Luka 15

Gwɔrɔ-hâ tyimit de ya vuru hɛ

(Mat 18:12-14)

1E jeng cak, pyak e ji bemât serês dyâm yeles na pyɛ́ tanga bemât negwɔn neves behak ba vey wok neha de Yɛsu a ha. 2Ko BeFarisi tanga bemât basâ Badu ba hwo gwɔrɔng, ba tē, “Mwat womo e wunsa hɛ na bemât negwɔn neves, ko e to re pyɛ́ na yɛn arɔng.” 3Yɛsu a wok neha mɛn o, ko a ha a yɛn gwɔrɔ-há hemo:

4“Ka sede hwak e ji min a vɔk tyīmit naga, ko jining e ji yɛ̄ ya vuru hɛ, e sɛ́ de mwat o ê ra arɛt? Ê hàla bwang yēmo de ya sé kuru shabatat na yɛ shatyat (99) e dem gyeng yɛ̄, na a wɔ̀ jāma yane de ya vuru hɛ mo, sɛ̌ a sɛ̀ yɛ e ngyen. 5Jeng de a sɛ̀ yɛ̀, yey mɛ yê pɛngɛ, ko ê jut yɛ, ê tɛ̀ e ra sanat mɛ, 6ko ê kyè na yɛ vɔk e lɔ. Jeng de a wul lɔ, ê yila besa mɛ tanga bemât vwara mɛ, ê yang ɛn, ‘Vɔk in yey pyɛng tanga me, yaga ma ga sɛ̀ tyimit hom de yá kana vuru hɛ!’ 7Ano arɔng, ma sé ha a yin, ka sede mwât banɛn gwining a doyo yi e banɛn mɛ, vemo de ba sé e lagwi ba rɔda vɔk yey pyɛng de ya dal yemo de yɛn ê vɔk e ra bemat kuru shabatat na vɛ shabetat de ba sé berat, vemo de be jāma be doyo yi e banɛn mɛn wɛt.”

Gwɔrɔ-hâ dyam pyɛng de ya vuru hɛ

8Yɛsu a to yang ɛn, “Ka sede hwā hwak a vɔk dyām pyɛng kuru#15:8 dyām pyɛng kuru: Ya sé dyâm fwôm mwat yê tuk kuru., ko a vuru jining e ji mo, e sɛ́ de ê ra arɛt? Ê tɛ̀ kya e kywa-kya na a yishing lɔ mo, na a jāma yɛ̀ hywɛ, sɛ̌ a sɛ̀ yɛ e ngyen. 9Jeng de a sɛ̀ yɛ, ê yila behywi mɛ tanga bemât vwara mɛ, ê yang ɛn, ‘Vɔk in yey pyɛng tanga me, yaga ma ga sɛ̀ dyam hom de yá kana vuru hɛ!’ 10Ano arɔng, ma sé ha a yin, betom-lagwi ba rɔda vɔk yey pyɛng e ra mwât banɛn gwining de a doyo yi e banɛn mɛ.”

Gwɔrɔ-hâ hwey de ha vuru hɛ

11Yɛsu a re nuyel, a yang ɛn, “Mwat hwak á sɛ̀ de a vɔk nèy neba bewen o. 12Swɛl o a hwo yâng da mɛ, ‘À da, nɔng me numo nang hê pyɛ̂ nedanelɔ mō.’ Ko da mo a gas a yɛn pyɛ́ mɛ mo. 13E bamâ jeng tyɔng, hwey sɛl o mo ha tula pyɛ̂ mwa de ha vɔk, ko ha sogo mɛ̀. Ha kyè vɔk e sevwel sehak yikyik, ko e hwomo, ha wey na yas hɛ mo e ra begwông sangal beves. 14Bama de ha ga wey na kayɛ pyɛ, vyong vyes ya hwo e yɛnɛ̂ sevwel sane mo, ko hwey o ha hwo jāma pyɛ́ zii. 15Ko ha kyè he wɔ̀ jāma fwom na mwât sevwel sane mo hwak. Mwat o a gang hɛ vɔk e hey mɛ e de gyeng bezà. 16Yaga vyong ya vo hɛ ding-ding, ha masa yis na he sila jîm hɛ na bebôk pyɛ́ de bezà mo be re, ko mwat hwak a nɔ̂ng hɛ pyɛ wɛt. 17Ko jeng de nehywɛ hɛ na toyo a hɛ, ha ye, ‘Kée, bemât fwôm da hom be re pyɛ́ be tɛrɛs ɛ̀ bwang o, ko me a womo, vyong ya sé kyè wɔ̀ mɔrɔ me! 18Ma rɔda sogo, na me to me vɔk na da hom, na me yang ɛ: À da, ma ga ra a Dagwi tanga hwo banɛn. 19Ma to me vey na be yang me, à hwey mō wɛt; tɛ̀ me sede hwak e ji bemat de be ra a hwo fwom.’ 20Ko ha sogo, ha kyè vɔk na dâ hɛ.

