Markus 10
10
Yɛsu a basa e ra gâs weneng
(Mat 19:1-12; Luk 16:18)
1Yɛsu a tik kwɔn hane, a vɔk e sevwêl Yudiya, ko a ye dɔ e gurâ Rɔt Yɔrdan. Regyɛng bemat pyak ra to vey, ba sé tus ɛn na yɛ, ko a basa a yɛn, sede remo de a dopse ra.
2BeFarisi behak ba vey na yɛ, ba simo na be mara hɛ, ko ba rangal hɛ, ba ye, “Badu mot ba simo a mwat na a ro hwā mɛ arɛt?”
3Yɛsu a toyo a yɛn na rángal, a ye, “Mose à kana nɔng in nu, à ye ala arɛt?”
4Yɛn a yang ɛ, “Mose à kana simo a wot, na mwat a jɛk a hwā mɛ bwok gâs weneng, na a tɛ̀ ɛ e gwong.”
5Ko Yɛsu a yang ɛn, “Mose à jɛk a yin redu remo, yaga neyey min na sé kashalang. 6Ko yimo susu mo jeng de bà yong jey, bà ye, ‘Dagwi a yong bemat, rwas na hwā.’ 7Bà to ye, ‘Pyɛ ma yemo de ya tɛ̀, rwas a rɔda tik da mɛ na neng mɛ, na a wuna hɛ na hwā mɛ, 8ko yɛn beba mo ba rɔda tɛ́ ɛn rebek rining.’ E ngamo nuyel, yɛn a to sé beba wɛt, ba sé pyɛ jining. 9Yaga ano, pyɛ de Dagwi a ga wuna, mwat a kwon gas yɛ wɛt.”
10E ji lɔ kwong, bemât masâ fwom mɛ ba to rangal hɛ há mo. 11A yang ɛn, “Mwat de a ro hwā mɛ, na a to vo hwak a sé ra nejwang na wo neba mo. 12Ano arɔng, hwā de a hàla rwas mɛ, na a to wɔ̂ weneng o hak, yɛ arɔng a sé ra nejwang.”
Yɛsu a tɛ̀ nerat e ra nèy
(Mat 19:13-15; Luk 18:15-17)
13Bemat behak ba vey na nèy na Yɛsu, yaga na a bin tɛ̀ vɔ mɛ e ra nɛ, ko bemât masâ fwom mɛ ba hwo gyong ɛn. 14Sede Yɛsu a di ano, shom ya sogo a yɛ, ko a yang ɛn, “Tík in nèy na ne vey na me! Yin ro nɛ wɛt, yaga e bemat sede yerê nèy nemo de ba rɔda ba sangal e ji Segwɔm Dagwi. 15Tsak o mwin me ha a yin: Ka sede mwat a sey Dagwi sede hwey wɛt, na Dagwi a re negwɔm e ra yɛ, ko a rɔda ba yel e ji segwɔm o wɛt.” 16E bama mo, a kula nèy o, a tɛ̀ vɔ mɛ e ra nɛ, ko a tɛ̀ nerat e ra nɛ.
Mwat de a sé gbɔng darwey
(Mat 19:16-30; Luk 18:18-30)
17Sede Yɛsu a to hwo kwɛngɛl mɛ, mwat hwak a tele na a man na yɛ, a pom, a ye guduruk e nuyel mɛ, a rangal hɛ, a ye, “À Mwat Basa, ma tɔk hwà sé mwat rwat. Mê ra sɛ́ na me bin sɛ̀ neken gbak-gbak arɛt?”
18Ko Yɛsu a yang ɛ, “Yaga sɛ́ de hwà yang me, ma sé mwat rwat arɛt? Vit a mwat rwat sɛ̌ Dagwi nju mɛ zɔng. 19Hwà tɔk badu wɔgɔ, ‘Hwo mɔrɔ mwat wɛt; hwo ra nejwang wɛt; hwo shigi wɛt; hwo ha hâ bɔs e ra mwat hwak wɛt; hwo mɔt mwat wɛt; nɔ̂ng da mō na neng mō nerey.’ ”
20Ko mwat o a ye, “À Mwat Basa, ma hwo gyenges mwa badu mo yimo me wen vey e remo.”
