Luka 6

Rángal e ra Tuk Shábat

(Mat 12:1-8; Mar 2:23-28)

1Tuk Shábat hak, Yɛsu á sè kwey e ji hwirî alkama, ko bemat masâ fwom mɛ ba hwo kwɔrɔs batô alkama mo, ba tanang vɛ e vɔ, ba re yéneng o. 2Ko BeFarisi behak ba hwo ye, “Yaga sɛ́ de yin a sé ra pyɛ de Badu mot ba ro mɛ̀ na be ra Tuk Shábat arɛt?”

3Yɛsu a toyo a yɛn, a yang ɛn, “Yin a ga basa pyɛ de Gbɔng Gwɔ̀m Davit à kana ra jeng de yɛ tanga bemat mɛ yɛn à wok vyong wɛt arɛt? 4À yel e duk Dagwi, à jut kpam-tuk de bà nása e nuyêl Dagwi, à re, ko à to gas a bemat de bà sè tanga yɛ, mwa ano de Badu mot ba ro mwat hwak nà re wɛ sɛ̌ bepiris zɔng.”

5E yɛnɛ mo, Yɛsu a yang ɛn, “Me de ma tɛ́ me mwat ma vɔk reto e ra Tuk Shábat.”

Mwat de vwɔ mɛ gwa gyɔt

(Mat 12:9-14; Mar 3:1-6)

6Tuk Shábat o hak gbak, Yɛsu a wɔ̀ yel e duk re fongol, ko a basa a bemat. Mwat hwak á sè e hwomo de vwɔ yege mɛ gwa gyɔt. 7Bemât basâ Badu tanga BeFarisi ba simo na be sɛ̀ pyɛ cak e ra Yɛsu, na be wɔ̂ sekun mɛ. Yaga ano, yɛn a bɛrɛng hɛ naka na be di, kɛ gyeng ê tɛ̀ ɛ tyang Tuk Shábat. 8Ko Yɛsu a tɔk báre mɛn, a yâng mwat de vwɔ mɛ gwa gyɔt, “Sogo, na hwo tumal e tē.” Ko mwat o a sogo, a wɔ̀ tumal e hwomo. 9Ano Yɛsu a yang ɛn, “Ma sé rangal hin: Badu mot ba simo a wot na wot a ra sɛ́ e Tuk Shábat arɛt? Wot a ra pyɛ ryat kɛ pyɛ vyes arɛt? Wot a sey nekên mwat, kɛ wot a wey na nɛ arɛt?” 10A gwɔrɔ na bayis mɛ, na a bɛrɛng hɛn mwa, ko a yâng mwat o, “Nára vwɔ mō!” A nára gwɛ, ko gwa tɛ́ ɛ gyat.

11Yɛn a tɛ̀ shom sizɔng, ko ba hwo tɔrɔng na bemɛn e ra pyɛ de bê ra a Yɛsu.

Yɛsu a kasa betom kuru na vɛ beba

(Mat 10:1-4; Mar 3:13-19)

12E ji nepɔlɔ nane, Yɛsu a wɔ̀ tut e raku na a ra won; e hwomo a pɔ̂l sè ha na Dagwi e ji won. 13Jeng de gasi ha ye gbey, a yishi bemât masâ fwom mɛ na be vey na yɛ, ko e ji mɛn a kasa bemat kuru na vɛ beba, ko a vo a yɛn rezâ Betom. 14Bemat a vemo ngan: Simɔn, de Yɛsu a tang ɛ, à Bitrus, tanga gwa mɛ Andarawus, na Yakɔp, na Yohana, na Filip, na Bartɔlɔmayus, 15na Matayus, na Tomas, na Yakɔp Alfayus, na Simɔn, de ba tang ɛ, à Zelotes wɔgɔ, mwat de a sé e yong ɛ na a dul sevwel mɛ, 16na Yuda Yakɔp, tanga Yuda Iskaryot, de a tɛ́ ɛ mwât rôw Yɛsu.

Yɛsu a basa, ko a tɛ̀sɛ bemat tyang arɔng

(Mat 4:23-25; Mar 3:7-12)

17Yɛsu tanga betom mɛ mo ba gyirik yi e raku mo, ko yɛn a wɔ̀ tumal e kwɔn de ha sé tyɛl. Bemat de ba sé raa Yɛsu pyak ba ga tula hɛn e hwomo tanga gbɔng regyɛng bemat yi e mwa sevwêl Yudiya, na yi e gbɔng repomô Yɛrusalɛm, na yi e bapomô Tur na Sidɔn de ba sé e rekwogôm gworep. Yɛn a vey na be ba wok basa mɛ, na be to tɛ̀sɛ hɛn tyang yi e nezap nerɔ mɛn. 18Ko vemo de cēng ya tak a yɛn reyɔm ba vey, ko ba tɛ̀ ɛn tyang arɔng. 19Bemât mwa ba tē ngyɛ́k na be ra ɛ, yaga reto mɛ de e ra mɛ̀ pyɛ̂ bes ra yi na yɛ, ko ra tɛ̀sɛ hɛn mwa tyang.

