Luka 8
8
Beha de ba kyè tanga Yɛsu
1A ga mâk ros wɛt, ko Yɛsu a kyě kyè e bapomo tanga bemajey, na a shara Yɛgɛt Yat wɔgɔ, Dagwi a rɔda re negwɔm e ra jey. Bemât masâ fwom mɛ kuru na vɛ beba ba sé tanga yɛ. 2Beha behak arɔng ba kyè tanga yɛ, vemo de á kana paa cēng yi e ji mɛn, ko á kana tɛ̀sɛ hɛn tyang yi e nerɔ mɛn arɔng. Yɛn vɛ, à Marya wo Magdala, de bá kana paa cēng tyaama yi e ji mɛ, 3na Yowana hwâ Kuza de á sè gbɔng mwât fwôm Herodes, na Susana, tanga bwang beha mo pyak de ba sɛlsɛ Yɛsu na bemât masâ fwom mɛ yi na pyɛ̂ vɔ mɛn.
Gwɔrɔ-hâ mwât berê yére
(Mat 13:1-9; Mar 4:1-9)
4Bemat bá sè vɛ̀sɛ na Yɛsu yi e bapomo detidetu; ko jeng de gbɔng regyɛng bemat ra ga tula hɛ, Yɛsu a hwo ha a yɛn gwɔrɔ-há hemo, a yang ɛn:
5“Mwat hwak a nusu na a wɔ̀ bere yére. Jeng de a sé bere yére mo, cak ya gaba e tê gwong, ko bemat ba bɔrɔs yɛ̄, ko benon ba tɔng yɛ̄. 6Cak ya gaba e kwɔ̂n kusha, ko jeng de ya vungu, ya hworok, yaga nefongôl kwɔn o na sé yɔkyɔk wɛt. 7Cak ya gaba e kwɔ̂n serɔgɔ, ko rɔgɔ mo ha ras mwa tanga yɛ̄, ko ha vo yɛ̄. 8Cak arɔng ya gaba e ji nefongol nerat. Ya ras, ya tɛ̀ yéneng, ko ba sɛ̀ pyɛ́ de ba bere zang naga (100).”
E yɛnɛ mo, Yɛsu a ha na gbɔng fwɔ, a ye, “Mwat de a vɔk betong, tik na yɛ a wok!”
Retîn gwɔrɔ-há mo
(Mat 13:10-17; Mar 4:10-12)
9Ko bemât masâ fwôm Yɛsu ba hwo rangal hɛ pyɛ de gwɔrɔ-há mo ha ha. 10Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Dagwi. Ko bwang bemat yɛn e wokos pyɛ́ mo yi e gwɔrɔ-há, yaga na yɛn a bɛrɛng, ko yɛn ê di wɛt, yɛn ê wok, ko yɛn ê tɔk wɛt.”
Yɛsu a nɔng cap gwɔrɔ-há mo
(Mat 13:18-23; Mar 4:13-20)
11Yɛsu a to yang ɛn, “Gwɔrɔ-há mo ha kwey ngan: Yére mo ya sé rehâ Dagwi. 12Yére de ya gaba e ra gwong ya sé sede bemat de be wok rɛ. Ko gwɔ̀m cēng e vey, ko e hashe reha mo yi e neyey mɛn, yaga na yɛn a kwon sey tsak o, na be sey neken mɛn wɛt. 13Yére de ya gaba e ra kusha ya sé sede bemat de be wok reha mo, ko be sey rɛ na yey pyɛng. Reha mo re tɛ̀ berinis wɛt, yɛn e sey tsak o jeng tyɔng zɔng, ko e jeng setɔgɔs yɛn e to ɛn na bama. 14Yére yemo arɔng de ya gaba e ji serɔgɔ ya sé sede bemat de be wok reha mo, ko hywɛ-hywɛ bɔrɔ̂k pyɛ̂ jey, na netâ yas, tanga raà netâ pyɛ̂ jey yemo ne sila neyey mɛn, ne vo reha mo, ko be sɛ̀ pyɛ cak yi na yɛn wɛt. 15Ko yére de ba bere e ji nefongol nerat kwong ya sé sede bemat de be wok reha mo, yɛn a vɔk rɛ naka na yey rining, be gyenges rɛ, ko yɛn e niri, sɛ̌ ba sɛ̀ pyɛ ryat yi na yɛn.”