21Yɛsu a bɛrɛng hɛ, ko a tɛ̀ yey na yɛ, a yang ɛ, “Hwà bidɛ pyɛ jining zɔng: Ci wɔ̀ row kayɛ pyɛ de hwà vɔk, na hwo gas a bepɛng dyām o, ko hwà rɔda ba sɛ̀ yas e lagwi. E bama mo, vey, na hwo ba raa me.” 22Jeng de mwat o a wok ano, a rɔgɔs bayis mɛ, ko a nára hɛ na lashe yey, yaga yɛ a sé gbɔng darwey.
23Yɛsu a bɛrɛng bemât masâ fwom mɛ, ko a yang ɛn, “E ba sè gbang na bedaberey be yel e ji Segwɔm Dagwi!”
24A yang ɛn kpɔrɔk na há hane, ko Yɛsu a to yang ɛn, “À nèy hom, a sé gbang na be yel e ji Segwɔm Dagwi! 25E ba sè nduga maryat wo yel e rewôl kwêt tolo, na darwey a yel e ji Segwɔm Dagwi.”
26A vɛ̌ yâng bemat mɛ mo yɔɔt na há hane, ko yɛn a rangsâl bemɛn, “Ko sɛ̌ e wǎ de bê ba tɔk sey neken mɛ arɛt?”
27Yɛsu a bɛrɛng hɛn, ko a yang ɛn, “Pyɛ yemo ye tɔk té na bemat wɛt, ko ye tɔk té na Dagwi, yaga Dagwi e tɔk ra kayɛ pyɛ.”
28Ko Bitrus a hwo yang ɛ, “Di, wot a ga tik kayɛ pyɛ na wot a raa hwo!”
29Yɛsu a yang ɛn, “Tsak o mwin me ha a yin: Kawɛ mwat de a ga tik lɔ mɛ, kɛ begwa mɛ, kɛ neng mɛ, kɛ da mɛ, kɛ nèy mɛ, kɛ cāp mɛ yaga me tanga yaga sharâ Yɛgɛt Yat, 30a rɔda sɛ̀ pyɛ́ de ye ba dal mwa. E jeng yemo, a rɔda sɛ̀ ye dal zang naga (100) e ra nelɔ, na begwa mɛ, na beneng mɛ, na nèy mɛ, na cāp — mwa tanga reyɔm. Ko e jeng de ye kyè vey a rɔda ba sey neken gbak-gbak. 31Pyak e ji vemo de ba sé vê yel a remo ba rɔda ba tɛ́ ɛn vê bama; ko pyak e ji vemo de ba sé vê bama a remo kwong ba rɔda ba tɛ́ ɛn vê yel.”
Hê tat de Yɛsu a ha e ra reku mɛ
(Mat 20:17-19; Luk 18:31-34)
32Yɛn a ga kaba gwong vɔk e Yɛrusalɛm, ko Yɛsu a sé kyè e nuyêl bemât masâ fwom mɛ vemo de ba langat hɛn hɛ, ko bemat de ba sé raa hɛn e bama kwong yɛn a wok bengyip. Yɛsu a to jut yɛn kuru na vɛ beba e hagat, ko a ha a yɛn e ra pyɛ́ de ye kyè wɔ̀ té na yɛ. 33A yang ɛn, “Wok in, wot a sé kyè vɔk e Yɛrusalɛm, e kwɔn de ba rɔda nára Me de ma tɛ́ me mwat e vɔ begbɔng bepiris tanga bemât basâ Badu. Yɛn a rɔda ra a me shɔt reku. Ano, yɛn a rɔda nára me e vɔ bemat beduk. 34Yɛn o ba rɔda shɛgɛsh me, bê tulus me na netey, bê dak me na zining, ko bê mɔrɔ me. E bamâ nepɔlɔ netat, ma rɔda sene yi e reku.”
Won de Yakɔp na Yohana ba ra
(Mat 20:20-28; Luk 22:24-27)
35Ko Yakɔp na Yohana, nèy Zɛbɛdayus, yɛn a gwɛ̌ sek bagat na Yɛsu, yɛn a yang ɛ, “À Mwat Basa, wot a sé ra won na hwo, pyɛ cak ya sɛ́ de wot e simo hwo ra a wot.”
