Matayus 24

Rehâ wey na Gbɔng Duk Re Fongol

(Mar 13:1-2; Luk 21:5-6)

1Sede Yɛsu á sè nu ɛ yi e Gbɔng Duk Re Fongol, á sè kyè, ko bemât masâ fwom mɛ ba vey na yɛ na be dura a yɛ gwong de ba lɔk beduk Gbɔng Duk o. 2Yɛsu a hanat, a yang ɛn, “Ey, bɛrɛng hin lɔk o naka! Mwin me ha a yin: Vit a gwofwa gwohwak e ngamo de ba rɔda ba tik gwɛ e ra tɛ̂t mumwɛ; ba rɔda ba gangas vɛ mwa e vwel.”

Reyɔm na rezot

(Mar 13:3-13; Luk 21:7-19)

3Jeng de Yɛsu á sè e sangal e Raku Pàt, bemât masâ fwom mɛ ba wɔ́ na yɛ zɔgɔ̂ hɛn. Yɛn a hwo rangal hɛ, yɛn a ye, “Hā a wot, pyɛ́ yemo ye ba té nayu ɛ? Ko e sɛ́ de ye ba dura a wot, jeng vey mō tanga jeng talâ jey ya ga vey arɛt?”

4Yɛsu a toyo a yɛn, a yang ɛn, “Tē in naka, mwat hwak a kwon kwɛlɛng hin wɛt! 5Yaga bemat pyak ba rɔda ba vey e ji reza hom, ko kawɛ e ji mɛn ê ba ye, yɛ a sé Mwat de Dagwi a kasa na a sey bemat. Ko yɛn ê ba tɛ̀ bemat pyak be vuru gwong. 6Yin kwon vo yey wɛt jeng de yin a rɔda ba wok rehâ tô como bagat kɛ yikyik ayi. Gbing-gbing na pyɛ́ yane ye ba té, ko jeng ye yɛnɛ mo ya ga vey e ngyen wɛt. 7Yére bemat jey ya rɔda ba tó como na bemɛn, ko yere arɔng ya rɔda ba tó como na yere cak. Vyong ya rɔda ba sè, ko vwel ha rɔda ba digis e nekwɔn detidetu. 8Mwa pyɛ́ yemo ya sé sede mɛsɛ̂ng rûs tɔ́.

9“Ba rɔda ba vos in, ko bê ba nása hin e vɔ bemat na be tak a yin reyɔm, na be mɔbɔs hin. Mwa yére bemasi ya rɔda bɛɛ hin ves, yaga yin e raa me. 10E jeng o, bemat pyak ba rɔda ba tik raà Dagwi, yɛn a rɔda ba row bemɛn e vɔ bemat, ko yɛn ê to bɛɛ bemɛn ves. 11E jeng o arɔng, bezarap Dagwi vê bɔs pyak ba rɔda ba nunus, ko yɛn ê ba tɛ̀sɛ bemat pyak be vuru gwong. 12Yaga bemat beves ba rɔda sè pyak sizɔng, bwarwêy bemat ba rɔda tik nà tɛ̀ yey na bemɛn ding-ding. 13Ko ba rɔda ba sey mwat de a niri vɔk e yɛnɛ mo. 14Ko ba rɔda ba shara Yɛgɛt Yat yemo de ya sé e ra Segwɔm Dagwi e yɛnɛ̂ jêy mwa, yaga na yére bemasî mwa ye tɔk wok yɛ̄. E bama mo, jeng ye yɛnɛ mo ya rɔda vey.”

