Luka 7
7
Yɛsu a tɛ̀ sam gbɔng mwat como tyang
(Mat 8:5-13; Yoh 4:46-53)
1Jeng de Yɛsu a tala ha a bemat pyɛ́ yemo mwa, a kyè vɔk e Kafarnahum. 2E hwomo, gbɔng o wo bemât como a vɔk sam de yɛ a nɔng ɛ nerey. Sam o a ro ɛ sede ê ku. 3Jeng de gbɔng o mo a wok rehâ Yɛsu, a hwo tomo bemakûk BeYuda behak na yɛ, na be wɔ̀ yang ɛ, yɛ a vey na a ba tɛ̀ sam mɛ tyang. 4Sede yɛn a pom na Yɛsu, yɛn a dak a yɛ gabɔk sizɔng, ba ye, “Gwɔ̀m o a sé mwat de a sé naka na hwo sɛlɛ hɛ, 5yaga yɛ a tɛ̀ yey na bemat mot, ko yɛ wɛ de a lɔk a wot duk re fongol.”
6Yɛsu a hwo kyè tanga yɛn. Ko jeng de a wɔ́ bagat na lɔ mo, gbɔng o mo a tomo besa mɛ, na be wɔ̀ ha a yɛ wɔgɔ, “À Da, hwo kwon di reyɔ̂m vey e ngamo wɛt, yaga ma ka vey na hwo yel e ji lɔ hom wɛt. 7Yaga ano, ma di ma radɛ me, na me vey na hwo pyɛ hom. Hwo hanat zɔng, ko mwât fwom hom a rɔda tɛ̀ tyang. 8Me pyɛ hom ma sé e nɛ̂n gbɔng mwat mot, ko me arɔng ma vɔk bemât como e nɛn hom. Me yâng womo, ‘Kyè!’ ko e kyè; me yâng woro, ‘Vey!’ ko e vey; ko me yâng sam hom, ‘Rá pyɛ yemo!’ ko e ra yɛ.”
9Sede Yɛsu a wok há mɛ mo, a langat hɛ, ko a doyo vɔk na regyɛng bemat de re raa hɛ, a yang ɛn, “Ma sé ha a yin, ma ga ka di mwat hwak e ji BeIsrayɛl de a tɛ̀ gap mɛ e ra me e gwong gwomo sede mwat womo wɛt!”
10Jeng de bemat de ba tomo hɛn o ba toyo vɔk e lɔ mo, ko yɛn a sɛ̀ sam o, a ga tɛ̀ tyang.
Yɛsu a sene hwêy kuma yi e reku
11A ga mak ros wɛt, ko Yɛsu a kyè vɔk e repomo de be tâng rɛ, à Nayin, ko bemât masâ fwom mɛ na regyɛng bemat pyak ba kyè tanga yɛ. 12Jeng de a vey bagat na ruhûp repomo mo, ba sé nusu na revîn mwat. Mwat o á sè nju mɛ e neng mɛ, ko neng mɛ mo á sè kuma; ko gbɔng regyɛng bemat yi e repomo mo ra sè tanga yɛ. 13Jeng de Darwey a di kuma mo, a wok nemwishish mɛ, a yang ɛ, “Hwo tosho wɛt.” 14A hwo kyè wɔ bagat, a ra kpap o, ko bemat de ba jut wɛ ba tumal. Ko Yɛsu a ye, “À wen! Ma yang o, sogo!” 15Mwat de á kana ku mo a sangal cik, a hwo ha, ko Yɛsu a to nɔ̂ng neng mɛ hɛ.
16Bengyip ba vo kawɛ mwat e ji mɛn, ko yɛn a nɔ̂ng Dagwi nerey, ba ye, “Gbɔng zarap Dagwi a ga nusu e ji mot!” Ko ba to ye, “Dagwi a ga vey sɛlɛ bemat mɛ!”
17Há de ba ha e ra Yɛsu ha shara hɛ e mwa sevwêl Yudiya na yɛnɛ̂ sevwêl mwa de sa gwɔrɔ sɛ.
