Markus 13

Rehâ wey na Gbɔng Duk Re Fongol

(Mat 24:1-2; Luk 21:5-6)

1Sede Yɛsu á sè nu ɛ yi e Gbɔng Duk Re Fongol, gwining e ji bemât masâ fwom mɛ a ha a yɛ, a ye, “À Mwat Basa, di yerê beta berey vemo na yerê lɔ̂k nelɔ nerat nemo!”

2Ko Yɛsu a hanat, a yang ɛ, “Hwà di gbɔng nelɔ nemo a? Vit a gwofwa gwohwak e ngamo de ba rɔda ba tik gwɛ e ra tɛ̂t mumwɛ; ba rɔda ba gangas vɛ mwa e vwel.”

Reyɔm na rezot

(Mat 24:3-14; Luk 21:7-19)

3Jeng de Yɛsu á sè e sangal e Raku Pàt de wa sé e gura e bayîs Gbɔng Duk Re Fongol, Bitrus, na Yakɔp, na Yohana, tanga Andarawus ba wɔ́ na yɛ zɔgɔ̂ hɛn. 4Yɛn a hwo rangal hɛ, yɛn a ye, “Hā a wot, pyɛ́ yemo ye ba té nayu ɛ? Ko e sɛ́ de ye ba dura a wot, pyɛ́ mo mwa ya sé kyè ba té arɛt?”

5Yɛsu a yang ɛn, “Tē in naka, mwat hwak a kwon kwɛlɛng hin wɛt! 6Bemat pyak ba rɔda ba vey e ji reza hom, ko kawɛ e ji mɛn ê ba ye, yɛ a sé me. Ko yɛn ê ba tɛ̀ bemat pyak be vuru gwong. 7Yin vo yey wɛt jeng de yin e ba wok rehâ tô como bagat kɛ yikyik ayi. Gbing-gbing na pyɛ́ yane ye ba té, ko jeng ye yɛnɛ mo ya ga vey e ngyen wɛt. 8Yerê bemât jey ya rɔda ba tó como na bemɛn, ko yere arɔng ya rɔda ba tó como na yere cak. Vwel ha rɔda ba digis e nedem detidetu, ko vyong ya rɔda ba sè. Pyɛ́ yemo ya sé sede mɛsɛ̂ng rûs tɔ́.

9“Tē in naka na bato min, yaga ba rɔda ba vos in, ko bê ba nása hin e nuyêl bemât shɔt. Yɛn a rɔda ba dak in e beduk re fongol; be ba yila hin e nuyêl begbɔng begwɔ̀m na begwɔmna, yaga yin e raa me. E jeng o, yin a rɔda ba nɔng nuha e ra Yɛgɛt Yat e nuyel mɛn. 10Gbing-gbing sɛ̌ bemat ba tānga shara a yerê bemasî mwa e jey Yɛgɛt Yat. 11Ko jeng de be ba vos in, na be ba vɔk na yin e nelɔ shɔt, yin sap gyam rehâ pyɛ de yin ê ha wɛt. E jeng o, yin a rɔda ba ha pyɛ de bê nɔng in, yaga a sé e yin de yin ê ba ha wɛt, ko a sé e Gabik Jɛrɛ de hê ha. 12Gwà a rɔda ba nára gwa mɛ, na be mɔrɔ hɛ; ko da a rɔda ba ra tyɛng ano na hwey mɛ. Nèy na rɔda ba doyo e ra beda na beneng mɛn, ko nê ba tɛ̀ be mɔbɔs hɛn. 13Kawɛ mwat a rɔda ba bɛɛ hin ves, yaga yin e raa me. Ko ba rɔda ba sey mwat de a niri vɔk e yɛnɛ mo.”

Pyɛ vyes sizɔng yè tɛ̂ kwɔ̂n jɛrɛ ligis

(Mat 24:15-28; Luk 21:20-24; 17:23)

14“Yin a rɔda ba di ‘Pyɛ vyes sizɔng de ye tɛ̀ kwɔ̂n jɛrɛ ligis’ e tumal e kwɔn de ha jam na ye tumal ɛ̀ wɛt.” (Mwat de e basa há hemo, tik na yɛ a tɔk.) “E jeng o, tik na bemat de be ba sè e sevwêl Yudiya be tele vɔk e beraku.” 15Womo de e ba sè e sangal e ji fwam, a kwon yel e ji lɔ na a lashe jeng e de jût pyɛ mɛ cak wɛt. 16Ko womo de e ba sè e hey kwong, a to ɛ vɔk e lɔ, na a wɔ̀ jut pyɛ banga mɛ wɛt. 17Yaa kukuuk! Gawey e ra beha de bê ba vɔk jim, mwa na vemo de bê ba ngas nèy e jeng o! 18Rá in won na Dagwi, na pyɛ́ yemo ye ba té nabolos wɛt! 19Yaga e jeng o, bemat ba rɔda ba sɛ̀ reyɔm reves o, yerê remo de ba ga kana sɛ̀ rɛ wɛt yimo susu mo jeng de Dagwi à yong jey vey e jeng yemo, ko ba rɔda to ba sɛ̀ yerê rɛ arɔng wɛt. 20Ko ka Darwey a yâng tɛt nepɔlɔ mo wɛt, ka vit a mwat de a yâng ba làl. Ko a sé yaga bemat de yɛ a ga kana kasa de a tɛt nepɔlɔ mo.