Pyɛ vyes sizɔng de ye tɛ̀ kwɔ̂n jɛrɛ ligis

(Mar 13:14-23; Luk 21:20-24; 17:23-24, 37)

15“Yin a rɔda ba di ‘Pyɛ vyes sizɔng de ye tɛ̀ kwɔ̂n jɛrɛ ligis’ yemo de Danyɛl, zarap Dagwi, à kana ha e ra yɛ. Pyɛ mo ya rɔda sè e tumal e kwɔ̂n jɛrɛ.” — Mwat de e basa há hemo, tik na yɛ a tɔk — 16“E jeng o, tik na bemat de be ba sè e sevwêl Yudiya be tele vɔk e beraku. 17Womo de ê ba sè sangal e ji fwam, a kwon yel e ji lɔ, na a lashe jeng e de jût pyɛ́ mɛ de ya sé e ji mo wɛt. 18Ko womo de ê ba sè e hey kwong, a kwon to ɛ vɔk e lɔ, na a wɔ̀ jut pyɛ banga mɛ wɛt. 19Yaa kukuuk! Gawey e ra beha de bê ba vɔk jim mwa na vemo de bê ba ngas nèy e jeng o! 20Rá in won na Dagwi, na pyɛ́ yemo ye ba té nabolos kɛ Tuk Shábat wɛt! 21Yaga e jeng o, bemat ba rɔda ba sɛ̀ reyɔm reves yere remo de ba ga kana sɛ̀ rɛ wɛt yimo susû jey vey e jeng yemo, ko ba rɔda to ba sɛ̀ yerê rɛ arɔng wɛt. 22Ko ka sede Dagwi à yâng tɛt nepɔlɔ mo wɛt, ka vit a mwat de a yâng ba làl. Ko a sé yaga bemat de yɛ a ga kana kasa de a rɔda tɛt nepɔlɔ mo.

23“E jeng o, ka sede mwat hwak a yang in, ‘Di, Mwat de Dagwi a kasa na a sey bemat á womo!’ kɛ ‘Di, á woro!’ — yin sey tsak o na há mɛ wɛt. 24Yaga bemât bɔs de be tē, yɛn a sé vemo de Dagwi a kasa, tanga bezarap Dagwi vê bɔs ba rɔda ba nusu. Yɛn ê ba ra gbɔng pyɛ̂ bes, ko bê to ba dúsa pyɛ́ de bemat ba rɔda ba langat hɛn, yaga na be kwɛlsɛng mɛ̀ vemo de Dagwi a ga kasa, ka sede yɛn ê tɔk ra ano. 25Ko di! Ma ga ha a yin pyɛ́ yemo gyam na ye té.

26“Ko ka sede bemat ba yang in, ‘Di, á woro e ji hey!’ yin wɔ́ wɛt. Ko ka sede ba yang in, ‘Di, á womo, a sé e lɛrɛ e ji lɔ!’ yin sey tsak o na há mɛn wɛt. 27Yaga Me de ma tɛ́ me mwat ma rɔda ba vey gobok sede nedɛbɛt gbara de ne ta yi e rak vɔk e tā.

28“E kahɛ kwɔn de revîn pyɛ ra sé ɛ̀, e hwomo de bejagawey be tula hɛn ɛ̀.”

Toyô Yɛ de a tɛ́ ɛ mwat

(Mar 13:24-27; Luk 21:25-28)

29“Remo-remo, e bamâ jeng reyɔm yane, gwi gwa rɔda ba tɛ́ ɛ mwangalang, ko pwɛl gwa rɔda to pɛngɛ wɛt, netangacɛn na rɔda ba gabsa yi e lagwi, ko pyɛ́ de ya vɔk reto e gwi ba rɔda ba kàsa yɛ̄ yi e begwông yɛ̄. 30E jeng o, bemat ba rɔda ba di pyɛ cak e lagwi de ya rɔda dura, Me de ma tɛ́ me mwat ma sé kyè vey. Ko mwa yére bemat jey ya rɔda ba tosho, sede yɛn a di Me de ma tɛ́ me mwat me kyè vey e ji balê lagwi na reto tanga nedyɛt nerat sizɔng. 31Ba rɔda ba pɛl durum de wo tosho rɛng-rɛng, ko ma rɔda ba tomo betom-lagwi hom vey e jey vɔk e rwa gùl naas, na yɛn a ba tula bemat de Dagwi a ga kasa yi e yɛnɛ̂ jêy bak womo vɔk e yɛnɛ̂ jêy bak woro.”