Yohana a tomo bemat na Yɛsu
(Mat 11:2-6)
18Yohana arɔng a wok pyɛ́ yemo mwa yi na bemât masâ fwom mɛ, ko a hwo yila beba e ji mɛn; 19a tomo hɛn vɔk na Darwey na be wɔ̀ rangal hɛ, “E hwo wɛ, à mwat de ba ha, e kyè vey, kɛ wot e gyeng mwat o hwak arɛt?”
20Jeng de bemat o ba wɔ́ na Yɛsu, yɛn a yang ɛ, “Yohana wo batisma a tomo hot vey na hwo, na wot a ba rangal, e hwo wɛ, à mwat de ba ha, e kyè vey, kɛ wot e gyeng mwat o hwak arɛt?”
21E jeng o, Yɛsu á sè tɛ̀sɛ bemat pyak tyang, vemo de ba tak reyɔm mwa na vemo de ba vɔk nezap nerɔ detidetu, tanga vemo de ba vɔk cēng. A to tɛ̀ bebók pyak be bɛrɛng jey arɔng. 22Ko a toyo a bemat de Yohana a tomo hɛn, a yang ɛn, “Tō in vɔk na Yohana, na yin a wɔ̀ ha a yɛ pyɛ́ de yin a ga di na yēmo de yin a ga wok wɔgɔ: Bebók be tɔk bɛrɛng jey, ko bemat nà bol be tɔk kyè; ba sé tɛ̀ bekparong tyang, ko bekpey be tɔk wok há; ba sé sensa vemo de ba ga kushu, ko ba sé basa a bepɛng Yɛgɛt Yat. 23Wo yey pyɛng a womo de a ye bugurɛk yaga me wɛt!”
Yɛsu a ha e ra Yohana wo batisma
(Mat 11:7-19)
24Bama de bemat de Yohana a tomo hɛn ba ga kyè wɛrɛn, Yɛsu a hwo ha na bagyɛng bemat e ra Yohana mo, a ye, “Sɛ́ de yin á simo yin a di jeng de yin á wɔ́ na Yohana e tê hey ɛ? Yin á wɔ̀ di gwohwěy de gul gwo pɛsɛl gwɛ a? 25Ko e sɛ́ kwong de yin á wɔ̀ di arɛt? E mwat de a tɔrɔ hɛ na yɔ̀m yat a? Wey, vemo de be tɔrɔ hɛn ano ba ga sɛ̀ sangâl neta, ko be sɛsɛm hɛn e nelɔ begbɔng begwɔ̀m! 26Há a me hin, e sɛ́ de yin á wɔ̀ di arɛt? Yin á wɔ̀ di zarap Dagwi a? Ey mwin, me ha a yin, yin á di mwat de a dal zarap Dagwi. 27Yohana wɛ, à mwat o de bà jɛk e ra yɛ e Bwok-basa Dagwi wɔgɔ,
“ ‘Di, tom hom à womo; ma sé tomo hɛ e nuyel mō,
na a yong gwong yaga hwo.’
28“Ma sé ha a yin, vit a mwat hwak de ba tɔ ɛ e jey yemo de a dal Yohana na nerey. Ko mwa ano, mwat de a dal na nesɛl mwa e ji Segwɔm Dagwi a dal ɛ na nerey.”
29Jeng de yɛn a wok há hemo, bemât mwa tanga bemât serês dyâm yeles na pyɛ́ yɛn a ye ey, Dagwi e gas badu e tē. Yɛn a ha ano, yaga yɛn á kana simo na Yohana a tɛ̀ a yɛn batisma. 30Ko BeFarisi tanga bemât basâ Badu ba kyɛ́ ɛn nà ra pyɛ́ de Dagwi e simo be ra, yaga yɛn á kana simo na Yohana a tɛ̀ a yɛn batisma wɛt.
31Ko Yɛsu a to ye, “Ma rɔda tyɛngrɛ bemât jeng yemo na sɛ́ arɛt? Yɛn a sé tyɛng na sɛ́ ɛ? 32Yɛn a sé tyɛng na nèy de na sé sangal e bajang, ko ne yila bemɛn, ne tē,
“ ‘Wot a pɛsɛl a yin jū, ko yin a rɛ̌ wɛt;
wot a ra lɛlɛ sin, ko yin a tosho wɛt.’
