e dem hining, a yang ɛn, “Tsak o mwin me ha a yin: Kuma womo de a sé pɛ́ng-pɛng a tɛ̀ pyɛ de ya dal yemo de bwang bemat ba tɛ̀sɛ. 44Yaga mwa hɛn ba vɛ́sɛ yi e ji pyɛ̂ nedanerey mɛn, ko ba tɛ̀sɛ. Ko yɛ, mwa ano de a sé pɛ́ng-pɛng, a tɛ̀ mwa pyɛ de a vɔk; a nɔng mwa pyɛ de ê re mɛ̀ pyɛ́.”

Currently Selected:

Markus 12: bomBI

Highlight

Copy