Matayus 7

Bása e ra râ shɔt

(Luk 6:37-38, 41-42)

1“Yin kwon ra a bemat shɔt wɛt, yaga na Dagwi a ba ra a yin yɛ arɔng wɛt. 2Yaga Dagwi a rɔda ra a yin shɔt e gwong gwining de yin a ra a bemat yɛ, ko a rɔda raa begwong de yin á kana raa e jeng de yin a ra a bemat behak shɔt arɔng. 3Yaga sɛ́ de hwó di keshugu e yîs gwa mō, ko hwó tɛ̀ tong na bak cɔgɔt de wa sé e yis mō wɛt ɛ? 4Kɛ e rɛ̌ de hwô tɔk yâng gwa mō, ‘Tik me pat a hwo keshugu kane e yis mō’, e jeng de bak cɔgɔt wa sé e yis mō ɛ? 5À hwo mwât nenu-neba! Tānga pat bak cɔgɔt de wa sé e yis mō e ngyen, ko e bama mo, hwô tɔk di kyɛrɛng na hwo pat keshugu yi e yîs gwa mō.

6“Yin kwon jut pyɛ́ de ya sé jɛrɛ na yin nɔ̂ng bevu wɛt, yaga yɛn a rɔda doyo na be roros hin zɔng. Yin kwon barak a bezà beta min de ba sé berat sedesi, yaga yɛn a rɔda bɔrɔs vɛ na bol mɛn zɔng.”

Bása e ra râ won

(Luk 11:9-13)

7“Rá in wôn pyɛ de yin e simo na Dagwi, ko a rɔda nɔng in. Jāma hin, ko yin a rɔda sɛ̀ pyɛ de yin a sé jāma. Kwɔgɔt hin, ko ba rɔda wunta a yin rwi duk o. 8Yaga kawɛ mwat de e ra wôn pyɛ cak, ba rɔda nɔng ɛ yɛ; ko yɛ womo de e jāma pyɛ cak, a rɔda sɛ̀; ko yɛ womo kwong de e kwɔgɔt rwi duk, ba rɔda wunta a yɛ gwɛ. 9E wà e ji min de a rɔda nɔ̂ng hwey mɛ gwofwa jeng de ha ra wôn kpam-tuk ɛ? 10Kɛ e wà de ê nɔ̂ng hɛ gwɔ̄m jeng de ha ra wôn tɔk ɛ? 11Ka sede yin kwong de yin a sé beves yin e tɔk nɔ̂ng nèy min pyɛ́ ryat, tàga Da min e lagwi a rɔda nɔ̂ng vemo de ba ra won na yɛ pyɛ́ ryat!

12“Yaga ano, kayɛ jeng rá in a bemat tyɛng pyɛ de yin e simo yɛn a ra a yin arɔng. Badu Mose tanga bása bezarap Dagwi ba sé e ra tɛ̂t há hane mo.”

Ruhup de gwa sé ngyɔgɔdɔk

(Luk 6:31; 13:24)

13“Yél in e ruhup de gwa sé ngyɔgɔdɔk! Yaga ruhup de gwa sé wɔ e kwɔ̂n kya gwa sé gbey, ko gwông wɔ e hwomo gwa to sé gbang wɛt, ko a sé bemat pyak de be kwey e gwɛ. 14Ko ruhup de gwa sé wɔ e kwɔ̂n neken gwa sé ngyɔgɔdɔk, ko gwông wɔ e hwomo gwa to sé gbang, ko a sé bemat tyɔng zɔng de be sè gwɛ.”

Túsa e ra bezarap Dagwi vê bɔs

(Luk 6:43-44)

15“Tē in naka na bezarap Dagwi vê bɔs! Yɛn e vɛ̀sɛ na yin, ko jeng de yin e bɛrɛng hɛn, yin e bare, yɛn a sé vyēl pyɛng, ko e ji hâ mwin, yɛn a sé sede ngyāma vyes e neyey mɛn. 16Yin ê tɔk ɛn yi na tomong mɛn. Bemat be tɔk vos nèy anap e ra serɔgɔ kɛ nèy regwi e ra jaal arɛt? 17Kayɛ cɔgɔt ryat ye tɔs nèy nerat, ko cɔgɔt vyes ye tɔs nèy neves arɔng. 18Cɔgɔt ryat ye tɔk tɔs nèy neves wɛt, ko cɔgɔt vyes arɔng ye tɔk tɔs nèy nerat wɛt. 19Kayɛ cɔgɔt de ye tɔs nèy nerat wɛt, be tow yɛ, be bomo yɛ e kya. 20Ano kwong, yin ê tɔk bezarap Dagwi vê bɔs yi na tomong mɛn.”

Bemat de bê tɔk yel e Segwɔm Lagwi wɛt

(Luk 6:46; 13:25-27)

21“A sé e kawɛ mwat de e tang me, à Darwey, à Darwey de a rɔda yel e Segwɔm Lagwi wɛt, ko a sé e womo zɔng de e ra pyɛ de Da hom de a sé e lagwi e simo. 22E tuk de ba rɔda ba ra a jey shɔt, bemat pyak ba rɔda ba yang me, ‘À Darwey, à Darwey, a sé e ji reza mō de wot á zarap na Dagwi wɛt a? A sé e ji reza mō de wot á paa cēng wɛt a? A sé e ji reza mō arɔng de wot á ra pyɛ̂ bes pyak wɛt a?’ 23Ko mê yang ɛn, ‘Ma ga sang tɔk in wɛt. Kyè in e ngamo, à yin de yin e ragas pyɛ́ vyes!’ ”

Lɔ e ra gbondong na lɔ e ra bazɛk

(Luk 6:47-49)

24“Yaga ano, kawɛ mwat de e wet betong na neha hom nemo, na a gyeng nɛ, a sé sede mwât netsitsɛng de a lɔk lɔ mɛ e ra gbondong. 25Rwak wa hwo rop, tɛmɛ-nshi na pom, ko gul gwa pɛsɛl na gap, gwa tɛ́s lɔ mo; ko mwa ano, ha gaba wɛt, yaga bá kana bomo retîs hɛ e ra gbondong. 26Ko kawɛ mwat de e wet betong na neha hom nemo wɛt, na a gyeng nɛ wɛt a sé sede tɔn de a lɔk lɔ mɛ e ra bazɛk. 27Rwak wa hwo rop, tɛmɛ-nshi na pom, ko gul gwa pɛsɛl na gap, gwa tɛ́s lɔ mo, ko ha gaba. Hm! Lɔ hane ha gaba gaba ves!”

28E bama de Yɛsu a yɛnɛ neha nemo, bagyɛng bemat o ba langat hɛn e ra gwong de a basa a yɛn, 29yaga gwa sé detu na gwomo de bemât basâ Badu ba ra. Yɛsu a basa a yɛn na reto.

Currently Selected:

Matayus 7: bomBI

Highlight

Copy