Matayus 22
22
Gwɔrɔ-há e ra nzem weneng
(Luk 14:15-24)
1Yɛsu a to ha a bemat na negwɔrɔ-há, a ye, 2“Segwɔm Lagwi sa sé sede ngan: Gbɔng gwɔ̀m hwak á sɛ̀ de á yong pyɛ̂ nzem yaga wenêng hwey mɛ. 3Á tomo besam mɛ wɔ na bemat de bá kana rini hɛn nzem o, na be yila hɛn be vey, ko yɛn á simo be vey wɛt. 4A to tomo besam behak na há hemo vɔk na bemat de ba rini hɛn o wɔgɔ, ‘Ma ga yɛnɛ yong nzem weneng o: Ba ga yɛt bemus, na nèy berɔndɔng de ba gyenges nɛ na ne mɔsɔ naka, ko ba ga yɛnɛ yông kayɛ pyɛ a remo. Vey in e de weneng o!’ 5Ko bemat de ba rini hɛn o yɛn a ka tɛ̀ nehywɛ mɛn e ra há mo wɛt, ko yɛn a re nuyel na pyɛ́ de yɛn a sé ra mo zɔng: Hwak a kyè wɔ e cap mɛ, ko hwak a kyè vɔk e kwɔ̂n rɛsɛl pyɛ́ mɛ. 6Ko behak ba vos besam o, ba tak a yɛn reyɔm, ko ba mɔbɔs hɛn.
7“Gbɔng gwɔ̀m o a wok shom sizɔng. Yaga ano, a tomo bemât como mɛ, ba wɔ̀ mɔbɔs mwa bemat mɔbɔs bemat vane mo, ko ba dak kya e ra repomo mɛn. 8E bama mo, a yâng besam mɛ, ‘Ba ga yɛnɛ yông pyɛ̂ nzem o, ko bemat de ma rini hɛn weneng o ba jam wɛt. 9A remo kwong, ci in vɔk e begbɔng begwong, na yin a yila mwa bemat de yin a tɔk sɛ̀.’ 10Besam o ba nusu, yɛn a raa begwong, ko yɛn a tula mwa bemat de ba tɔk sɛ̀, berat mwa na beves, ko duk nzem o wa sila na bemat pyak.
11“Ko jeng de gbɔng gwɔ̀m o a yel e duk nzem o, na a di bemat de ba sé e hwomo, a di mwat hwak de a tɛ̀ berugu de bà jam yaga weneng o wɛt. 12A hwo rangal hɛ, a ye, ‘À sá, yi e rɛ̌ de hwà yel e ngamo sana berugu de ba jam yaga weneng o arɛt?’ Ko mwat o a tɔk toyo na há hak wɛt. 13Yaga ano, gbɔng gwɔ̀m o a yâng bemât fwom mɛ, ‘Rɔgɔs hin mwat womo, vɔ na bol mɛ, ko gang in hɛ e jey e ji lwīl, e kwɔn de a rɔda tosho na a roros yìn.’ ”
14Ko Yɛsu a yɛnɛ há mo, a ye, “A sé e bemat pyak de ba rini vɛ, ko a sé e tyɔng zɔng de ba kasa hɛn.”
Rángal e ra talâ dyâm vwel
(Mar 12:13-17; Luk 20:20-26)
15E bama mo, BeFarisi ba kyè, ba wɔ̀ yong gwong na be sɛ̀ Yɛsu na há hak de ha sé tyɛng wɛt. 16Yɛn a tomo behak e ji bemât raa mɛn na bemât raà Herodes wɔ na yɛ, ko yɛn a hwo yang ɛ, “À Mwat Basa, wot a tɔk, hwà sé mwat de hwó ha tsak há. Hwó basa a bemat pyɛ de ya sé tsak o e ra gwong de Dagwi e simo be raa gwɛ. Vit a pyɛ de ye bɔrɔk hwo na barê mwat hwak, yaga bemât mwa ba sé tyɛng e nuyel mō. 17Hā a wot pyɛ de hwó bare. E di mō, Badu mot ba simo a wot na wot a tala Da vwel BeRoma dyâm vwel kɛ wey arɛt?”
18Ko Yɛsu a pere tɔk yerê bare ves mɛn, a yang ɛn, “À yin bemât nenu-neba! Yaga sɛ́ de yin e simo na yin a tɛ̀ a me segun arɛt? 19Dura a me hin dyam de be talsa mɛ̀ dyâm vwel o.”
Yɛn a vey a yɛ na dyam o, 20ko a rangal hɛn, a ye, “E retô wà na rezâ wà de ba tɛ̀ e ra dyam o arɛt?”
21Yɛn a yang ɛ, “A sé rê Da vwel BeRoma.”
Ko Yɛsu a yang ɛn, “Yàa! Tala hin Da vwel BeRoma pyɛ de ya sé myɛ, ko tala hin Dagwi pyɛ de ya sé ye Dagwi.”