Basa e ra yey pyɛng na gawey

(Mat 5:1-12)

20Yɛsu a yâng rato mɛ garang, a bɛrɛng bemât masâ fwom mɛ, ko a hwo ye,

“Yin a sé vê yey pyɛng, à yin bepɛng,

yaga yin a sé nèy vwel ne Segwɔm Dagwi!

21Yin a sé vê yey pyɛng, à yin de yin a sé wok vyong a remo,

yaga yin a rɔda sirik!

Yin a sé vê yey pyɛng, à yin de yin a sé tosho a remo,

yaga yin a rɔda shɛgɛsh!

22“Yin a sé vê yey pyɛng jeng de bemat be bɛɛ hin ves, ko be kyini hin, ko be dùsa hin, ko be tɛ̀ baza min ba sé beves, yaga yin e raa Me de ma tɛ́ me mwat! 23Vɔk in yey pyɛng jeng de pyɛ́ yane ya té, na yin a gyilsit na yey pyɛng, yaga pyɔlɔ min ya rɔda ba sè pyak e lagwi! Bedabeda mɛn kwong bà ra a bezarap Dagwi tyɛng ano arɔng.

24“Yaa kukuuk! Gawey e ra yin de yin a sé bedaberey a remo,

yaga yin a ga kana sɛ̀ neta min!

25Gawey e ra yin de yin a sirik a remo,

yaga yin a rɔda sangal na vyong!

Gawey e ra yin de yin e shɛgɛsh a remo,

yaga yin a rɔda vɔk lashê yey,

ko yin a rɔda tosho arɔng!

26“Gawey e ra yin jeng de bemât mwa be ha há rat e ra yin, yaga bedabeda mɛn bà ha tyɛng ano e ra bezarap Dagwi vê bɔs.”

Bása Yɛsu e ra tɛ̂ yey na vê repugu

(Mat 5:38-48; 7:12a)

27“Ko ma sé ha a yin de yin a sé wokos me wɔgɔ: Tɛ̀ in yey na bemât repugu min, rá in a vemo de be bɛɛ hin ves pyɛ́ ryat, 28tɛ̀ in nerat e ra vemo de be wuna hin na gwi, ko rá in won yaga vemo de be tē na yin naka wɛt. 29Ka sede mwat hwak a fala hwo e rwanang gwomo, ko doyo a yɛ gwot na a to fala arɔng. Ka sede mwat hwak a jut pyɛ banga mō, ko hwo ro na rugu e yɛ wɛt. 30Nɔ̂ng kawɛ mwat pyɛ de a vey won na hwo, ko ka sede mwat hwak a jut pyɛ mō cak, hwo to yang ɛ a nɔng o yɛ wɛt. 31Rá in a bemat tyɛng pyɛ de yin e simo yɛn a ra a yin arɔng.

32“Ka sede yin e tɛ̀ yey zɔng na bemat de be tɛ̀ yey na yin, ko nerat o nɛ a sɛ́ na yin arɛt? Yaga bemât banɛn arɔng be tɛ̀ yey na vemo de be tɛ̀ yey na yɛn! 33Ko ka sede yin e ra pyɛ́ ryat vɔk na vemo zɔng de be ra a yin pyɛ́ ryat, nerat o nɛ a sɛ́ na yin arɛt? Yaga bemât banɛn arɔng be ra ano! 34Ko ka sede yin e hwɔpɔs a vemo zɔng de yin e bare, bê to tala hin, ko nerat o nɛ a sɛ́ na yin arɛt? Yaga bemât banɛn arɔng be hwɔpɔs a bemɛn, na be to tala tyɛng ano! 35A kwon sè ano wɛt! Tɛ̀ in yey na bemât repugu min, rá in a yɛn pyɛ́ ryat, ko hwɔpɔs hin a yɛn sana bare, yin ê to sɛ̀ pyɛ cak. Ano kwong, pyɔlɔ min ya rɔda ba sè pyak, ko yin a rɔda ba sè nèy Dagwi De A Dal Na Reto Mwa, yaga yɛ e ra a bemat de be feng wɛt tanga vemo de ba sé beves pyɛ́ ryat. 36Tosho hin reyɔ̂m bemat, tyɛng sede remo de Da min e tosho reyɔ̂m bemat arɔng.”