36Yɛsu a rangal hɛn, a ye, “E sɛ́ de yin e simo me ra a yin arɛt?”
37Yɛn a yang ɛ, “Jeng de hwó ba sangal e ra gwofwa negwɔm mō e ji gbɔng nerât negwɔm o, ko wot e simo na hwo tik ot na wot a sangal gwining e vwɔ yege mō na gwining e vwɔ mwɛlɛng mō.”
38Yɛsu a yang ɛn, “Yin a tɔk pyɛ de yin a sé ra wôn yɛ wɛt. Yin e ba tɔk sɔ keshi reyɔm de me ba sɔ arɛt? Kɛ be ba tɔk tɛ̀ a yin batisma e gwong de be ba tɛ̀ a me arɛt?”
39Yɛn a ye, “Ey, wot ê tɔk.”
Yɛsu a yang ɛn, “Mwin, yin a rɔda sɔ keshi reyɔm de ma rɔda sɔ, ko bê tɛ̀ a yin batisma e gwong de ba rɔda tɛ̀ a me. 40Ko ma vɔk reto na me kasa bemat de bê sangal e vwɔ yege na mwɛlɛng hom wɛt. A sé e Dagwi de e ba nɔng nekwɔn o vɔk na vemo de a ga kana yong nɛ yaga yɛn.”
41Sede bwang bemât masâ fwom kuru ba wok ano, yɛn a hwo tɛ̀ shom e ra Yakɔp na Yohana. 42Ko Yɛsu a yila hɛn mwa hɛn, a yang ɛn, “Yin a tɔk, bemat vemo de ba ga tɛ̀ ɛn, na be sè begwɔ̀m e ra yére dyuk be re negwɔm e ra bemat mɛn na retek, ko bemakuk mɛn be vɔk reto e ra yɛn arɔng. 43Ko ê sè ano na yin wɛt. Ka sede mwat hwak e ji min e simo na a tɛ́ ɛ gbɔng o, gbing-gbing na a sè mwât fwom min. 44Ko ka sede mwat hwak e ji min e simo na a sè wo yel, gbing-gbing na a sè sam bemât mwa. 45Yaga Me de ma tɛ́ me mwat ma vey na be ba ra a me fwom wɛt. Ko ma vey, na me ra fwom, na me nɔng neken hom, na me vibis mɛ̀ bemat pyak.”
Yɛsu a wunta bayîs bwók Bartimawus
(Mat 20:29-34; Luk 18:35-43)
46Yɛn a vey e Yeriko. Sede Yɛsu a sé tik repomo mo tanga bemât masâ fwom mɛ, gbɔng regyɛng bemat ra raa hɛ. Ko bwók hwak de ba tang ɛ, à Bartimawus Timawus a sé e sangal e vwarâ gwong, a sé ra won. 47Jeng de a wok, a sé e Yɛsu wo Nazarɛt, a hwo gbɔ, a ye, “À Yɛsu, Hwêy Davit, tosho reyɔm hom!”
48Bemat pyak ba gyong ɛ, ko yɛn a yang ɛ, a sǎ yuu. Ko a gwɛ̌ ye ngyat, a ye, “À Hwey Davit, tosho reyɔm hom!”
49Yɛsu a tumal, a ye, “Yila hin hɛ.”
Yɛn a yila bwók o, yɛn a yang ɛ, “Vɔk yey ting! Sogo, a sé yila hwo!”
50A pat pyɛ banga mɛ, a bomo yɛ, a gyili, ko a vey na Yɛsu.
51Yɛsu a rangal hɛ, a ye, “Hwó simo me ra a hwo sɛ́ arɛt?”
Bwók o a yang ɛ, “À Mwat Basa, me simo me to bɛrɛng jey.”
52Yɛsu a yang ɛ, “Kyè, ba ga tɛ̀ o tyang, yaga hwà tɛ̀ gap mō e ra me wɔgɔ, mê tɔk tɛ̀ o tyang!”
E ji jeng o, a hwo bɛrɛng jey, ko a raa Yɛsu e gwong.
Currently Selected:
Markus 10: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