22Sede yɛn a wok ano, yɛn a langat hɛn, ko yɛn a hàla hɛ, yɛn a kyè.
Rángal e ra sensa bemat yi e reku
(Mar 12:18-27; Luk 20:27-40)
23E tuk hane mo gbak, BeSaduki behak ba vey na Yɛsu. Yɛn á vemo de be tē, vit a mwat de a rɔda to ba sene yi e reku. 24Yɛn a yang ɛ, “À Mwat Basa, Mose à kana ye, ka sede mwat a ku, ko a vɔk nèy wɛt, a sé gbing-gbing na gwa mɛ a vo kuma mo, na rɔ̌ be tɔs nèy, na be sɛ̀ mɛ̀ yerê lɔ mo. 25Hwà di a? Bemat behak bá sè betaama e neng mɛn, yɛn á kana sè na sangal e ngamo. Kunat o a vo hwā, ko a ku sana sɛ̀ nèy. Ano kwong, gwa mɛ a jut kuma mo. 26Yɛ mo arɔng a ku sana sɛ̀ nèy na hwā mo. Ko bwang begwa mo yi e wo netat wɔ e wo netaama mo pyɛ jining o ya té na yɛn. 27E yɛnɛ mo mwa, hwā mo arɔng a ku. 28Ko di, tuk sensa bemat, hwā mo a rɔda ba tɛ́ ɛ wo wà e ji yɛn betaama mo arɛt? Yaga mwa hɛn ba ga vɔk ɛ.”
29Yɛsu a yang ɛn, “Yin vɛ, yin a tɔk há tyɔng wɛt! A sé yaga yin e dunus Bwok-basa Dagwi tanga reto mɛ arɔng. 30Yaga jeng de bemat de ba ga kushu ba rɔda ba sensa yi e reku, yɛn e to ba vos beha wɛt, ko beha be to ba kyese neweneng arɔng wɛt. Yɛn a rɔda ba sè sede betom-lagwi. 31Ko e rà sensa bemat yi e reku — yin á kana basa pyɛ de Dagwi à kana ha a yin wɛt arɛt? À ye, 32‘Me ma sé Dagwî Abraham, na wo Yishak, na wo Yakɔp.’ Hane ha dura, yɛ a sé Dagwî bavin wɛt, ko a sé Dagwî bemat de ba sé na neken, mwa ano de yɛn a ga kushu.”
33Sede bagyɛng bemat ba wok há mɛ mo, yɛn a langat hɛn pyɛ de a basa a yɛn.
Redu de ra dal bwang o
(Mar 12:28-34; Luk 10:25-28)
34E bama de BeFarisi ba di, Yɛsu a ga dal BeSaduki na há, yɛn a wɔ̀ tula hɛn. 35Hwak e ji mɛn de a sé mwât basâ Badu a simo na a tɛ̀ a Yɛsu segun; yaga ano, a rangal hɛ, a ye, 36“À Mwat Basa, e rɛ̌ redu de ra dal bwang o mwa na nerey e ji Badu arɛt?”
37Yɛsu a yang ɛ, “ ‘Tɛ̀ yey na Darwey mō na yey mō mwa, na neken mō mwa, na tɔ́k mō mwa arɔng.’ 38Redu rê mɛsɛng a remo, ko e rɛ de ra dal bwang o mwa na nerey. 39Redu re neba rerey o ra sé sede rɛ: ‘Tɛ̀ yey na mwât vwara mō, sede hwà tɛ̀ yey na tó mo.’ 40Mwa Badu de bà kana nɔ̂ng Mose, tanga bása hê bezarap Dagwi ba sé e ra badu baba vemo.”
Mwat de Dagwi a kasa na a sey bemat
(Mar 12:35-37; Luk 20:41-44)
41Jeng de BeFarisi ba tula hɛn e dem hining, Yɛsu a rangal hɛn, a ye, 42“Yin e bare sɛ́ e ra Mwat de Dagwi a kasa na a sey bemat arɛt? Yɛ a sé hwêy wà arɛt?”
Yɛn a yang ɛ, “A sé hwêy Davit.”
43Yɛsu a to rangal hɛn, a ye, “Yi e rɛ̌ de Gabik Jɛrɛ hà tɛ̀ Davit o à tang ɛ, à Darwey arɛt? Yaga Davit à ye,
44“ ‘Dagwi Darwey a yâng Darwey hom:
Sangal e ngamo e vwɔ yege hom,
sɛ̌ ma tɛ̀ bemât repugu mō e nɛ̂n bol mō.’
45“Sede remo de Davit pyɛ mɛ a tâng Mwat de Dagwi a kasa na a sey bemat, à Darwey, yi e rɛ̌ kwong de mwat o ê sè hwêy Davit o arɛt?”
46Vit a mwat e ji mɛn de a tɔk toyo a Yɛsu na há hak. Ko yi e tuk hane, vit a mwat de a vɔk yey ting na a to rangal hɛ pyɛ cak.
Currently Selected:
Matayus 22: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