“Ko jeng de ha sé rɔngɔl yikyik, dâ hɛ a di hɛ, ko a wok nemwishish hɛ. A tele vɔk na hwey mɛ mo, a kula hɛ e ragey, ko a man ranang na hɛ, na a dura a hɛ tɛ̂ yey mɛ. 21Hwey o ha yang ɛ, ‘À da, ma ga ra a Dagwi tanga hwo banɛn. Ma to me vey na be yang me, à hwey mō wɛt.’ 22Ko da mo a yâng besam mɛ, ‘Kyè in ziri! Vey in na gworugu de gwa dal mwa na nerat na yin a tɛ̀ a hɛ gwɛ. Tɛ̀ in yɔbɔ e kwɛn vwɔ̂ hɛ, na bekpatak e bol hɛ. 23Vey in na hwêy rɔndɔng de bá gyenges hɛ na he mɔsɔ, na yin a yɛrɛ hɛ. Tik na wot a re pyɛ́, na wot a ra jɔgɔ̂ yey pyɛng! 24Yaga hwey hom hemo há kana ku, ko ha to sé ken a remo; há kana vuru hɛ, ko ba ga to sɛ̀ hɛ.’ Ko yɛn a hwo ra jɔgɔ mo.

25“E jeng yane, hwey kinat há sè e hwiri. Jeng de ha sé kyè vɛ̄ hɛ, ha vey bagat na lɔ, ko ha wok bemat be ra lwɛ̄lɛ, be rɛ̌. 26Ha yila hwak e ji bemât fwôm lɔ mo, ha rangal hɛ pyɛ de ya sé té. 27Mwat o a toyo a hɛ, a yâng hɛ, ‘Gwa mō a ga vɛ̄ hɛ, ko da mō a ga yɛrɛ hwêy rɔndɔng de bá gyenges hɛ na he mɔsɔ, yaga gwa mō a ga toyo tyang naka.’

28“Gwa mɛ kunat o a tɛ̀ shom, ko a kyɛ́ ɛ nà yel e lɔ mo. Yaga ano, da mɛ a nusu, a wɔ̀ sɛ̀ ɛ e jey, ko a kyě ha na yɛ, a shonong na yɛ na a yel. 29Ko a toyo a da mɛ mo, a ye, ‘Di! Mwa neshey nemo ma sê bûm ra a hwo fwom sede sam, ko ma ga sang kyɛ́ me nà gyeng pyɛ́ de hwó nɔng me nu na me ra wɛt. Ko mwa ano, hwà ga sang nɔng me kekwey vyel shi wɛt, yaga na me yɛrɛ me ra mɛ̀ jɔgɔ na besa hom. 30Ko jeng de hwey mō, hemo de ha ga wey na pyɛ̂ nedanelɔ mō na bedebeves, ha vɛ̄-hɛ, hwà yɛrɛ a hɛ hwêy rɔndɔng de bá gyenges na he mɔsɔ!’ 31Da mɛ a yang ɛ, ‘À hwey hom, hwà sé tanga me kayɛ jeng, ko kayɛ pyɛ de ma vɔk ya sé myo. 32Ko a jam na wot a ra jɔgɔ, na wot a vɔk yey pyɛng, yaga gwa mō womo á kana ku, ko a to sé kwen a remo; á kana vuru hɛ, ko ba ga to sɛ̀ ɛ.’ ”

Currently Selected:

Luka 15: bomBI

Highlight

Copy