Matayus 18

E wɛ̌ de a dal na nerey ɛ?

(Mar 9:33-37; Luk 9:46-48)

1E jeng yane mo, bemât masâ fwôm Yɛsu ba vey na yɛ, ba rangal hɛ, “E wɛ̌ de a dal na nerey e Segwɔm Lagwi arɛt?”

2Yɛsu a yila hwey hak, a tɛ̀ hɛ he tumal e nuyel mɛn, 3ko a yang ɛn, “Mwin me ha a yin: Sɛ̌ yin a sege negwɔn min na yin a tɛ́ in sede nèy, ko yin ê sang yel e Segwɔm Lagwi wɛt. 4Kawɛ mwat de a dyɛng to mɛ na a sè sede hwey hemo, e yɛ wɛ de a dal na nerey e Segwɔm Lagwi. 5Kawɛ mwat de a sey hwey sede hemo e ji reza hom, a sé e me de yɛ a sey.”

Pyɛ́ de ye tɛ̀ mwat a ra banɛn

(Mar 9:42-48; Luk 17:1-2)

6“Ka sede mwat hwak a tɛ̀ hining e ji nèy nemo de na tɛ̀ gap mɛn e ra me, he tik nà tɛ̀ gâp hɛ e ra me, ê dal a yɛ ka ba rɔgɔs gbɔng gwofwa hwongo e fwɔ mɛ, na be bomo hɛ mɛ̀ pyɔp e ji gworep de gwa sé ciwil. 7Gawey e ra jey yemo, yaga pyɛ́ ya sé de ye tɛ̀sɛ bemat be tik nà tɛ̀ gap mɛn e ra Dagwi! Yerê pyɛ́ yane yê re nuyel na té, ko gawey e ra mwat de e tɛ̀ pyɛ́ mo ye té!

8“Ka sede e vwɔ mō kɛ bwol mō de gwo tɛ̀sɛ hwo, hwò ra banɛn, kpɔktɔ gwɛ na hwo bomo gwɛ! A dal naka hwo yel e kwɔ̂n neken gbak-gbak na vwɔ gwining kɛ bwol gwining, de hwô vɔk vɔ mō na bol mō mwa vɛ, na be bomo hwo e ji kya de he re gbak-gbak. 9Ko ka sede e reyis mō de re tɛ̀sɛ hwo na hwo ra banɛn, pat rɛ, na hwo bomo rɛ! A dal naka hwo yel e kwɔ̂n neken gbak-gbak na reyis rining, de hwô vɔk bayis mō baba, na be bomo hwo e kwɔ̂n kya.”

Gwɔrɔ-hâ tyimit de ya vuru hɛ

(Luk 15:3-7)

10“Tē in naka, yin byɛs hining e ji nèy nemo wɛt. Yaga ma sé ha a yin, betom-lagwi mɛn ba sé e nuyêl Da hom e ji lagwi kayɛ jeng. [ 11Yaga Me de ma tɛ́ me mwat ma vey na me sey bemat de ba ga vusa hɛn.]

12“Yin ê ye ala? Ka sede mwat a vɔk tyīmit naga, ko jining e ji yɛ̄ ya vuru hɛ, e sɛ́ de ê ra arɛt? Ê hàla bwang yemo de ya sé kuru shabatat na yɛ shatyat (99) e de rê sehwey e vwarâ raku, na a wɔ̀ jāma yane de ya vuru hɛ mo. 13Ka sede a sɛ̀ yɛ, mwin me ha a yin, a rɔda vɔk yey pyɛng e ra yɛ, a dal mɛ̀ yane de ya sé kuru shabatat na yɛ shatyat de ya vuru hɛ wɛt. 14Ano arɔng, Da min de a sé e ji lagwi e simo na hak e ji nèy nemo he vuru hɛ wɛt.”

Gwà de a ra renɛn

(Luk 17:3b)

15“Ka sede gwa mō a ra a hwo renɛn, ko wɔ na yɛ na hwo dura a yɛ renɛn mɛ; yin beba nju min zɔng. Ka sede a wok há mō, ko hemo he dura hwà ga toyo na yɛ à wane. 16Ko ka sede a wok há mō wɛt, to wɔ́, na hwo vɔk ɛ̀ mwat gwining kɛ beba ayi, yaga na kahɛ há de ba ha e hwomo be sɛ̀ bemât nuha tɛk beba kɛ betat, sede remo de bà kana jɛk e ji Bwok-basa Dagwi. 17Ka sede a kyɛ́ ɛ nà wok há mɛn, wɔ na há mo na ekilisiya. Ko ka sede a kyɛ́ ɛ nà wok hâ ekilisiya mo mwa arɔng, teshe hin na yɛ, tyɛng sede yin e teshe na mwat de a tɔk Dagwi wɛt kɛ mwât seres dyâm yeles na pyɛ́ ayi.”

Pyɛ de ba yang yɛ ‘wey’ na yemo de ba yang yɛ ‘ey’

18“Mwin me ha a yin: Pyɛ de yin ê ye wey a yɛ e ngamo e jey, Dagwi ê ye wey a yɛ arɔng. Ko pyɛ de yin ê ye ey a yɛ e ngamo e jey, Dagwi ê ye ey a yɛ arɔng.

19“Ko me to gwɛ̌ ha a yin: Ka sede beba e ji min e ngamo e jey ba wuna nu e ra pyɛ cak de yin a ra wôn yɛ, ko Da hom de a sé e ji lagwi a rɔda ra a yin yɛ. 20Yaga e kwɔn de bemat beba kɛ betat ba tula hɛn ɛ̀ e ji reza hom, ma sé e hwomo e tē mɛn.”

Gwɔrɔ-hâ mwat nà toshô reyɔm

(Luk 17:4)

21E bama mo, Bitrus a vey na Yɛsu, ko a rangal hɛ, a ye, “À Darwey, ka sede gwa hom a dopse ra a me banɛn, ko mê hàla a yɛ zang ala arɛt? Zang taama a?”

22Yɛsu a yang ɛ, “Wey, a sé zang taama wɛt, ko a sé kuru bataama (70) zang taama.#18:22 kuru bataama zang taama: kɛ: kuru bataama na vɛ betaama (77). 23Yaga Segwɔm Lagwi sa sé sede ngan: Gbɔng gwɔ̀m hwak á sɛ̀ womo de a simo na a basa yas mɛ de ya sé e vɔ bemât fwom mɛ. 24Jeng de a hwo basa mo, ba vey a yɛ na mwat hwak de gbɔng gwɔ̀m o e rangal hɛ betalen gu kuru (10,000).#18:24 talen: Ya sé dyâm fwôm mwat yê neshey kuru na nɛ netungun (15). 25Ko mwat o a vɔk pyɛ cak de ê tala mɛ̀ pyɛ de be rangal hɛ mo wɛt. Yaga ano, dalɔ mɛ mo a nɔng nu na be wɔ̀ row ɛ, yɛ na hwā mɛ, na nèy mɛ, tanga mwa pyɛ́ de a vɔk, na be tala mɛ̀ redu mo. 26Ko mwât fwom o a gaba e cat bol mɛ, a ra won na yɛ, a ye, ‘Gabɔk wɛt, niri na me, ko ma rɔda tala hwo kayɛ pyɛ de hwó rangal me!’ 27Dalɔ mɛ mo a wok nemwishish mɛ, a hàla a yɛ redu mo, ko a tik ɛ, a kyè.

28“Ko jeng de mwât fwom o a nusu, a sé kyè, a sɛ̀ hwak e ji besâ fwom mɛ de yɛ e rangal hɛ dyâm fwom yê tuk naga. A kaba hɛ, a hwo tá a yɛ ngyɔt, a ye, ‘Tala me pyɛ de me rangal hwo!’ 29Sâ fwom mɛ mo a gaba e nuyel mɛ, a ra won na yɛ, a ye, ‘Gabɔk wɛt, niri na me, ko ma rɔda tala hwo pyɛ de hwó rangal me!’ 30Ko a kyɛ́ ɛ, a wɔ̀ tɛ̀ sa mɛ mo e lɔ̂ ngyang, sɛ̌ a tɔk tala redu mɛ.

31“Sede bwang bemât fwôm lɔ gwɔ̀m o ba di pyɛ de ya ga té, yɛn a lashe yey mɛn sizɔng, yɛn a wɔ́ na gbɔng gwɔ̀m o, ko yɛn a misang a yɛ mwa pyɛ de ya ga té mo. 32Yaga ano, dalɔ mo a yila mwât fwom mɛ wane de a ra pyɛ yane mo, a yang ɛ, ‘À hwo mwât fwom vwes! Ma hàla a hwo mwa pyɛ́ de me rangal hwo, yaga hwà ra won na me. 33A yâng jam, ka hwà yâng tosho reyɔ̂m sâ fwom mō, tyɛng sede remo de ma tosho reyɔm mō arɔng.’ 34Gwɔ̀m o a wok shom sizɔng, ko a nára hɛ e vɔ bemât gyeng lɔ̂ ngyang na be tak a yɛ reyɔm sɛ̌ bama de a ba tala kayɛ pyɛ de be rangal hɛ.

35“Gwong a gwomo de Da hom e ji lagwi a rɔda teshe na kawɛ e ji min, ka sede yin a hàla a gwa min na yey rining wɛt.”

Currently Selected:

Matayus 18: bomBI

Highlight

Copy