Pyɛ de be masa yi e retîn regwi

(Mar 13:28-32; Luk 21:29-33)

32“Tik na yin a masa yi e retîn regwi. Jeng de nelang o ne tɛ́ ɛn yɔkyɔk na ne hwo turuk, ne tɛ̀sɛ berang, ko yin a tɔk, swigi gwa ga vey bagat. 33Tyɛng ano arɔng, jeng de yin a di pyɛ́ yemo mwa, ko yin a tɔk, jeng hom ya ga vey bagat, ko ma sé lɛs e rwi duk. 34Mwin me ha a yin: Bemat de ba sé beken a remo, mwa vɛ ba rɔda kushu wɛt, sɛ̌ pyɛ yemo mwa ya té. 35Jey tanga lagwi ba rɔda ba tala hɛn, ko reha hom ra rɔda ba tala hɛ ko tyɔng wɛt.”

Vit a mwat de a tɔk tuk o kɛ jeng o

(Mar 13:32-37; Luk 17:26-30, 34-36; 12:39-40)

36“Vit a mwat de a tɔk tuk o na jeng o, kɛ betom-lagwi kɛ Hwêy Dagwi, sɛ̌ Da nju mɛ zɔng de a tɔk. 37Sede remo de à sè e jeng Nowa, a rɔda ba sè ano jeng de Me de ma tɛ́ me mwat mê ba vey arɔng. 38Yaga e jeng Nowa mo, gyam na tɛmɛ-nshi ne vey, bemat o bà re, ko bà sɔ, beras bà vos beha, ko beha arɔng bà kyese neweneng sɛ̌ tuk de Nowa à yel e ji gbɔng dwa-nshi. 39Yɛn à kana tɔk pyɛ de ya sé té wɛt sɛ̌ jeng de tɛmɛ-nshi na vey wey na yɛn mwa. A rɔda ba sè ano jeng de Me de ma tɛ́ me mwat ma rɔda ba vey. 40E jeng o, bemat beba ba rɔda sè e de fwom e hey; ba rɔda jut gwining, ko be tik gwining. 41Beha beba ba rɔda sè hwongo e dem hining; ba rɔda jut gwining, ko be tik gwining.

42“Bɛrɛng hin nekanang kwong, yaga yin a tɔk tuk de Darwey min a rɔda ba pom wɛt. 43Ko bàre hin, ka sede dalɔ a yâng tɔk jeng de gbik ê wɔ̀ yel e lɔ mɛ, ka a yâng bɛɛ nekanang na a ro ɛ nà yel ɛ̀. 44Yaga ano, yin arɔng, sangal hin e yong in, yaga Me de ma tɛ́ me mwat ma rɔda ba vey e jeng de yin ê sè gyeng vey hom wɛt.”

Sam rwat na sam vwes

(Luk 12:41-48)

45“E wǎ kwong de a sé gbɔng sam wo netsitsɛng, womo de be tó yey na yɛ wɛt arɛt? A sé e womo de dalɔ ê tik a yɛ bɛrɛng lɔ mɛ, na a nɔngɔ̂s bwang besam lɔ mo pyɛ́ mɛn tyɛng e ra jeng. 46Wo yey pyɛng a gbɔng sam de dalɔ mɛ mo ê sɛ̀ ɛ a sè ra ano jeng de a vɛ̄ hɛ. 47Mwin me ha a yin: Dalɔ mo a rɔda nɔng ɛ bɛrɛng pyɛ̂ nedanelɔ mɛ mwa. 48Ko ka sede yɛ a sé sam vwes, a rɔda ye e yey mɛ, ‘Kée! Dalɔ hom ê ros e de kwɛngɛl o.’ 49Ko yɛ ê hwo dak bwang besam o, ê hwo re, e sɔ tanga bemat de be sǎ e de sɔ zɔng. 50Dalɔ̂ sam o a rɔda ba to ɛ pút, ko sam o a rɔda ba tɔk jeng o wɛt. 51Ko dalɔ mɛ mo ê gas ɛ zang ba na a wey na yɛ, ko ê wuna hɛ na bemât nenu-neba. E hwomo, a rɔda tosho na a roros yìn.”

Currently Selected:

Matayus 24: bomBI

Highlight

Copy