33“Di, Yohana wo batisma a ga vey, a tik rê pyɛ́, ko a to tik sɔ̂ nshî anap, ko yin e tē, ‘A vɔk ceng!’ 34Ko di, Me de ma tɛ́ me mwat ma vey, ma sé re na sɔ, ko yin e tē, ‘Di, mwât serwéy na mwât sefeng de a sé sâ bemât serês dyâm yeles na pyɛ́ tanga bemât negwɔn neves!’ 35Bemat de ba sey netsitsɛ̂ng Dagwi be dura, netsitsɛng o na sé mwin.”
Yɛsu e lɔ Simɔn WoFarisi
36WoFarisi hwak a rini Yɛsu na a wɔ̀ re pyɛ́ tanga yɛ. Yɛsu a yel e ji lɔ mo, ko a sangal na a re pyɛ́. 37Hwā hwak á sè e ji repomo mo womo de a ragas pyɛ́ vyes. Sede a wok, Yɛsu a sé re pyɛ́ e lɔ WoFarisi mo, a hwo wɔ na kefus de ba yong na gwofwa alabasta, de ka sila na něy nesang hyɔɔlɔl. 38A tumal e bamâ Yɛsu bagat na bol mɛ, a tosho, ko nemwishil mɛ na tɔngɔt e ra bol Yɛsu. Ano, a yishing nɛ na setôt rato mɛ, a man bebɛrɛ̂k nu mɛ na bol mɛ, ko a shushu něy nesang hyɔɔlɔl nane mo e ra vɛ. 39Jeng de WoFarisi de a rini hɛ pyɛ́ e lɔ mɛ a di ano, a hwo bare e yey mɛ, “Ka sede mwat womo a yâng sè zarap Dagwi, ka ê tɔk yerê hwā womo de a sé ragas hɛ tanga yerê negwɔn mɛ, yaga a sé hwâ banɛn.”
40Ko Yɛsu a hanat, a yang ɛ, “À Simɔn, ma vɔk pyɛ cak de mê ha a hwo.”
Simɔn a yang ɛ, “Ey, à Mwat Basa, hā a me.”
41Yɛsu a hwo ha a yɛ, a ye, “Bemat behak beba ba wɔ̀ hwɔp dyām na darwey hwak; gwining a hwɔp dyām pyɛng naga betungun (500), ko wo neba mo a hwɔp yɛ kuru batungun (50). 42Sede yɛn a to tɔk tala hɛ dyām o wɛt, ko darwey o a hàla a yɛn yɛ̄ e nɔrɔ. Hā a me, e wɛ e ji mɛn de ê dal na tɛ̂ yey na darwey o arɛt?”
43Simɔn a yang ɛ, “E di hom, womo de a hàla a yɛ dyām de ya dal.”
Ko Yɛsu a ye, “Há mo ha sé tyɛng.” 44A doyo vɔk na hwā mo, ko a yâng Simɔn, “Hwà di hwā womo a? Ma vey e lɔ mō, ko hwà ka nɔng me nshi, na me kus mɛ̀ bol hom wɛt, ko hwā womo a sing bol hom na nemwishil mɛ, a to yishing vɛ na setôt rato mɛ arɔng. 45Hwà to man ranang mō na me na hwo dura, hwà sey me wɛt, ko hwā womo a ga tik manas bebɛrɛ̂k nu mɛ na bol hom yimo de ma vey wɛt. 46Hwà shushu něy e rato hom wɛt, ko yɛ a ga shusha něy nesang hyɔɔlɔl e bol hom. 47Yaga ano, ma sé ha a hwo, gbɔng tɛ̂ yey mɛ ha dura, ba ga hàla a yɛ banɛn mɛ pyak. Ko mwat de ba hàla a yɛ banɛn mɛ hyet, yɛ arɔng e dura tɛ̂ yey hyet zɔng.”
48Ko Yɛsu a yâng hwā mo, “Ba ga hàla a hwo banɛn mō.”
49Bwang bemat de ba sé e sangal e dem rê pyɛ́ ba hwo ha na bemɛn, “E wɛ̌ mwat a womo de e tɔk hàla banɛn arɛt?”
50Ko Yɛsu a to yâng hwā mo, “Ba ga sey o, yaga hwà tɛ̀ gap mō e ra me wɔgɔ, mê tɔk sey o. Kyè tyang kala!”
Currently Selected:
Luka 7: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
