Matayus 21

Yel Yɛsu e Yɛrusalɛm ha vey na yey-pyɛng

(Mar 11:1-11; Luk 19:28-40; Yoh 12:12-19)

1Jeng de yɛn a vey bagat na Yɛrusalɛm, ba pom e kerepomô Bet-Fage de ka sé e vwâ Raku Pàt. Yɛsu a hwo tomo bemât masâ fwom mɛ beba, 2a yang ɛn, “Kyè in vɔk e ji kerepomo kane e nuyel min. Sede yin a pom e hwomo, remo-remo, yin a rɔda di madung e rɔgɔs na hwêy wɛ e hagât wɛ. Viri hin vɛ, na yin a vey a me mɛ̀. 3Ka sede mwat hwak a rangal hin pyɛ cak, ko yang in hɛ, ‘Darwey e simo vɛ’, ko yɛ ê tomo na vɛ ziri.”

4Hemo ha té, yaga na be bin sila mɛ̀ pyɛ de zarap Dagwi à kana ha wɔgɔ,

5“Yang in repomô Siyɔn,

‘Di, gbɔng gwɔ̀m mō a sé kyè vey na hwo!

A dyɛng to mɛ, ko a sé laga madung,

a sé laga hwêy madung.’ ”

6Bemât masâ fwom mɛ ba wɔ̀ ra pyɛ de Yɛsu á kana misang hɛn. 7Yɛn a vey na madung o na hwêy wɛ, yɛn a paa pyɛ̂ banga mɛn, ba tɛ̀sɛ yɛ̄ e ra mâ bemadung o, ko Yɛsu a laga. 8Bemat pyak vit a yere mo ba lasha pyɛ̂ banga mɛn e gwong, ko behak ba kwɔrɔs berang yi e batîn cɔ́gɔt, ko ba lasha vɛ e ra gwong o. 9Bagyɛng bemat de ba sé kyè e nuyêl Yɛsu tanga vemo de ba sé raa hɛ e bama ba hwo gbɔ, ba tē, “Hosana! Bē somo Hwêy Davit! Tik na Dagwi a tɛ̀ nerat e ra womo de e kyè vey e ji rezâ Darwey! Bē somo Dagwi!”

10Jeng de Yɛsu a yel e Yɛrusalɛm, nehywɛ mwa bemât gbɔng repomo mo na sogo, ko ba hwo rangsal, “E wà a womo arɛt?”

11Bagyɛng bemat o ba yang ɛn, “Womo a sé Yɛsu, zarap Dagwi, de a sé yi e Nazarɛt e ji sevwêl Galili.”

Yɛsu e Gbɔng Duk Re Fongol

(Mar 11:15-19; Luk 19:45-48; Yoh 2:13-22)

12Yɛsu a wɔ̀ yel e nelalâ Gbɔng Duk Re Fongol, ko a ro mwa bemât rɛsɛl pyɛ́ tanga vemo de ba sé seres yɛ̄ yi e hwomo. A gangas betebut bemât segsâ dyām, na necɔgɔ̂t sangsâl bemat de ba sé rɛsɛl bebɔp. 13A yang ɛn, “Bà jɛk e Bwok-basa Dagwi wɔgɔ, Dagwi a ye, ‘Ba rɔda tâng lɔ hom, à duk won.’ Ko yin, yin a sé tɛ̀ hɛ he tɛ́ ɛ fwarâ begbik!”

14Bebók na bemat nà bol ba vey na yɛ e Gbɔng Duk Re Fongol o, ko a tɛ̀sɛ hɛn tyang. 15Ko jeng de begbɔng bepiris tanga bemât basâ Badu ba di pyɛ̂ bes de a ra, ko ba to di nèy de na gbɔ e Gbɔng Duk o wɔgɔ, “Bē somo Hwêy Davit!” Yɛn a tɛ̀ shom.

16Yaga ano, yɛn a rangâl Yɛsu, “Hwà wok pyɛ́ de nèy nemo na sé tē arɛt?”

Yɛsu a yang ɛn, “Ey, ma wok. Yin a ga sang basa há hemo e Bwok-basa Dagwi wɛt arɛt? Há ma het: ‘Hwà tɛ̀ nèy tanga nèy-vɔ ne somo hwo naka.’ ”

17Ko a hàla hɛn, a nusu yi e repomo mo vɔk e Bet-Anya, ko a wɔ̀ pɔl ɛ̀.

Yɛsu na retîn regwi

(Mar 11:12-14, 20-24)

18E nusû hwol bop nagasi, sede a sé to ɛ vɔk e ji repomo, ko Yɛsu a wok vyong. 19A di retîn regwi e vwarâ gwong, a wɔ́ bagat na rɛ, ko a sɛ̀ pyɛ cak wɛt sɛ̌ berang zɔng. Ko a yâng rɛ, “Hwo to ba tɔs nèy wɛt neshey gbak-gbak!” Remo-remo, retîn cɔgɔt o ra hworok.

20Jeng de bemât masâ fwom mɛ ba di ano, yɛn a langat hɛn, ko yɛn a rangal hɛ, “Yi e rɛ̌ de retîn regwi o ra pe hworok ziri ano arɛt?”

21Yɛsu a toyo a yɛn, a yang ɛn, “Mwin me ha a yin: Ka sede yin a tɛ̀ gap min e ra Dagwi, na yin a tó yey wɛt, ko yin a rɔda tɔk ra pyɛ de ma ra a retîn regwi remo zɔng wɛt, ko yin ê tɔk yâng raku womo, ‘Sogo, na hwo wɔ̀ gaba e ji gworep’, ko pyɛ mo ya rɔda té. 22Ka sede yin a tɛ̀ gap min e ra Dagwi, ko yin a rɔda sɛ̀ kayɛ pyɛ de yin a lolo yɛ e ji won o.”

Rángal e ra yerê rêto Yɛsu

(Mar 11:27-33; Luk 20:1-8)

23Yɛsu a to yel e nelalâ Gbɔng Duk Re Fongol. Jeng de a sé basa a bemat, begbɔng bepiris tanga bemakuk ba hwo vey na yɛ, ba rangal hɛ, ba ye, “E rɛ̌ reto de hwà vɔk de hwó ra mɛ̀ pyɛ́ yemo arɛt? E wà de a nɔng o reto remo mo arɛt?”

24Yɛsu a hanat, a yang ɛn, “Mê rangal hin pyɛ cak arɔng. Ka sede yin a ha a me, ma rɔda ha a yin yerê reto de ma vɔk na me ra mɛ̀ pyɛ́ yemo. 25Yohana á sɛ̀ retô râ batisma yi e gwa arɛt? Á sɛ̀ rɛ yi na Dagwi a? Kɛ yi na bemat arɛt?”

Yɛn a hwo tó cuna na bemɛn, “Sɛ̌ wot ye ala arɛt? Ka sede wot a ye, ‘Rà yi na Dagwi’, a rɔda yang ot, ‘Yaga sɛ́ de yin a sey tsak o na há mɛ wɛt arɛt?’ 26Ko ka sede wot a ye, ‘Rà yi na bemat’, wot e tele hot pyɛ de bemat ba rɔda ra — yaga yɛn mwa ba jut Yohana, a sé zarap Dagwi.” 27Yaga ano, yɛn a yâng Yɛsu, “Wot a tɔk wɛt.”

Ko Yɛsu a yang ɛn, “Me arɔng mê ha a yin wɛt kɛ na e rɛ̌ reto de me ra mɛ̀ pyɛ́ yemo.”

Gwɔrɔ-há e ra nèy neba

28“Yin a di e rɛ̌ arɛt? Mwat hwak á sɛ̀ de a vɔk nèy neba. A wɔ́ na kunat o, a yang ɛ, ‘À hwey hom, ci wɔ̀ ra fwom e bwî anap yunung.’ 29Hwey o ha yang ɛ, ‘Wey, mê wɔ wɛt!’ Ko e bama mo, ha sege yêy hɛ, ko ha wɔ̂ fwom o. 30Da mo a wɔ́ na hwey o het, ko a ha a hɛ tyɛng ano arɔng. Ha yang ɛ, ‘Ey, mê wɔ, à da’, ko ha de wɔ́ wɛt. 31E ji nèy o, e hɛ̌ de ha ra pyɛ de da mɛn a simo arɛt?”

Yɛn a ye, “Kunat o.”