Kywa-kya de ba ye gup na kwɛt
(Mar 4:21-25)
16“Vit a mwat de e tɛ̀ kya e kywa-kya, na a ye gup a wɛ na kwɛt, kɛ na a tik wɛ e nɛ̂n gwat. Ê jāma kwɔn de ha sé garang, na a tik ɛ̀ wɛ, yaga na bemat de be yel e duk be bɛrɛng negbey o. 17Vit a pyɛ de ba ga kana lɛrɛ, de ba rɔda ba nusu na yɛ e jey wɛshɛrɛk wɛt; ko vit a pyɛ de ba ga kana bang, de ba rɔda tik nà tɔk yɛ na be to wunta yɛ dɛdɛrɛng wɛt.
18“Tē in naka kwong na gwong de yin e wokos há, yaga mwat de a vɔk pyɛ cak, ba rɔda to gwɛ̌ a yɛ. Ko yɛ womo de a vɔk pyɛ wɛt, ba rɔda sey ɛ̀ yi na yɛ kepyɛ de e bare, ka sé kemɛ.”
Nêng Yɛsu na begwa mɛ
(Mat 12:46-50; Mar 3:31-35)
19E jeng yane, nêng Yɛsu na begwa mɛ ba hwo vey na yɛ, ko yɛn a tɔk wɔ bagat na yɛ wɛt, yaga bemat ba kat. 20Bemat o ba yâng Yɛsu, “Di, neng mō na begwa mō ba sé e tumal e majey, yɛn e simo be di o.”
21Ko Yɛsu a hanat a yɛn mwa, a yang ɛn, “Di, neng hom na begwa hom à vemo de be wok rehâ Dagwi, na be ra fwom na rɛ.”
Yɛsu a tɛ̀ gwogul gwo tumal
(Mat 8:23-27; Mar 4:35-41)
22Tuhak, Yɛsu a yel e dwa-nshi tanga bemât masâ fwom mɛ, ko a yang ɛn, “Tik na wot a ye dɔ vɔk e gurâ gworep gworo.” Ko yɛn a kyè. 23Sede yɛn a sé e ji kwɛngɛl o, Yɛsu a vɛ̌ hwo nevwa. Ko gwogul gwa nusu, gwa pɛsɛl rep o na gap, dwa mo wa hwo sila na nshi, ko bwang o tyɔng yɛn a wey. 24Bemât masâ fwom o ba wɔ́ na Yɛsu, ba shina hɛ, ba yang ɛ, “À Da, à Da! Wot a sé kyè wɔ̀ ye pyɔp!”
Yɛsu a sogo, a gyong gwogul o tanga bagun nshi de ba ra yol, ko gwogul o gwa tumal, ko kwɔn o ha ye yuu. 25Ko a rangal hɛn, a ye, “Yaga sɛ́ de yin a tɛ̀ gap min e ra me wɛt arɛt?”
Yɛn a wok bengyip, ko yɛn a langat hɛn, ba hwo tâng bemɛn, “Kée! E wɛ̌ mwat a womo de a nɔ̂ng gwogul na nshi nu, ko be gyeng há mɛ arɛt?”
