Matayus 20
20
Há e ra bemât fwom e bwî anap
1“Segwɔm Lagwi sa sé sede ngan: Dâ bwi hwak á sɛ̀ de á nusu bop nagasi, na a wɔ̀ jāma bemât fwôm dyām na be vey ra a yɛ fwom e bwî anap mɛ. 2Jeng de a sɛ̀ bemat o, yɛn a yong ɛ̀ e ra pyɛ de bê tala hɛn, yɛ̀ à dyam pyɛng jining tuk hining, ko a tomo hɛn na be wɔ̀ ra fwom o e bwi mɛ mo. 3Sede dyâm-gwi shatyat ya vey, a to nusu wɔ e bajang, ko a di bemat behak e hwomo de ba sé kyě kyè zɔng, vit a fwôm ra mo. 4A yang ɛn, ‘Yin arɔng, ci wɔ̀ ra in fwom e bwî anap hom; ma rɔda tala hin pyɛ de ya sé tyɛng.’ 5Yɛn a simo, ko yɛn a kyè. A to nusu e tê-gwi tanga e dyām tyat nahywegelek, ko a ra tyɛng ano. 6Sede dyām tyungun ya vey, a nusu gbak, a to wɔ́ e bajang o ko a di bemat behak de ba sé tumal zɔng. A rangal hɛn, ‘Yaga sɛ́ de yin a sé tumal e ngamo ngan, yin a bomo gwi e de râ pyɛ wɛt arɛt?’ 7Yɛn a toyo a yɛ, ‘Vit a mwat de a ba jut ot e fwom.’ A yang ɛn, ‘Yin arɔng, ci wɔ̀ ra in fwom e bwî anap hom.’
8“Jeng de gwi gwa gaba, dâ bwî anap o a yâng mwât nuyêl bemât fwom mɛ, ‘Yila bemat de ba ra fwom e ji bwi mo, na hwo tala hɛn byɛ mɛn. Tānga pɛrɛ na vemo de bá gà jut ɛn e fwom e tala mo, na hwo kyè mɛ̀ vɔk e vê susu mo.’ 9Bemat de ba hwo fwom dyām tyungun nahywegelek zɔng ba vey, ko ba tala hɛn dyam pyɛng jining. 10Ano kwong, vemo de bá ga tānga jut ɛn nagasi ba pom, ko yɛn a bare, ba rɔda tala hɛn pyɛ de ya dal ye bemɛn. Ko ba talâ kawɛ e ji mɛn dyam pyɛng jining arɔng. 11Sede yɛn a sey dyām o, yɛn a hwo gwɔrɔng a dâ bwi mo. 12Yɛn a ye, ‘Di, bemat vemo de hwà jut ɛn e fwom e yɛnɛ mo yɛn a ra fwom dyam-gwi jining zɔng, ko hwà tɛ̀ ɛn tyɛng na wot, wot vemo de wot a jut nedirîk fwom o, ko wot a to sɔ nepêp gwi de gwa ta yunung o!’
13“Ko dâ bwi mo a toyo a hwak e ji mɛn, a yang ɛ, ‘À sa hom, ma mɔt o wɛt. Hwá ga simo na hwo ra fwom o e nû dyam pyɛng jining wɛt arɛt? 14Jut dyam fwom mō, na hwo kyè! Ma simo na me talâ mwat de ma jut ɛ e fwom e yɛnɛ mo tyɛng pyɛ de ma nɔng o. 15Ma vɔk reto na me ra pyɛ de me simo na dyām hom wɛt arɛt? Kɛ hwó ra repugu bemin, yaga ma viri vwɔ na yɛn arɛt?’ ”
16Ko Yɛsu a yɛnɛ há mo, a ye, “Yaga ano, vemo de ba sé vê bama a remo ba rɔda ba tɛ́ ɛn vê yel, ko vemo de ba sé vê yel a remo ba rɔda ba tɛ́ ɛn vê bama.”
Hê tat a hemo de Yɛsu a ha e ra reku mɛ
(Mar 10:32-34; Luk 18:31-34)
17Sede Yɛsu á sè kyè vɔk e Yɛrusalɛm, a jut bemât masâ fwom mɛ kuru na vɛ beba e hagat, yɛn e de kwɛngɛl o, ko a yang ɛn, 18“Wok in, wot a sé kyè vɔk e Yɛrusalɛm, e kwɔn de ba rɔda nára Me de ma tɛ́ me mwat e vɔ begbɔng bepiris tanga bemât basâ Badu. Yɛn a rɔda ra a me shɔt reku; 19e bama mo, yɛn a rɔda nára me e vɔ bemat beduk, na be shɛgɛsh me, na be dak me na zining arɔng, ko yɛn a rɔda kak me e ra cɔ́gɔt. Ko e tuk hê tat, ba rɔda sene me yi e reku.”
Won de nêng nèy Zɛbɛdayus a ra
(Mar 10:35-45; Luk 22:24-27)
20E bama mo, nêng nèy Zɛbɛdayus a vey na Yɛsu, yɛ tanga nèy mɛ. A gaba e nuyel mɛ, ko a jāma na Yɛsu a ra a yɛ pyɛ cak.
21Yɛsu a rangal hɛ, a ye, “E sɛ́ de hwó simo arɛt?”
Hwā mo a yang ɛ, “Simo a me na hak e ji nèy hom nemo he sangal e vwɔ yege mō, ko hak e vwɔ mwɛlɛng mō jeng de hwó ba sangal e ra gwofwa negwɔm mō.”
22Ko Yɛsu a yang ɛn, “Yin a tɔk pyɛ de yin a sé ra wôn yɛ wɛt. Yin e ba tɔk sɔ keshi reyɔm de me ba sɔ arɛt?”
Yɛn a yang ɛ, “Ey, wot ê tɔk sɔ.”
23Yɛsu a yang ɛn, “Mwin, yin a rɔda sɔ keshi reyɔm de ma rɔda sɔ. Ko me, ma vɔk reto na me kasa bemat de bê sangal e vwɔ yege na mwɛlɛng hom wɛt. A sé e Da hom de e ba nɔng nekwɔn o vɔk na vemo de a ga kana yong nɛ yaga yɛn.”
24Sede bwang bemât masâ fwom kuru ba wok ano, yɛn a tɛ̀ shom e ra begwa beba vane mo. 25Ko Yɛsu a yila hɛn mwa hɛn, a yang ɛn, “Yin a tɔk bemat de ba ga tɛ̀ ɛn, na be sè begwɔ̀m e ra yére dyuk be re negwɔm e ra bemat mɛn na retek, ko bemakuk mɛn ba vɔk reto e ra yɛn arɔng. 26Ko ê sè ano na yin wɛt. Ka sede mwat hwak e ji min e simo na a tɛ́ ɛ gbɔng o, gbing-gbing na a sè mwât fwom min. 27Ko ka sede mwat hwak e ji min e simo na a sè wo yel, gbing-gbing na a sè sam min, 28tyɛng sede remo de Me de ma tɛ́ me mwat ma vey na be ba ra a me fwom wɛt. Ko ma vey, na me ra fwom, na me nɔng neken hom, na me vibis mɛ̀ bemat pyak.”
Yɛsu a wunta bayîs bebók beba
(Mar 10:46-52; Luk 18:35-43)
29Sede Yɛsu na bemât masâ fwom mɛ bá sè tik Yeriko, gbɔng regyɛng bemat ra raa hɛ. 30Bebók beba bá sè e sangal e vwarâ gwong. Jeng de yɛn a wok, Yɛsu a sé kwey, yɛn a hwo gbɔ, ba ye, “À Da, à Hwêy Davit, tosho reyɔm mot!”
31Regyɛng bemat o ra gyong ɛn, ko ra yang ɛn, be sǎ yuu. Ko yɛn a gwɛ̌ ye ngyat, ba ye, “À Da, à Hwêy Davit, tosho reyɔm mot!”
32Yɛsu a tumal, ko a yila hɛn, a rangal hɛn, a ye, “Yin e simo na me ra a yin sɛ́ arɛt?”
33Yɛn a yang ɛ, “À Da, wot e simo na wot a to bɛrɛng jey.”
34Yɛsu a wok nemwishish mɛn, ko a ra bayis mɛn. E ji jeng o, yɛn a hwo bɛrɛng jey, ko yɛn a raa hɛ.
Currently Selected:
Matayus 20: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