21“E jeng o, ka sede mwat hwak a yang in, ‘Di, Mwat de Dagwi a kasa na a sey bemat á womo!’ kɛ ‘Di, á woro!’ — yin sey tsak o na há mɛ wɛt. 22Yaga bemât bɔs de be tē, yɛn a sé vemo de Dagwi a kasa, tanga bezarap Dagwi vê bɔs ba rɔda ba nusu. Yɛn ê ba ra pyɛ̂ bes, ko bê to ba dúsa pyɛ́ de bemat ba rɔda ba langat hɛn, yaga na be kwɛlɛng mɛ̀ bemat de Dagwi a ga kasa, ka sede yɛn ê tɔk ra ano. 23Tē in naka! Ma ga ha a yin pyɛ́ yemo mwa gyam na ye té.”

Toyô Yɛ̀ de a tɛ́ ɛ mwat

(Mat 24:29-31; Luk 21:25-28)

24“E bamâ jeng reyɔm yane, gwi gwa rɔda ba tɛ́ ɛ mwangalang, ko pwɛl gwa rɔda ba pɛngɛ wɛt, 25netangacɛn na rɔda ba gabsa yi e lagwi, ko pyɛ́ de ya vɔk reto e gwi ba rɔda ba kàsa yɛ̄ e begwông yɛ̄. 26E jeng o kwong, bemat ba rɔda ba di Me de ma tɛ́ me mwat: Me kyè vey e ji bale na reto sizɔng tanga nedyɛt nerat. 27Ko ma rɔda ba tomo betom-lagwi vey e jey vɔk e rwa gùl naas, na yɛn a ba tula bemat de Dagwi a ga kasa yi e yɛnɛ̂ jêy bak womo vɔk e yɛnɛ̂ jêy bak woro.”

Pyɛ mása yi e retîn regwi

(Mat 24:32-35; Luk 21:29-33)

28“Tik na yin a masa yi e retîn regwi. Jeng de nelang o ne tɛ́ ɛn yɔkyɔk na ne hwo turuk, ne tɛ̀sɛ berang, ko yin a tɔk, swigi gwa ga vey bagat. 29Tyɛng ano arɔng, jeng de yin a di pyɛ́ yemo ya ga hwo té, ko yin a tɔk, jeng hom ya ga vey bagat, ko ma sé lɛs e rwi duk. 30Tsak o mwin me ha a yin: Bemat de ba sé beken a remo, mwa vɛ ba rɔda kushu wɛt, sɛ̌ pyɛ́ yemo mwa ya té. 31Jey tanga lagwi ba rɔda ba tala hɛn, ko reha hom ra rɔda ba tala hɛ ko tyɔng wɛt.”

Vit a mwat de a tɔk tuk o kɛ jeng o

(Mat 24:36-44; 25:14-15; Luk 19:12-13; 12:38, 40)

32“Vit a mwat de a tɔk tuk na jeng o, kɛ betom-lagwi kɛ Hwey Dagwi, sɛ̌ Da nju mɛ zɔng de a tɔk. 33Tē in naka, na yin a bɛrɛng nekanang! Yaga yin a tɔk tuk de jeng o yê ra wɛt. 34E ba sè sede mwat de e sogo wɔ̂ rekyɛn: E tik besam mɛ na be bɛrɛng a yɛ lɔ, e nɔ̂ng kawɛ e ji mɛn fwom de ê ra, ko e ha a lwêk rwi duk, yɛ a bɛrɛng nekanang. 35Yaga ano, bɛrɛng hin nekanang arɔng, yaga yin a tɔk jeng de dalɔ mo ê pom wɛt: Ê tɔk sè nawiri, kɛ nakabadem, kɛ e rwa-hwol gasi rey, kɛ e rwa hwol gasi cereng. 36Ka sede a pom pút, yɛ a sɛ̀ in e de nevwa wɛt. 37Pyɛ de me ha a yin ya sé yaga bemât mwa arɔng: Bɛrɛng hin nekanang!”

Currently Selected:

Markus 13: bomBI

Highlight

Copy