Yɛsu a tɛ̀ mwat de a vɔk cēng tyang
(Mat 8:28-34; Mar 5:1-20)
26Yɛn a kyè, sɛ̌ ba wɔ̀ wul yɛnɛ̂ sevwêl BeGerasa de sa sé e gura gworo gwô Gworep Galili. 27Sede Yɛsu a sé gyirik yi e dwa-nshi e rekwogom, ko mwat hwak wo repomo mo de a vɔk cēng e rato mɛ a man na yɛ. A ga ros vit a tɛ̀ berugu, ko a sangal e lɔ wɛt sɛ̌ e tara de be lɛsɛ ɛ̀ bavîn bemat. 28Sede a di Yɛsu, a pɛl sekun, ko a gaba e nuyel mɛ, a hwo gbɔ na gbɔng fwɔ, a ye, “À Yɛsu, Hwey Dagwi De A Dal Na Reto Mwa! Hwó simo sɛ́ na me arɛt? Ma sé ra won na hwo, hwo dura a me reyɔm wɛt!” 29A ha ano, yaga Yɛsu a ga kana nɔ̂ng ceng o nu, ye nusu yi e ji mɛ. Zang pyak ceng o yá kana hwosom hɛ, ko mwa ano de bá rɔgɔs vɔ mɛ tanga bol mɛ na ngyang, ko bá tɛ̀ bemat be bɛrɛng hɛ, á kwɔrɔs ngyang o, ko ceng o yá gangas hɛ a kyè vɔk e hey.
30Yɛsu a rangal hɛ, a ye, “Be tang o, à wà arɛt?”
Ko mwat o a toyo a yɛ, a ye, “Be tang me, à Pyak.” A ha ano, yaga cēng pyak ya ga kana yel e ji mɛ. 31Cēng o ya ra won na Yɛsu, yɛ̀ a kwon pat yɛ̄ vɔk e revɔng de ra vɔk yɛnɛ wɛt.
32Kwarâ bezà rwey o gwa losho hɛ bagat e hwomo, gwa sé re sehwey e vwâ raku. Ko cēng o ya ra won na Yɛsu, ka a tik yɛ̄ ye wɔ̀ yel e bezà mo, ko a tik yɛ̄. 33Cēng o ya nusu yi e ji mwat o, ko ya wɔ̀ yel e ji bezà mo. Kwara mo mwa gwa hwo tele cidirang e vwak, gwa wɔ̀ gaba e gworep, ko nshi mo na vo gwɛ.
34Sede bemât gyeng bezà mo ba di pyɛ de ya ga té, yɛn a jut setele, ko ba wɔ̀ shara há mo e ji repomo tanga bemajey arɔng. 35Bemat ba nusu, na be wɔ̀ di pyɛ de ya ga té. Yɛn a vey na Yɛsu, ko yɛn a sɛ̀ mwat de cēng yá kana nu ɛ yi e ji mɛ e sangal e cât bol Yɛsu. A ga bang ɛ na berugu, ko nehywɛ mɛ arɔng na ga to ɛn. Ko yɛn mwa ba wok bengyip. 36Vemo de bá kana di, yɛn a ha a bemat o gwong de Yɛsu a tɛ̀ mwat de a kana vɔk cēng tyang. 37Ko mwa bemat yi e yɛnɛ̂ sevwêl BeGerasa ba ra won na Yɛsu, na a hàla kwɔn mɛn, yaga yɛn a wok bengyip sizɔng. Ko Yɛsu a yel e dwa-nshi, na a to ɛ. 38Mwat de cēng ya nusu yi e ji mɛ a hwo ra won na yɛ, a ye, “Mê tɔk kyè tanga hwo arɛt?”
Ko Yɛsu a tɛ̀ ɛ e gwong, a yang ɛ, 39“Tō o vɔk e lɔ, na hwo wɔ̀ ha a bemat gbɔng pyɛ de Dagwi a ga ra a hwo.”
Mwat o a kyè, ko a hwo shara e ji repomô mwa rehâ gbɔng pyɛ de Yɛsu a ga ra a yɛ.