Ko Yɛsu a yang ɛn, “Mwin me ha a yin: Bemât seres dyâm yeles na pyɛ́ tanga bedebeves yɛn a rɔda tānga ba yel e ji Segwɔm Dagwi e ra yin. 32Yaga Yohana wo batisma á kana vey, na a dura a yin gwong de Dagwi e simo na yin a raa gwɛ, ko yin a sey tsak o na há mɛ wɛt, ko bemât seres dyâm yeles na pyɛ́ na bedebeves yɛn á kana sey tsak o na há mɛ mo. Ko mwa ano de yin a di pyɛ mo, yin a doyo yi e banɛn min na yin a sey tsak o na há mɛ wɛt.”

Gwɔrɔ-há e ra bemât bɛrɛng bwi

(Mar 12:1-12; Luk 20:9-19)

33“Gwɔrɔ-há mo hak a hemo: Mwat hwak á sɛ̀ de a how bwi, ko a tus ɛ̀ cɔ́gɔt anap. A ta gwɛ naka, a cing kwɔ̂n farâng nèy anap, ko a to lɔk kwɔn hak de mwat ê wɔ̀ sangal ɛ̀ na a bɛrɛng bwi mo. E bama mo, a tik gwɛ e vɔ bemat behak na be bɛrɛng a yɛ gwɛ, ko a kyè vɔk e sevwel sehak. 34Sede jeng vêl nèy cɔ́gɔt o ya vey, a tomo besam mɛ vɔk na bemât bɛrɛng bwi mo, na be wɔ̀ sey a yɛ numo mɛ e ji pyɛ́ de ya ga vel. 35Ko bemat o ba vo besam mɛ, ba dak gwining, ba mɔrɔ hwak, ko ba tó hwak na beta na be mɔrɔ hɛ. 36Dâ bwi mo a to tomo besam o behak de ba dal vê mɛsɛng o na nepyak. Ko bemât bɛrɛng bwi mo yɛn a to ra a yɛn tyɛng na vere mo. 37E yɛnɛ mo, a tomo hwey mɛ vɔk na yɛn, a ye, ‘Yɛn a rɔda nɔ̂ng hwey hom nerey.’ 38Ko jeng de bemât bɛrɛng bwi mo ba di hwey o, ba yâng bemɛn, ‘Hwey de he ba re nedanelɔ mɛ ma hemo! Vey in, na wot a mɔrɔ hɛ, na wot a sɛ̀ pyɛ̂ nedanelɔ mɛ!’ 39Yɛn a vo hɛ, ba bomo hɛ e jey yi e bwi mo, ko yɛn a mɔrɔ hɛ.

40“Ano kwong, jeng de dâ bwi mo ê vɛ̄ hɛ, a rɔda ra sɛ́ na bemât bɛrɛng bwi mo arɛt?”

41Yɛn a yang ɛ, “A rɔda mɔbɔs bemat beves vane mo mɔbɔs ves, ko a rɔda to tik bwî anap o e vɔ bemât bɛrɛng o behak, vemo de bê nɔng ɛ numo mɛ hê nèy cɔ́gɔt o e jeng de na ga vel.”

42Yɛsu a to yang ɛn, “Yin a ga sang basa há de bà jɛk e ji Bwok-basa Dagwi wɛt arɛt? Hā ye,

“ ‘Gwofwa de bemât lɔk duk ba kyɛ́ ɛn gwɛ wɔgɔ, gwa vɔk fwom wɛt,

e gwɛ de gwa tɛ́ ɛ gbɔng gwofwa râ fwom.

A sé e Darwey de a ra ano,

ko na wot, a sé pyɛ langat sizɔng!’

43“Yaga ano, ma sé ha a yin, yin a sé vê Segwɔm Dagwi, ko Dagwi a rɔda sey ɛ̀ reto min o yi na yin, na a nɔ̂ng bemat behak de ba rɔda ra tomong de ba sé tyɛng na pyɛ́ de Dagwi e simo. 44Mwat de e gaba e ra gwofwa gwomo a rɔda cɛgɛt rebek mɛ e ra gwɛ; ko ka sede gwofwa mo gwa gaba e ra yɛ, gwa rɔda hwongo hɛ sede nemuk.”

45Sede begbɔng bepiris tanga BeFarisi ba wok gwɔrɔ-há detidetu de Yɛsu a ha, yɛn a pere tɔk, a sé ha e ra yɛn. 46Yɛn a jāma begwong na be tɛ̀ be vo ɛ. Ko yɛn a wok bengyip bagyɛng bemat, yaga bemat o ba jut Yɛsu, a sé zarap Dagwi.

Currently Selected:

Matayus 21: bomBI

Highlight

Copy