Matayus 8

Yɛsu a tɛ̀ kparong tyang

(Mar 1:40-45; Luk 5:12-16)

1Jeng de Yɛsu a gyirik yi e raku mo, bagyɛng bemat pyak ba raa hɛ. 2Ko kparong hwak a vey na yɛ, a gaba e nuyel mɛ, ko a ye, “À Darwey, ka sede hwà simo, ko hwà vɔk reto na hwo tɛ̀ me tyang.”

3Yɛsu a nára vwɔ mɛ, ko a ra mɛ̀ mwat o, a yang ɛ, “Ey, me simo; tɛ̀ tyang!” Remo-remo, sekwa mo sa hàla hɛ, ko a sɛ̀ netyang. 4Ko Yɛsu a yang ɛ, “Wok, hwo kwon ha a mwat hwak pyɛ de ma ga ra a hwo wɛt. Ko nára hwo vɔk na piris, na a bɛrɛng rebek mō. E bama mo, nára nɔrɔ hemo de Mose à kana nɔng nu e ra hɛ, na he dura a kawɛ mwat, hwà ga tɛ̀ tyang.”

Yɛsu a tɛ̀ sam gbɔng mwat como tyang

(Luk 7:1-10; 13:28-29; Yoh 4:46-53)

5Jeng de Yɛsu a yel e ji Kafarnahum, gbɔng o wo bemât comô BeRoma hwak a vey na yɛ, a ra won, 6a ye, “À Da, mwât fwom hom a sé e dyɛngɛ e lɔ na serɔ̂ gbɛrɛ̂k nedem de se ro ɛ sizɔng.”

7Yɛsu a yang ɛ, “Mê wɔ̀ tɛ̀ ɛ tyang.”

8Ko gbɔng o mo a ye, “Kée wey, à Da! Ma ka vey na hwo yel e lɔ hom wɛt. Hwo hanat zɔng, ko mwât fwom hom ê tɛ̀ tyang. 9Yaga me pyɛ hom ma sé e nɛ̂n gbɔng mwat mot, ko me arɔng ma vɔk bemât como e nɛn hom. Me yâng womo, ‘Kyè!’ ko e kyè; me yâng woro, ‘Vey!’ ko e vey, ko me yâng sam hom, ‘Rá pyɛ yemo!’ ko e ra yɛ.”

10Sede Yɛsu a wok há mɛ, a langat hɛ, ko a yâng bemat de ba raa hɛ, “Mwin me ha a yin: Ma ga ka di mwat hwak e ji BeIsrayɛl de a tɛ̀ gap mɛ e ra me e gwong gwomo sede mwat womo wɛt! 11Ma to sé ha a yin, bemat pyak ba rɔda yi e rwa rak na yi e rwa tā, ko yɛn ê sangal tanga Abraham, na Yishak, tanga Yakɔp e de re pyɛ́ e Segwɔm Lagwi. 12Ko vane de ba yâng sé e ji segwɔm o, ba rɔda ba gang ɛn e jey e ji lwīl, e kwɔn de yɛn a rɔda tosho na be roros yìn mɛn.”

13Ko Yɛsu a yâng gbɔng o wo bemât como mo, “Kyè wɔ e lɔ! Pyɛ de hwà tɛ̀ gap mō e ra me yaga yɛ, yê té.” Ko mwât fwom mɛ mo a tɛ̀ tyang e jeng mo.

Yɛsu a tɛ̀ gùna Bitrus na bemat behak tyang

(Mar 1:29-34; Luk 4:38-41)

14Jeng de Yɛsu a yel e lɔ Bitrus, a di gùna Bitrus o e dyɛngɛ pep-pep na bêk fes. 15A ra vwɔ mɛ, ko bêk fes o ha hàla hɛ. A sogo, ko a yong a yɛ pyɛ́.

16Sede nawiri na vey, bemat ba vɛ̀sɛ na bemat pyak de ba vɔk cēng. Yɛsu a paa begabik beves o na hâ nu mɛ zɔng, ko a tɛ̀sɛ bemât serɔ mo mwa tyang. 17A ra ano, yaga na be sila mɛ̀ pyɛ de Yɛshaya, zarap Dagwi, à kana ha wɔgɔ,

“Yɛ pyɛ mɛ a jut nezap nerɔ mot,

ko a to kyè na pyɛ́ de ye ro ot.”

