Markus 11

Bemât Yɛrusalɛm ba sey Yɛsu e gwong

(Mat 21:1-11; Luk 19:28-40; Yoh 12:12-19)

1Jeng de yɛn a vey bagat na Yɛrusalɛm, ba pom e nebapomô Bet-Fage na Bet-Anya de ba sé e vwâ Raku Pàt. Yɛsu a hwo tomo bemât masâ fwom mɛ beba, 2a yang ɛn, “Kyè in vɔk e kerepomo kane e nuyel min. Sede yin a yel e hwomo, yin a rɔda di hwêy madung e rɔgɔs, hemo de vit a mwat de a ga kana laga hɛ. Viri hin hɛ, na yin a vey mɛ̀. 3Ka sede mwat hwak a rangal hin, ‘Yaga sɛ́ de yin a sé ra ano arɛt?’ ko yang in hɛ, ‘Darwey e simo hɛ, ko a rɔda toyo na hɛ ziri.’ ”

4Yɛn a kyè, ko ba pom, ba sɛ̀ hwêy madung e vwâ gwong e rɔgɔs e majêy lɔ hak. Jeng de yɛn a hwo viri hɛ, 5bemat behak de ba sé e hwomo e tumal ba rangal hɛn, ba ye, “Yaga sɛ́ de yin a sé viri hwêy madung o arɛt?”

6Ko yɛn a ha tyɛng sede remo de Yɛsu a ha a yɛn, ko bemat o ba tik ɛn be kyè na hɛ. 7Yɛn a vey na hwêy madung o na Yɛsu. E hwomo, yɛn a paa pyɛ̂ banga mɛn, ba tɛ̀sɛ yɛ̄ e ra mâ madung o, ko Yɛsu a laga wɛ. 8Bemat pyak ba lasha pyɛ̂ banga mɛn e gwong, behak kwong ba lasha berang de yɛn a kwɔrɔs e règyeng. 9Bemat de ba sé kyè e nuyel tanga vemo de ba sé raa hɛ e bama ba hwo gbɔ, ba tē, “Hosana! Bē somo Dagwi! Tik na Dagwi a tɛ̀ nerat e ra womo de e kyè vey e ji rezâ Darwey! 10Tik na Dagwi a tɛ̀ nerat e ra jeng rê negwɔm de ye kyè vey, yemo de ya rɔda sè tyɛng na jeng de da mot Davit à kana re negwɔm! Bē somo Dagwi!”

11Yɛsu a pom e Yɛrusalɛm, a yel e Gbɔng Duk Re Fongol, ko a kyě bɛrɛng pyɛ̂ mwa. Ko yaga jeng ya ga kyè, a nusu vɔk e Bet-Anya tanga bemât masâ fwom mɛ kuru na vɛ beba.

Yɛsu na retîn regwi

(Mat 21:18-19)

12Nusu hwol, sede yɛn a to ɛn yi e Bet-Anya, Yɛsu a wok vyong. 13Yi e jey, a di retîn regwi de ra vɔk berang, ko a wɔ̀ di, a tē kɛ gyeng ê sɛ̀ nèy o e ra rɛ. Ko jeng de a pom e hwomo, a di pyɛ cak wɛt sɛ̌ berang, yaga retîn regwi re tɔs e jeng o wɛt. 14Ko a yâng rɛ, “Vit a mwat de a rɔda to ba re nèy mō neshey gbak-gbak!”

Bemât masâ fwom mɛ arɔng ba wok pyɛ de a ha.

Yɛsu a yel e Gbɔng Duk Re Fongol

(Mat 21:12-17; Luk 19:45-48; Yoh 2:13-22)

15Sede yɛn a pom e Yɛrusalɛm, Yɛsu a wɔ̀ yel e nelalâ Gbɔng Duk Re Fongol, a hwo ro bemât rɛsɛl pyɛ́ tanga vemo de ba sé seres yɛ̄ yi e hwomo. A gangas betebut bemât segsâ dyām, na necɔgɔ̂t sangsâl bemat de ba sé rɛsɛl bebɔp, 16ko a tik mwat hwak a kwey na pyɛ cak e nelalâ Gbɔng Duk o wɛt. 17Ko a basa a bemat, a yang ɛn, “Bà jɛk e Bwok-basa Dagwi wɔgɔ, Dagwi a ye, ‘Ba rɔda tâng lɔ hom, à duk won yaga mwa yére bemat jey.’ Ko yin, yin a ga tɛ̀ hɛ he tɛ́ ɛ fwarâ begbik!”

18Jeng de begbɔng bepiris tanga bemât basâ Badu ba wok ano, yɛn a hwo jāma begwong de bê mɔrɔ hɛ. Ko yɛn a wok bengyip mɛ, yaga bemât mwa ba langat hɛn bása mɛ.

19Ko jeng de nahywegelek na vey, Yɛsu na bemât masâ fwom mɛ ba tik repomo mo.

Pyɛ de be masa yi e retîn regwi

(Mat 21:20-22; 6:14)

20Bop nagasi kwong, sede yɛn a sé kwey, yɛn a di retîn regwi o ra ga hworok yi e nelang o vɔk e berinis o. 21Bitrus a bare na pyɛ de Yɛsu a kana ha, ko a yang ɛ, “Di, à Mwat Basa, retîn regwi remo de hwà sira a rɛ ra ga hworok!”

22Yɛsu a hanat, a yang ɛn, “Tɛ̀ in gap min e ra Dagwi. 23Tsak o mwin me ha a yin: Yin ê tɔk yâng raku womo, ‘Sogo, na hwo wɔ̀ gaba e ji gworep.’ Ka sede yin a tó yey wɛt, ko yin a sey tsak o wɔgɔ, pyɛ mo yê té, ko mwin, ya rɔda té. 24Yaga ano, ma sé ha a yin: Jeng de yin a sé ra won na Dagwi, na yin a rangal hɛ pyɛ cak, tɛ̀ in gap min e ra yɛ wɔgɔ, yin a ga sɛ̀ yɛ, ko yin a rɔda sɛ̀ yɛ. 25Ko jeng de yin a sé ra won, hàla hin kayɛ pyɛ de rɔ̌ yin a vɔk na mwat hwak, yaga na Da min e lagwi a bin hàla a yin buru min arɔng. [ 26Ko ka sede yin a hàla a bemin wɛt, Da min e lagwi arɔng a rɔda hàla a yin buru min wɛt.]”

Rángal e ra yerê reto de Yɛsu a vɔk

(Mat 21:23-27; Luk 20:1-8)

27Yɛn a to ɛn vɔk e Yɛrusalɛm. Sede Yɛsu a sé kyè e Gbɔng Duk Re Fongol, begbɔng bepiris, na bemât basâ Badu, tanga bemakuk ba hwo vey na yɛ, 28ba rangal hɛ, ba ye, “E rɛ̌ reto de hwà vɔk de hwó ra mɛ̀ pyɛ́ yemo arɛt? E wà de a nɔng o retô râ yɛ̄ arɛt?”

29Yɛsu a hanat, a yang ɛn, “Mê rangal hin pyɛ cak arɔng. Ka sede yin a ha a me, ko ma rɔda ha a yin yerê reto de ma vɔk na me ra mɛ̀ pyɛ́ yemo. 30Há a me hin: Yohana á sɛ̀ retô râ batisma yi e gwa arɛt? Á sɛ̀ rɛ yi na Dagwi a? Kɛ yi na bemat arɛt?”

31Yɛn a hwo tó cuna na bemɛn, “Sɛ̌ wot ye ala arɛt? Ka sede wot a ye, ‘Rá yi na Dagwi’, a rɔda yang ot, ‘Yaga sɛ́ de yin á sey tsak o na há mɛ wɛt arɛt?’ 32Ko ka sede wot a ye, ‘Rá yi na bemat’, bemat ba rɔda doyo e ra wot, yaga yɛn mwa ba jut Yohana á sè zarap Dagwi.” 33Yaga ano, yɛn a yâng Yɛsu, “Wot a tɔk wɛt.”

Ko Yɛsu a yang ɛn, “Me arɔng mê ha a yin wɛt kɛ na e rɛ̌ reto de me ra mɛ̀ pyɛ́ yemo.”

Currently Selected:

Markus 11: bomBI

Highlight

Copy