Bása Yɛsu e ra râ shɔt

(Mat 7:1-5)

37“Yin kwon ra a bemat shɔt wɛt, ko Dagwi a rɔda ba ra a yin yɛ arɔng wɛt. Yin gang mwat na shɔt wɛt, ko Dagwi a rɔda ba gang in na yɛ arɔng wɛt. Hàla hin a bemat banɛn mɛn, ko Dagwi a rɔda ba hàla a yin bemin arɔng. 38Nɔngɔs hîn bemat nɔrɔ, ko Dagwi a rɔda nɔng in arɔng. Ba rɔda masa a yin na shǐ de ba sila hɛ, hemo de ba ga dugut hɛ, na be ngyɔ pyɛ́ de ya sé e ji mo, na ye sila zoo, na ye lusha hɛ, ko ba rɔda shusha yɛ̄ e ji dap min. Yaga shǐ de yin e masa a bemat mɛ̀ e hɛ de Dagwi a rɔda to ba masa a yin mɛ̀ arɔng.”

39Ko Yɛsu a hwo ha a yɛn gwɔrɔ-há hemo, a yang ɛn, “Bwók a rɔda tɔk hwɔlɔ a bwók vwɔ arɛt? Ka sede a ra ano, ko mwa hɛn ba rɔda gaba e ji revɔng! 40Mwat de be masa a yɛ pyɛ a dal mwat de e basa a yɛ wɛt; ko kawɛ mwat a rɔda sè tyɛng sede mwât basa mɛ jeng de a tala masâ fwom o.

41“Yaga sɛ́ de hwó di keshugu e yîs gwa mō, ko hwó tɛ̀ tong na bak cɔgɔt de wa sé e yis mō wɛt arɛt? 42Kɛ e rɛ̌ de hwô tɔk yâng gwa mō, ‘Gabɔk, à gwa, tik na me pat a hwo keshugu de ka sé e yis mō’, ko hwo kwong, hwô tɔk di bak cɔgɔt de wa sé e yis mō wɛt arɛt? À hwo mwât nenu-neba! Tānga pat bak cɔgɔt de wa sé e yis mō e ngyen, ko e bama mo, hwô tɔk di kyɛrɛng, na hwo pat keshugu de ka sé e yîs gwa mō.”

Be tɔk cɔgɔt yi e nèy de ye tɔs

(Mat 7:16-20; 12:33-35)

43“Cɔgɔt ryat ye tɔs nèy neves wɛt; ano arɔng, cɔgɔt vyes ye tɔs nèy nerat wɛt. 44Yaga be tɔk kayɛ cɔgɔt yi e nèy de ye tɔs: Be vos nèy regwi e ra serɔgɔ kɛ nèy anap e ra jaal arɔng wɛt. 45Mwat rwat e ra pyɛ́ ryat yi e pyɛ́ ryat de ya sé e ji yey mɛ; ko mwat vwes e ra pyɛ́ vyes yi e pyɛ́ vyes de ya sé e ji yey mɛ arɔng. Yaga e pyɛ́ de ya ga sila yêy mwat de ye nunus yi e nu mɛ.”

Lɔ e ra gbondong na lɔ e ra bazɛk

(Mat 7:21, 24-27)

46“Yaga sɛ́ de yin e tang me, ‘À Darwey, à Darwey’, ko yin e kyɛ́ in nà ra pyɛ de me ha a yin arɛt? 47Kawɛ mwat de e vey na me, na a wet betong na neha hom, na a gyeng nɛ — ma rɔda dura a yin yerê mwat de yɛ a sé: 48Yɛ a sé sede mwât lɔk de a cing tîn lɔ mo ciwil, ko a hwo tɛ̀ retis o e ra gbondong. Jeng de rwak wa hwo rop, ko tɛmɛ-nshi na pom, na tɛ́s lɔ mo, ko na tɔk gang hɛ wɛt, yaga bá kana lɔk hɛ naka. 49Ko mwat de e wet betong na neha hom wɛt, na a gyeng nɛ wɛt a sé sede mwat de a lɔk lɔ mɛ pàk e vwel sana tɛ̀ retis. Jeng de tɛmɛ-nshi na pom, na tɛ́s lɔ mo, ko remo-remo, ha vɛ̌ gaba. Hm! Lɔ hane ha gaba gaba ves!”

Currently Selected:

Luka 6: bomBI

Highlight

Copy