Bemat de ba ye, bê raa Yɛsu

(Luk 9:57-62)

18Sede Yɛsu a di regyɛng bemat ra gwɔrɔ hɛ, a nɔ̂ng bemât masâ fwom mɛ nu na be ye dɔ vɔk e gurâ gworep gworo. 19Ko mwât basâ Badu hwak a vey na yɛ, a yang ɛ, “À Mwat Basa, ma rɔda raa hwo vɔk e kahɛ kwɔn de hwô vɔk ɛ̀.”

20Ko Yɛsu a toyo a yɛ, a ye, “Benɛ́t ba vɔk bavɔng mɛn; nenon arɔng na vɔk barɛngɛ mɛn. Ko Me de ma tɛ́ me mwat ma vɔk kwɔn de mê dyɛng ɛ̀ na me pɔnglɔ wɛt.”

21Mwat o hwak arɔng, gwining e ji bemât masâ fwom mɛ, a yang ɛ, “À Da, tík me, na me tānga wɔ̀ lɛrɛ da hom e ngyen.”

22Ko Yɛsu a yang ɛ, “Raa me, tik na bavîn bemat be lɛsɛ bemɛn.”

Yɛsu a tɛ̀ gwogul gwo tumal

(Mar 4:35-41; Luk 8:22-25)

23Yɛsu a yel e dwa-nshi, ko bemât masâ fwom mɛ ba raa hɛ wɔ e ji mo. 24E jeng o, gwogul gwa nusu, gwa hwo pɛsɛl na gap sedesi, ko gwa hashe nshi vɔk e ji dwa mo. Ko Yɛsu a sé e dyɛngɛ e de nevwa. 25Bemat mɛ ba wɔ́ na yɛ, ba wɔ̀ shina hɛ, ba yang ɛ, “À Darwey, sey ot! Wot a sé kyè wɔ̀ ye pyɔp!”

26Yɛsu a yang ɛn, “Yaga sɛ́ de yin a wok bengyip ano ɛ? À yin de yin e tɛ̀ gap min mwa e ra me wɛt!” Ko a sogo e tumal, a gyong gwogul o na nshi mo, ko kwɔn o ha ye yuu tyɔng wɛt.

27Bemat o ba langat hɛn, ba ye, “Kée! E yerê wɛ̌ mwat a womo de gwogul na gworep be gyeng há mɛ ɛ?”

Yɛsu a tɛ̀ bemat beba de ba vɔk cēng tyang

(Mar 5:1-20; Luk 8:26-39)

28Jeng de Yɛsu a wɔ̀ wul e gura gworo e yɛnɛ̂ sevwêl BeGadara, bemat behak beba de ba vɔk cēng ba nusu yi e tara de be lɛsɛ ɛ̀ bavîn bemat, ba man na yɛ. Yɛn á ra yol tyɔng wɛt; yaga ano, vit a mwat de á tɔk kwey e gwong o. 29Remo-remo, yɛn a gbɔ, ba ye, “À Hwey Dagwi, hwó simo sɛ́ na wot arɛt? Hwà ga vey e ngamo, na hwo tak a wot reyɔm gyam na jeng de bà kana yong ɛ̀ ye vey a?”

30Kwarâ bezà rwey o gwa losho hɛ e hwomo bagat na yɛn e de rê sehwey. 31Ko cēng o ya ra won na Yɛsu, ya ye, “Ka sede hwô pat ot, ko tomo hot vɔk e kwarâ bezà mo, na wot a wɔ̀ yel e ji vɛ.”

32A yâng yɛ̄, “Ci in!” Ano cēng o ya nusu, ko ya wɔ̀ yel e bezà mo. Kwara mo mwa gwa hwo tele cidirang e vwak, gwa wɔ̀ gaba e gworep, ko gwa wey.

33Bemât gyeng bezà mo ba jut setele, ba wɔ̀ yel e repomo, ko ba wɔ̀ ha a bemat pyɛ̂ mwa tanga pyɛ de ya té na bemat de bá kana vɔk cēng o. 34Bemât repomo mo mwa ba nusu na be wɔ̀ man na Yɛsu. Ko jeng de yɛn a di ɛ, yɛn a ra won na yɛ a hàla yɛnɛ̂ sevwel mɛn.

Currently Selected:

Matayus 8: bomBI

Highlight

Copy