Hwông Yairus na hwā de a ra rugû Yɛsu
(Mat 9:18-26; Mar 5:21-43)
40Jeng de Yɛsu a to wɔ̀ wul gurâ gworep, regyɛng bemat ra sey ɛ, yaga yɛn mwa bá sè gyeng ɛ. 41Ko mwât nuyêl duk re fongol hwak de ba tang ɛ, à Yairus a hwo yi. A pom, a gaba e nuyêl Yɛsu, a ra won na yɛ, na a wɔ́ e lɔ mɛ, 42yaga hwóng mɛ a wane gwining de a vɔk, ko ê dal wɛt. Hwóng mɛ mo a vɔk neshey sede kuru na nɛ neba.
Sede Yɛsu a sé kyè, bemat ba ngyɔ hɛ e kawɛ bak. 43Ko hwā hwak á sè e hwomo de á sè tak reyɔm na serɔ̂ telê nemi neshey kuru na nɛ neba, [á wey na mwa pyɛ́ de a vɔk e nelɔ bevwoshon,] ko vit a hwak de á tɔk tɛ̀ ɛ tyang. 44Hwā mo a vey yi e bamâ Yɛsu, a ra nû gworugu mɛ, ko remo-remo, telê nemi mɛ mo ha tumal. 45Ko Yɛsu a rangal, a ye, “E wà de a ra me ɛ?”
Sede kawɛ mwat a tono, Bitrus a yang ɛ, “À Da, di bemât mwa ba gwɔrɔ hwo, ko yɛn a sé ngyɔ hwo!”
46Ko Yɛsu a ye, “Mwat hwak a ga ra me, yaga ma tɔk, ba ga ra fwom na reto hom de me ra mɛ̀ pyɛ̂ bes.” 47Jeng de hwā mo a di, a tɔk lɛrɛ tó mɛ wɛt, a wɔ́ na vôw rebek, ko a gaba e nuyêl Yɛsu. E hwomo e bayîs kawɛ mwat, a ha a yɛ pyɛ de ya tɛ̀, a ra ɛ, na gwong de a tɛ̀ tyang e ji jeng o. 48Yɛsu a yang ɛ, “À hwóng hom, ba ga tɛ̀ o tyang, yaga hwà tɛ̀ gap mō e ra me, mê tɔk tɛ̀ o tyang. Kyè tyang kala!”
49Jeng de Yɛsu a sé ha ano, mwat hwak a vey yi e lɔ Yairus, ko a yang ɛ, “Hwóng mo a ga tala hɛ; hwo ká hwo to nɔ̂ng Mwat Basa yɔ́m wɛt.”
50Sede Yɛsu a wok ano, a yâng Yairus, “Nemi ne gaba a hwo e yey wɛt! Tɛ̀ gap mō e ra Dagwi zɔng, ko hwóng mo ê to sè naka!”
51Jeng de a pom e lɔ mo, a tik na mwat hwak a yel wɛt sɛ̌ Bitrus, na Yohana, na Yakɔp, tanga da na nêng hwong o. 52Kawɛ mwat e hwomo a sé tosho na dâk sekun yaga rekû hwong o. Ko Yɛsu a yang ɛn, “Yin tosho wɛt! Hwōng o a ga ku wɛt, a sê nevwa zɔng!”
53Yɛn mwa ba hwo shɛgɛsh hɛ, yaga yɛn a tɔk, a ga ku. 54Ko Yɛsu a kaba hɛ na vwɔ, a yang ɛ, “Sogo, à hwong!” 55Neken mɛ na to ɛn, ko a pere sogo. Ko Yɛsu a ha a yɛn, yɛn a nɔng ɛ pyɛ́ na a re. 56Dâ hwong o na neng mɛ ba langat hɛn sizɔng, ko Yɛsu a nɔng ɛn nu, yɛn a ha a mwat hwak pyɛ de ya ga té wɛt.
Currently Selected:
Luka 8: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust